ប្រធានអង្គភាពអ្នកនាំពាក្យរាជរដ្ឋាភិបាលប្រកាសចេញផ្សាយសៀវភៅ«ឃាតកម្មក្រោយខ្នងសម្តេចតេជោ ហ៊ុន សែន»
21-September-2026 / ផ្សេងៗ
ភ្នំពេញ៖ លោក ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានថ្លែងនៅព្រឹកថ្ងៃទី២៤ ខែកញ្ញានេះ ថា «សៀវភៅឃាតកម្មក្រោយខ្នងសម្តេចតេជោ ហ៊ុន សែន» មិនមែនជាសៀវភៅប្រលោមលោកដែលសរសេរថែមថយតាមការស្រមៃទេតែជាកម្រងព្រឹត្តិ ការណ៍សំខាន់ៗ ដែលមានការចូលរួមសរសេរពីសាក្សីរស់ជាធាតុចូលដ៏មានសារៈសំខាន់។
ក្នុងកម្មវិធីសម្ពោធផ្លូវការ និងផ្សព្វផ្សាយ «សៀវភៅឃាតកម្មក្រោយខ្នងសម្តេចតេជោ ហ៊ុន សែន» នៅបណ្ណាល័យហ៊ុនសែនភូមិន្ទភ្នំពេញ លោក ប៉ែន បូណា បានថ្លែងថា សៀវភៅឃាតកម្មក្រោយខ្នងសម្តេចតេជោ ហ៊ុន សែន ជាសៀវភៅមួយដែលចងក្រងអំពីព្រឹត្តិការណ៍សំខាន់មួយកាលពីថ្ងៃទី២៤ ខែកញ្ញា ឆ្នាំ១៩៩៨ នៅខេត្តសៀមរាប ដែលជាពេលវេលាដ៏តក់ស្លុតព្រោះសម្តេចតេជោ ហ៊ុន សែន ត្រូវបានដៃគូប្រកួតប្រជែងលបធ្វើឃាតតាមរយៈការបំផ្ទុះបេ៤០ចំនួន៤គ្រាប់មកលើរថយន្តសម្តេច។«បើគ្មានការចងក្រងសៀវភៅឃាតកម្មក្រោយខ្នងសម្តេចតេជោ ហ៊ុន សែន នោះទេ ព្រឹត្តិការណ៍២៤ កញ្ញា ១៩៩៨ នឹងត្រូវគេបំភ្លេចចោល»។ នេះជាប្រសាសន៍របស់ លោក ប៉ែន បូណា។
ប្រធានអង្គភាពអ្នកនាំពាក្យរាជរដ្ឋាភិបាល បានគូសបញ្ជាក់ថា សៀវភៅឃាតកម្មក្រោយខ្នងសម្តេចតេជោ ហ៊ុន សែន នឹងបកអាក្រាតជនដែលតាំងខ្លួនជាអ្នកប្រជាធិបតេយ្យតែនៅក្រោយឆាកគឺពិសពុល។លោក ប៉ែន បូណា បានលើកឡើងដែរថា សម្តេចតេជោ ហ៊ុន សែន គឺជាថ្នាក់ដឹកនាំដ៏រឹងមាំម្នាក់ដែលធានាសុខសន្តិភាពជូនប្រជាជនបាន មិនតែប៉ុណ្ណោះ សម្តេចតេជោ ហ៊ុន សែន គឺជាថ្នាក់ដឹកនាំដែលមានសមត្ថភាពយកឈ្នះសមរភូមិរហូតដល់១០៥សមរភូមិតាំងពីសម័យខ្មែរក្រហម និងជាបុគ្គលដែលមានសមត្ថភាពកសាងប្រទេសឡើងវិញទោះស្ថិតក្នុងស្ថានភាពលំបាកយ៉ាងណាក៏ដោយ ហើយក៏ជាថ្នាក់ដឹកនាំដែលតែងចូលតុចរចាជាមួយភាគីបរទេស និងខ្មែរដើម្បីបុព្វហេតុជាតិផងដែរ។
លោក ប៉ែន បូណា បញ្ជាក់ដែរថា សៀវភៅឃាតកម្មក្រោយខ្នងសម្តេចតេជោ ហ៊ុន សែន ក៏បានបង្ហាញថាសម្តេចតេជោត្រូវគូប្រកួតប្រជែងប៉ុនប៉ងធ្វើឃាតចំនួន៥ដងតែត្រូវបរាជ័យទាំងអស់។
សូមរំឭកជូនថា កាលថ្ងៃទី២៤ ខែកញ្ញា ឆ្នាំ១៩៩៨ កាលពី ២៦ឆ្នាំមុននេះ នៅខេត្តសៀមរាបសម្តេចតេជោ ហ៊ុន សែន បានរួចផុតពីអំពើប៉ុនប៉ងបាញ់សម្លាប់ ដោយការបញ្ជាបំផ្ទុះគ្រាប់បេ៤០ តាមប្រព័ន្ធចុចពីចម្ងាយ ហើយថ្ងៃទី២៤ ខែកញ្ញា ឆ្នាំ១៩៩៨ គឺជាថ្ងៃជួបជុំគ្នាដំបូងនៃគណបក្សនយោបាយធំៗទាំង៣ ដែលឈ្នះឆ្នោត និងត្រូវបានចាត់ទុកថា ជាថ្ងៃដើម្បីបញ្ចប់វិបត្តិផ្ទៃក្នុង ក្រោយការតវ៉ារបស់គណបក្សចូលរួមបោះឆ្នោតជ្រើសតាំងតំណាងរាស្ត្រនីតិកាលទី២។
សៀវភៅ«ឃាតកម្មក្រោយខ្នង សម្តេចតេជោ ហ៊ុន សែន» ដែលបានរៀបរាប់យ៉ាងច្បាស់លាស់នូវព្រឹត្តិការណ៍បាញ់ប្រហារទៅលើវីរបុរសជាតិ មានកម្រាស់១៦៧ទំព័រ ដែល បាន បោះពុម្ពលើកទី១ ចំនួន២០.៣៩៤ ក្បាល មានសប្បុរសជនជួយឧបត្ថម្ភបោះពុម្ពចំនួន៥៥នាក់ ក្នុងនោះមានវត្តមានសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ចំនួន៥.០០០ក្បាល លោកឧបនាយករដ្ឋមន្ត្រី នេត សាវឿន ១.០០០ក្បាល លោកឧបនាយករដ្ឋមន្ត្រី ស៊ុន ចាន់ថុល ២.៥០០ក្បាល លោកឧកញ៉ា ឃុន សៀ ៥.០០០ក្បាល។ល។
លោកឧត្តមសេនីយ៍ឯក មាស សុខុនអង្គរក្សនិងជាអ្នកបើករថយន្តជូនសម្តេចតេជោហ៊ុនសែន គឺជាប្រធានក្រុមការងារស្រាវជ្រាវនិពន្ធ នៃសៀវភៅ «ឃាតកម្មក្រោយខ្នងសម្តេច តេជោ ហ៊ុន សែន» ។លោកឧត្តមសេនីយ៍ឯក មាស សុខុន បានអំពាវនាវដល់សាធារណជន និងប្រព័ន្ធសារព័ត៌មានផ្សព្វផ្សាយ នូវសៀវភៅ «ឃាតកម្មក្រោយខ្នងសម្តេច តេជោ ហ៊ុន សែន» ឲ្យបានទូលំទូលាយ។
លោកឧត្តមសេនីយ៍ឯក មាស សុខុន បានថ្លែងថា តាងនាមឲ្យប្រធានក្រុមស្រាវជ្រាវនិពន្ធ លោកសូមថ្លែងអំណរគុណនិង ការដឹងគុណយ៉ាងជ្រាលជ្រៅជូនចំពោះ លោក ខៀវ កាញារីទ្ធ តំណាងរាស្ត្រខេត្តកំពង់ចាម លោក អ៊ុក ប្រាថ្នា រដ្ឋលេខាប្រចាំការក្រសួងព័ត៌មាន និង លោក ឆាយ សុផល រដ្ឋលេខាក្រសួងព័ត៌មាន ដែលមានគុណធម៌ទឹកចិត្ត សប្បុរសបានលះបង់ពេលវេលាបញ្ញាស្មារតីដ៏មានគុណតម្លៃជួយពិនិត្យផ្ទៀងផ្ទាត់ ខ្លឹមសារសៀវភៅ «ឃាតកម្មក្រោយខ្នង សម្តេចតេជោ ហ៊ុន សែន» ឲ្យរឹតតែ មានអត្ថរូប អត្ថន័យ អត្ថរសបានល្អប្រសើរថែមទៀត ដើម្បីក្លាយជាឯកសារ ដ៏មានគុណតម្លៃបម្រើដល់ការសិក្សាស្រាវជ្រាវឈ្វេងយល់ទូទៅ។
សូមជម្រាបថា សៀវភៅនេះ ជាស្នាដៃដ៏ល្អ និង មានលក្ខណៈជាប្រវត្តិសាស្ត្រ ដែលបានរៀបរាប់យ៉ាងច្បាស់លាស់នូវព្រឹត្តិការណ៍បាញ់ប្រហារ(ក្នុងខេត្តសៀមរាប) ទៅលើសម្តេចតេជោ ហ៊ុន សែន ដែលជាវីរបុរសជាតិ និង ជាបិតាសន្តិភាពរបស់កម្ពុជា។ហេតុការណ៍បំផ្ទុះគ្រាប់បេ ៤០ កាលពីថ្ងៃទី២៤ ខែកញ្ញា ឆ្នាំ១៩៩៨ កន្លងមកនេះ កើតឡើងនៅកណ្តាលផ្លូវពីសណ្ឋគារគោធ្លកមកព្រះរាជដំណាក់ក្រុងសៀមរាបបណ្តាលឲ្យមានជនរងគ្រោះ ស្លាប់ និងរបួស ប្រជាពលរដ្ឋមួយចំនួន៕
