លោកស៊ូហ្កាក្លាយជាប្រធានគណបក្ស កាន់អំណាចជប៉ុន ដែលនឹងឡើងជំនួសលោក ស៊ីនហ្សូ អាបេ
11-February-2026 / ព័ត៌មានអន្តរជាតិ
ជប៉ុន៖ នៅថ្ងៃច័ន្ទ ទី១៤ ខែកញ្ញាគណបក្សកំពុងកាន់អំណាចរបស់ជប៉ុន បានបោះឆ្នោតជ្រើសរើសយកលោកយ៉ូស្ស៊ីហ៊ីដេស៊ូហ្កា( Yoshihide Suga) ជាមេដឹកនាំថ្មីរបស់ខ្លួន ដែលធ្វើឱ្យលោកអាចឡើងជានាយករដ្ឋមន្ត្រីបន្ទាប់របស់ប្រទេស ជំនួសលោក ស៊ីនហ្សូ អាបេដែលលាលាលែងដោយបញ្ហាសុខភាព ។
លោក Suga ទទួលបានសំឡេង ៣៧៧ ក្នុងចំណោមសន្លឹកឆ្នោតសរុប ៥៣៤ ពីសមាជិកសភាគណបក្សប្រជាធិបតេយ្យសេរី និងអ្នកតំណាងគណបក្សក្នុងតំបន់ ។ គូប្រជែងរបស់លោក គឺអតីតរដ្ឋមន្ត្រីក្រសួងការពារជាតិលោក Shigeru Ishiba បានស្ថិតពីក្រោយយ៉ាងឆ្ងាយ ។ ផ្អែកលើលក្ខន្តិកៈរបស់គណបក្សប្រជាធិបតេយ្យសេរី( LDP) លោក Suga ត្រូវបានគេរំពឹងថា នឹងឈ្នះការបោះឆ្នោតសភា នៅថ្ងៃពុធខាងមុខនេះ ហើយនឹងក្លាយជានាយករដ្ឋមន្ត្រីបន្ទាប់ពីលោក អាបេ ។
ជាទីប្រឹក្សារដ្ឋាភិបាល និងជាអ្នកនាំពាក្យរាជរដ្ឋាភិបាលជប៉ុនដ៏មានឥទ្ធិពលម្នាក់ លោក Suga អាយុ ៧១ ឆ្នាំ ត្រូវបានគេមើលឃើញថា មានសមត្ថភាពលេចធ្លោក្នុងការបន្តគោលនយោបាយរបស់លោក អាបេ«Abenomics» ។ លោកបាននិយាយយ៉ាងជាក់លាក់ថា បេក្ខភាពរបស់លោក ត្រូវបានជម្រុញដោយបំណងប្រាថ្នា ដើម្បីបន្តកម្មវិធីរបស់នាយករដ្ឋមន្ត្រីដែលត្រូវចាកចេញគឺលោក អាបេ ។ លោក Ishiba ដែលមានប្រជាប្រិយភាពពីសាធារណជនជប៉ុន ប៉ុន្តែមិនសូវមាននៅក្នុងគណបក្ស LDP ទេ ដោយទទួលបានសំឡេងគាំទ្រត្រឹមតែ ៦៨ សម្លេងប៉ុណ្ណោះ ជាមួយលោក Kishida ដែលធ្លាប់ត្រូវបានគេចាត់ទុកថា ជាអ្នកស្នងតំណែងពីលោក អាបេ នោះ ទទួលបាន ៨៩ សម្លេង ។
លោក យូស្ហ៊ីហ៊ីដេ ស៊ូហ្កាកើតនៅថ្ងៃទី ៦ ធ្នូ ១៩៤៨ ជាឥស្សរជននយោបាយប្លែកពីសមាជិកបក្សសេរីប្រជាធិបតេយ្យ។ លោក ជាកូនកសិករធ្វើចំការដាំផ្លែស្តូបូរី និងម្តាយជាគ្រូបង្រៀន។ លោក យូស្ហ៊ីហ៊ីដេ ស៊ូហ្កា Yoshihide Suga មានស្រុកកំណើតនៅតំបន់ តូហូគូ ភាគខាងជើងប្រទេស ដែលជាខេត្តក្រីក្រ លំបាកខ្លាំង “ស្រុកទឹកកក”។ លោកជានិម្មិត្តរូបសម្រាប់ប្រជាជនជប៉ុនមួយភាគដែលបន្តគោរពប្រពៃណីបូរាណ។ជាឪពុករបស់កូនបីនាក់ ចូលចិត្តដើរនិងនេសាទ មិនទទួលទានសុរា លោក យូស្ហ៊ីហ៊ីដេ ស៊ូហ្កា មិនសូវបញ្ចេញជីវិតឯកជនទេ ហើយប្រជាពលរដ្ឋជប៉ុនក៏ស្គាល់រូបលោកយ៉ាងតិចតួចបំផុតដែរ។ លោក ទើបលេខមុខខ្លាំង រហូតជាប់ឈ្មោះជា មារបស់រជ្ជកាល Reiwa នៅពេលប្រកាសបើកសករាជថ្មី របស់ព្រះចៅអធិរាជ្យជប៉ុន ណារូហ្ស៊ីតូ។
ក្រោយពីបានបញ្ចប់ការសិក្សាផ្នែកច្បាប់ និងមានជំនក់ចិត្តផ្នែកនយោបាយ ដោយបានជាប់ឆ្នោត ជាក្រុមប្រឹក្សាឃុំសង្កាត់ នៅក្រុងយូកូហាម៉ា នៅឆ្នាំ១៩៨៧។ ៩ឆ្នាំ ក្រោយមកលោក យូស្ហ៊ីហ៊ីដេ ស៊ូហ្កា ក៏បានក្លាយជាសមាជិកសភាម្នាក់នៃក្រុងដ៏ធំមួយនេះ រហូតមកទល់សព្វថ្ងៃ។ជាជំនិតរបស់លោក អាបេ ជាអ្នកផ្តួចផ្តើមរៀបចំឱ្យលោកអាបេ ត្រលប់មកកាន់អំណាចវិញនៅឆ្នាំ២០១២ លោកស៊ូហ្កា បានទទួលការតស្នងមកវិញ ជាមួយនឹងកាត់តួនាទីជាអ្នកនាំពាក្យរដ្ឋាភិបាល និងជាអគ្គលេខាធិការរបស់រដ្ឋាភិបាល (តួនាទីយុទ្ធសាស្ត្រ មិនថាក្នុងផ្នែករដ្ឋបាលនិងជម្រើសនយោបាយឬសេដ្ឋកិច្ចទេ)។
គឺរូបលោក យូស្ហ៊ីហ៊ីដេ ស៊ូហ្កានេះហើយជាស្នូលនៃផែនការផ្តល់សន្ទុះសេដ្ឋកិច្ចជប៉ុន អាបេណូមិច របស់លោកអាបេ។ គឺលោកនេះហើយជាអ្នកផ្តួចផ្តើម បើកចំហនយោបាយទេសចរណ៍ ផ្តល់ទិដ្ឋាការទេសចរណ៍ដល់បណ្តាប្រទេសនៅតំបន់អាស៊ី ពិសេសចិន។ បើតាមទស្សនាវដ្តី Times លោក យូស្ហ៊ីហ៊ីដេ ស៊ូហ្កា បានដើរតួនាទីសំខាន់ណាស់ ក្នុងការទ្រទ្រង់សន្ធិសញ្ញាផ្តោះប្តូរសេរីអន្តរប៉ាស៊ីហ្វិក ក្រោយពីអាមេរិករបស់លោកត្រាំ បានដកខ្លួនចេញនៅឆ្នាំ២០១៧។
ហើយទាក់ទងនឹងនយោបាយការបរទេស លោក យូស្ហ៊ីហ៊ីដេ ស៊ូហ្កា ក៏ទំនងជានឹងបន្តនយោបាយរបស់ស្ហ៊ីនហ្សូអាបេ ដដែល គឺ ប្រកាន់ជំហរតឹងតែងជាមួយចិន តែរក្សាចំណងទំនាក់ទំនងល្អដើម្បីការពារនិងរក្សាប្រយោជន៍សេដ្ឋកិច្ច និងថែថួនឱ្យបានល្អប្រសើរបំផុតសម្ព័ន្ធភាពជាមួយសហរដ្ឋអាមេរិក។
លោកអាបេ ដែលបានបំបែកកំណត់ត្រាជានាយករដ្ឋមន្ត្រី មានរយៈពេលយូរបំផុតរបស់ប្រទេសជប៉ុន មុនពេលលាលែងពីតំណែង ដោយសារមានជំងឺរលាកពោះវៀនធំ បានបដិសេធមិនគាំទ្របេក្ខជនណាមួយឡើយនៅក្នុងការបោះឆ្នោត ។ ក្នុងឋានៈជានាយករដ្ឋមន្ត្រី លោក អាបេ បានប្រឈមនឹងបញ្ហាលំបាកជាច្រើន រួមមាន ការទប់ទល់នឹងជំងឺកូវីដ១៩ ការស្តារសេដ្ឋកិច្ចឡើងវិញរបស់ប្រទេសសេដ្ឋកិច្ចធំលំដាប់ទី៣ នៅលើពិភពលោក ដែលកំពុងមានវិបត្តិ សូម្បីតែមុនពេលមានជំងឺរាតត្បាត ៕
