ប្រទេសថៃអំពាវនាជាថ្មី ឱ្យមានកិច្ចពិភាក្សាជាមួយកម្ពុជា អំពីអណ្តូងប្រេងត្រួតស៊ីគ្នា
21-September-2026 / សេដ្ឋកិច្ច
បាងកក៖ វិទ្យាស្ថានប្រេងកាតថៃ កំពុងជំរុញឱ្យអាជ្ញាធរថាមពល និងអាជ្ញាធរកិច្ចការបរទេសរបស់ប្រទេសថៃ ពិភាក្សាជាមួយកម្ពុជា អំពីផលិតកម្មប្រេងរួមគ្នា នៅក្នុងតំបន់ត្រួតស៊ីគ្នា (OCA) ព្រោះថា មិនទាន់មានវឌ្ឍនភាពលើបញ្ហានេះនៅឡើយ ចាប់តាំងពីដើមឆ្នាំនេះមក។ នេះបើយោងតាមកាសែតបាងកកប៉ុស្តិ៍។ប្រភពពីវិមានរដ្ឋាភិបាលថៃ ដែលសុំមិនបញ្ចេញឈ្មោះថា បន្ទាប់ពីសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ទៅបំពេញទស្សនកិច្ចនៅប្រទេសថៃកាលពីខែកុម្ភៈមក មិនទាន់មានសំណើសុំការពិភាក្សាបន្ថែមនៅឡើយទេ។
បន្ទាប់ពីដំណើរទស្សនកិច្ចនេះ រដ្ឋាភិបាលក្រុងបាងកក និងរដ្ឋាភិបាលក្រុងភ្នំពេញ បានយល់ព្រមបន្តការចរចាអំពីតំបន់ត្រួតស៊ីគ្នា OCA ដែលបានជាប់គាំងចាប់តាំងពីបញ្ហានេះ ត្រូវបានលើកឡើងក្នុងឆ្នាំ២០០១។លោក Kurujit Nakornthap នាយកប្រតិបត្តិនៃវិទ្យាស្ថានប្រេងកាតថៃ ត្រូវបានដកស្រង់សម្ដីដោយកាសែតបាងកកប៉ុស្តិ៍ថា ប្រសិនបើប្រទេសថៃនិងកម្ពុជាធ្វើការរួមគ្នា ដើម្បីធានាឱ្យមានការចរចាប្រកបដោយជោគជ័យ ប្រទេសទាំងពីរនឹងទទួលបានប្រភពថាមពលថ្មីមួយ ដែលអាចផ្តល់សន្តិសុខថាមពលសម្រាប់ប្រទេសទាំងពីរ។
តំបន់ត្រួតស៊ីគ្នា OCA ដែលត្រូវបានទាមទារដោយប្រទេសកម្ពុជានិងថៃ ទំនងជាប្រភពប្រេងថ្មីដោយសារតែទីតាំងនេះ នៅជិតប្លុកឧស្ម័ន Bongkot និង Erawan ក្នុងឈូងសមុទ្រថៃ នេះបើយោងតាមនាយកដ្ឋានឥន្ធនៈរ៉ែរបស់ប្រទេសថៃ។ លោក Kurujit ជឿជាក់ថា ការខ្វែងគំនិតគ្នាលើដែនសមុទ្ររវាងកម្ពុជា និងថៃអាចត្រូវបានដោះស្រាយតាមរយៈការចរចា។កន្លងមក ប្រទេសថៃធ្លាប់មានជម្លោះទឹកដីស្រដៀងគ្នាជាមួយប្រទេសវៀតណាម។ លោកបាននិយាយថា បញ្ហានេះត្រូវបានដោះស្រាយនៅក្នុងខែសីហា ឆ្នាំ១៩៩៧ ដោយត្រួសត្រាយផ្លូវសម្រាប់ការអភិវឌ្ឍផលិតកម្មឧស្ម័ន ក្នុងសមុទ្រប្រាំឆ្នាំក្រោយមក។លោក Kurujit បានមានប្រសាសន៍ថា៖ «ជោគជ័យដូចគ្នាអាចកើតមានឡើង អាស្រ័យលើការប្តេជ្ញាចិត្តរបស់អាជ្ញាធរ ក្នុងការជំរុញឱ្យមានការពិភាក្សាជាមួយប្រទេសកម្ពុជា»។
ឆ្លើយតបទៅនឹងការចង់សហការរួមគ្នាដើម្បីទាញយកផលប្រេងពីតំបន់ត្រួតស៊ីគ្នា លោកកែវ រតនៈ រដ្ឋមន្ត្រីក្រសួងរ៉ែ និងថាមពលបានបញ្ជាក់ប្រាប់វិទ្យុបារាំងអន្តរជាតិRFI នៅព្រឹកថ្ងៃទី១៣ ខែសីហា ឆ្នាំ២០២៤នេះថា កម្ពុជាត្រៀមស្វាគមជានិច្ច សហការជាមួយភាគីថៃ ប្រសិនបើចង់ទាញយកប្រេងពីតំបន់ត្រួតស៊ីគ្នារួមគ្នា ទោះបីការកំណត់ព្រំដែនទឹកនៅមិនទាន់ដោះស្រាយចប់សព្វគ្រប់ក្តី។ តែ មកទល់ពេលនេះ លោករដ្ឋមន្ត្រីបានអះអាងថា ពុំទាន់ឃើញមានការបញ្ជាក់អ្វីជាផ្លូវការពីភាគីថៃនោះទេ។
ចំពោះលោករដ្ឋមន្ត្រីក្រសួងរ៉ែ និងថាមពល អាទិភាពរបស់កម្ពុជានៅចំពោះមុខពេលនេះ គឺការការពារបូរណភាពទឹកដី ចំណែកការចរចាគ្នានៅលើផ្នែកវិនិយោគនឹងត្រូវធ្វើឡើង ជាបន្តបន្ទាប់ និងតាមដំណាក់កាល។ គួរបញ្ជាក់ថា កន្លងមករដ្ឋាភិបាលថៃបានផ្លាស់ប្តូរយុទ្ធសាស្ត្រក្នុងការចរចាជាមួយកម្ពុជា ដើម្បីកំណត់តំបន់ត្រួតស៊ីគ្នាក្នុងដែនសមុទ្រ តាមរយៈការផ្តោតទៅលើការអភិវឌ្ឍធនធានធម្មជាតិរួមគ្នា ជំនួសឱ្យការកំណត់ការបោះបង្គោលព្រំដែនសមុទ្រជាមួយកម្ពុជា។ ប៉ុន្តែអ្វីៗនៅបន្តជាប់គាំងដដែល មិនទាន់មានដំណើរការជាវិជ្ជមានឡើយ។
មន្ត្រីថៃដដែល បានលើកឡើងថា ការអភិវឌ្ឍកន្លែងផលិតប្រេងថ្មីនៅ OCA នឹងមិនត្រូវចំណាយពេលវេលាទេ ព្រោះថៃបានដាក់ហេដ្ឋារចនាសម្ព័ន្ធនៅទីនោះរួចហើយ ពោលគឺចាប់តាំងពីប្រទេសបានរកឃើញកំណប់ប្រេងនៅឈូងសមុទ្រថៃ។គួរបញ្ជាក់ថា ថៃមិនបានអភិវឌ្ឍវិស័យប្រេង និងឧស្ម័នថ្មីអស់រយៈពេលជាង ១៥ ឆ្នាំមកហើយ ដែលបង្កឱ្យមានការព្រួយបារម្ភចំពោះការថយចុះការផ្គត់ផ្គង់ឧស្ម័នក្នុងស្រុក ដែលនឹងបង្ខំឱ្យប្រទេសនេះនាំចូលឧស្ម័នធម្មជាតិពង្រាវ (LNG) បន្ថែមទៀត។ ឧស្ម័នរួមចំណែកប្រមាណ ៦០ ភាគរយ នៃឥន្ធនៈដែលប្រើដើម្បីបង្កើតថាមពលក្នុងប្រទេសថៃ។ ប្រសិនបើការពឹងផ្អែករបស់ថៃលើការនាំចូល LNG កើនឡើង នោះប្រទេសនឹងប្រឈមនឹងបញ្ហាឡើងចុះនៃតម្លៃថាមពលសកល។
តំបន់ទាមទារត្រួតស៊ីគ្នាកម្ពុជា-ថៃ មានទំហំប្រហែល ២៦ ០០០ គីឡូម៉ែត្រការ៉េក្នុងឈូងសមុទ្រថៃ និងត្រូវបានប៉ាន់ប្រមាណពីមុនថា អាចមានកំណប់ឧស្ម័នធម្មជាតិរហូតដល់ ១១ ទ្រីលានហ្វីតគូប ក៏ដូចជាបរិមាណដ៏ច្រើននៃប្រេងកាត។ អនុស្សរណៈនៃការយោគយល់គ្នាឆ្នាំ ២០០១ រវាងថៃ និងកម្ពុជា បានគូសបញ្ជាក់អំពីក្របខណ្ឌដែលបានព្រមព្រៀងដើម្បីដោះស្រាយជម្លោះដែនសមុទ្រ ប៉ុន្តែភាពតានតឹងផ្នែកនយោបាយ និងបញ្ហាជុំវិញការបោះបង្គោលព្រំដែនគោករវាងប្រទេសទាំង២ បានរួមចំណែកធ្វើឱ្យការពិភាក្សាស្ដីពីតំបន់ត្រួតស៊ីគ្នាត្រូវជាប់គាំង៕
