ក្រសួងការពារជាតិថា ភាពស្ងប់ស្ងាត់នៅថ្ងៃទី១៨សីហា បង្ហាញពីភាពបរាជ័យដ៏អាម៉ាស់ជាថ្មីរបស់ក្រុមប្រឆាំងនៅក្រៅប្រទេសចុះសម្រាប់ភ្ញៀវទេសចរណ៍វិញ?
21-September-2026 / ព័ត៌មានជាតិ
ភ្នំពេញ៖ នាយឧត្តមសេនីយ៍ ឈុំ សុជាត រដ្ឋលេខាធិការ និងជាអ្នកនាំពាក្យក្រសួងការពារជាតិ បានចាត់ទុកថា ភាពស្ងប់ស្ងាត់គ្មានបាតុភាពណាមួយនៅថ្ងៃនេះ(ទី១៨សីហា) បង្ហាញពីភាពបរាជ័យដ៏អាម៉ាស់ជាថ្មីរបស់ក្រុមប្រឆាំងជ្រុលនិយមនៅក្រៅប្រទេស ដោយសារតែមិនមានប្រជាពលរដ្ឋ និងយុវជន ចូលរួមតាមការបំផុសបំផុលរបស់ពួកគេឡើយ។
នេះជាការលើករបស់នាយឧត្តមសេនីយ៍ ឈុំ សុជាត តាមរយៈបណ្តាញសង្គមហ្វេសប៊ុក បន្ទាប់ពីស្ថានភាពទូទៅនៅទូទាំងប្រទេសកម្ពុជា រួមទាំងរាជធានីភ្នំពេញ នៅព្រឹកថ្ងៃទី១៨ ខែសីហា ឆ្នាំ២០២៤នេះ មិនមានសកម្មភាពប្រមូលផ្តុំ ឬចលនាណាមួយប្រឆាំងរាជរដ្ឋាភិបាលកម្ពុជាបានកើតឡើង ដូចការបំផុសបំផុលរបស់ក្រុមប្រឆាំងជ្រុលនិយមនោះឡើយ។ ប្រជាពលរដ្ឋនៅតែប្រកបរបរ និងការងារជាធម្មតាក្នុងជីវភាពប្រចាំថ្ងៃ ខណៈដែលនៅតាមដងផ្លូវ និងទីសាធារណៈនានា មានសភាពស្ងប់ស្ងាត់ មិនមានបាតុភាពអ្វីគួរឱ្យកត់សម្គាល់នោះទេ។
នាយឧត្តមសេនីយ៍អ្នកនាំពាក្យ បញ្ជាក់ថា៖ «លទ្ធផលនៅថ្ងៃនេះ បានបង្ហាញឱ្យឃើញអំពីភាពបរាជ័យដ៏អាម៉ាស់ជាថ្មីរបស់ក្រុមប្រឆាំងជ្រុលនិយមនៅក្រៅប្រទេស ដែលតែងមានគំនិតទុច្ចរិតប៉ុនប៉ងផ្តួលរំលំរាជរដ្ឋាភិបាលកម្ពុជា ក្រៅគន្លងប្រជាធិបតេយ្យ ដែលនេះគ្រាន់តែជាក្តីស្រមៃបែបរវើរវាយប៉ុណ្ណោះ ហើយក៏បញ្ជាក់ឱ្យឃើញដែរថា ប្រជាពលរដ្ឋ និងយុវជនខ្មែរមានការយល់ដឹង ពុំបានឆោតល្ងង់ចូលរួម ឬសម្តែងការគាំទ្រទាល់តែសោះ ជាមួយនឹងសកម្មភាពរបស់ពួកគេ»។
បើតាមអ្នកនាំពាក្យក្រសួងការពារជាតិ, ទោះបីជាមិនមានបាតុភាពណាមួយបានកើតឡើង ដូចអ្វីដែលក្រុមឧទ្ទាមបានខិតខំញុះញង់ បំផុសបំផុលក៏ដោយ ក៏កម្លាំងចម្រុះ នៃកងយោធពលខេមរភូមិន្ទ បានត្រៀមខ្លួនជានិច្ច ក្នុងការបង្ការ ទប់ស្កាត់ និងបង្ក្រាបរាល់សកម្មភាពវិទ្ធង្សនាទាំងឡាយ ដែលមានចេតនាពិសពុល ក្នុងការបង្កឱ្យមានចលាចល រំខានដល់ភាពសុខសាន្តរបស់ប្រជាពលរដ្ឋ ធ្វើឱ្យប៉ះពាល់ដល់សន្តិភាព ស្ថិរភាព និងការអភិវឌ្ឍនៃព្រះរាជាណាចក្រកម្ពុជា។លោកសូមសម្តែងការគាំទ្រនូវចំណាត់ការរបស់ សមត្ថកិច្ច និងរាជរដ្ឋាភិបាល ក្នុងការចាប់ខ្លួនមេក្លោង និងជនទាំងឡាយដែលបំផុសបំផុលចលនាណាមួយ ក្នុងគោលដៅផ្តួលរំលំរាជរដ្ឋាភិបាល និងស្នើឱ្យតុលាការចាត់វិធានការផ្លូវច្បាប់ឱ្យបានតឹងរ៉ឹងបំផុត ។
លោកបន្តទៀតថា៖ «សូមបងប្អូនជឿទុកចិត្តលើរាជរដ្ឋាភិបាលកម្ពុជា ដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបាន និងកំពុងដឹកនាំរាជរដ្ឋាភិបាល ក្នុងការថែរក្សាសន្តិភាព ស្ថិរភាព និងកសាងប្រទេសឱ្យមានការរីកចម្រើនជាបន្តបន្ទាប់ ដើម្បីឈានទៅសម្រេចគោលដៅនៅពេលឆាប់ៗខាងមុខ ប្រែក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសចំណូលខ្ពស់នៅឆ្នាំ២០៥០»។
សូមបញ្ជាក់ថាតាំងពីមានការចេញសាររបស់សម្តេចតេជោហ៊ុនសែនប្រធានព្រឺទ្ធសភាអះអាងថាការធ្វើកិច្ចសហប្រតិបត្តិការអភិវឌ្ឍន៍តំបន់ត្រីកោណកម្ពុជាវៀតណាមឡាវដែលខាងខ្មែរដាក់ខេត្ត៤នៅភូមិភាគឥសាន(មានក្រចេះមណ្ឌលគីរីរតនៈគីរីស្ទឹងត្រែង)ថាមិនមានការបាត់បង់ទឹកដីដូចការរិះគន់មកមកក៏កើតមានចលនាវាយប្រហារគ្នាតាមបណ្តាញសង្គមពីប្រទេសនិងក្នុងស្រុករហូតមានទាំងការធ្វើបាតុកម្មនៅប្រទេសកូរ៉េជប៉ុនអូស្ត្រាលីឲ្យរដ្ឋាភិបាលលុបចោលកិច្ចព្រមព្រៀងដែលពួកគេចាត់ទុកថាមាននហានិភ័យនៅពេលក្រោយ។
បន្ទាប់ក្នុងស្រុកក៏មានការចេញមុខមកគាំទ្រសម្តេចតេជោពីកងកម្លាំងប្រដាប់អាវុធទាំងអង្គភាពនិងបុគ្គលមានតាំងពីសម្តេចក្រឡាហោមសខេងអនុប្រធានគណបក្សនិងមានបញ្ចេញសម្ភារៈនិងកម្លាំងត្រៀមសម្រាប់ព្រីទ្ធការថ្ងៃ១៨សីហាដែលថានឹងមានបាតុកម្មទ្រង់ទ្រាយធំ។តែលទ្ធផលគឺសូន្យដូចលោកនាយឧត្តមសេនីយ៍ ឈុំ សុជាតអ្នកនាំពាក្យក្រសួងការពារជាតិនិយាយចឹងគឺគ្មានអាឈឹមណាមួយចេញមុខដូចជំនាន់ឆ្នាំ១៩៩៧ផ្ទុះអាវុធកណ្តាលក្រុងនិងបាតុកម្មឆ្នាំ២០១៣ណោះឡើយ។
ជោគជ័យដូចការអះអាងមែនព្រោះរាជរដ្ឋាភិបាលធ្លាប់បានប្រកាសហើយថាក្នុងតម្លៃណាក៏ដោយក៏ហ៊ានចំណាយដែរដើម្បីការពារសន្តិភាពតែអ្វីដែលត្រូវព្រួយបារម្ភគឺថាចាប់ពីពេលនេះតទៅមិនដឹងថាតើនឹងមានភ្ញៀវទេសចរណ៍ប៉ុន្មានដែលហ៊ានមកលេងស្រុកខ្មែរនោះទេ?។ព្រោះការឃោសនាវាយបកបង្ហាញកម្លាំងនិងអាវុធគគ្រឹកគគ្រេងចឹងតើគេមើលមកស្រុកខ្មែរតាមទម្រង់អី?។ជាក់ស្តែងគ្រាន់តែខ្សែភាពយន្តចិនមួយមានចំណងជើងថាNo more betsធ្វើឲ្យទេសចរណ៍ចិនរាប់សែនលែងហ៊ានមកស្រុកខ្មែរតៅហើយ៕
