អង្គភាពកាសែតមាតុភូមិមិនពេញចិត្តទង្វើបង្កចល្លាចលពីក្រុមជ្រុលនិយម
26-December-2024 / ផ្សេងៗ
ភ្នំពេញ៖អង្គភាពសារព័ត៌មាន គេហទំព័រ មាតុភូមិ www.meatophoum.com បានសង្កេតឃើញថា : ក្នុងរយ:ពេលប៉ុន្មានថ្ងៃចុងក្រោយនេះ រលកនៃស្រមោលបដិវត្តន៍ពណ៌ បាននឹងកំពុងពុះកញ្ជ្រោលកើតឡើងសារជាថ្មីម្តងទៀត ហើយតាមការឃោសនា អូសទាញ ញុះញង់ បញ្ឆេះកំហឹងរបស់ក្រុមមនុស្សខ្មែរមួយចំនួនតូច ដែលមានមូលដ្ឋាននៅក្រៅប្រទេស ។
ពួកជ្រុលនិយមមួយដំបរស្វានេះ បានបំផុស បំផុល អូសទាញ និងញុះញង់ប្រជាពលរដ្ឋ ជាពិសេសក្រុមយុវជនវ័យក្មេងៗអោយនាំគ្នាងើបឈរធ្វើបាតុកម្ម ដើម្បីផ្តួលរំលំរាជរដ្ឋាភិបាលកម្ពុជា ក្រោមឡេះប្រឆាំងតវ៉ា សុំអោយរដ្ឋាភិបាលកម្ពុជា បញ្ឈប់គំរោងអភិវឌ្ឍន៍តំបន់ ត្រីកោណ កម្ពុជា ឡាវ វៀត ណាម ឬហៅកាត់ថា : CLV-DTA ក្នុងគម្រោងនោះ កម្ពុជាមានចំនួន០៤ខេត្ត គឺខេត្ត រតនគិរី ខេត្តមណ្ឌលគិរី ខេត្តក្រចេះ និង ខេត្តស្ទឹងត្រែង ។ ក្រុមជ្រុល និយមមួយដំបរស្វានេះ បានរៀបចំផែនការ មានសេណារី យោយ៉ាងច្បាស់លាស់ តាមខ្សែបណ្តាញរបស់ពួកគេ តាមរយ: ប្រព័ន្ធតេឡេក្រាម និងបណ្តាញសង្គម facebook ធ្វើការឃោសនាបំភ្លៃការពិត បំភ័ន្តសាធារណមតិជាតិ - អន្តរជាតិអំពីគំរោងអភិវឌ្ឍន៍តំបន់ត្រីកោណ CLV នេះថា : រាជរដ្ឋាភិបាលកម្ពុជាបានកាត់ទឹកដី ចំនួន០៤ខេត្ត គឺខេត្ត ក្រចេះ ស្ទឹងត្រែង មណ្ឌលគិរី និងខេត្តរតនគិរី ទៅអោយប្រទេសវៀតណាម សំដៅធ្វើអោយប្រជាពលរដ្ឋមានកំហឹងក្តៅឡើងប្រឆាំងនឹងរាជរដ្ឋាភិបាល ដោយពួកគេបានកំណត់យកថ្ងៃទី១៨ ខែសីហា ឆ្នាំ២០២៤ ខាងមុខនេះ ជាថ្ងៃធ្វើមហាបាតុកម្មទ្រង់ទ្រាយធំ នៅរាជធានីភ្នំពេញ មុខព្រះបរមរាជវាំង ។
អង្គភាពគេហទំព័រ មាតុភូមិ យល់ឃើញថា : ពួកមេដឹកនាំជ្រុលនិយមបី-បួននាក់នេះ បានដឹងច្បាស់ អំពីផែនការរៀបចំរបស់ពួកគេថា:ពិតជាមិនអាចធ្វើទៅរួចទេ ប៉ុន្តែដើម្បីមហិច្ឆតា កេងចំណេញនយោបាយ និងផលប្រយោជន៍ផ្ទាល់ របស់បក្ខ ពួកខ្លួន ពួកគេខិតខំបំផុសបំផុល ញុះញង់ អូសទាញប្រជាពលរដ្ឋស្លូតត្រង់ និងកងកម្លាំងប្រដាប់អាវុធ អោយក្លាហាន ហ៊ានក្រោកឈរប្រឆាំងនឹងមេដឹកនាំ ដូចនៅប្រទេសបង់ក្លាដែស ។ អង្គភាពគេហទំព័រ មាតុភូមិ គឺជាសារព័ត៌មានរបស់ជាតិខ្មែរមួយ ដែលបានចូលរួមចំណែកយ៉ាងសកម្ម បំរើសង្គម និងប្រជាជនកម្ពុជា ចាប់តាំងពីឆ្នាំ១៩៩២មករហូតដល់បច្ចុប្បន្ននេះ ពិតជាបានមើលឃើញច្បាស់ជាក់ស្តែងនូវរាល់សកម្មភាព និងស្ថានការណ៍ វិវឌ្ឃន៍ឥតឈប់ឈរ របស់ប្រទេសកម្ពុជា ក្រោមរបបរាជាធិបតេយ្យ អាស្រ័យធម្មនុញ្ញ អស់រយ:កាលជាង៧អាណត្តិ នៃរដ្ឋសភាជាតិជាបន្តបន្ទាប់ ។
ដូច្នេះ ពួកជ្រុលនិយមមួយដំបរស្វានេះ មិនត្រូវប្រៀបធៀបមេដឹកនាំប្រទេសកម្ពុជា ទៅនឹងមេដឹកនាំ ប្រទេសផ្សេងៗទៀតបានទេ ពីព្រោះមេដឹកនាំប្រទេសកម្ពុជា គឺជាវីរ:ជនស្នេហាជាតិពិតប្រាកដ ឈរការពារជាតិ អធិបតេយ្យ បូរណភាពទឹកដី ហ៊ានធ្វើពលីកម្មគ្រប់ឧបសគ្គ ដើម្បីសង្គ្រោះជាតិ ការពារអាយុជីវិតរបស់ប្រជាជនគ្រប់កាល:ទេស: ដោយមិនរួញរា ឬ រត់ចោលស្រុកម្តងណាទេ ។ ដោយឡែក ចំពោះគម្រោងសហប្រតិបត្តិការអភិវឌ្ឃន៍តំបន់ត្រីកោណ កម្ពុជា ឡាវ វៀតណាម ហៅកាត់ថា : CLV-DTA របស់រាជរដ្ឋាភិ បាលកម្ពុជា ពិតជាមានសារ:សំខាន់ខ្លាំងណាស់ សំរាប់ប្រជាជនកម្ពុជាយើងជាច្រើនវិស័យ ដូចការរៀបរាប់បញ្ជាក់ពីលោកជំទាវ ចម និមល រដ្ឋមន្ត្រីក្រសួងពាណិជ្ជកម្ម នាពេលថ្មីៗនេះ បន្ថែមពីលើការបកស្រាយបំភ្លឺជូនសាធារណ:មតិជាតិ និង អន្តរជាតិរបស់សម្តេចតេជោ ហ៊ុន សែន ប្រធានព្រឹទ្ធសភា ។
អង្គភាពគេហទំព័រ មាតុភូមិ សូមប្រកាសថ្កោលទោសដាច់ អហង្ការ និងប្រឆាំងដាច់ខាតចំពោះក្រុមជ្រុលនិយម មួយដំបរស្វា ដែលធ្វើការឃោសនា អូស ទាញ ញុះញង់ បញ្ឆេះកំហឹង បង្កចលាចល អសន្តិសុខ អស្ថេរភាព ក្នុងគោល បំណងបំផ្លិចបំផ្លាញសមិទ្ធផលជាតិ និងដំណើរការអភិវឌ្ឃន៍តំបន់ត្រីកោណ CLV-DTA នេះ ។ ដូច្នេះសូមបងប្អូនប្រជា ពលរដ្ឋទាំងអស់កុំភាន់ច្រឡំ លង់ជឿការញុះញង់អូសទាញរបស់ក្រុមជ្រុលនិយមមួយក្តាប់តូចនេះ អោយសោះ ព្រោះអាចនាំអោយមានទោសទណ្ឌជាប់ដល់ខ្លួន ។ សូមបងប្អូនរក្សាភាពស្ងៀមស្ងាត់ ជឿទុកចិត្តលើរាជរដ្ឋាភិបាលកម្ពុជា និងបន្តចូលរួមគាំទ្ររាជរដ្ឋាភិបាលកម្ពុជាយើង ដែលដឹកនាំដោយ សម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី នៃ ព្រះរាជាណាចក្រកម្ពុជា ៕
ភ្នំពេញ, ថ្ងៃទី ១៦ ខែសីហា ឆ្នាំ២០២៤អង្គភាពគេហទំព័រ មាតុភូមិ(www.meatophoum.com)
