វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1125 នាក់
ម្សិលមិញ 5168 នាក់
សរុប 16013259 នាក់
សៀមរាប៖ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រចាត់ទុក ព្រឹត្តិការណ៍ “ស្នាមញញឹមនៃកម្ពុជា” នៅមុខប្រាសាទអង្គរវត្តនាព្រឹកថ្ងៃទី១៥ ខែសីហានេះ ថា បានរួមចំណែកក្នុងការ ឆ្លើយតបទៅនឹងយុទ្ធនាការ “ទស្សនាសៀមរាប ឆ្នាំ២០២៤។
សម្តេចកិត្តិសង្គហបណ្ឌិត មានប្រសាសន៍ថា កាលពីអតីតកាលកម្ពុជា ពោរពេញដោយសង្គ្រាម ពុំមានអ្នកណាមានសិទ្ធសេរីភាព រងនូវការកាប់សម្លាប់ បែកបាក់និរាសព្រាត់ប្រាស់គ្រួគ្រួសារ គ្មានទស្នាមញញឹម ។ ប៉ុន្ដែ ព្រឹត្តិការណ៍ថ្ងៃនេះ កើតចេញពីប្រទេសមានសុខសន្តិភាព ទើបមានកម្មវិធី ស្នាមញញឹមនៃកម្ពុជាថ្ងៃនេះ ដែលជាផ្នែកមួយនៃគោលនយោបាយ និងទិសដៅការទស្សនាខេត្តសៀមរាបឆ្នាំ២០២៤ ដែលបានដាក់ចេញដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកាលពីដើមឆ្នាំកន្លងទៅ ដើម្បីជំរុញវិស័យទេសចរណ៍ នៅខេត្តសៀមរាបឲ្យងើបឡើងវិញ បន្ទាប់ពីរងផលប៉ះពាល់ដោយសារជំងឺកូវីដ១៩។
សម្តេចកិត្តិសង្គហបណ្ឌិត ក៏បាន ថ្លែងនូវការកោតសរសើរ វាយតម្លៃខ្ពស់ និងថ្លែងអំណរគុណ ដល់សមាគមសិល្បករខ្មែរ ក៏ដូចជាក្រសួងវប្បធម៌ និងវិចិត្រសិល្ប: ក្រសួងទេសចរណ៍ ក្រសួងកិច្ចការនារី រដ្ឋបាលខេត្តសៀមរាប អាជ្ញាធរជាតិអប្សរា និងសហព័ន្ធ ទេសចរណ៍បានរួមសហការគ្នាយ៉ាងល្អក្នុងការរៀបចំព្រឹត្តិការណ៍ «ស្នាមញញឹមនៃ កម្ពុជា» ដែលបានរួមចំណែក និងឆ្លើយតបទៅនឹងយុទ្ធនាការ “ទស្សនាសៀមរាប ឆ្នាំ២០២៤” របស់រាជរដ្ឋាភិបាលសំដៅលើកស្ទួយវិស័យទេសចរណ៍ក្នុង ខេត្តសៀមរាប។
អ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ បានលើកឡើងថា ព្រឹត្តិការណ៍ ស្នាមញញឹមនៃកម្ពុជា គឺជាការផ្តល់ឱកាសឲ្យសិល្បករ សិល្បការិនីដែលមានឈ្មោះល្បីនៅលើបណ្តាញសង្គម និងអ្នកជំនាញបង្កើតមាតិកាល្អៗមកជួបជុំគ្នានៅលើដែនដីអង្គរដ៏អស្ចារ្យ ដោយមានគោលបំណងរួមគ្នាក្នុងការផលិតមាតិការវីដេអូខ្លីៗ ស្តីអំពីសុជីវធម៌ វប្បធម៌ ប្រពៃណី ទំនៀមទម្លាប់ និងតំបន់ទេសចរណ៍ល្បីៗក្នុងតំបន់អង្គរ ដើម្បីបង្ហាញពីសក្តានុពលទេសចរណ៍វប្បធម៌ ធម្មជាតិរបស់ប្រទេសកម្ពុជាទៅកាន់ពិភពលោក។ស្នាមញញឹមរបស់ខ្មែរគឺជាស្នាមញញឹមមួយមិនមែនមានត្រឹមតែនៅលើផ្ទៃមុខរបស់ជនជាតិខ្មែរមួយរូបមួយរូបនោះឡើយ គឺជាស្នាមញញឹមប្រកបដោយព្រហ្មវិហារធម៌នៃប្រាសាទបាយ័នជាស្នាដៃបុព្វបុរសខ្មែរ បានផ្ដល់ជាមរតកបង្កប់ក្នុងស្នាមញញឹមរបស់កូនខ្មែរគ្រប់ៗជំនាន់ជាបន្តបន្ទាប់ ដែលនេះគឺជាស្នាមញញឹមដ៏ស្រស់ស្រាយរាក់ទាក់ទាក់ទាញដែលពិភពលោកទទួលស្គាល់។
ព្រឹត្តិការណ៍ “ស្នាមញញឹមនៃកម្ពុជា” មានរយៈពេល ៥ថ្ងៃ ចាប់ពីថ្ងៃទី១២-១៦ ខែសីហា ឆ្នាំ២០២៤នេះ ជាកក្តាជំរុញឱ្យមានកំណើនភ្ញៀវទេសចរជាតិ-អន្តរជាតិ ដែលមានបំណងចង់ចូលទស្សនា ក៏ ដូចជាបានសិក្សាឈ្វេងយល់អំពីវប្បធម៌ ប្រពៃណីខ្មែរ អមជាមួយនឹងការផ្ដល់ឱកាសឱ្យភ្ញៀវទេសចរភ្លក់នូវរស់ជាតិម្ហូបខ្មែរដ៏ឈ្ងុយឆ្ញាញ់ និងស្នាមញញឹមរបស់ប្រជាពលរដ្ឋកម្ពុជា ពិសេសប្រជាជនក្នុង
ខេត្តសៀមរាប៕