ប្រជាជនខ្មែរចិនសម្រុកនាំគ្នាទៅវត្តភ្នំសែនកាត់ឆុងតែមេហោរាសាស្ត្រខ្មែរថាកុំជ្រួលច្របល់ពេក!
08-July-2026 / ទេសចរណ៏និងវប្បធម៌
ភ្នំពេញ៖បុណ្យចូលឆ្នាំចិនវៀតណាមនឹងប្រព្រឹត្តទៅចាប់ពីថ្ងៃទី៣១មករា។មុន១ថ្ងៃប្រជាពលរដ្ឋខ្មែរកាត់សែស្រឡាយចិនជាច្រើននាក់ បានសម្រុកទៅធ្វើការកាត់ឆុង តាមប្រពីណៃទំនៀមទំលាប់ដែលមានជាច្រើនឆ្នាំណាស់មកហើយនៅលើព្រះវិហារចិន «តាព្រះចៅ» មានទីតាំងស្ថិតលើរមណីដ្ឋានប្រវត្តិសាស្ត្រវត្តភ្នំ។
ប្រជាពលរដ្ឋដែលអញ្ជើញមកធ្វើការកាត់ឆុងនៅលើព្រះវិហារតាព្រះចៅបានសម្តែង នៅការព្រួយបារម្ភដែលពួកគាត់មានឆ្នាំឆុងតាមជំនឿ ទើបនាំគ្នាមកធ្វើការកាត់ឆុងនិងធ្វើការបួងសួងសុំសេចក្តីសុខ ជាមួយគ្នា ។
តាអាចារ្យ ប្រាក់ សំណាង ប្រចាំការនៅលើព្រវិហារតាព្រះចៅ បានប្រាប់កាសែតថា សម្រាប់ប្រជាពលរដ្ឋដែលអញ្ជើញមកធ្វើការកាត់ឆុងនៅពេលនេះ មានចំនួនច្រើនជាងឆ្នាំមុន ដោយសារតែឆ្នាំមុនប្រជាពលរដ្ឋមានការព្រួយបារម្ភខ្លាំងពីជងឺកូវីដ ដូច្នេះហើយទើបឆ្នាំនេះមានការធូស្រាលបន្តិចទើបមានប្រជាពលរដ្ឋច្រើនមកពីគ្រប់ទិសទីមកធ្វើការកាត់ឆុង និងសុំសេចក្តីសុខសប្បាយទាំងអស់គ្នា។
លោកតា ប្រាក់ សំណាងដែលដុះក្បាលពោះបន្តិចបាន ឲ្យដឹងទៀតថា សម្រាប់ឆ្នាំខាលឆ្នាំនេះឆ្នាំដែលឆុងខ្លាំងជាងគេគឺឆ្នាំវកដែលគេហៅថាឡាក់ឆុងហើយឆ្នាំបន្ទាប់មកទៀតគឺឆ្នាំកុរ និងម្សាញ់?។
ជុំវិញរឿងរ៉ាវមួយនេះសម្រាប់ លោក អ៊ឹម បុរិន្ទ អ្នកហោរាសាស្ត្រខ្មែរ និងជាទីប្រឹក្សាអមគណៈកម្មាធិការជាតិ រៀបចំបុណ្យជាតិ អន្តរជាតិ បានមានប្រសាសន៍បកស្រាយថា៖នៅប៉ុន្មានឆ្នាំចុងក្រោយនេះយើងសង្កេតឃើញហោរាគ្រូទាយ ចិនសែរីកព្រោងព្រាតពេញហ្វេសប៊ុក ផេក វាជាការល្អម្យ៉ាងដែរដែលមានហោរាជាច្រើនដូច្នេះ ព្រោះងាយស្រួលក្នុងការឱ្យគ្រូហោរជួយតម្រង់ទិសការងារអាជីវកម្មខ្លះៗ។តាមករសង្កេតរបស់ខ្ញុំឥឡូវនេះហោរាកាន់ក្បួនចិន ដែលយើងធ្លាប់ហៅថា ចិនសែមានការរីកដុះដាលខ្លាំងជាគេហើយក៏ត្រូវប៉ាន់ជាងគេផង។តាមការសង្កេតក៏បានឃើញថាហោរាខ្មែរ ហោរដែលជាអ្នកស្នងរូប ហៅថាខ្មោ.ចចូលហោរាចូលរូបនិងហោរមួយចំនួនទៀតបានក្លាយខ្លួនជាចិនសែស្ទើរទាំងអស់ទៅហើយ។
នៅប៉ុន្មានថ្ងៃចុងក្រោយនេះគឺជាថ្ងៃជិតដល់ពេលចូលឆ្នាំចិននិងសែនដកជើងធូបស្រាប់តែឮចិនសែខ្លះថាថ្ងៃសែនមិនត្រូវពាក់អាវពណ៌នេះពណ៌នោះគ្រូខ្លះថាហាមពណ៌ក្រហម ពណ៌មាសពណ៌លឿង។ល។ហើយឱ្យពាក់ពណ៌ខ្មៅពណ៍ខៀវ សូម្បីតែរបស់សែនក៏ឱ្យលាភពណ៍ខ្មៅឬខៀវដែរ។ខ្ញុំគិតថាគ្រូច្រើនពេកខ្មែរខ្សែស្រឡាយចិនប្រហែលកំពុងវង្វេងហើយមិនដឹងថាធ្វើអ្វីឱ្យត្រូវនោះឡើយ។សម្រាប់ខ្ញុំសូមជម្រាបបងប្អូនដែលជាខ្មែរសែស្រឡាយចិន(កាត់ចិន)គួរមើលទៅទំនៀមទម្លាប់វិញទើបមិនច្របូកច្របល់។
ប្រពៃណីជនជាតិចិនគឺពណ៌ក្រហមជាពណ៌តំណាងឱ្យជ័យជំនះ ពណ៌ដែលអាចកំចាត់ឧបទ្រព្យទាំងឡាយបានហើយសត្វនៀនក៏ខ្លាចពណ៌ក្រហមនេះដែរ។ដូច្នេះការសែនដកជើងធូបក្ដីសែនចូលឆ្នាំក្ដី ពណ៌ក្រហមជាពណ៌ល្អបំផុតហើយពណ៌លឿងជាពណ៌ផ្កាអង្គារសីលគឺជាដើមឈើដែលជនជាតិចិនមិនអាចអត់បាននៅក្នុងឱកាសចូលឆ្នាំចិន។ដូច្នេះចូរសំឡឹងមេីលទៅទំនៀមទម្លាប់កុំសំឡឹងទៅមេីលហោរាច្រេីនពេកព្រោះពេលនេះជាពិធីបុណ្យប្រពៃណីមិនមែនបុណ្យហោរាទេ។លោក អ៊ឺម បុរិន្ទ អ្នកហោរាសាស្ត្រខ្មែរ
បើទោះបីជាស្ថានភាពកូវីដនៅកម្ពុជាហាក់បានធូរស្រាលបន្តិចតែថ្មីៗនេះ វត្តមាននៃការរកឃើញជំងឺកូវីដបំប្លែងថ្មីអូមីក្រុងកំពុងត្រូវបានរកឃើញជារៀងរាលថ្ងៃ ដែលនេះ ជាអ្វីដែលប្រមុខរាជរដ្ឋាភិបាលក៏ដូចជាក្រសួងសុខាភិបាលកំពុងមានការព្រួយបារម្ភ និងអំពាវនាវឲ្យប្រជាពលរដ្ឋត្រូវចូលរួមបន្តដើម្បីគោរពវិធានរបស់ក្រសួងសុខាភិបាល ដើម្បីកាត់បន្ថយការឆ្លងនៅក្នុងសហគមផងដែរ។ក្រៅពីរឿងងប់ងល់និងកាត់ឆុងប្រជាជនខ្មែរ ជាប់សែស្រឡាយចិនខ្លះទៀតក៏បានត្រៀមខ្លួនបណ្ដើរៗ ការទិញគ្រឿងសំភារៈសំរាប់សែនព្រេនទទួលទេវតាឆ្នាំថ្មី ព្រមទាំងការរៀបចំតុបតែងផ្ទះសម្បែង និងពិធីសែននានា ក្នុងនោះចង់មិនចង់ អ្នកមានជំនឿចង់ដឹងអំពីឆ្នាំរបស់ខ្លួន រាសីឡើង ឬក៏ចុះទើបគាត់នាំគ្នាមកធ្វើពិធីកាត់ឆុងនៅលើវិហារ។
