ឃាត់ខ្លួនបុរស២នាក់ ឃាត់ខ្លួន ក្រោយពួកគាត់ធ្វើតាមបញ្ជារបស់បុរសម្នាក់ទៀត ដែលអះអាងថាខ្លួនគឺជាមន្ត្រីរាជការ និងជាម្ចាស់ការដ្ឋានសំណង់មួយកន្លែង ឲ្យដើរប្រមូលលុយភាស៊ីពីប្រជាពលរដ្ឋក្រីក្រ
21-September-2026 / សន្តិសុខសង្គម
ភ្នំពេញ ៖ នៅ ថ្ងៃទី១១ ខែសីហា ឆ្នាំ២០២៤ កម្លាំងអាជ្ញាធរ និងនគរបាលព្រហ្មទណ្ឌខណ្ឌពោធិ៍សែនជ័យ ក្រោមការបញ្ជាផ្ទាល់ពីលោកអភិបាលខណ្ឌ សក់ ច័ន្ទកញ្ញារិទ្ធ បានធ្វើការឃាត់ខ្លួនបុរស២នាក់ដែលដើរប្រមូលទាលុយពីប្រជាពលរដ្ឋលក់ដូរតាមកញ្ច្រែង កញ្ជើ ល្អី បំពានសារាចរណែនាំរបស់រាជរដ្ឋាភិបាល និង សេចក្ដីណែនាំរបស់រដ្ឋបាលសាលារាជធានីភ្នំពេញ ដែលបានដាក់ចេញក្នុងពេលកន្លងមកដើម្បីកាត់បន្ថយការលំបាកខ្វះខាតរបស់ប្រជាពលរដ្ឋ ។
បុគ្គលទាំង២នាក់ដែលត្រូវឃាត់ខ្លួននេះ ម្នាក់ឈ្មោះថៃ ឈឿន ភេទប្រុស អាយុ៤០ឆ្នាំ មុខរបរបើកបររថយន្ត មានស្រុកកំណើតនៅឃុំប្រាសាទ ស្រុកសន្ទុក ខេត្តកំពង់ធំ និងមានទីលំនៅបច្ចុន្នផ្ទះលេខ១៤ សង្កាត់បឹងព្រលឹត ខណ្ឌ៧មករា រាជធានីភ្នំពេញ ។ ចំណែកម្នាក់ទៀតឈ្មោះចាន់ ម៉េន ភេទប្រុស អាយុ៤៥ឆ្នាំ មុខរបរសន្តិសុខ មានស្រុកកំណើតនៅភូមិបន្លាស្អិត ឃុំច្រេស ស្រុកចន្ទ្រា ខេត្តស្វាយរៀង និងមានទីលំនៅបច្ចុប្បន្នសង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ។
បុគ្គលទាំង២នាក់នេះបានធ្វើសកម្មភាពដើរប្រមូលប្រាក់ភាសុីពីប្រជាពលរដ្ឋក្រីក្រ ដែលជាអ្នករកសុីលក់ដូរតាមតាមកញ្ច្រែង កញ្ជើ ល្អី ជាច្រើនកន្លែង ស្ថិតនៅខាងក្រោយសួនកុមារពោធិ៍ចិនតុង ភូមិតាងួន១ សង្កាត់កាកាប១ ខណ្ឌពោធិ៍សែនជ័យ រយៈពេល៣ថ្ងៃមកហើយ ។ ដោយក្នុងមួយកន្លែងៗយកចាប់ពី៥ពាន់ទៅ១ម៉ឺនរៀល ដែលបានបង្កការក្ដៅក្រហាយពីប្រជាពលរដ្ឋយ៉ាងខ្លាំង ព្រោះតែពួកគាត់លក់ដូរមិនសូវដាច់ផង ហើយក្នុង១ថ្ងៃៗ រកប្រាក់ចំណេញបានតិចតួចប៉ុណ្ណោះ ។
អាជ្ញាធរខណ្ឌបានប្រាប់ឲ្យដឹងបន្តទៀតថា ទង្វើបែបនេះនាំឲ្យប្រជាពលរដ្ឋមានការថ្នាំងថ្នាក់ជាមួយអាជ្ញាធរ ហើយក៏បានបំពានយ៉ាងធ្ងន់ធ្ងរលើសារាចរណែនាំលេខ១១ ស រ របស់រាជរដ្ឋាភិបាល ដែលបានដាក់ចេញកាលពីឆ្នាំ២០១៦« ស្តីពីការលុបការបង់ថ្លៃចំពោះប្រជាពលរដ្ឋលក់ដូរតាមកញ្ច្រែង កញ្ជើ ល្អី »។ ដើម្បីកាត់បន្ថយភាពក្រីក្រនិងទុក្ខលំបាកខ្វះខាតដល់ប្រជាពលរដ្ឋរកសុីតូចតាចបែបនេះ មិនតែប៉ុណ្ណោះដោយអនុវត្តន៍តាមសារាចរណែនាំរបស់រាជរដ្ឋាភិបាលខាងលើនោះ រដ្ឋបាលសាលារាជធានីភ្នំពេញ ។ ក៏បានចេញសេចក្ដីណែនាំមួយផងដែរ «ស្តីពីការមិនប្រមូលចំណូលភាស៊ី និងការបង់ថ្លៃផ្សេងៗ ចំពោះការលក់ដូរតាមកញ្ច្រែង កញ្ជើ ល្អី និងការលក់ដូរចល័តគ្រប់ប្រភេទនៅរាជធានីភ្នំពេញ »។
បុរសទាំង២នាក់បានសារភាពថា កាលពីថ្ងៃទី១០ ខែសីហា ឆ្នាំ២០២៤ ឈ្មោះកែវ វ៉ា ភេទប្រុស អាយុ៤៦ឆ្នាំ មុខរបរជាមន្ត្រីរាជការ បានឲ្យពួកខ្លួនយាមការដ្ឋានសំណង់របស់គាត់ស្ថិតនៅក្នុងភូមិតាងួន១ សង្កាត់កាកាបទី១ ខណ្ឌពោធិ៍សែនជ័យ ។ បន្ទាប់មកឈ្មោះកែវ វ៉ា នោះបានប្រើឲ្យពួកខ្លួនដើរប្រមូលភាសុីពីអ្នកលក់នៅតាមផ្លូវលេខ២០០៦ មុខក្បាលដីរបស់គាត់(ឈ្មោះ កែវ វ៉ា) ដោយយកកន្លែង៥ពាន់ និងកន្លែងខ្លះទៀត១ម៉ឺនរៀល តាមអ្នកលក់តិចឬច្រើន ។
ជនសង្ស័យបានរៀបរាប់បន្តទៀតថា បន្ទាប់ពីប្រមូលបានប្រាក់ភាសុីនោះហើយខ្លួនបានយកទៅប្រគល់ឲ្យឈ្មោះកែវ វ៉ា ជាអ្នកចាត់ចែង ហើយលោកវ៉ាបានដកឲ្យត្រលប់មកវិញ១ម៉ឺនទៅ២ម៉ឺនរៀលប៉ុណ្ណោះ ។ លុះដល់ថ្ងៃទី១១ ខែសីហា ឆ្នាំ២០២៤ ស្រាប់តែកម្លាំងអាជ្ញាធរសមត្ថកិច្ចនគរបាលចុះទៅធ្វើការឃាត់ខ្លួនពួកគាត់ទាំង២នាក់នាំទៅសាកសួរបែបនេះតែម្ដង ។
ដោយឡែករដ្ឋបាលខណ្ឌពោធិ៍សែនជ័យ ក៏បានអំពាវនាវដល់ជនទាំងឡាយណា ដែលកំពុងឆ្លៀតឱកាសលួចលាក់ដើរប្រមូលភាស៊ីពីប្រជាពលរដ្ឋដែលជាអ្នករកស៊ីលក់តាមកញ្ច្រែង កញ្ជើ ល្អី នោះ ឆាប់ដកខ្លួនចេញជាបន្ទាន់ ។ បើមិនដូច្នោះទេ ប្រសិនបើអាជ្ញាធរស្រាវជ្រាវដឹងនោះ និងត្រូវឃាត់ខ្លួនអនុត្តន៍តាមច្បាប់មិនលើកលែងឡើយ ៕
