នាយករដ្ឋមន្ត្រីថៃទៅមើលជនជាតិវៀតណាម៦នាក់ដេកស្លាប់ក្នុងសណ្ឋាគារប្រណីតមួយកណ្តាលក្រុងបាងកក
21-September-2026 / ព័ត៌មានអន្តរជាតិ
ប្រទេសថៃ ៖ មានហេតុការណ៌ភ្ញាក់ផ្អើលកណ្តាលទីក្រុងបាងកកកាលពីថ្ងៃទី១៦ ខែកក្កដា ឆ្នាំ២០២៤ ដោយសារព័ត៌មានថៃរាយការណ៍ថា ជនវៀតណាមចំនួន៦នាក់ ដេកស្លាប់ក្នុងបន្ទប់សណ្ឋាគារប្រណីតនៅតំបន់រ៉ាជប្រាស៊ុង រកឃើញដោយបុគ្គលិកសណ្ឋាគារ ហើយក្នុងចំណោមនោះ សាកស_ព ២នាក់ មានសញ្ជាតិអាមេរិកផងដែរ ។
នៅក្នុងបន្ទប់កើតហេតុ សាកសពជនជាតិវៀតណាមចំនួន៤នាក់ បានស្លាប់នៅបរិវេណតុអាហារ រីឯសាកសព២នាក់ទៀតស្លាប់ក្នុងបន្ទប់សម្រាក ។ ជំហានដំបូង សមត្ថកិច្ចថៃសន្និដ្ឋានថា មូលហេតុនៃការស្លាប់ គឺមានបុគ្គលផ្សេងទៀតលួចដាក់ថ្នាំបំពុលពួកគេក្នុងភេសជ្ជៈ ពីព្រោះគ្មានស្លាកស្នាមការវាយតប់គ្នា ឬអំពើហិង្សាក្នុងបន្ទប់ស្នាក់នៅទេ ។សមត្ថកិច្ចបានបង្ហាញអត្តសញ្ញាណសាកសពជនជាតិវៀតណាមទាំង៦នាក់ រួមមាន ៖
១-អ្នកស្រី SHERINE CHONG អាយុ៥៦ឆ្នាំ សញ្ជាតិអាមេរិក២-លោក HUNG DANG VAN អាយុ៥៥ឆ្នាំ សញ្ជាតិអាមេរិក៣-អ្នកស្រី THI NGUYEN PHUONG LAN អាយុ៤៧ឆ្នាំ សញ្ជាតិវៀតណាម៤-លោក HONG PHAM THANH អាយុ៤៩ឆ្នាំ សញ្ជាតិវៀតណាម៥-លោក DINH TRAN PHU អាយុ៣៧ឆ្នាំ សញ្ជាតិវៀតណាម និង៦-អ្នកស្រី THI NGUYEN PHUONG សញ្ជាតិវៀតណាម ។
លោកឧត្តមសេនីយ៍ឯក ធិទិ ស៊ែងសាវ៉ាង ស្នងការនគរបាលប្រចាំក្រុងបាងកក និយាយថា តាមរយៈការត្រួតពិនិត្យនៅកន្លែងកើតហេតុឃើញថា គ្មានស្លាកស្នាមការវាយតប់គ្នាទេ ហើយជនជាតិវៀតណាមទាំងនេះបានស្លាប់ក្នុងបន្ទប់តែមួយ ។ ពួកគេមានគម្រោង Check out ចេញពីបន្ទប់សណ្ឋាគារ នៅថ្ងៃទី១៦ ខែកក្កដា ឆ្នាំ២០២៤ ព្រមទាំងបានរៀបចំអីវ៉ាន់ដាក់វ៉ាលិសរួចរាល់ហើយ ។ ជំហានបន្ទាប់ សមត្ថកិច្ចនឹងធ្វើការពិសោធន៍សាកសពឱ្យបានលម្អិត និងត្រួតពិនិត្យភស្តុតាងពាក់ព័ន្ធទាំងអស់ ។
បើតាមបុគ្គលិកផ្នែកបោសសម្អាតសណ្ឋាគារខាងលើនិយាយថា ដោយសារសង្ស័យ ខ្លួនក៏មកពិនិត្យនៅបន្ទប់កើតហេតុ ពីព្រោះជនជាតិវៀតណាមទាំងនេះដល់ពេលវេលា Check out ចេញពីបន្ទប់សណ្ឋាគារហើយ ប៉ុន្តែខ្លួនពុំឃើញពួកគេចាកចេញសោះ ។នាយករដ្ឋមន្ត្រីថៃ លោក ស្រេតថា ថាវីស៊ីន ក៏បានធ្វើដំណើរមកកាន់សណ្ឋាគារកើតហេតុនៅតំបន់រ៉ាជប្រាស៊ុង ព្រមជាមួយមន្ត្រីរដ្ឋាភិបាលមួយចំនួនទៀតដើម្បីពិនិត្យករណីយ៍ផ្ទាល់។
លោកនារករដ្ឋមន្ត្រីថៃថ្លែងថា បើពិនិត្យនៅទីតាំងកើតហេតុនេះ គឺគ្មានអំពើប្លន់ទ្រព្យសម្បត្តិ ឬអំពើហិង្សាកើតឡើងទេ ។ ការសន្និដ្ឋានជំហានដំបូង គឺអាស្រ័យលើការពិនិត្យសាកសពទាំងអស់ ព្រមទាំងពិនិត្យភស្តុតាងផ្សេងៗដើម្បីសន្និដ្ឋានថា តើពួកគេបានបរិភោគអ្វីដែរឬទេ? ទោះយ៉ាងណា យើងសូមបញ្ជាក់ថា ហេតុការណ៍នេះពុំពាក់ព័ន្ធនឹងអំពើប្លន់ធ្វើបាបរាងកាយទេ ។លោកនាយករដ្ឋមន្ត្រីថៃបន្តថា បើតាមសន្និដ្ឋានរបស់សមត្ថកិច្ចថា គឺអាចមានជនជាតិវៀតណាមម្នាក់ទៀតពាក់ព័ន្ធនឹងហេតុការណ៍នេះ ហើយសមត្ថកិច្ចពុំទាន់រកឃើញនៅឡើយ ។ ដូច្នេះ វានឹងពុំប៉ះពាល់ដល់វិស័យទេសចរណ៍ប្រទេសថៃទេ ហើយមុននេះ លោកក៏បានជជែកជាមួយមន្ត្រីទូតវៀតណាមរួចហើយ និងបានជម្រាបព័ត៌មាននេះទៅមន្ត្រីទូតវៀតណាម ។ក្រោយមក សមត្ថកិច្ចក៏បានរកឃើញភស្តុតាងបន្ថែមទៀត និងបង្ហាញម្ហូបអាហារនៅលើតុក្នុងបន្ទប់សណ្ឋាគារដែលជនជាតិវៀតណាមទាំងនេះកុម្ម៉ង់មកបរិភោគ ប៉ុន្តែពួកគេពុំទាន់បានបរិភោគអាហារនៅឡើយទេ មុនពេលស្លាប់ ។
តាមការចុះផ្សាយរបស់ Bangkok Post នៅថ្ងៃពុធទី១៧ខែកក្កដាឆ្នាំ២០២៤, ប៉ូលិសថៃជឿជាក់ថា មនុស្ស៦នាក់ ពិតជាត្រូវបានបំពុលស្លាប់ ក្នុងបន្ទប់សណ្ឋាគារលំដាប់ផ្កាយ៥មែន ហើយប៉ូលិសទទួលតម្រុយថា ក្នុងចំណោមនោះ មានស្ត្រីម្នាក់ គឺជាអ្នកដាក់ថ្នាំបំពុល រួចក៏ធ្វើអត្តឃាតតាមក្រោយ។ប៉ូលិសបញ្ជាក់ថា ក្រោយការសាកសួរសាក្សី, ករណីនេះ គឺលាតត្រដាងយ៉ាងច្បាស់ថា មានជាប់ពាក់ព័ន្ធជាមួយរឿងចំពាក់លុយកាក់ ហើយស្ត្រីឈ្មោះ Sherine Chong គឺជាអ្នកដាក់ថ្នាំបំពុលមនុស្ស៥នាក់ទៀត រួចក៏ធ្វើអត្តឃាតតាមក្រោយ។
ក្នុងចំណោមអ្នកទាំង៦ គឺមានម្ចាស់លុយ អ្នកខ្ចី និងអ្នកធានា ហើយបើនិយាយពីទំហំទឹកប្រាក់វិញ គឺមានចំនួន ១០លានបាត (ជិត ២៨០ ០០០ដុល្លារអាមេរិក)។ អគ្គស្នងការរងប៉ូលិសក្រុងបាងកក លោក Noppassin Poonsawat និយាយថា អ្នកទាំង៦ បាន Check in សណ្ឋាគារខុសពេលគ្នា ហើយស្នាក់នៅក្នុងបន្ទប់ចំនួនប្រាំ ពោលគឺបួនបន្ទប់នៅជាន់ទីប្រាំពីរ និងមួយបន្ទប់នៅជាន់ទីប្រាំ។ លុះមកដល់ថ្ងៃចន្ទ Chong បានល្បួងទាំងអស់គ្នាឲ្យមកចូលបន្ទប់លេខ៥០២ នៅជាន់ទីប្រាំ រួចក៏ធ្វើសកម្មភាពតែម្តង។ បច្ចុបន្ននេះ ប៉ូលិសថៃ កំពុងបន្តការស៊ើបអង្កេត ហើយនឹងធ្វើសន្និសីទសារព័ត៌មានជាបន្តបន្ទាប់បើទទួលបានព័ត៌មាន ឬតម្រុយថ្មីៗ៕
