វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4122 នាក់
ម្សិលមិញ 5378 នាក់
សរុប 14083415 នាក់
មីយ៉ាន់ម៉ា៖កាលពីថ្ងៃសៅរ៍ទី៧ធ្នូ ប្រជាជនមីយ៉ាន់ម៉ាច្រើនពាន់នាក់ បានជួបជុំគ្នានៅរដ្ឋធានីណៃពិដាវ ដើម្បីសម្តែងការគាំទ្រ ដល់លោកស្រី អ៊ុងសាន ស៊ូជី ដែល នឹងត្រូវចេញដំណើរទៅកាន់ទីក្រុងឡាអេ ដើម្បីចូលរួមសវនាកា តុលាការអន្តរជាតិនៅថ្ងៃទី១០ធ្នូ ទៅលើពាក្យបណ្តឹង ដែលគេចោទប្រទេសភូមា ពីបទឧក្រិដ្ឋកម្មប្រល័យពូជសាសន៍ ធ្វើទៅលើជនជាតិរ៉ូហ៊ីងយ៉ា។
បាតុករបាននៅលើកបដា មានសរសេរ ថា “ពួកយើងគាំទ្រ ថ្នាក់ដឹកនាំយើងជានិច្ច”។ លោក វិន ស្វេ ប្រជាជនភូមាម្នាក់ បានប្រាប់អ្នកយកព័ត៌មានបារាំង AFP ថា៖ "គេមិនមែនចោទបុគ្គលណាឲ្យចំទេ តែគឺគេបានចោទប្រជាជនភូមាទាំងមូលតែម្តង"។
ប្រទេសហ្កំប៊ីតំណាងឲ្យប្រទេសចំនួន៥៧ នៃក្រុមប្រទេសសហប្រតិបត្តិការអ៊ីស្លាម បានដាក់ពាក្យប្តឹងទៅតុលាការអន្តរជាតិក្រុងឡាអេ ដោយបានចោទរដ្ឋាភិបាល និងកងទ័ពភូមា ពីបទឧក្រិដ្ឋកម្មប្រល័យពូជសាសន៍ ធ្វើទៅលើជនជាតិរ៉ូហ៊ីងយ៉ា។ លោកស្រីអ៊ុងសាន ស៊ូជី ត្រូវធ្វើដំណើរទៅចូលរួមសវនាកាដើម្បីឆ្លើយការពារភូមា ដែលសវនាកានេះ នឹងចាប់ផ្តើមបើកពីថ្ងៃទី១០ ដល់ថ្ងៃទី១២ធ្នូ។
សូមរំលឹកថា នៅរវាងខែសីហា ឆ្នាំ២០១៧ ជនជាតិរ៉ូហ៊ីងយ៉ា ក្នុងរដ្ឋរ៉ាឃីនភាគខាងលិចភូមា ចំនួនប្រមាណ៧សែន៤ម៉ឺននាក់ បានរត់ភៀសខ្លួនទៅកាន់បង់ក្លាដែស បន្ទាប់ពីកងទ័ពភូមា សហការជាមួយកម្លាំងប្រជាជន ចេញប្រតិបត្តិការបណ្តេញ វាយ ចាប់ចង សម្លាប់ និង ដុតផ្ទះទាំងភូមិៗ។ យ៉ាងហោចណាស់ មានជនជាតិរ៉ូហ៊ីងយ៉ា ១ម៉ឺននាក់ត្រូវបានគេសម្លាប់ក្នុងប្រតិបត្តិការនេះ។ យោងតាមអង្គការសិទ្ធិមនុស្ស និងអ្នកជំនាញនៃអង្គការសហប្រជាជាតិ សកម្មភាពហិង្សា រៀបចំដោយកងទ័ពភូមានេះ វាមានទ្រង់ទ្រាយជាការបោសសំអាតពូជសាសន៍ សម្លាប់ ឬបណ្តេញជនជាតិរ៉ូហ៊ីងយ៉ា ដែលជាអ្នកកាន់សាសនាអ៊ីស្លាម ឲ្យអស់ពីដីភូមា។
លោកស្រីអ៊ុងសាន ស៊ូជី បានចេញមុខការពាររដ្ឋាភិបាលនិងកងទ័ពភូមា ថាពុំមានសកម្មភាពប្រល័យពូជសាសន៍នោះទេ។ គោលជំហរនេះ បានធ្វើឲ្យកិត្តិនាម នៃអតីតនិមិត្តរូបអ្នកតស៊ូដើម្បីប្រជាធិបតេយ្យរូបនេះ ធ្លាក់ចុះជាខ្លាំង នៅលើឆាកអន្តរជាតិ។