នាយករដ្ឋមន្ត្រីយោធាប្រាយុទ្ធប្រកាសឈរឈ្មោះជាបេក្ខជននាយករដ្ឋមន្ត្រីសម្រាប់ការបោះឆ្នោតនាថ្ងៃទី១៤ឧសភា
02-May-2023 / ព័ត៌មានអន្តរជាតិ
ថៃឡង់ដ៍៖ លោកនាយករដ្ឋមន្ត្រីថៃប្រាយុទ្ធ ចាន់អូចា ត្រូវបានតែងតាំងជាបេក្ខជននាយករដ្ឋមន្ត្រីសម្រាប់ឈរឈ្មោះឱ្យគេបោះឆ្នោតឡើងវិញសម្រាប់គណបក្សរបស់លោកកាលពីចុងសប្តាហ៍កន្លងទៅ ដើម្បីធ្វើការប្រកួតប្រជែងសម្រាប់ការបោះឆ្នោតជាតិ ដែលគេកំណត់នឹងធ្វើឡើងនៅថ្ងៃទី១៤ខែឧសភា ខាងមុខនេះ។ទីភ្នាក់ងារព័ត៌មានរ៉យទ័របានរាយការណ៍ឱ្យដឹងថា លោកឧត្តមសេនីយ៍ប្រាយុទ្ធ ចាន់អូចា មានអាយុ៦៩ឆ្នាំហើយ លោកបានឈរឈ្មោះជាបេក្ខភាពសម្រាប់ប្រជែងតំណែងនាយករដ្ឋមន្ត្រីឱ្យគណបក្សជាតិថៃរួបរួមគ្នាថ្មី(United Thai Nation Party)ដែលជាគណបក្សលោកបង្កើតផ្ទាល់។
ទោះជាយ៉ាងណាគណបក្សរបស់លោកប្រាយុទ្ធ ចាន់អូចា នឹងត្រូវប្រឈមការប្រកួតប្រជែងខ្លាំងជាមួយនឹងគណបក្សភឿថៃដែលដឹកនាំដោយកូនស្រីអតីតនាយករដ្ឋមន្ត្រីថាក់ស៊ីនស៊ីណាវ៉ាត់ក៏ដូចជាគណបក្សចាស់ផាឡាងប្រជាជាតិរបស់លោកដែលមានលោកប្រាវីតវង្សសូវ៉ាន់ដឹកនាំនិងជាបេក្ខជននាយករដ្ឋមន្ត្រីផងដែរ។លោកឧត្តមសេនីយ៍ប្រាយុទ្ធ ចាន់អូចា បានធ្វើរដ្ឋប្រហារយោធាផ្តួលរំលំរដ្ឋាភិបាលស៊ីវិលលោកស្រី Yingluck Shinawatra ឡើងកាន់អំណាចកាលពីឆ្នាំ២០១៤ក្រោយមកទៀតបានជាប់ការជ្រើសរើសជាមេដឹកនាំស៊ីវិលក្នុងឆ្នាំ២០១៩។
ឧត្តមសេនីយ៍យោធាជើងចាស់រូបនេះរំពឹងថាអាចនឹងឈ្នះមួយក្តារទៀតតាមរយៈការសន្យារបស់ខ្លួនលើការជំរុញឱ្យមានសុខុមាលភាពពលរដ្ឋ រួមទាំងស្ថេរភាពជាតិ ហើយនិងប្តេជ្ញាការពាររាជបល្ល័ង្កជាដើមក្រោមពាក្យស្លោក“យើងស្ម័គ្រចិត្តដើម្បីបំរើអ្នកគ្រប់គ្នា ដើម្បីឱ្យសប្បាយចិត្តតាមដែលអាចធ្វើទៅបាន”។ នៅក្នុងពិធីជួបសមាជិកគណបក្ស លោកប្រាយុទ្ធបានដាក់ចេញនូវខ្សែបន្ទាត់នយោបាយសម្រាប់បេក្ខភាពឈរតាមមណ្ឌលបោះឆ្នោតប្រមាណជា៤០០មណ្ឌល។
ទោះបីជាបែបណាក៏ដោយ លោកមិនភ្លេចរំលឹកថា រដ្ឋាភិបាលបន្ទាប់នឹងនៅតែបន្តធ្វើការងាររបស់ខ្លួនដោយការទទួលខុសត្រូវ ដោយលោកបានលើកឡើងនូវពាក្យជាទិសស្លោកថា “បានធ្វើ កំពុងតែធ្វើ នឹងបន្តធ្វើ”។
លោកប្រាយុទ្ធចាន់អូចា បានលើកឡើងបែបអួតផង និងលើកសរសើរនូវស្នាដៃរបស់ខ្លួនផងប្រាប់ដល់ក្រុមអ្នកគាំទ្របន្ថែមទៀតដែរថា “រឿងដែលសំខាន់បំផុតនោះពោលគឺ ការពារប្រទេស និងការពារស្ថាប័នសំខាន់របស់ជាតិ។ សូមទុកចិត្តលើខ្ញុំចុះ ដូចអស់លោកធ្លាប់ទុកចិត្តកាលពីគ្រាមុនដែរ”។
គួររំលឹកផងដែរថា ការបោះឆ្នោតរបស់ប្រទេសថៃនាគ្រាខាងមុខនេះ អាចបង្ហាញឱ្យឃើញថា មានគូប្រជែងស្វិតស្វាញរវាងក្រុមនយោបាយពីរក្រុម ក្នុងនោះមានក្រុមអ្នកគាំទ្រលទ្ធិប្រជាធិបតេយ្យមួយ និងក្រុមឥស្សរជនចាស់វស្សាមួយ ដែលពីរក្រុមនេះហើយមានឥទ្ធិពលលើឆាកនយោបាយនៅក្នុងប្រជាជាតិអាស៊ីអាគ្នេយ៍អស់រយៈពេលជាច្រើនទសវត្សរ៍កន្លងមកនេះ។ព្រះមហាក្សត្រថៃ Maha Vajiralongkorn បានចេញព្រះរាជក្រឹត្យស្តីពីការរំលាយសភា នេះបើយោងតាមសេចក្តីប្រកាសមួយ ដែលចុះផ្សាយក្នុង Royal Gazette នៅថ្ងៃចន្ទ ទី២០ ខែមីនា ជាការបើកផ្លូវសម្រាប់ការបោះឆ្នោតសកល ដែលនឹងប្រព្រឹត្តទៅនៅក្នុងខែឧសភា។
ព្រះរាជ្យក្រឹត្យដែលបានចេញកាលពីថ្ងៃទី១៧ ខែមីនាកន្លងទៅ បានចូលជាធរមាននៅថ្ងៃចន្ទនេះ។ ច្បាប់រដ្ឋធម្មនុញថៃចែងថា ការបោះឆ្នោតនឹងត្រូវរៀបចំនៅចន្លោះ ៤៥ថ្ងៃ និង៦០ថ្ងៃ ក្រោយរំលាយសភា ដែលនេះមានន័យថា ការបោះឆ្នោតនឹងរៀបចំឡើង នៅចន្លោះថ្ងៃទី៤ និងថ្ងៃទី១៩ ខែឧសភាខាងមុខនេះ។កាលពីសប្តាហ៍មុន លោកនាយករដ្ឋមន្ត្រី Prayut Chan-o-cha បានស្នើសុំព្រះរាជក្រឹត្យ ដើម្បីរំលាយសភាមុនបញ្ចប់អាណត្តិរយៈពេល ៤ឆ្នាំ របស់លោកនៅថ្ងៃទី២៣ ខែឧសភាខាងមុខ។គួរឲ្យដឹងថា ថៃបានរៀបចំការបោះឆ្នោតលើកមុនរបស់ខ្លួន នៅថ្ងៃទី២៤ ខែមីនា ឆ្នាំ២០១៩ ជាការចាប់ផ្តើមអន្តរកាលពីរបបយោធារយៈពេលជិត ៥ឆ្នាំ ឆ្ពោះទៅកាន់រដ្ឋាភិបាលបោះឆ្នោតដោយលទ្ធិប្រជាធិបតេយ្យ។នៅពេលនោះ លោកឧត្តមសេនីយ៍ Prayut មេដឹកនាំរបបសឹក ដែលជាបេក្ខជនមកពីគណបក្ស Palang Pracharat បានឈ្នះឆ្នោតក្លាយជានាយករដ្ឋមន្ត្រីថៃ។
