ទស្សនកិច្ចលោកពូទីនទៅកូរ៉េខាងជើងត្រុវបានចាត់ទុកថាជាទង្វើរំលោភសេចក្តីសម្រេចក្រុមប្រឹក្សាសន្តិសុខអង្គការសហប្រជាជាតិស្តីពីការដាក់ទណ្ឌកម្មកូរ៉េខាងជើង
26-December-2024 / ព័ត៌មានអន្តរជាតិ
រុស្ស៊ីកូរ៉េខាងជើង៖ ប្រធានាធិបតីរុស្ស៉ី លោក វ្ល៉ាឌីមៀ ពូទីន បានសន្យាបង្កើតប្រព័ន្ធពាណិជ្ជកម្ម និងសន្តិសុខជាមួយកូរ៉េខាងជើង ដែលនឹងមិនស្ថិតក្រោមការគ្រប់គ្រងដោយលោកខាងលិចទេ ហើយក៏បានសន្យាដែរថានឹងផ្ដល់ការគាំទ្រឥតងាករេសម្រាប់ទីក្រុងព្យុងយ៉ាង។ នេះបើតាមប្រព័ន្ធផ្សព្វផ្សាយរដ្ឋកូរ៉េខាងជើង ដកស្រង់ចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី១៨ ខែមិថុនា ឆ្នាំ២០២៤។
នៅក្នុងលិខិតមួយដែលត្រូវបានចុះផ្សាយដោយសារព័ត៌មានកូរ៉េខាងជើង Rodong Sinmun មុននឹងរូបលោកត្រូវបំពេញទស្សនកិច្ចទៅកាន់ទីក្រុង ព្យុងយ៉ាង លោក ពូទីន ក៏បានគូសបញ្ជាក់ផងដែរថារុស្ស៉ី និងកូរ៉េខាងជើង បានអភិវឌ្ឍទំនាក់ទំនង និងភាពជាដៃគូបានយ៉ាងល្អប្រសើរអស់រយៈពេលជាង ៧០ឆ្នាំ មកនេះ ផ្អែកលើគោលការណ៍ស្មើភាព ព្រមទាំងគោរព និងជឿទុកចិត្តគ្នាទៅវិញទៅមក។ «យើងនឹងអភិវឌ្ឍយន្តការពាណិជ្ជកម្ម និងការស្រុះស្រួលគ្នាទៅវិញទៅមក ដែលមិនស្ថិត នៅក្រោមគ្រប់គ្រងដោយលោកខាងលិចនោះទេ ហើយរួមដៃគ្នាប្រឆាំងនឹងការរឹតត្បិតឯកតោភគីដោយខុសច្បាប់ទាំងឡាយ។ ព្រមពេលជាមួយគ្នា យើងនឹងកសាងប្រព័ន្ធសន្តិសុខមួយ ប្រកបដោយស្មើភាព និងមិនអាចបំបែកបំបាក់បានក្នុងតំបន់អឺរ៉ាស៊ី»។ នេះជាការគូសបញ្ជាក់របស់លោក ពូទីន។
លោកប្រធានាធិបតីរុស្ស៉ី លោក វ្ល៉ាឌីមៀ ពូទីន នឹងធ្វើទស្សនកិច្ចទៅកាន់ប្រទេសកូរ៉េខាងជើង ជាលើកដំបូងក្នុងពេល ២៤ឆ្នាំ ពីថ្ងៃអង្គារ ទី១៨ ដល់ថ្ងៃពុធ ទី១៩ ខែមិថុនានេះ។ បន្ទាប់ពីកូរ៉េខាងជើង លោក ពូទីន ក៏នឹងធ្វើទស្សនកិច្ចទៅកាន់វៀតណាម ផងដែរពីថ្ងៃទី១៩ ដល់ថ្ងៃទី២០ ខែមិថុនា។ ដំណើរទស្សនកិច្ចរបស់ប្រធានាធិបតីរុស្ស៊ី វ្ល៉ាឌីមៀ ពុទីន ទៅកាន់ទីក្រុងព្យុងយ៉ាង កូរ៉េខាងជើង ត្រូវបានរៀបចំបានយ៉ាងល្អ និងនាំមកនូវលទ្ធផលជាវិជ្ជមាន នេះបើយោងតាមសេចក្តីរាយការណ៍ដោយទីភ្នាក់ងារព័ត៌មានរដ្ឋ TASS របស់រុស្ស៊ី កាលពីដើមសប្តាហ៍ ។ ដំណើរទស្សនកិច្ចរបស់ប្រមុខដឹកនាំរុស្ស៊ី ទៅកាន់ទីក្រុងព្យុងយ៉ាង បានធ្វើឡើងមុននឹងបន្តដំណើរទៅកាន់រដ្ឋធានីហាណូយ ប្រទេសវៀតណាម នៅថ្ងៃទី ១៩ និង ២០ ខែមិថុនា ក្នុងសប្តាហ៍នេះ ។
រំឮកពីសង្គ្រាមនៅអ៊ុយក្រែន មជ្ឈដ្ឋានអន្តរជាតិជាច្រើន រួមមាន មន្ត្រីនៅទីក្រុងវ៉ាស៊ីនតោន ក្រុងសេអ៊ូល និងក្រុងគីវ ក៏ដូចជាអ្នកជំនាញឯករាជ្យ និងក្រុមអ្នកឃ្លាំមើលរបស់អង្គការសហប្រជាជាតិ បានចោទប្រកាន់រុស្ស៊ី ថាបានប្រើប្រាស់មីស៊ីល និងកាំភ្លើងធំផលិតដោយកូរ៉េខាងជើង យកទៅវាយប្រហារគោលដៅនានា នៅក្នុងប្រទេសអ៊ុយក្រែន ។យោងតាមរបាយការណ៍ថ្មីមួយរបស់កាសែតរុស្ស៊ី វ៉េដូម៉ូស្ទី (Vedomosti) បានឱ្យដឹងថា លោកពុទីន និងមេដឹកនាំកូរ៉េខាងជើង លោក គីម ជុងអ៊ុន អាចនឹងពិភាក្សាចំពោះលទ្ធភាពដែលរុស្ស៊ីអាចនាំយកពលករចំណាកស្រុកពីកូរ៉េខាងជើង ទៅធ្វើការនៅប្រទេសរុស្ស៊ី ព្រោះតែបច្ចុប្បន្ន រុស្ស៊ី កំពុងតែខ្វះខាតកម្លាំងពលកម្មយ៉ាងធ្ងន់ធ្ងរ ដោយសារតែសង្គ្រាមនៅអ៊ុយក្រែន ខណៈពលរដ្ឋជាបុរសជាតិរុស្ស៊ីរាប់សែននាក់ បានចេញទៅប្រយុទ្ធ ឬភៀសខ្លួនទៅក្រៅប្រទេស ដើម្បីគេចចេញពីកំណែនទ័ពឱ្យចូលរួមធ្វើសង្គ្រាម ។
គួររំឮកថា កាលពីខែកញ្ញាឆ្នាំមុន លោក ពុទីន បានទៅបំពេញទស្សនកិច្ចនៅកូរ៉េខាងជើង តបតាមការអញ្ជើញរបស់លោកគីម ជុងអ៊ុន ដោយធ្វើឱ្យសហរដ្ឋអាម៉េរិក មានក្តីព្រួយបារម្ភថា ទំនាក់ទំនងមូស្គូ-ព្យុងយ៉ាង នឹងជួយឱ្យលោកគីម ទទួលបានបច្ចេកវិទ្យាពីរុស្ស៊ីបន្ថែមទៀត ដែលអាចជួយជំរុញប្រតិបត្តិការយោធានៅអ៊ុយក្រែន ។ ស្របពេលដំណើរទស្សនកិច្ចដំបូងរបស់លោក ពុទីន ទៅកាន់កូរ៉េខាងជើង ធ្វើឡើងនៅក្នុងឆ្នាំ ២០០០ ជាឆ្នាំដំបូងដែលលោកពុទីន ចូលកាន់តំណែងជាប្រធានាធិបតីរុស្ស៊ី។
ទស្សនកិច្ចរបស់ប្រមុខរដ្ឋរុស្ស៊ី លោកពូទីននៅកូរ៉េខាងជើងធ្វើឡើងនៅ៩ខែក្រោយ ដែលមេដឹកនាំកូរ៉េខាងជើង លោកគីម ជុងអ៊ុនបានធ្វើដំណើរទៅទស្សនាមូលដ្ឋានអវកាសរុស្ស៊ី Vostotchny នៅក្នុងគោលបំណងចង់បានជំនួយបច្ចេកវិទ្យាពីរុស្ស៊ីដើម្បីផលិតអភិវឌ្ឍម៊ីស៊ីល និងផ្កាយរណបចារកម្មរបស់កូរ៉េខាងជើង។នៅពេលចូលកាន់តំណែងជាប្រធានាធិបតីរុស្ស៊ីជាលើកដំបូង លោកពូទីន ធ្លាប់ទស្សនកិច្ចលើកទី១ នៅព្យុងយ៉ាង នៅឆ្នាំ ២០០០ និងទទួលបានការរាក់ទាក់ពីអគ្គមគ្គុទេសក៍កូរ៉េខាងជើង លោកគីម ជុងអ៊ីល ដែលជាឪពុករបស់លោកគីម ជុងអ៊ុន។បន្ថែមពីលើការពង្រឹងមិត្តភាពក្នុងកាលៈទេសៈដែលប្រទេសទាំងពីរដែលជាប់ទណ្ឌកម្មច្រើនជាងគេបំផុតក្នុងលោក កូរ៉េខាងជើង និង រុស្ស៊ីនៅត្រូវការគ្នាទៅវិញ ទៅមក នៅក្នុងការផ្គត់ផ្គង់ និងធានាសន្តិសុខ។
បើតាមលោក Sergei Markov មនុស្សជំនិតរបស់លោកពូទីន រុស្ស៊ីត្រូវការសព្វាវុធបន្ថែមពីកូរ៉េខាងជើង ពលករ ព្រមទាំងអ្នកស្ម័គ្រចិត្តកូរ៉េខាងជើងនៅក្នុងសមរភូមិប្រយុទ្ធអ៊ុយក្រែន។ ពីចំណែករបស់កូរ៉េខាងជើង ព្យុងយ៉ាងចង់បានផលិតផលរបស់រុស្ស៊ី ស្បៀងអាហារ និងជំនួយបច្ចេកវិទ្យារបស់រុស្ស៊ីសម្រាប់គោលដៅយោធា ដូចជាកម្មវិធីផលិតមីស៊ីលចម្ងាយឆ្ងាយ ដែលគេជឿថា កូរ៉េខាងជើងត្រូវការចាំបាច់ដើម្បីអាចវាយប្រហារដល់ដីអាមេរិក។
ប្រទេសនៅក្នុងតំបន់ ដូចជាកូរ៉េខាងត្បូង ជប៉ុន និងក្រុមប្រទេសលោកខាងលិចបានតាមដានទស្សនកិច្ចរបស់លោកពូទីន នៅកូរ៉េខាងជើង និងចាត់ទុកការពង្រឹងសម្ព័ន្ធភាព រុស្ស៊ី កូរ៉េខាងជើងថា ជាការគំរាមកំហែង និងគ្រោះថ្នាក់។ចំពោះអគ្គលេខាធិការអង្គការអូតង់ ទស្សនកិច្ចរបស់លោកពូទីននៅកូរ៉េខាងជើងស្តែងឲ្យឃើញថា រុស្ស៊ីដែលជាសមាជិកអចិន្ត្រៃយ៍របស់ក្រុមប្រឹក្សាសន្តិសុខ បានរំលោភសេចក្តីសម្រេចចិត្តរបស់ក្រុមប្រឹក្សាដែលចែងពីការដាក់ទណ្ឌកម្មលើកូរ៉េខាងជើង។ នៅខែមីនាកន្លងទៅ លោកពូទីនបានផ្តល់អំណោយដល់មេដឹកនាំកូរ៉េខាងជើង តាមរយៈការលើកដៃវេតូប្រឆាំងនឹងគម្រោងសេចក្តីសម្រេចចិត្តរបស់ក្រុមប្រឹក្សាសន្តិសុខស្តីពីការពន្យារបេសកកម្មរបស់គណៈកម្មាធិការការអនុវត្តទណ្ឌកម្មលើកូរ៉េខាងជើង។
អឺរ៉ុបផ្ទាល់ដែលឃើញ ភ្លើងសង្គ្រាមរុស្ស៊ីឈ្លានពាននៅជាប់មាត់របងរបស់ខ្លួន កាន់តែព្រួយបារម្ភដែលឃើញរុស្ស៊ីបង្កើនទំនាក់ទំនងជិតស្និទ្ធជាមួយ កូរ៉េខាងជើង ដែលអឺរ៉ុបបានចោទប្រកាន់ថា បានបញ្ចេញអាវុធគ្រាប់ផ្ទុះ គ្រាប់ប្លោងរាប់លានគ្រាប់ ពីក្នុងឃ្លាំងរបស់ខ្លួនដើម្បីបញ្ជូនទៅឲ្យរុស្ស៊ីយកទៅវាយប្រហារអ៊ុយក្រែន។ នៅសប្តាហ៍មុន មន្ទីបញ្ចកោនបានចោទប្រកាន់រុស្ស៊ីថា បានប្រើមីស៊ីលបាលីស្ទិកកូរ៉េខាងជើង ក្នុងសង្គ្រាមអ៊ុយក្រែន។
នៅសេតវិមាន អ្នកនាំពាក្យរបស់ក្រុមប្រឹក្សាសន្តិសុខជាតិ លោកJohn Kirby និយាយថា គេដឹងរួចទៅហើយថា នៅក្នុងទំនាក់ទំនងស្អិតល្មួតជាមួយកូរ៉េខាងជើង រុស្ស៊ីបានទទួលគ្រាប់ សព្វាវុធដើម្បីធ្វើសង្គ្រាមឈ្លានពានអ៊ុយក្រែន។ ប៉ុន្តែ អ្វីដែលធ្វើឲ្យគេរឹតតែព្រួយបារម្ភ គឺការខិតចូលជិតគ្នារវាងកូរ៉េខាងជើង និងរុស្ស៊ីនៅក្នុងការផ្ទេរបច្ចេកវិទ្យា និងការសហការសន្តិសុខរវាងមហាអំណាចនុយក្លេអ៊ែរទាំងពីរនឹងធ្វើឲ្យប៉ះពាល់ដល់សន្តិសុខនៅឧបទ្វីបកូរ៉េ និងក្នុងតំបន់៕
