ប្រទេសភាគច្រើនក្នុងកិច្ចប្រជុំកំពូលសន្តិភាពអ៊ុយក្រែន បង្ហាញការគាំទ្រលើសេចក្តីប្រកាសរួមបញ្ហាសំខាន់គេយកចិត្តតុកដាក់រឿងនុយក្លេអែរ
06-August-2026 / ព័ត៌មានអន្តរជាតិ
ស្វីស៖ កិច្ចប្រជុំកំពូលស្តីពីសន្តិភាពអ៊ុយក្រែន ក្នុងរយៈពេលពីរថ្ងៃ ស្ថិតនៅលើទឹកដីរបស់ប្រទេសស្វីស ទើបតែបានបិទបញ្ចប់កាលពីថ្ងៃអាទិត្យ ដោយសម្រេចបាននូវសេចក្តីប្រកាសរួមមួយដែលមានការចុះហត្ថលេខាគាំទ្រពីបណ្តាប្រទេសអ្នកចូលរួមភាគច្រើន ជាមួយនឹងការគាំទ្រទៅលើផែនការសន្តិភាពរបស់រដ្ឋាភិបាលក្រុងគីវ រួមទាំងកិច្ចគាំពារឯករាជ្យភាព អធិបតេយ្យភាព និងបូរណភាពទឹកដីរបស់អ៊ុយក្រែន។
ថ្លែងនៅក្នុងសុន្ទរកថាបិទអង្គប្រជុំកាលពីចុងសប្តាហ៍ ប្រធានាធីបតីស្វីស លោកស្រី វីអូឡា អាមហឺ (Viola Amherd) បានបញ្ជាក់ថា ខ្លឹមសារសេចក្តីប្រកាសរួមនៃកិច្ចប្រជុំកំពូលសន្តិភាពអ៊ុយក្រែន បានបង្ហាញជំហរប្រឆាំងនឹងការគំរាមកំហែងផ្នែកអាវុធនុយក្លេអ៊ែរ និងជំរុញទាមទារឱ្យមានការធានាសុវត្ថិភាពឡើងវិញ សម្រាប់នាវាដឹកជញ្ជូនទំនិញនៅតាមតំបន់ច្រកសមុទ្រខ្មៅ រួមទាំងច្រកសមុទ្រ Azov និងទាមទារឱ្យមានការបញ្ជូនកុមារអ៊ុយក្រែន ដែលត្រូវរុស្ស៊ីចាប់យកដោយខុសច្បាប់ ត្រឡប់មកវិញ ។
បន្ថែមពីនេះ លោកស្រីក៏បានថ្លែងទទួលស្គាល់អំពីសារៈសំខាន់នៃការចូលរួមរបស់ប្រទេសរុស្ស៊ី នៅក្នុងកិច្ចប្រជុំពាក់ព័ន្ធដទៃទៀតនៅថ្ងៃអនាគត និងអំពាវនាវឱ្យពិភពលោកចូលរួមគោរពតាមគោលការណ៍ធម្មនុញ្ញអង្គការសហប្រជាជាតិ ដើម្បីជាកិច្ចគាំពារដល់ស្ថិរភាពនិងសន្តិសុខសកល។
ដោយឡែក សម្រាប់ប្រធានាធិបតីអ៊ុយក្រែន Volodymyr Zelenskiy ឯណោះវិញ បានបង្ហាញការដឹងគុណនិងកោតសរសើរចំពោះការចូលរួមគាំទ្ររបស់សហគមន៍អន្តរជាតិ មកលើអ៊ុយក្រែន ដោយលោកបានចាត់ទុកសកម្មភាពនេះ ថាជាការចូលរួមពង្រឹងនិងស្តារឡើងវិញនូវគោលការណ៍ច្បាប់អន្តរជាតិ។
នៅក្នុងឱកាសកិច្ចប្រជុំកំពូលនេះ ក្រុមប្រទេសសម្ព័ន្ធមិត្តលោកខាងលិចសំខាន់ៗ ដូចជា អ៊ីតាលីនិងអាឡឺម៉ង់ បាននាំគ្នារិះគន់ទៅលើលក្ខខណ្ឌសន្តិភាពរបស់មេដឹកនាំរុស្ស៊ី គឺលោកពុទីន ដែលបានដាក់ការទាមទារឱ្យអ៊ុយក្រែន ដកទ័ពចេញពីតំបន់ចំនួន៤ ស្ថិតនៅភាគខាងកើតអ៊ុយក្រែន ដែលរុស្ស៊ីបានកាត់យកកាលពីចុងឆ្នាំ ២០២២ ដោយរួមមានតំបន់ Donetsk, Kherson, Luhansk និង Zaporizhzhia ជាថ្នូរនឹងការបញ្ចប់ប្រតិបត្តិការសឹករបស់រុស្ស៊ីនៅអ៊ុយក្រែន ។
ក្រុមប្រទេសមហាអំណាចលោកខាងលិច និងសម្ព័ន្ធមិត្តរបស់ពួកគេ នៅឯកិច្ចប្រជុំកំពូលមួយ ស្តីពីសន្តិភាពអ៊ុយក្រែន ដែលប្រារព្ធឡើងនៅប្រទេសស្វីស បានថ្កោសទោសការឈ្លានពានរបស់រុស្ស៉ីលើអ៊ុយក្រែន ក៏ប៉ុន្តែពួកគេមិនអាចបញ្ចុះបញ្ចូល ប្រទេសធំៗដែលមិនចូលបក្សសម្ព័ន្ធ ឱ្យចូលរួមផ្តល់ហត្ថលេខា លើសេចក្តីថ្លែងការណ៍រួមចុងក្រោយ នៃកិច្ចប្រជុំនោះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃចន្ទ ទី១៧ ខែមិថុនា ឆ្នាំ២០២៤។
សូមបញ្ជាក់ថាមានប្រទេសប្រមាណជា៩០ បានមកចូលរួមក្នុងកិច្ចពិភាក្សារយៈពេល២ថ្ងៃខាងលើ ក្រោមការអញ្ជើញរបស់ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី។ ស្របពេលដែលកិច្ចប្រជុំនោះ ត្រូវបានហៅថា «កិច្ចប្រជុំកំពូលសន្តិភាព» ប្រទេសរុស្ស៉ី ដែលជាភាគីជម្លោះផ្ទាល់ក្នុងសង្គ្រាម មិនត្រូវបានគេអញ្ជើញឱ្យចូលរួមឡើយ។ រុស្ស៉ីដែលមិនត្រូវបានអញ្ជើញឲ្យចូលរួមបានរិះគន់កិច្ចប្រជុំសន្តិភាពនេះពីចម្ងាយថា ជាការខ្ជះខ្ជាយពេលវេលាឥតប្រយោជន៍ ដែលនឹងមិនទទួលបានលទ្ធផលជាសាច់ការអ្វីនោះទេ។
ចិន ដែលជាកំពូលមហាអំណាចមួយរបស់ពិភពលោក ក្នុងការមិនចូលរួម ត្រូវបានគេមើលឃើញរួចទៅហើយថា គឺជាសញ្ញាមួយដែលឱ្យតំរុយថា កិច្ចប្រជុំកំពូលនោះ មុខជានឹងបរាជ័យមិនខាន ក្នុងការសម្រេចគោលបំណងរបស់អ៊ុយក្រែន ដែលចង់បញ្ចុះបញ្ចូលប្រទេសធំៗមកពី «ក្រុមលោកខាងត្បូង» ឱ្យចូលរួម ក្នុងកិច្ចប្រឹងប្រែងធ្វើឱ្យរុស្ស៉ីនៅឯកោ។ប្រេស៉ីលដែលជាប្រទេសធំមួយ ប្រចាំតំបន់អាមេរិកឡាទីន បានចូលរួមក្នុងនាមត្រឹមជា «អ្នកសង្កេតការណ៍» ប៉ុណ្ណោះ ហើយនៅទីបំផុត ប្រទេសដូចជា ឥណ្ឌា ឥណ្ឌូណេស៉ី ម៉ិកស៉ិក អារ៉ាប៊ីសាអូឌីត អាហ្វ្រិកខាងត្បូង ថៃ និងអេមីរ៉ាតអារ៉ាប់រួម ជាដើម សុទ្ធតែបានសម្រេចចិត្តមិនចុះហត្ថលេខា លើសេចក្តីថ្លែងការណ៍រួមឡើយ ទោះបីពួកគេបានទៅចូលរួមកិច្ចប្រជុំក៏ដោយ។
គួរបញ្ជាក់ថា សេចក្តីថ្លែងការណ៍រួម នៃកិច្ចប្រជុំកំពូលនៅប្រទេសស្វីស អំពាវនាវឱ្យមានរុស្ស៉ីប្រគល់ រោងចក្រថាមពលនុយក្លេអ៊ែរ Zaporizhzhia មកឱ្យអ៊ុយក្រែន គ្រប់គ្រងវិញ, ធានាការផលិតនិងផ្គត់ផ្គង់ដោយគ្មានការរំខាន នៃផលិតផលកសិកម្មនៅអ៊ុយក្រែន, ធានាការចេញ-ចូលពេញលេញ នៅតាមកំពង់ផែជាប់សមុទ្រខ្មៅ និងសមុទ្រ Azov, ដោះលែងអ្នកទោសសង្គ្រាមទាំងអស់ ហើយបញ្ជូនកុមារអ៊ុយក្រែនទាំងអស់ ត្រឡប់មកប្រទេសពួកគេវិញ ក្នុងចំណោមចំណុចផ្សេងៗទៀត។សេចក្តីថ្លែងការណ៍ខាងលើ បានកំណត់ថា បូរណភាពទឹកដីនិងអធិបតេយ្យរបស់អ៊ុយក្រែន ចាំបាច់ត្រូវតែជាមូលដ្ឋានគ្រឹះនៃកិច្ចព្រមព្រៀងសន្តិភាព ណាមួយ។ សេចក្តីថ្លែងការណ៍នោះ ក៏បានប្រកាសដែរថា គំរាមកំហែង ឬការប្រើប្រាស់ណាមួយ នៃអាវុធនុយក្លេអ៊ែរ ក្នុងបរិបទនៃសង្គ្រាមអ៊ុយក្រែនប្រឆាំងអ៊ុយក្រែន គឺជារឿងមិនអាចអត់ឱនឱ្យបាន ហើយការវាយប្រហារលើកប៉ាល់ និងកំពង់ផែស៉ីវិល គឺជាទង្វើមិនអាចទទួលយកបាន៕
