ប្រធានាធិបតីអ៊ីរ៉ង់ អេប្រាហ៊ីម រ៉ៃស៊ីអ្នកអាចស្នងតំណែងមគុទេសន៍សាសនាកំពូលអ៊ីរ៉ង់ ធ្លាក់ឧទ្ធម្ភាគចក្រស្លាប់
21-September-2026 / ព័ត៌មានអន្តរជាតិ
លោកប្រធានាធិបតីអ៊ីរ៉ង់ អេប្រាហ៊ីម រ៉ៃស៊ី និងលោករដ្ឋមន្ត្រីការបរទេសអ៊ីរ៉ង់ បានស្លាប់នៅក្នុងគ្រោះថ្នាក់ធ្លាក់ឧទ្ធម្ភាចក្រ កាលពីល្ងាចថ្ងៃអាទិត្យទី១៩ឧសភា។ ទីភ្នាក់ងារព័ត៌មានអ៊ីរ៉ង់ Irna ព្រមទាំងទូរទស្សន៍ជាតិអ៊ីរ៉ង់បានឲ្យដឹងថា៖ គ្រោះថ្នាក់ធ្លាក់ឧទ្ធម្ភាគចក្រ បានកើតឡើងកាលពីល្ងាចថ្ងៃអាទិត្យទី១៩ឧសភា នៅតំបន់ភាគពាយ័ព្យ ក្បែរព្រំដែនរវាងអ៊ីរ៉ង់ និងអាស៊ែបៃហ្សង់។ មានឧទ្ធម្ភាគចក្រ តែមួយគ្រឿងក្នុងចំនៅម៣គ្រឿង ដែលបានជួបគ្រោះថ្នាក់ធ្លាក់។
ឧទ្ធម្ភាគចក្រទាំង៣គ្រឿងនេះ ដឹកគណៈប្រតិភូរបស់លោកប្រធានាធិបតីអ៊ីរ៉ង់ អេប្រាហ៊ីម រ៉ៃស៊ី ត្រលប់មកពីចូលរួមពិធីសម្ពោធទំនប់ទឹកមួយនៅអាស៊ែបៃហ្សង់ ដោយមានវត្តមានលោកប្រធានាធិបតីអាស៊ែបៃហ្សង់ អ៊ីឡាំ អាលីយេវ ចូលរួមដែរ។ឧទ្ធម្ភាគចក្រ ដែលធ្លាក់ ជាប្រភេទ Bell 212 ដឹកមនុស្សសរុប៩នាក់ ក្នុងនោះគឺមានលោក ប្រធានាធិបតីអ៊ីរ៉ង់ អេប្រាហ៊ីម រ៉ៃស៊ី លោករដ្ឋមន្ត្រីការបរទេសអ៊ីរ៉ង់ ហ៊ូសេន អាមៀរ អាប់ឌុលឡាយ៉ាន អភិបាលខេត្តភាគពាយ័ព្យអ៊ីរ៉ង់ម្នាក់ អ៊ីម៉ាំអ៊ីស្លាមសំខាន់ម្នាក់នៅតំបន់នោះ មេកងអង្គរក្សសន្តិសុខលោកប្រធានាធិបតី និងអ្នកបើកឧទ្ធម្ភាគចក្រ៣នាក់ទៀត។
បណ្តាញព័ត៌មានអ៊ីរ៉ង់បានផ្សាយថា តំបន់ដែលកើតគ្រោះថ្នាក់នេះ ជាតំបន់ភ្នំនិងមានព្រៃច្រើន។ ក្នុងពេលកើតហេតុ គឺកត្តាអាកាសធាតុមិនល្អទេ ដោយមានភ្លៀងខ្យល់ ហើយមានពពកអ័ព្ទក្រាសខ្លាំងណាស់។ មិនទាន់មានការបញ្ជាក់ឲ្យច្បាស់ណាមួយទេ ថាឧទ្ធម្ភាគចក្រធ្លាក់ដោយជួបបញ្ហាបច្ចេកទេសពេលកំពុងហោះ ឬមួយក៏ហោះបុកភ្នំ ដោយសារតែពពកអ័ព្ទបាំងមើលអ្វីមិនឃើញ។ អាជ្ញាធរអ៊ីរ៉ង់បានព្យាយាមស្វែងរកឧទ្ធម្ភាគចក្រនេះ ពេញមួយយប់ថ្ងៃអាទិត្យ នៅតាមជ្រលងភ្នំ ដោយសង្ឃឹមថាអាចនឹងជួយសង្គ្រោះមនុស្សនៅក្នុងនោះទាន់ពេលវេលា។ តួកគីបានបញ្ជូនក្រុមសង្គ្រោះ៣២នាក់ និងដ្រូនតាមរកពេលយប់ងងិតទៅជួយរកទាំងយប់។ ចំណែកសហភាពអឺរ៉ុបវិញ បានឲ្យដឹងថាដោយមានការស្នើសុំពីខាងអ៊ីរ៉ង់ គេបានបើកប្រព័ន្ធរ៉ាដាផែនទី CopernicusEMS ដើម្បីថតប្រមូលទិន្នន័យភូមិសាស្ត្រ ជួយរកឧទ្ធម្ភាគចក្រឲ្យបានលឿនបំផុត។
លុះព្រឹកព្រហាមថ្ងៃចន្ទទី២០ឧសភានេះ ទើបគេរកឧទ្ធម្ភាគចក្រដែលធ្លាក់ឃើញ ហើយបណ្តាញផ្សព្វផ្សាយផ្លូវការអ៊ីរ៉ង់បានផ្សាយភ្លាមដែរថា អ្នកដំណើរទាំង៩នាក់ គឺគ្មាននរណារស់ទេ ស្លាប់ទាំងអស់ ក្នុងនោះគឺមានលោកប្រធានាធិបតី អេប្រាហ៊ីម រៃស៊ី អាយុ៦៣ឆ្នាំ និងលោករដ្ឋមន្ត្រីការបរទេស ហ៊ូសេន អាមៀរ អាប់ឌុលឡាយ៉ាន អាយុ៦០ឆ្នាំ។
ថ្វីបើបណ្តាញផ្សព្វផ្សាយព័ត៌មានផ្លូវការរបស់អ៊ីរ៉ង់ បានលើកឡើងថា កត្តាអាកាសធាតុភ្លៀងខ្យល់ពពកអ័ព្ទខ្លាំង អាចជាហេតុផលបង្កគ្រោះថ្នាក់នេះ តែមតិមួយចំនួនបានដាក់ការសង្ស័យថា វាអាចជាករណីធ្វើឃាតក៏ថាបាន ព្រោះឧទ្ធម្ភាគចក្រមាន៣គ្រឿង តែធ្លាក់តែ១គ្រឿង ហើយធ្លាក់ចំអាមួយគ្រឿងដែលដឹកប្រធានាធិបតីអ៊ីរ៉ង់។
សូមបញ្ជាក់ដែរ ថាលោកអេប្រាហ៊ីម រ៉ៃស៊ី គឺជាប្រធានាធិបតីអភិរក្សនិយមជ្រុល ស្តាប់បង្គាប់អាយ៉ាតូឡាអាលីខាមឺណី ហើយមានទំនោរស្អប់ និងចាត់ទុកអ៊ីស្រាអែលជាសត្រូវដំធំរបស់ខ្លួន។ យើងនៅចាំមិនទាន់ភ្លេចទេ កាលពីថ្ងៃទី១៣មេសា អ៊ីរ៉ង់បានបង្ហោះដ្រូននិងមីស៊ីលប្រមាណ៣០០គ្រឿង សំដៅវាយប្រហារអ៊ីស្រាអែល ហើយដែលអ៊ីស្រាអែល បានប្រកាសថានឹងសងសិកវិញ។អំឡុងពេលនេះ អ៊ីរ៉ង់បានចាប់ផ្តើមបើកចរចាដោយប្រយោល ជាមួយភាគីអាមេរិក ស្តីអំពីកម្មវិធីនុយក្លេអ៊ែរអ៊ីរ៉ង់។ ចំណុចនេះ ជាចំណុចរសើបខ្លាំងណាស់សម្រាប់លោកនាយករដ្ឋមន្ត្រីអ៊ីស្រាអែល នេតាន់យ៉ាហ៊ូ ព្រោះ លោកតែងតែព្រមានថា អាមេរិកនឹងចាញ់ស្នៀតអ៊ីរ៉ង់ ប្រសិនបើព្រមចរចាបើកឲ្យអ៊ីរ៉ង់មាននុយក្លេអ៊ែរស៊ីវីលស្របច្បាប់។ លោកនេតាន់យ៉ាហ៊ូ អះអាងថា ធាតុពិតអ៊ីរ៉ង់នឹងយកទៅធ្វើគ្រឿងសព្វាវុធនុយក្លេអ៊ែរ។ ហើយបើអ៊ីរ៉ង់មានអាវុធនុយក្លេអ៊ែរ គឺអ៊ីស្រាអែលដែលជាអ្នកត្រូវភ័យខ្លួន។
អាយ៉ាតូឡា អាលីខាមឺណី មគុទេសន៍សាសនាកំពូលអ៊ីរ៉ង់ បានថ្លែងសារនៅព្រឹកថ្ងៃចន្ទ ប្រាប់ទៅប្រជាជនអ៊ីរ៉ង់ថាកុំព្រួយបារម្ភឲ្យសោះ ព្រោះដំណើរការដឹកនាំប្រទេស នឹងនៅតែបន្តតាមធម្មតាដោយរលូន។ លោកបានប្រកាស ការកាន់ទុក្ខជាតិ ដែលមានរយៈពេល៥ថ្ងៃ។ ដូចគ្នាដែរ រដ្ឋាភិបាលអ៊ីរ៉ង់បានចេញសារប្រកាសជាផ្លូវការថា គេនឹងបន្តធ្វើការបម្រើប្រជាជនអ៊ីរ៉ង់ ដោយមិនឲ្យមានបញ្ហារអាក់រអួលអ្វីទាំងអស់។ យោងតាមមាត្រា១៣១ នៃរដ្ឋធម្មនុញ្ញអ៊ីរ៉ង់ ក្នុងករណីដែលប្រធានាធិបតីស្លាប់ ឬត្រូវគេទម្លាក់មុនចប់អាណត្តិ គឺអនុប្រធានាធិបតីទី១ នឹងត្រូវឡើងមកដឹកនាំប្រទេសជាបណ្តោះអាសន្នសិន មុននឹងមានការបោះឆ្នោតថ្មី ដែលត្រូវរៀបចំធ្វើក្នុងកំឡុងពេល៥០ថ្ងៃយ៉ាងយូរបំផុត។
នៅរសៀលថ្ងៃចន្ទ២០ឧសភា អាយ៉ាតូឡា អាលីខាមឺណី បានប្រកាសតែងតាំងលោក Mohammad Mokhber អាយុ៦៨ឆ្នាំ ដែលបច្ចុប្បន្នជាអនុប្រធានាធិបតីទី១ ឲ្យដឹកនាំប្រទេសជាបណ្តោះអាសន្ន។ ចំណែកលោក Ali Bagheri បច្ចុប្បន្នជាប្រធានក្រុមការងារចរចាកម្មវិធីនុយក្លេអ៊ែរអ៊ីរ៉ង់ ត្រូវបានតែងតាំងឲ្យធ្វើជារដ្ឋមន្ត្រីក្រសួងការបរទេសថ្មី។លោក អេប្រាហ៊ីម រ៉ៃស៊ី កាលនៅរស់ ត្រូវបានមតិជាច្រើនទាំងក្នុងនិងក្រៅអ៊ីរ៉ង់ គិតរំពឹងទុកថា លោកអាចនឹងឡើងមកធ្វើជាមគុទេសន៍ដឹកនាំកំពូលរបស់អ៊ីរ៉ង់ បន្តពីលោកអាលីខាមឺណី ដែលកាន់តែចាស់ជរា មានអាយុ៨៥ឆ្នាំ។ ដូច្នេះ សំណួរនៅតែចោទសួរ ថាតើនរណានឹងឡើងមកធ្វើអាយ៉ាតូឡាមគុទេសន៍កំពូលដឹកនាំអ៊ីរ៉ង់ នៅពេល អាលី ខាមឺណីស្លាប់ទៅ?
