ប្រធានាធិបតីចិនទស្សនកិច្ចផ្លូវរដ្ឋទៅកាន់ប្រទេសបារាំងតែជជែគគ្នាសម្រាប់អឺរ៉ុបផងដែរ
28-April-2024 / ព័ត៌មានអន្តរជាតិ
បារាំង-ចិន៖ នៅថ្ងៃអាទិត្យកន្លងទៅ ប្រធានាធិបតីចិន ស៊ី ជីនពីង បានធើ្វដំណើរទៅដល់ទីក្រុងប៉ារីស តាមការអញ្ជើញរបស់ប្រធានាធិបតីបារាំង Emmanuel Macron ជុំវិញដំណើរបំពេញទស្សនកិច្ចផ្លូវរដ្ឋជាលើកទីបី ដើម្បីអបអរខួបទំនាក់ទំនងការទូតរយៈពេល ៦០ឆ្នាំរវាងចិននិងបារាំង ។
នាយករដ្ឋមន្ត្រីបារាំងលោក Gabriel Attal និងមន្ត្រីជាន់ខ្ពស់បារាំងជាច្រើននាក់ផ្សេងទៀតបានមកទទួលលោកស៊ីនៅព្រលានយន្តហោះ។លោកប្រធានាធិបតីស៊ីជីនពីង បានបង្ហាញក្តីសោមនស្សរីករាយចំពោះដំណើរទស្សនកិច្ចរបស់លោកនៅពេលនេះ ដោយលោកចាត់ទុកទំនាក់ទំនងរវាងបារាំងនិងចិន ថាជាចំណងមិត្តភាពមានវ័យចំណាស់ និងជាអ្នកតំណាងឱ្យអរិយធម៌រវាងតំបន់បូព៌ានិងលោកខាងលិចដ៏មានសារៈសំខាន់ និងតែងបង្ហាញការកោតសរសើរនិងគោរពគ្នាទៅវិញទៅមកក្នុងរយៈពេលដ៏យូរលង់។
លោកស៊ីជីនពីងបានបន្តរំលឹកអំពីប្រវត្តិនៃការភ្ជាប់ទំនាក់ទំនងការទូតដំបូងរវាងចិននិងបារាំង ក្នុងអំឡុងសម័យសង្គ្រាមត្រជាក់ កាលនោះ រដ្ឋាភិបាលនៃប្រទេសទាំងពីរបានខិតខំយ៉ាងលំបាកក្នុងការជម្នះឧបសគ្គ ដើម្បីកសាងចំណងមិត្តភាពមួយនេះឡើង និងបានបន្តប្រឹងប្រែងថែរក្សាវាបានយ៉ាងរឹងមាំរហូតមកដល់សព្វថ្ងៃក្នុងរយៈពេលជាង៦០ឆ្នាំ ។ប្រមុខដឹកនាំចិនរូបនេះបានលើកឡើងទៀតថា ការពង្រឹងទំនាក់ទំនងរវាងចិននិងបារាំងបាននាំមកនូវមិនត្រឹមតែផលប្រយោជន៍សម្រាប់ប្រជាជាតិទាំងពីរប៉ុណ្ណោះទេ ប៉ុន្តែថែមទាំងរួមចំណែកក្នុងការថែរក្សាស្ថិរភាពនិងការអភិវឌ្ឍន៍សម្រាប់ពិភពលោកទាំងមូលទៀតផង។
លោកស៊ីជីនពីង នឹងជួបជជែកជាមួយលោកប្រធានាធិបតីម៉ាក្រុង ដើម្បីផ្លាស់ប្តូរទស្សនៈវិស័យឱ្យបានស៊ីជម្រៅទៅលើកិច្ចការអភិវឌ្ឍន៍ទំនាក់ទំនង និងសហប្រតិបត្តិការទ្វាភាគីរវាងចិននិងបារំង រួមទាំងបញ្ហាចំណងមិត្តភាពរបស់ចិនជាមួយនឹងសហភាពអឺរ៉ុប នៅក្រោមបរិបទនៃការវិវត្តន៍ប្រែប្រួលស្ថានការណ៍ភូមិសាស្ត្រនយោបាយ ក៏ដូចជាបញ្ហាសំខាន់ៗដទៃទៀតក្នុងកម្រិតតំបន់និងសកលលោក។នៅក្នុងបទសម្ភាសន៍មួយ ផ្តល់ឲ្យកាសែត La Tribune dimanche លោកប្រធានាធិបតីម៉ាក្រុងបានទទួលស្គាល់ ថាប្រទេសអឺរ៉ុបមានការយល់ឃើញមិនដូចគ្នាទេ ទាក់ទិននឹងបញ្ហាពាណិជ្ជកម្មជាមួយចិន។ ប្រទេសខ្លះគិតឃើញត្រឹមថា ចិនជាទីផ្សារដ៏ធំនិងសំបូរឱកាសជំនួញ។ លោកម៉ាក្រុងបានបន្ថែមថា តែទន្ទឹមនឹងនេះ ចូរកុំភ្លេចថាចិន កំពុងតែសំរុកនាំចូលទំនិញមកជន់ជោរពេញអឺរ៉ុប ឯអឺរ៉ុបវិញត្រូវបិទរោងចក្រ ពឹងផ្អែកលើទំនិញចិន។ ដូច្នេះ អឺរ៉ុបត្រូវតែរកវិធីការពារខ្លួន ការពារសន្តិសុខ និងផលប្រយោជន៍ ហើយទាមទារឲ្យមានភាពយុត្តិធម៌ សមភាពក្នុងទំនាក់ទំនងពាណិជ្ជកម្មជាមួយចិន។
ដោយឡែក លោកស្រី អៀរស៊ូឡា វុនដឹឡេយេន បានលើកឡើងថា តាងនាមឲ្យសហភាពអឺរ៉ុប គឺលោកស្រីនឹងនិយាយដោយត្រង់ៗ ដើម្បីឲ្យភាគីចិនធានាឲ្យបាននូវការប្រកួតប្រជែងពាណិជ្ជកម្ម ប្រកបដោយភាពស្មោះត្រង់ និងមានសមភាព។ លោកស្រីប្រធានគណៈកម្មការអឺរ៉ុប បានលើកឡើងថា បច្ចុប្បន្នរដ្ឋចិនបានចំណាយប្រាក់ជួយឧបត្ថម្ភដល់ការផលិតទំនិញយុទ្ធសាស្ត្រមួយចំនួន ជាក់ស្តែងរថយន្តអគ្គីសនី និងដែកថែប ដើម្បីសំរុកយកមកលក់នៅអឺរ៉ុបក្នុងតម្លៃថោក។ ទង្វើបែបនេះ វាគឺជាការធ្វើពាណិជ្ជកម្មបែបមិនស្មោះត្រង់។
ទាក់ទិនបញ្ហាសង្គ្រាមនៅអ៊ុយក្រែនវិញ បើផ្អែកតាមវិមានប្រធានាធិបតីបារាំង គឺលោកម៉ាក្រុង មានចេតនាបញ្ចុះបញ្ចូលលោកស៊ី ជីនពីង ក្នុងនាមជាមហាមិត្តរបស់លោកពូទីន ឲ្យទៅនិយាយជាមួយភាគីរុស្ស៊ី ដើម្បីរកច្រកផ្លូវបិទបញ្ចប់សង្គ្រាម។ លោកស៊ី ជីនពីង បានផ្តល់បទសម្ភាសន៍ឲ្យកាសែតបារាំង Le Figaro ដោយលោកបានលើកថា ចិនពិតជាចង់ចូលរួមធ្វើឲ្យស្ថិរភាព និងសន្តិភាពត្រលប់មកវិញនៅអឺរ៉ុប។ លោកស៊ី ជីនពីងបន្តថា ចិននឹងចាប់ដៃគ្នាជាមួយបារាំង និងសហគមន៍អន្តរជាតិ ដើម្បីរួមគ្នាស្វែងរកច្រកផ្លូវ ឈានទៅដោះស្រាយបញ្ហាសង្គ្រាមនៅអ៊ុយក្រែន។
សូមបញ្ជាក់ថា តាមការគ្រោងទុក ចេញពីប៉ារីស នៅថ្ងៃអង្គារទី៧ឧសភា លោកម៉ាក្រុងនិងលោកស៊ី ជីនពីង នឹងធ្វើដំណើរទៅតំបន់ភ្នំ Pyrénées ភាគនិរតីបារាំង។ គូស្វាមីភរិយានៃប្រធានាធិបតីទាំង២ នឹងពិសារអាហារថ្ងៃត្រង់ជុំគ្នា ដែលជាឱកាសបង្កើតភាពស្និទ្ធស្នាល ជាលក្ខណៈឯកជន។ នេះក៏ជាឱកាសដ៏ល្អ ដើម្បីឲ្យលោកម៉ាក្រុង អាចនិយាយដោះដូរយោបល់ដោយត្រង់ៗ ទាក់ទិននឹងបញ្ហាសង្គ្រាមអ៊ុយក្រែន។
