វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4406 នាក់
ម្សិលមិញ 4027 នាក់
សរុប 14157076 នាក់
មីយ៉ាន់ម៉ា៖ លោក Kim Aris ដែលត្រូវជាកូនប្រុសពៅរបស់លោកស្រីអ៊ុងសានស៊ូជី បាន ចាត់ទុកថា ការប្រកាសលើកលែងទោសដោយអន្លើ សម្រាប់លោកស្រីអង់សានស៊ូជី ដោយតុលាការរបបយោធាមីយ៉ាន់ម៉ាកាលពីពេលថ្មីៗនេះ “គឺជាការលើកលែងទោសដែលគ្មានន័យអ្វីសូម្បីតែបន្តិច“ គឹគ្រាន់តែដើម្បីឃោសនាបោកបញ្ឆោតមតិសហគមន៍អន្តរជាតិតែប៉ុនណោះ។ លោក Kim Aris បានបន្តអំពាវនាវឱ្យក្រុមប្រទេសលោកខាងលិចបង្កើនការដាក់សម្ពាធទៅរដ្ឋាភិបាលសឹកសព្វថ្ងៃ ។
គួរបញ្ជាក់ជូនថា លោកស្រីអ៊ុងសានស៊ូជីដែលបានជាប់បណ្តឹងសរុបចំនួន ១៩ករណី ឬស្មើនឹងទោសជាប់ពន្ធនាគារយៈពេល ៣៣ឆ្នាំកាលពីថ្ងៃទី១សីហា ត្រូវបានរដ្ឋាភិបាលរបបសឹកសម្រេចលើកលែងទោសចំនួន ៥ករណី ដែលនឹងបន្ធូរបន្ថយទោសជាប់ពន្ធនាគារយៈពេល ៦ឆ្នាំ និងបានផ្ទេពីគុកមកឃុំនៅផ្ទះដោយធ្វើឱ្យមានការចាប់អារម្មណ៍ជាខ្លាំងពីសហគមន៍អន្តរជាតិ។ យ៉ាងណាមិញ កូនប្រុសពៅរបស់លោកស្រីស៊ូជី បានហៅសេចក្ដីសម្រេចមួយនេះថាជាការឃោសនាអនុវត្តនូវលទ្ធិប្រជាធិបតេយ្យក្លែងក្លាយ ។
គួររំលឹកជូនថា ចាប់តាំងពីរដ្ឋប្រហារយោធាទម្លាក់រដ្ឋាភិបាលស្របច្បាប់របស់លោកស្រីអ៊ុងសានស៊ូជី កាលពីដើមឆ្នាំ ២០២១មក ប្រទេសមីយ៉ាន់ម៉ាបានធ្លាក់ចូលទៅក្នុងវិបត្តិនយោបាយយ៉ាងធ្ងន់ធ្ងរ បូករួមទាំងភាពចលាចលប្រដាប់អាវុធរវាងក្រុមយោធារដ្ឋាភិបាល ជាមួយនឹងក្រុមចលនាតស៊ូរបស់ពលរដ្ឋជនជាតិដើមភាគតិចដែលប្រឆាំងទៅនឹងការដណ្ដើមអំណាចដោយខុសច្បាប់របស់ក្រុមមេដឹកនាំយោធាសព្វថ្ងៃ រហូតបណ្តាលឱ្យពលរដ្ឋជាច្រើនបានបាត់បង់ជីវិត និងបង្ខំភៀសខ្លួនទៅកាន់ប្រទេសជិតខាង ខណៈក្រុមសកម្មជនប្រឆាំងជាច្រើនពាន់នាក់ផ្សេងទៀតត្រូវបានចាប់ដាក់ពន្ធនាគារ ៕ប្រភព៖ Reuters Connect