វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 5078 នាក់
ម្សិលមិញ 5304 នាក់
សរុប 14144604 នាក់
វៀតណាម៖ ថ្មីៗនេះ មានការព័ត៌មានបង្កការចាប់អារម្មណ៍ចេញពីប្រទេសវៀតណាម ពោលគឺ ករណីកិបកេងនិងបាត់បង់លុយច្រើនសន្ធឹកសន្ធាប់ រហូតឈានដល់មានការចោទប្រកាន់មហាសេដ្ឋិនីមួយរូបដ៏ល្បីឈ្មោះ។ប្រភពពីកាសែតភាសាវៀតណាមបានផ្សាយពីចម្លើយសារភាពដោះសារជនជាប់ចោទ នៅពីមុខគណៈក្រុមប្រឹក្សាវិនិច្ឆ័យក្រុងហូជីមិញ មានខ្លឹមសារដូចខាងក្រោម៖
គិតរហូតមកទល់នឹងថ្ងៃទី ១៣ ខែមីនា ឆ្នាំ ២០២៤នេះ សវនាការជំនុំជម្រះទោសមហាសេដ្ឋិនីអចលនទ្រព្យវៀតណាម ជឿង មីឡាន អាយុ ៦៨ឆ្នាំ ប្រធានសម្ព័ន្ធក្រុមហ៊ុន វ៉ានធិញ ហ្វាត និងជនជាប់ចោទ ៨៥នាក់ផ្សេងទៀត ធើ្វឡើងនៅសាលសវនាការតុលាការប្រជាជនក្រុងហូជីមិញ បានឈានចូលដល់ថ្ងៃទី ៧ហើយ។ ក្រុមប្រឹក្សាជំនុំជម្រះនៃតុលាការនេះបានឱ្យដឹងថា សវនាការនេះនឹងបន្តធើ្វរហូតដល់ថ្ងៃទី ២៩ ខែមេសាឆ្នាំ ២០២៤ខាងមុខទើបបញ្ចប់។
កាលពីថ្ងៃទី ១១ ខែមីនាកន្លងទៅ ជនជាប់ចោទមហាសេដ្ឋិនីអចលនទ្រព្យវៀតណាមដែលតុលាការបានចោទប្រកាន់ពីបទកេងបន្លំនិងបំបាត់ប្រាក់របស់ធនាគារពាណិជ្ជសាយហ្គន ឬហៅកាត់ថា (SCB) រហូតដល់ទៅ ៤៩៨ពាន់លានដុង(រូបិយប័ណ្ណវៀតណាម) ស្មើនឹង ១២.៥ពាន់លានដុល្លារអាម៉េរិក បានក្លាយជាជនជាប់ចោទត្រូវបានសាកសួរចុងក្រោយគេបង្អស់ដែលពាក់ព័ន្ធនឹងរឿងរ៉ាវហិរញ្ញវត្ថុដ៍កក្រើកមួយនេះ។
ជនជាប់ចោទដដែល បានព្យាយាមបដិសេធខ្លឹមសារបទចោទរបស់រដ្ឋអាជ្ញានិងឆ្លើយទម្លាក់កំហុសទៅកាន់ថ្នាក់ក្រោម(មន្ត្រីក្រោមឱវាទ)របស់ខ្លួន។ឈរនៅពីខាងមុខរង្វង់ក្រចកសេះ ជនជាប់ចោទមហាសេដ្ឋិនីអចលនទ្រព្យរូបនេះបានប្រាប់ដល់ក្រុមប្រឹក្សាជំនុំជម្រះថា ចំណុចមួយចំនួននៅក្នុងបទចោទប្រកាន់ទៅលើរូបគាត់ពុំត្រឹមត្រូវនោះទេ នៅក្នុងការឆ្លងឆ្លើយជាមួយនឹងអាជ្ញាធររដ្ឋនោះ មានពេលខ្លះជនជាប់ចោទឆ្លើយបានត្រឹមត្រូវ ប៉ុន្តែផ្នែកទីពីរនៃចម្លើយ ជនជាប់ចោទនៅតែអះអាងថា ខ្លួនមិនដែលបានកាន់កាប់ភាគហ៊ុននៅក្នុងធនាគារពាណិជ្ជសៃហ្គន (SCB) រហូតដល់ទៅជាង ៩០% ដូចការចោទប្រកាន់របស់រដ្ឋអាជ្ញានោះទេ ដែលតាមការពិតគាត់កាន់កាប់ភាគហ៊ុននៅធនាគារនេះត្រឹមតែ ៤.៩%នៃភាគហ៊ុនសរុបតែប៉ុណ្ណោះ រីឯកូនស្រីរបស់គាត់ពីរនាក់ទៀត ក្នុងម្នាក់ៗកាន់កាប់ភាគហ៊ុនត្រឹមតែជិត ៥%ប៉ុណ្ណោះ។
បើយើងពិនិត្យទៅលើភាគហ៊ុនសរុបរបស់ក្រុមគ្រួសារមួយនេះមានត្រឹមតែប្រមាណជា ១៥ភាគរយប៉ុណ្ណោះ ក្រៅពីនេះគឺគ្រាន់តែជាអ្នកចេញមុខឈរបំផុសឱ្យមិត្តភ័ក្តិនៅបរទេសកាន់កាប់ភាគហ៊ុន ៣០ភាគរយ និងមិត្តភ័ក្តិនៅវៀតណាមកាន់កាប់ភាគហ៊ុនជាង ៣៥ភាគរយ នៅពេលដែលរដ្ឋអាជ្ញា ជាក្រុមប្រឹក្សាជំនុំជម្រះ និងជាប្រធានតុលាការព្រហ្មទណ្ឌទីក្រុងហូជិមិញ លោក ផាមលឿងទាន់ ណែនាំឱ្យជនជាប់ចោទពន្យល់ថាតើហេតុអ្វីបានជាអ្នកដែលទិញភាគហ៊ុនធនាគារ (SCB) សុទ្ធតែបានឆ្លើយថា គេទិញភាគហ៊ុននោះដោយមានលោកស្រី ជឿងមីឡាន ជាអ្នកឈរឈ្មោះ ជនជាប់ចោទបានឆ្លើយថាពួកគេទាំងនោះបានឈរឈ្មោះទិញភាគហ៊ុនដើម្បីជួយមិត្តភ័ក្តិរបស់ជនជាប់ចោទ គឺមិនមែនទិញភាគហ៊ុនដើម្បីជួយជនជាប់ចោទនោះទេ។
នៅលើបណ្តាញផ្សព្វផ្សាយវៀតណាមដដែល ជនជាប់ចោទរូបនេះ បានឱ្យដឹងទៀតថា គាត់មានមិត្តភ័ក្តិជាអនីតិជនជាតិវៀតណាមរស់នៅប្រទេសកាណាដានិងអូស្ត្រាលី ដូច្នេះតាមច្បាប់កំណត់របស់រដ្ឋមិនអនុញ្ញាតឱ្យជនបរទេសឈរឈ្មោះទិញភាគហ៊ុនក្នុងប្រទេសវៀតណាមបាននោះទេ។អាស្រ័យដោយជនជាប់ចោទជឿងមីឡាន ជាអ្នកធើ្វជាអន្តរការី ឬគ្រាន់តែធ្វើជាអ្នកតភ្ជាប់ទៅកាន់អតិថិជននៅឯក្រៅប្រទេសជាមួយនឹងធនាគារ (SCB) ដូច្នេះគាត់គ្រាន់តែជាអ្នកឈរឈ្មោះឱ្យតែប៉ុណ្ណោះ ពុំមែនជាម្ចាស់ភាគហ៊ុននោះឡើយ។ ជនជាប់ចោទបានបន្តទៀតថាស្ថានភាពហិរញ្ញវត្ថុរបស់ធនាគារ (SCB) មានការលំបាកខ្លាំង ដូច្នេះការបាត់បង់ប្រាក់កាក់ដែលចោទថាគាត់កេងបន្លំរហូតដល់ ១២.៥ពាន់លានដុល្លារអាម៉េរិកនោះ គឺមិនត្រឹមត្រូវឡើយ។
ដោយឡែក ប្រធានក្រុមប្រឹក្សាជំនុំជម្រះបានណែនាំឱ្យជនជាប់ចោទ ជឿងមីឡាន ពន្យាល់អំពីដំណើរដើមទង និងទំនាក់ទំនងរវាងគាត់ជាមួយនឹងអគ្គនាយកប្រធានក្រុមប្រឹក្សាភិបាលរបស់ធនាគារ (SCB) ដោយពួកគេទាំងពីរនាក់នោះបានសារភាពថា ពួកគេបានធើ្វតាមការណែនាំរបស់លោកស្រីជឿងមីឡាន។ ជនជាប់ចោទបានពន្យល់ប្រាប់ប្រធានក្រុមប្រឹក្សាជំនុំជម្រះថា ជនជាប់ចោទដទៃទៀតឆ្លើយប្រាប់តុលាការពុំត្រឹមត្រូវទេ ព្រោះនៅពេលដែលមានការរួមច្របាច់បញ្ចូលគ្នាធនាគារ ៣ ទៅតែ ១នោះ គាត់បានបំផុសអតិថិជនឱ្យចូលរួមវិនិយោគដាក់ទុនជួយដោះស្រាយបញ្ហារបស់ធនាគារ ហើយខ្លួនគាត់ផ្ទាល់ពុំមានភារកិច្ចប្រតិបតិ្តនិងណែនាំលើការងារធនាគារទេ រីឯគណៈគ្រប់គ្រងនៃសម្ព័ន្ធក្រុមហ៊ុន វ៉ានធិញហ្វាត ដែលមានលោកស្រីជាប្រធាននោះ ក៏ពុំមានអ្នកណាម្នាក់ចូលរួមដឹកនាំធនាគារពាណិជ្ជសៃហ្គន (SCB) ដែរ។ ជនជាប់ចោទបានអះអាងប្រាប់ក្រុមប្រឹក្សាជំនុំជម្រះទៀតថា ប្រសិនបើខ្លួនបានធើ្វអ្វីដូចតាមការចោទប្រកាន់របស់រដ្ឋអាជ្ញាមែននោះ ម្លេះ ! សមទ្រព្យសម្បត្តិរបស់ខ្លួននោះមិនស្ថិតនៅក្នុងគណនីធនាគារ (SCB) ដែលមានស្ថានភាពហិរញ្ញវត្ថុលំបាកលំបិនខ្លាំងនិងក្ស័យធននោះទេ។
សូមបញ្ជាក់ថា ជនជាប់ចោទលោកស្រីជឿងមីឡាន មានអាយុ ៦៨ឆ្នាំ ជាមហាសេដ្ឋិនីផ្នែកអចលនទ្រព្យវៀតណាមត្រូវបានតុលាការចោទប្រកាន់លើបទល្មើសចំនួន ៣ គឺទី ១ រំលោភយកទ្រព្យសម្បត្តិ ទី២ សូកប៉ាន់មន្ត្រីនិងមនុស្សជាច្រើនទៀត និងទី ៣ រំលោភលើសេចក្ដីសម្រេចស្តីពីការឱ្យខ្ចីប្រាក់នៃសកម្មភាពអង្គការឥណទានរបស់ប្រទេសវៀតណាម។ជនជាប់ចោទដដែលរូបនេះបានបង្កើតក្រុមហ៊ុនពាណិជ្ជកម្មរហូតដល់ទៅជាង ១,០០០ក្រុមហ៊ុន មានទាំងក្រុមហ៊ុនតូចៗជាសាខាទាំងនៅក្នុងនិងក្រៅប្រទេស ក្រុមហ៊ុននេះប្រកបអាជីវកម្មសំខាន់ផ្តោតទៅលើផ្នែកអចលនទ្រព្យ វិស័យទេសចរណ៍ សេវាកម្មជាដើម។
យោងតាមជំពូកទី ៤ មាត្រា ៣៥៣ និងមាត្រា ៣៦៤ នៃក្រមព្រហ្មទណ្ឌប្រទេសវៀតណាមឆ្នាំ ២០១៥ បានធើ្វវិសោធនកម្មកាលពីឆ្នាំ ២០១៧កន្លងទៅ បទល្មើសទាំង៣ដែលតុលាការបានចោទប្រកាន់ទៅលើជនជាប់ចោទជឿងមីឡាននេះ មានកម្រិតទោសអតិបរមាប្រហារជីវិត។រឿងក្តីសវនាការជំនុំជម្រះនេះ ត្រូវបានអ្នកសង្កេតការណ៍ជាតិនិងអន្តរជាតិចាត់ទុកថា ជារឿងជំនុំជម្រះទោសដែលបណ្តាលមកពីការបាត់ប្រាក់កាក់យ៉ាងច្រើនសន្ធឹកសន្ធាប់ ទាំងសម្បត្តិរដ្ឋនិងឯកជនដែលពុំធ្លាប់កើតមានឡើងនៅក្នុងប្រទេសវៀតណាម ជាប្រទេសមួយប្រកាន់យករបបដឹកនាំបែបកុម្មយនិស្ត និងមានសេដ្ឋកិច្ចទីផ្សារសេរី។
ប៉ុន្មានថ្ងៃចុងក្រោយនេះ ប្រព័ន្ធផ្សព្វផ្សាយរដ្ឋវៀតណាមជាច្រើនបានផ្សព្វផ្សាយព័ត៌មាននេះ ធើ្វឱ្យមានការរំជើបរំជួលនិងភ្ញាក់ផ្អើលដល់សាធារណៈជនវៀតណាម និងពាណិជ្ជករនានានៅប្រទេសវៀតណាមនិងនៅក្នុងតំបន់ផងដែរ។សូមបញ្ជាក់ថា នៅប្រទេសវៀតណាមការប្រយុទ្ធប្រឆាំងនឹងអំពើពុករលួយបាត់បង់ទ្រព្យសម្បត្តិរដ្ឋនិងឯកជន គឺស្ថិតនៅក្នុងការដឹកនាំបញ្ជារបស់លោកង្វៀន ហ្វូចុក អគ្គលេខាធិការនៃគណៈកម្មាធិការមជ្ឍិមបក្សកុម្មយនិស្តវៀតណាម និងជាប្រធានគណៈកម្មាធិការប្រឆាំងអំពើពុករលួយវៀតណាមដែលគេស្គាល់ថាជាកំពូលឥស្សរជននយោបាយស្អាតស្អំ មិនដែលត្រាប្រណីដល់ការធើ្វឱ្យខូចផលប្រយោជន៍ជាតិវៀតណាមនិងប៉ះពាល់កិត្តិយសដល់ប្រទេសវៀតណាម ក្នុងករណីដែលមានសកម្មភាពអសកម្មណាមួយបន្ថយជំនឿទុកចិត្តវិនិយោគិនបរទេសមកលើប្រទេសរបស់លោកឡើយ៕
អត្ថបទលោក ខៀវ កូឡា ផលិតករព័ត៌មានទូរទ្សន៍ស៊ីអិនស៊ី