ប្រមុខការទូតចិនជួបសមភាគីតាលីបង់ប្រកាសពីជំនួយនិងហាមមិនឲ្យគាំទ្រភេរវកម្ម!
21-September-2026 / ព័ត៌មានអន្តរជាតិ
កាតា៖លោកវ៉ាងយីប្រមុខការទូតចិន បានជួបគ្នាផ្ទាល់ជាមួយឧបនាយករដ្ឋមន្ត្រីស្តីទីអាហ្កានីស្ថានលោកមូឡាអាបឌុលហ្កានីបារ៉ាដា( Mullah Abdul Ghani Baradar )នៅរដ្ឋធានីដូហា ប្រទេសកាតាកាលពីថ្ងៃទី២៥ ខែតុលាដែលត្រូវបានចាត់ទុកថាជាជំនួបជាន់ខ្ពស់លើកដំបូង រវាងមន្ត្រីចិន និងក្រុមតាលីបង់ចាប់តាំងពីក្រុមនេះឡើងកាន់អំណាចនៅអាហ្វហ្កានីស្ថានជាថ្មី។
បើតាមទីភ្នាក់ងារព័ត៌មាន Xinhua ចេញផ្សាយនៅថ្ងៃទី២៦ ខែតុលាបានឲ្យដឹងថា៖ លោក វ៉ាង យី លើកឡើងថា អាហ្វហ្កានីស្ថានកំពុងប្រឈមមុខនឹងបញ្ហាបួនធំៗដូចជាវិបត្តិមនុស្សធម៌ ភាពវឹកវរសេដ្ឋកិច្ច ការគំរាមកំហែងពីក្រុមភេរវកម្ម និងបញ្ហាអភិបាលកិច្ច។ ការយកឈ្នះលើបញ្ហាប្រឈមទាំងនេះ ទាមទារការយោគយល់ និងការគាំទ្របន្ថែមទៀតពីសហគមន៍អន្តរជាតិ។ នេះបើ។
លោករដ្ឋមន្ត្រីការបរទេសចិនសង្ឃឹមថា ក្រុមតាលីបង់នឹងប្ដេជ្ញាចិត្តបើកចំហ និងបង្រួបបង្រួមក្រុមជនជាតិភាគតិចនិងភាគីទាំងអស់ដើម្បីធ្វើការរួមគ្នាកសាងប្រទេសប្រកបដោយសន្តិភាព និងការពារសិទ្ធិផលប្រយោជន៍របស់ស្ត្រី និងកុមារដោយប្រសិទ្ធភាព។ បន្ថែមពីនេះលោក វ៉ាង ទទូចឱ្យក្រុមតាលីបង់ប្រកាន់យកគោលនយោបាយមិត្តភាពចំពោះប្រទេសជិតខាងអាហ្វហ្កានីស្ថាន និងកសាងប្រទេសទំនើបមួយដែលស្របតាមការចង់បានរបស់ប្រជាជន និងសហគមន៍អន្តរជាតិ។
ប្រមុខការទូតចិន ទទូចឱ្យ អាម៉េរិក និងលោកខាងលិចរួមគ្នាដកទណ្ឌកម្មពីអាហ្វហ្កានីស្ថាន និងជួយជ្រោមជ្រែងអាហ្វហ្កានីស្ថានក្នុងលក្ខណៈសមហេតុសមផលឱ្យដើរលើផ្លូវអភិវឌ្ឍន៍ប្រកបដោយសន្តិភាព។ ចំពោះចិនវិញ លោក វ៉ាង ប្រាប់មេដឹកនាំតាលីបង់ថា ចិននឹងបន្តផ្តល់ ជំនួយមនុស្សធម៌តាមសមត្ថភាពរបស់ខ្លួន និងធ្វើការជាមួយសហគមន៍អន្តរជាតិដើម្បីជួយដោះស្រាយចំពោះមុខ។
ក្នុងកិច្ចប្រជុំខាងលើដដែលនោះ លោក វ៉ាង ប្រាប់លោក Baradar ថា ក្រុមតាលីបង់ មិនត្រូវពាក់ព័ន្ធជាមួយ ក្រុមសកម្មប្រយុទ្ធដូចជាចលនាឥស្លាមតួកេស្ថានខាងកើត (ETIM) ក៏ដូចក្រុមភេរវករផ្សេងៗទៀត ហើយតាលីបង់ត្រូវតែចាត់វិធានការប្រកបដោយប្រសិទ្ធភាពដើម្បីបង្ក្រាបពួកគេ។
ឧបនាយករដ្ឋមន្ត្រីស្តីទីតាលីបង់លោក Baradar បានរៀបរាប់ពីស្ថានភាព នៅអាហ្វហ្កានីស្ថានហើយបានអះអាងថា រដ្ឋាភិបាលបណ្ដោះអាសន្នបានគ្រប់គ្រងស្ថាន ភាពបានយ៉ាងមានប្រសិទ្ធភាព។ បន្ថែមពីនេះ រដ្ឋាភិបាលបណ្ដោះអាសន្ន ក៏កំពុងធ្វើការយ៉ាងសកម្មក្នុងការបំពេញតម្រូវការរបស់ប្រជាជនក៏ដូចជារៀនពីបទពិសោធរបស់ខ្លួនពីមុនដើម្បីអភិវឌ្ឍប្រទេសទៅមុខផងដែរ។
លោក Baradar ប្ដេជ្ញាចិត្តថា តាលីបង់នឹងរាប់បញ្ចូលគ្រប់តំណាងភាគីក្នុងជួររដ្ឋាភិបាល ពង្រឹងការប្រឹងប្រែងដើម្បីការពារសិទ្ធិ និងផលប្រយោជន៍របស់ស្ត្រី និងកុមារ ហើយនឹងមិនដកហូតសិទ្ធិទទួលបានការអប់រំ និងការងារនោះទេ។ យ៉ាងណាមិញ លោក Baradar លើឡើងថា ស្ត្រីប្រឈមមុខនឹងការលំបាកដូចជាកង្វះសម្ភារបរិក្ខារ និងថវិកា។ លោកក៏សង្ឃឹមថា ចិន និងអន្តរជាតិនឹងបង្កើនជំនួយដល់អាហ្វហ្កានីស្ថាន ដើម្បីជំនះវិបត្តិមនុស្សធម៌ និងត្រឡប់ទៅរកផ្លូវនៃការអភិវឌ្ឍវិញ..។
សូមបញ្ជាក់ថា៖បច្ចុប្បន្នប្រទេសចិនគឺជាវិនិយោគិនបរទេសធំជាងគេនៅអាហ្វហ្គានីស្ថានដែលមានទុនបំរុងរ៉ែធំជាងគេនៅលើពិភពលោកដែលមានតម្លៃជាង១ ទ្រីលានដុល្លារ។ ប្រទេសចិនកាលពីខែមុនបានសន្យាផ្តល់ជំនួយស្បៀងអាហារនិងថ្នាំចំនួន៣១ លានដុល្លារដល់អាហ្វហ្គានីស្ថានរួមជាមួយវ៉ាក់សាំងការពារជំងឺCovid-19ចំនួន៣លានដូស។
ប្រទេសចិនមានចំណាប់អារម្មណ៍ជាក់លាក់នៅក្នុងប្រទេសអាហ្វហ្គានីស្ថាននៅពេលដែលគម្រោងនៅក្រោមគំនិតផ្តួចផ្តើម”ខ្សែក្រវ៉ាត់និងផ្លូវ”(BRI)របស់ទីក្រុងប៉េកាំងឆ្លងកាត់តំបន់នេះ។ទីក្រុងប៉េកាំងហាក់ដូចជាកំពុងមើលឃើញឱកាសមួយដើម្បីពង្រីកគម្រោងBRIដែលមានតម្លៃរាប់ពាន់លានដុល្លារទៅកាន់អាហ្វហ្គានីស្ថាន។ទន្ទឹមនឹងនេះក្រុមតាលីបង់បានចាត់ទុកប្រទេសចិនជាដៃគូរដ៏សំខាន់បំផុតមួយរបស់ប្រទេសអាហ្វហ្គានីស្ថានហើយសង្ឃឹមថាការវិនិយោគនិងការគាំទ្ររបស់ចិននឹងជួយអាហ្វហ្គានីស្ថានកសាងប្រទេសឡើងវិញ។
អាហ្វហ្គានីស្ថានកំពុងជួបការលំបាកជាច្រើនជាពិសេសវិបត្តិស្បៀងអាហារ។ លោក David Beasley នាយកប្រតិបត្តិនៃកម្មវិធីស្បៀងអាហារពិភពលោក(WFP) បាននិយាយថារដូវរងានេះ“ ប្រជាជនអាហ្វហ្កានីរាប់លាននាក់នឹងត្រូវបង្ខំចិត្តជ្រើសរើសរវាងការធ្វើចំណាកស្រុកនិងការអត់ឃ្លាន” លុះត្រាតែមានការផ្តល់ជំនួយសង្គ្រោះ៕
