បន្ទាប់ពីថ្វាយសាតាំងឯកអគ្គរដ្ឋទូតអាមេរិកចង់បន្តជួបមន្ត្រីរាជរដ្ឋាភិបាល!
ភ្នំពេញ៖ បន្ទាប់ពីទទួលបានការអនុញ្ញាតចូលគាល់មហាក្សត្រព្រះករុណា ព្រះបាទសម្តេច ព្រះនរោត្តម សីហមុនីថ្វាយសាតាំងកាលពីថ្ងៃទី១៩ ខែតុលា ឆ្នាំ២០១៩លោក Patrick Murphyឯកអគ្គរដ្ឋទូតអាមេរិកថ្មីប្រចាំនៅកម្ពុជាបានបង្ហាញពីបំណងចង់ជួបមន្ត្រីរាជរដ្ឋាភិបាល ដើម្បីពង្រឹងចំណងមិត្តភាពអាមេរិក-កម្ពុជា។ 
លោក Patrick Murphy បានសរសេរសារខ្លីនៅបណ្តាញសង្គម Twitter របស់លោកយ៉ាងដូច្នេះថា៖ «បន្ទាប់ពីចូលគាល់បង្ហាញខ្លួនក្នុងនាមជា ឯកអគ្គរដ្ឋទូតអាមេរិកថ្មី ប្រចាំនៅកម្ពុជា ចំពោះព្រះភក្ត្រព្រះមហាក្សត្ររួចហើយ ខ្ញុំកំពុងរង់ចាំជួបជាមួយសមាជិកនានារបស់រាជរដ្ឋាភិបាលកម្ពុជា ដើម្បីពិភាក្សាពីកិច្ចប្រឹងប្រែងចំណងមិត្តភាពរវាងប្រទេសទាំងពីរ»។ទូតអាមេរិកក៏បានអពាវនាវឲ្យតាមដានព្រិត្តិការណ៍នៅក្រោយឆាកផងដែរ។
ក្រោយពីមានសារនេះអ្នកនាំពាក្យរាជរដ្ឋាភិបាលលោក ផៃ ស៉ីផាន នៅថ្ងៃទី២០ ខែតុលា ឆ្នាំ២០១៩តាមរយៈ Facebook បានបញ្ជាក់យ៉ាងដូច្នេះថា៖ «ជូនពរ និងស្វាគមន៍ ឯកឧត្តមឯកអគ្គរដ្ឋទូត។ សហប្រតិបត្តិការជិតស្និទ្ធ និងទំនាក់ទំនងប្រសើរ គោរពផលប្រយោជន៍ ប្រជាជាតិគ្នាទៅវិញទៅមកជាអទិភាព។ ផលនៃសន្តិភាព ស្ថិរភាព និងវឌ្ឍនភាព បានស្វាគមន៍ឯកឧត្តម គ្រប់ទិសទីមិនថា ជនបទ ឬទីក្រុងនោះឡើយ»។
សូមជំរាបថា លោក Patrick Murphy ត្រូវបានព្រឹទ្ធសភាសហរដ្ឋអាមេរិកបានអនុម័ត ឱ្យក្លាយជាឯកអគ្គរដ្ឋទូតវិសាមញ្ញ និងពេញសមត្ថភាពរបស់ប្រទេសខ្លួន ប្រចាំនៅកម្ពុជា កាលពីថ្ងៃទី០២ ខែសីហា ឆ្នាំ២០១៩ រួចហើយប្រធានាធិបតីលោក Trump បានបញ្ជូនការតែងតាំងនេះ ទៅព្រឹទ្ធសភា ដែលយោងតាមមាត្រា២ នៃរដ្ឋធម្មនុញ្ញរបស់សហរដ្ឋអាមេរិក មានការទទួលខុសត្រូវក្នុងការផ្តល់ «ប្រឹក្សានិងការយល់ព្រម» លើការតែងតាំងទាំងឡាយ ដោយប្រធានាធិបតី ក្នុងនោះមានឯកអគ្គរដ្ឋទូតផងដែរ។
លោក Patrick Murphy និងភរិយារបស់លោក បានមកដល់ប្រទេសកម្ពុជា កាលពីយប់ថ្ងៃទី១៨ ខែកញ្ញា ឆ្នាំ២០១៩ ដើម្បីផ្តើមការងាររបស់ខ្លួននៅកម្ពុជា ជំនួសឯកអគ្គរដ្ឋទូតអាមេរិកប្រចាំនៅកម្ពុជាផុតអាណត្តិ លោក William A. Heidt។ តាមសេចក្តីប្រកាសរបស់ស្ថានទូតអាមេរិក លោក Murphy បានចាប់ផ្តើមការងារនៅថ្ងៃដំបូងរបស់លោកនៅថ្ងៃទី១៩ ខែកញ្ញា ឆ្នាំ២០១៩កន្លងទៅ ដោយមានការសែនព្រេន នៅផ្ទះអ្នកតាក្នុងស្ថានទូត។
លោកជាអតីតឧបការីរងរដ្ឋមន្ត្រីក្រសួងការបរទេស ទទួលបន្ទុកតំបន់អាស៊ីអាគ្នេយ៍ ហើយជាសមាជិកអាជីពម្នាក់ នៅក្នុងកិច្ចការបរទេសជាន់ខ្ពស់។ កន្លងមកលោក គឺជាអនុប្រធានទូត និងជាភារធារី ប្រចាំនៃប្រទេសថៃ ពីឆ្នាំ២០១៣ ដល់ ឆ្នាំ២០១៦, នៅប្រទេស Lesotho ពីឆ្នាំ២០០៦ ដល់ ឆ្នាំ២០០៨ ហើយបានធ្វើជាតំណាងស្តីទីពិសេស និងជាអ្នកសម្របសម្រួលគោលនយោបាយ សម្រាប់ប្រទេសមីយ៉ាន់ម៉ាពីឆ្នាំ ២០១២ ដល់ឆ្នាំ ២០១៣។
វត្តមានឯកអគ្គរដ្ឋទូតអាមេរិកថ្មីគឺចំពេលដែលសភាពការណ៍នយោបាយនៅកម្ពុជាមានការតានតឹងទាំងខាងវោហាសព្ទ័និងការគម្រាមប្រើកម្លាំងដោយសារតែការប្រកាសវិលចូលស្រុកវិញនាថ្ងៃទី៩វិច្ឆិការបស់លោកសមរង្ស៊ីនិងមន្ត្រីអតីជាន់ខ្ពស់អតីតគណបក្សសង្គ្រោះជាតិជាច្រើនរូបទៀតដែលរាជរដ្ឋាភិបាលចាត់ទុកជាក្រុមក្បត់ជាតិចង់ធ្វើរដ្ឋប្រហារដូរបប។ចាំមើលថាតើនឹងមានអ្វីផ្លាស់ប្តូរបន្ទាប់ពីជំនួបជាមួយមន្ត្រីរាជរដ្ឋាភិបាល?។
