អ៉ីរ៉ង់ និងសម្ព័ន្ធមិត្តរបស់ខ្លួន បើកកិច្ចប្រជុំស្វែងរកមធ្យោបាយសងសឹកប្រឆាំងអ៉ីស្រាអែលតើអាចទៅរួចទេ?
06-June-2026 / ព័ត៌មានអន្តរជាតិ
អ៊ីរ៉ង៖ ក្រុមមន្ត្រីកំពូលៗរបស់អ៉ីរ៉ង់ នឹងត្រូវជួបជាមួយក្រុមមន្ត្រីនៃសម្ព័ន្ធមិត្តរបស់អ៉ីរ៉ង់នៅក្នុងតំបន់មកពីប្រទេសលីបង់ អ៉ីរ៉ាក់ និងយេម៉ែន នៅថ្ងៃព្រហស្បតិ៍ ទី១ ខែសីហា (ម៉ោងក្នុងតំបន់) ដើម្បីពិភាក្សាពីវិធានការសងសឹកប្រឆាំងនឹងអ៉ីស្រាអែល បន្ទាប់ពីការសម្លាប់មេដឹកនាំហាម៉ាសក្នុងទីក្រុងតេហេរ៉ង់។ នេះបើតាមការចេញផ្សាយដោយទីភ្នាក់ងារ សារព័ត៌មាន Reuters។
ប្រភពចំនួន៥ បានប្រាប់ Reuters ក្នុងលក្ខខណ្ឌមិនបញ្ចេញឈ្មោះថាក្រុមមន្ត្រីមកពីក្រុមហាម៉ាស និងក្រុម Islamic Jihad ព្រមទាំងក្រុមហ៊ូទីយេម៉ែន និងក្រុមហេសបូឡា ក្នុងប្រទេសលីបង់ ក៏ដូចជាក្រុមចលនាតស៊ូក្នុងប្រទេសអ៉ីរ៉ាក់ នឹងត្រូវចូលរួមក្នុងកិច្ចប្រជុំមួយក្នុងទីក្រុងតេហេរ៉ង់។ «អ៉ីរ៉ង់ និងសមាជិកចលនាតស៊ូ នឹងធ្វើការវាយតម្លៃយ៉ាង ល្អិតល្អន់ នៅបន្ទាប់ពីកិច្ចប្រជុំក្នុងទីក្រុងតេហេរ៉ង់ ក្នុងការស្វែងរកមធ្យោបាយដ៏ល្អ និងមានប្រសិទ្ធភាព ដើម្បីសងសឹកនឹងរបប Zionist (អ៉ីស្រាអែល)»។ នេះជាការបញ្ជាក់របស់ មន្ត្រីជាន់ខ្ពស់អ៉ីរ៉ង់ម្នាក់ដែលបានដឹងពីកិច្ចប្រជុំខាងលើ។
ដោយឡែកសម្រាប់អាមេរិកវិញប្រធានាធិបតីអាមេរិក លោក ចូ បៃដិន បានប្រាប់នាយករដ្ឋមន្ត្រីអ៉ីស្រាអែល លោក បេនចាមីន ណេតាន់យ៉ាហ៊ូ កាលពីថ្ងៃព្រហស្បតិ៍ ទី១ ខែសីហា ថាទីក្រុងវ៉ាស៊ីនតោនមានការប្ដេជ្ញាចិត្តការពារសន្តិសុខរបស់អ៉ីស្រាអែល ប្រឆាំងនឹងការគំរាមកំហែងគ្រប់ទម្រង់ទាំងអស់ពីអ៉ីរ៉ង់ ប្រឈមមុខនឹងការគំរាមសងសឹករបស់ ទីក្រុងតេហេរ៉ង់ បន្ទាប់ពីមេដឹកនាំហាម៉ាសត្រូវបានសម្លាប់នៅលើទឹកដីអ៉ីរ៉ង់។ នេះបើតាមសេតវិមាន ដកស្រង់ចេញផ្សាយដោយទីភ្នាក់ងារសារព័ត៌មាន AFP។
សេតវិមានបានឱ្យដឹងក្នុងសេចក្ដីថ្លែងការណ៍មួយថា លោក ចូ បៃដិន រួមជាមួយអនុប្រធានាធិបតី លោកស្រី កាម៉ាឡា ហារីស បានបើកកិច្ចសន្ទនាតាមទូរស័ព្ទជាមួយ លោក ណេតាន់យ៉ាហ៊ូ ហើយនៅក្នុងកិច្ចសន្ទនានេះមេដឹកនាំអាមេរិកទាំង២ ក៏បានសង្កត់ធ្ងន់ផងដែរពីកិច្ចប្រឹងប្រែងបន្ធូរបន្ថយភាពតានតឹងនៅក្នុងតំបន់មជ្ឈិមបូព៌ា។សេចក្ដីថ្លែងការណ៍បានបញ្ជាក់ទៀតថា «លោកប្រធានាធិបតី បានពិភាក្សាពីកិច្ចប្រឹងប្រែងដើម្បីការពារ អ៉ីស្រាអែលប្រឆាំងនឹងការគំរាមកំហែង ក្នុងនោះរួមមានការវាយប្រហារដោយមីស៊ីលបាលិស្ទីគ និងដ្រូន ព្រមទាំងមធ្យោបាយការពារថ្មីបន្ថែមទៀត»។
គួរបញ្ជាក់ថា កិច្ចសន្ទនារវាងមេដឹកនាំអាមេរិក និងអ៉ីស្រាអែល កើតមានឡើងបន្ទាប់ពីអ៉ីស្រាអែលបានប្រកាសពីការសម្លាប់មេបញ្ជាការជាន់ខ្ពស់ហេសបូឡា លោក Fuad Shukr ក្នុងការវាយប្រហារតាមផ្លូវអាកាសមួយលើទីក្រុងបេរូត ប្រទេសលីបង់ កាលពីថ្ងៃអង្គារ រួមទាំងការធ្វើឃាតមេដឹកនាំនយោបាយហាម៉ាស លោក Ismail Haniyeh ក្នុងទីក្រុងតេហេរ៉ង់។ អ៉ីរ៉ង់ និងក្រុមហាម៉ាសបានចោទប្រកាន់ថាអ៉ីស្រាអែលជាអ្នកសម្លាប់លោក Haniyeh តែអ៉ីស្រាអែលមិនបានប្រកែក ហើយក៏មិនទទួលស្គាល់នោះដែរ។ ទាំងអ៉ីរ៉ង់ និងហាម៉ាសសុទ្ធតែបានគំរាមសងសឹកអ៉ីស្រាអែល។
នៅទីក្រុងតេហេរ៉ង់ ពិធីបុណ្យដង្ហែរសពលោកអ៊ីស្មាយ ហានីយ៉េ មេដឹកនាំនយោបាយរបស់ក្រុមហាម៉ាសប៉ាឡេស្ទីនទើបចាប់ផ្តើម ជាមួយសម្រែករបស់មហាជន ស្រែកជេរប្រទេចសងសឹកអ៊ីស្រាអែល កងទ័ពអ៊ីស្រាអែល នៅថ្ងៃព្រហស្បតិ៍ទី ១ សីហាបានចេញមកប្រកាសថា មេដឹកនាំយោធាធំបំផុតរបស់ចលនាហាម៉ាស គឺ Mohammed Deif ស្លាប់នៅក្នុងការវាយប្រហាររបស់យន្តហោះចម្បាំងអ៊ីស្រាអែលកាលពីពាក់កណ្តាលខែកក្កដា ។
គេនៅចាំថាកាលពីថ្ងៃទី ១៣ កក្កដា អ៊ីស្រាអែលបានបើកប្រតិបត្តិការផ្លូវអាកាស សំដៅទីតាំងប្រជុំជនមួយក្នុងទីក្រុងKhan Younès ភាគខាងត្បូងហ្កាហ្សា ដែលអ៊ីស្រាអែលជឿថា ជាកន្លែងលាក់ខ្លួនរបស់មេកងកម្លាំងIzzedine Al-Qassam ដែលជាចលនាប្រដាប់អាវុធរបស់ហាម៉ាស។ ភ្លាមៗ ក្រសួងសុខាភិបាលហាម៉ាសប្រកាសថា ការវាយប្រហាររបស់កងទ័ពអ៊ីស្រាអែលទៅលើជំរំជនភៀសខ្លួននៅKhan Younès បានសម្លាប់មនុស្ស៩០នាក់។ក្រុមហាម៉ាសនិយាយថា មេដឹកនាំយោធារបស់ខ្លួន គឺ Mohammed Deifមិនស្ថិតក្នុងចំណោមជនរងគ្រោះស្លាប់នៅក្នុងការវាយប្រហាររបស់អ៊ីស្រាអែល។ ប៉ុន្តែ កងទ័ពអ៊ីស្រាអែល នៅថ្ងៃព្រហស្បតិ៍ទី ១សីហាបាននិយាយថា ព័ត៌មានចារកម្មនៅទីបំផុតបញ្ជាក់ថា មេដឹកនាំយោធាធំសំខាន់បំផុតរបស់ហាម៉ាស Mohammed Deifពិតជាស្លាប់នៅក្នុងការវាយប្រហាររបស់អ៊ីស្រាអែលកាលពីពាក់កណ្តាលខែកក្កដា។
ដោយចាត់ទុក Mohammed Deif មេដឹកនាំរបស់ចលនាប្រដាប់អាវុធរបស់ក្រុមហាម៉ាសថា ជាអូសាម៉ា បិនឡាដិន នៅហ្កាហ្សា រដ្ឋមន្ត្រីការពារអ៊ីស្រាអែល លោកYoav Gallant អបអរកោតសរសើរស្នាដៃរបស់កងទ័ពអ៊ីស្រាអែល ដែលទទួលជោគជ័យដ៏ធំធេងនៅក្នុងប្រតិបត្តិការគាស់រំលើងក្រុមហាម៉ាស តាមផ្លូវនយោបាយ និងយោធា។នៅក្នុងសារបង្ហោះផ្សាយលើបណ្តាញសង្គមX ប្រមុខការពារជាតិអ៊ីស្រាអែលបេ្តជ្ញាបន្តសង្គ្រាមរហូតសម្រេចគោលដៅ ដែលគ្មានអ្វីផ្សេងក្រៅពីតាមសម្លាប់ឲ្យអស់មេដឹកនាំក្រុមហាម៉ាស។ រដ្ឋមន្ត្រីការពារជាតិអ៊ីស្រាអែលនៅបានអំពាវនាវឲ្យកូនទាហានរបស់ក្រុមហាម៉ាសទាំងអស់យល់ព្រមទម្លាក់អាវុធចុះចាញ់ ឬមួយក៏ត្រូវប្រឈមនឹងការតាមប្រមាញ់សម្លាប់របស់អ៊ីស្រាអែល ដូចជាមេកើយរបស់ខ្លួន គឺ Mohammed Deif។
Mohammed Deifកើតនៅឆ្នាំ ១៩៦៥ នៅក្នុងជំរំជនភៀសខ្លួននៅទីក្រុង Khan Younès ក្នុងភាគខាងត្បូងហ្កាហ្សា Mohammed Deif បានចូលរួមក្នុងសកម្មភាពនយោបាយរបស់ក្រុមហាម៉ាសតាំងពីនៅជានិស្សិតនៅសកលវិទ្យាល័យនៅហ្កាហ្សា និងកាន់តែសកម្មខ្លាំង នៅពេលកើតមានសង្គ្រាមគប់ដុំថ្មលើកដំបូង Intifada ឆ្នាំ ១៩៨៧។ នៅឆ្នាំ១៩៩០ Deifបានចូលរួមបង្កើតកងកម្លាំងIzzedine Al-Qassam ចលនាប្រដាប់អាវុធរបស់ហាម៉ាសដែលរូបគេចូលគ្រប់គ្រងដឹកនាំតាំងពីឆ្នាំ២០០២។គាត់ជាអ្នកផ្តួចផ្តើមគំនិតសាងសង់រូងក្រោមដី និងជំនាញផលិតគ្រាប់បែក គ្រាប់ប្លោង Mohammed Deif ត្រូវបានអ៊ីស្រាអែលចោទប្រកាន់ថា ជាអ្នកបញ្ជាឲ្យក្រុមប្រដាប់អាវុធហាម៉ាសចូលទៅសម្លាប់ និងចាប់ប្រជាជនអ៊ីស្រាអែលមកធ្វើជាចំណាប់ខ្មាំង នៅក្នុងការវាយប្រហារភេរវកម្ម៧តុលា។
Mohammed Deif ជាប់ឈ្មោះក្នុងបញ្ជីក្រុមភេរវជនដែលអាមេរិក និងអ៊ីស្រាអែលតាមប្រមាញ់ជាង៣០ឆ្នាំមកហើយ។ ប្រពន្ធ និងកូនតូចៗរបស់ Mohammed Deif ស្លាប់នៅក្នុងការវាយប្រហាររបស់អ៊ីស្រាអែលកាលពីឆ្នាំ ២០១៤។ ចំណែក Mohammed Deif ផ្ទាល់ត្រូវគេដាក់រហស្សនាមថា ជាឆ្មាជីវិត ៩ ព្រោះថា អ៊ីស្រាអែលបានប៉ុនប៉ងតាមសម្លាប់ Mohammed Deif ៧លើក ប៉ុន្តែ មិនបានសម្រេច។ លក្ខណៈពិសេសរបស់មេទ័ពរបស់ហាម៉ាសគឺ មិនដែលបង្ហាញមុខ មិនស្ថិតនៅកន្លែងណាមួយយូរជាង១ថ្ងៃនោះទេ។ Deif ដែលជាឈ្មោះរបស់ Mohammed Deif មានន័យថា ជាភ្ញៀវ ដែលលេចមុខមួយភ្លែតៗ ចល័តផ្លាស់ទីគ្រប់កន្លែង ជារៀងរាល់ថ្ងៃ ដែលជាហេតុធ្វើឲ្យកងទ័ពអ៊ីស្រាអែល ពិបាកចាប់សញ្ញាបាន។
ដោយសម្លាប់បានមេដឹកនាំយោធារបស់ហាម៉ាស ចំណែកមេដឹកនយោបាយរបស់ហាម៉ាសក៏បានស្លាប់នៅក្នុងការវាយប្រហារតាមផ្លូវអាកាសនៅក្នុងទឹកដីអ៊ីរ៉ង់ អ៊ីស្រាអែលសង្ឃឹមបំបាក់ទឹកចិត្តស្មារតីប្រយុទ្ធរបស់កងកម្លាំងហាម៉ាសនៅហ្កាហ្សា។ ប៉ុន្តែ ទន្ទឹមគ្នានោះ អ៊ីស្រាអែលក៏បានប្រកាសត្រៀមខ្លួន ការពារនិងវាយបកវិញ ព្រោះថា ទាំងអ៊ីរ៉ង់ និងក្រុមហេសបូឡាលីបង់បានប្រកាសសងសឹកអ៊ីស្រាអែលយ៉ាងចាស់ដៃ ដោយសារអ៊ីស្រាអែលបានរំលោភខ្សែបន្ទាត់ក្រហម បើកការវាយប្រហារតាមផ្លូវអាកាសចូលក្នុងទឹកដីអ៊ីរ៉ង់ និងលីបង់ដើម្បីសម្លាប់មេដឹកនាំហាម៉ាស និងមេបញ្ជាការទ័ពសំខាន់របស់ហេសបូឡាលីបង់។
គួរបញ្ជាក់ថា តំបន់មជ្ឈិមបូព៌ា កំពុងប្រឈមមុខនឹងហានិភ័យនៃសង្គ្រាមរវាងអ៉ីស្រាអែលជាមួយអ៉ីរ៉ង់ និងសម្ព័ន្ធមិត្តរបស់អ៉ីរ៉ង់ បន្ទាប់ពីការសម្លាប់មេដឹកនាំនយោបាយហាម៉ាស លោក Ismail Haniyeh ក្នុងទីក្រុងតេហេរ៉ង់កាលពីថ្ងៃពុធ និងការសម្លាប់មេបញ្ជាការជាន់ខ្ពស់ក្រុមហេសបូឡាម្នាក់ ក្នុងការវាយប្រហារតាមផ្លូវអាកាសរបស់អ៉ីស្រាអែល លើទីក្រុងបេរូត ប្រទេសលីបង់ កាលពីថ្ងៃអង្គារដើមសប្ដាហ៍កន្លងទៅនេះ៕
