គោលបំណងនិងលទ្ធផលនៃដំណើរទស្សនកិច្ចប្រមុខការទូតចិននៅកម្ពុជា
21-September-2026 / ផ្សេងៗ
ភ្នំពេញ៖ ប្រមុខការទូតចិន លោក វ៉ាង យី បានប្រកាសបង្ហាញជំហររដ្ឋាភិបាលរបស់ខ្លួនបន្តប្រឹងប្រែងគាំទ្រដល់កិច្ចអភិវឌ្ឍន៍របស់កម្ពុជា តាមរយៈជំរុញវិស័យកសិកម្ម ឧស្សាហកម្ម និងបច្ចេកវិទ្យាពេលជួបសម្តែងការគួសមជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នារសៀលថ្ងៃចន្ទ ទី២២ ខែមេសា ឆ្នាំ២០២៤។លោក វ៉ាង យី បានលើកឡើងថា ចិន និងកម្ពុជា គឺជាមិត្តដ៏ជិតស្និទ្ធ និងស្មោះត្រង់ជាមួយគ្នា។ លោក វ៉ាង យី បានសម្តែងក្ដីសោមនស្សរីករាយ ដែលរដ្ឋាភិបាលទាំងពីរបានអនុវត្តកិច្ចសហប្រត្តិការទាំងឡាយបានយ៉ាងល្អក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ ហើយបានជំរុញចំណងមិត្តភាពចិន-កម្ពុជាកាន់តែរឹងមាំដូចដែកថែប។
ប្រមុខការទូតចិន បានគូសបញ្ជាក់ថា ទស្សនកិច្ចរបស់លោកនៅកម្ពុជាពេលនេះ នឹងបន្តគាំទ្រ និងជំរុញកិច្ចសហប្រតិបត្តិការនៃការកសាងសហគមន៍វាសនារួម ចិន-កម្ពុជា ក្នុងយុគសម័យថ្មី ឱ្យលេចចេញជារូបរាង និង មានដំណើរការកាន់តែរឹងមាំ។ជាមួយនិងការស្វាគមន៍លោករដ្ឋមន្ត្រី វ៉ាង យី និងគណៈប្រតិភូប្រកបដោយភាពកក់ក្តៅបំផុត ចំពោះដំណើរបំពេញទស្សនកិច្ចនៅកម្ពុជា សម្តេចធិបតី បានថ្លែងអំណរគុណ និងវាយតម្លៃខ្ពស់ចំពោះកិច្ចសហប្រតិបត្តិការកម្ពុជា-ចិន ដែលបានរួមចំណែកក្នុងការជំរុញ ការអភិវឌ្ឍសង្គម-សេដ្ឋកិច្ចកម្ពុជា ឱ្យមានការរីកចម្រើន។
បន្ថែមពីលើនេះ សម្តេចធិបតី ក៏បានវាយតម្លៃខ្ពស់ចំពោះគំនិតផ្តួចផ្តើមខ្សែក្រវ៉ាត់ និងផ្លូវ (BRI) ដែលបានរួមចំណែកផ្តល់លទ្ធភាពដល់កម្ពុជាក្នុងការកសាងហេដ្ឋារចនាសម្ព័ន្ធ ដូចជាផ្លូវលឿនភ្នំពេញ-ក្រុងព្រះសីហនុ និង អាកាសយានដ្ឋានអន្តរជាតិសៀមរាប-អង្គរ ជាដើម ដែលបានរួមចំណែកដល់កំណើនសេដ្ឋកិច្ចកម្ពុជា។សម្តេចធិបតី ក៏បានបង្ហាញក្តីរីករាយ និងវាយតម្លៃខ្ពស់អំពីវឌ្ឍនភាពនៃក្របខ័ណ្ឌកិច្ចសហប្រតិបត្តិការត្បូងពេជ្រ ដែលប្រទេសទាំងពីរបានឯកភាព កាលពីឆ្នាំ២០២៣។
សម្ដេចធិបតី ហ៊ុន ម៉ាណែត និងលោករដ្ឋមន្ត្រី វ៉ាង យី បានបញ្ជាក់អំពីការបន្តពង្រឹងកិច្ចសហប្រតិបត្តិការដែលមានស្រាប់លើវិស័យការពារជាតិ និងសន្តិសុខ អប់រំ វប្បធម៌ និងវិស័យផ្សេងៗទៀត និងពង្រីកកិច្ចសហប្រតិបត្តិការថ្មីៗ។ ក្នុងនោះលោក វ៉ាង យី បានបញ្ជាក់ថា ភាគីចិន នឹងជំរុញបញ្ចប់ការរៀបចំផែនការមេឱ្យបានឆាប់ ដើម្បីឱ្យកិច្ចសហប្រតិបត្តិការលើច្រករបៀងមច្ឆា និងអង្ករ និងកិច្ចសហប្រតិបត្តិការច្រករបៀងឧស្សាហកម្ម និងបច្ចេកវិទ្យា លេចចេញជារូបរាងក្នុងពេលដ៏ខ្លីខាងមុខ ព្រមទាំងជួយអភិវឌ្ឍ និងធ្វើទំនើបកម្មវិស័យកសិ-ឧស្សាហកម្ម នៅកម្ពុជាផងដែរ។
នៅល្ងាចថ្ងៃចន្ទ ទី២២ ខែមេសា ឆ្នាំ២០២៤នេះ សម្តេចតេជោ ហ៊ុន សែន ប្រធានព្រឹទ្ធសភា បានអនុញ្ញាតឱ្យលោក វ៉ាង យី រដ្ឋមន្ត្រីការបរទេសចិន ចូលជួបសម្តែងការគួរសម និងពិភាក្សាការងារផងដែរ។តែមិនដឹងថាថ្នាក់ដឹកនាំទាំងពីរពីភាក្សាលើបញ្ហាអ្វីតែសំខាន់បំផុតគេចងដឹងថាតើលើកវ៉ាងយីអាចនឹងនិយាយពីថវិការរបស់ចិនក្នុងការជួយជិកព្រែកហ្វូណន់តេជោដែលកំពង់មានភាពចម្រាស់ឬអត់?។
សូមបញ្ជាក់ថាលោក វ៉ាង យី សមាជិកការិយាល័យនយោបាយ និងជាប្រធានការិយាល័យគណៈកម្មការកិច្ចការបរទេស នៃគណៈកម្មាធិការមជ្ឈិមបក្សកុម្មុយនីស្តចិនផងដែរនោះ បានអញ្ជើញមកដល់កម្ពុជា កាលពីរសៀលថ្ងៃទី២១ ខែមេសា ឆ្នាំ២០២៤នេះ ដើម្បីបំពេញទស្សនកិច្ចផ្លូវការ រយៈពេល៣ថ្ងៃ។ អ្វីជាការកត់សំគាល់ ដំណើរទស្សនកិច្ចរបស់ប្រមុខការទូតចិននៅពេលខាងមុខនេះ គឺស្របពេលដែលប្រទេសចិនបង្កើនការទូតរបស់ខ្លួនជាមួយបណ្តាប្រទេសអាស៊ីអាគ្នេយ៍ និងចំពេលដែលការប្រកួតប្រជែងជាយុទ្ធសាស្ត្រជាមួយសហរដ្ឋអាមេរិកក្នុងតំបន់អាស៊ីប៉ាស៊ីហ្វិកកំពុងរឹតបន្តឹង។
ក្នុងនាមជាមហាអំណាចសេដ្ឋកិច្ចទី២ ក្នុងលោក ចិនមិនត្រឹមតែកំពុងព្យាយាមរក្សាឋានៈរបស់ខ្លួនជាដៃគូពាណិជ្ជកម្មកំពូលជាមួយប៉ាពូអាស៊ីនូវែលហ្គីណេដែលជាប្រទេសកោះធំជាងគេនៅប៉ាស៊ីហ្វិកខាងត្បូងប៉ុណ្ណោះទេ តែថែមទាំងបានពង្រីកទំនាក់ទំនងរបស់ខ្លួនទៅកាន់តំបន់ជាច្រើនទៀតផង។ ក្នុងពេលជាមួយគ្នា ចិនក៏បានបង្កើនទំនាក់ទំនងរបស់ខ្លួនជាមួយឥណ្ឌូនេស៊ី និងកម្ពុជាដល់កម្រិតនៃការកសាង «សហគមន៍មួយ ជោគវាសនារួម» ខណៈចិនកំពុងជំរុញទំនាក់ទំនងជាមួយប៉ាពូអាស៊ីនូវែលហ្គីណេឲ្យទៅជា «ភាពជាដៃគូយុទ្ធសាស្ត្រគ្រប់ជ្រុងជ្រោយ» ។
ជាន់ដីកម្ពុជាភ្លាម លោក វ៉ាង យី បានអញ្ជើញចូលបង្គំគាល់ និងសវនាការជាមួយព្រះមហាក្សត្រខ្មែរ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី។ បន្ទាប់មកលោក វ៉ាង យី ក៏ចូលជួបពិភាក្សាការងារជាមួយលោកឧបនាយករដ្ឋមន្ត្រី សុខ ចិន្តាសោភា ប្រមុខការទូតរបស់កម្ពុជា។ក្នុងកម្មវិធី២នេះទាំងព្រះមហាក្សត្រនិងរដ្ឋមន្ត្រីការបរទេសកកម្ពជាបានប្រកាសជាថ្មីពីជំហរគាំទ្រចិនតែមួយ។ដោយឡែកពេលចូលរួមកិច្ចប្រជុំលើកទី៧ នៃគណៈកម្មាធិការសម្របសម្រួលអន្តរដ្ឋាភិបាលកម្ពុជា-ចិន នៅក្រុមប្រឹក្សាអភិវឌ្ឍកម្ពុជា ដែលភាគីកម្ពុជាដឹកនាំដោយលោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជានៅព្រឹកថ្ងៃទី២២ ខែមេសា ឆ្នាំ២០២៤ថ្នាក់ដឹកនាំទាំងពីរ ក៏បានធ្វើជាអធិបតីក្នុងពិធីចុះហត្ថលេខាលើឯកសារសំខាន់ៗចំនួន៣ទៀត ដើម្បីរួមចំណែកអភិវឌ្ឍន៍វិស័យទឹកស្អាត និងវិស័យកសិកម្មនៅកម្ពុជា។
ឯកសារសំខាន់ចំនួន៣នេះរួមមានទី១៖ លិខិតប្តូរសារស្តីពីការផ្តល់ជំនួយរបស់ចិនសម្រាប់ផ្គត់ផ្គង់ទឹកស្អាតនៅជនបទដំណាក់កាល.។ទី២៖ វិញ្ញាបនបត្រប្រគល់-ទទួលនៃគម្រោងផែនការមេអភិវឌ្ឍន៍កសិកម្មកម្ពុជា។.ទី៣៖ ពិធីសារទាក់ទងនឹងការធ្វើចត្តាឡីស័ក និងលក្ខខណ្ឌតម្រូវការអនាម័យសម្រាប់ផលិតផលចំណីឆ្កែពាក់កណ្តាលសម្រេចធ្វើពីស្បែកគោ សម្រាប់នាំចេញពីប្រទេសកម្ពុជាទៅកាន់ប្រទេសចិន។
ភាគីទាំងពីរក៏រៀបចំពិធីប្រគល់-ទទួលសៀវភៅ កំណត់ហេតុរបស់នគរចេនឡា អំពីទឹកដី ប្រពៃណី និងទំនៀមទម្លាប់ ប្រែសម្រួលជាភាសាខ្មែរ។លោក វ៉ាង យី នឹងអញ្ជើញចាកចេញពីកម្ពុជានៅថ្ងៃទី២៣ ខែមេសា ឆ្នាំ២០២៤។
លោក វ៉ាង យី ជាប្រមុខការទូតរបស់ចិនដែលទស្សនកិច្ចនៅកម្ពុជាញឹកញាប់បំផុត។ លោកទើបនឹងបំពេញទស្សនកិច្ចនៅកម្ពុជាកាលពីខែសីហា ឆ្នាំ២០២៣កន្លងទៅនេះ។ទស្សនកិច្ចរបស់ លោក វ៉ាង គឺមានគោលដៅជំរុញការអនុវត្តលើគម្រោងខ្សែក្រវ៉ាត់ និងផ្លូវ ដែលបានផ្តួចផ្តើមឡើងដោយប្រធានាធិបតីចិនលោកស៊ី ជីនពីង។ នេះបើតាមសារព័ត៌មានចិន South China Morning Post ដែលចេញផ្សាយនៅមុនទស្សនកិច្ចរបស់ប្រមុខការទូតចិនរូបនេះ។
តាមកាសែតចិនមួយនេះដដែល លោក វ៉ាង យី បានបញ្ជាក់បន្ថែមពីឆន្ទៈរបស់ចិនក្នុងការធ្វើការជាមួយកម្ពុជា ដើម្បីអនុវត្តនូវការឯកភាពគ្នាជាយុទ្ធសាស្ត្រ ដែលសម្រេចបានដោយមេដឹកនាំ នៃប្រទេសទាំងពីរ។ លោក ប្រមុខការទូតចិន ថ្លែងថាប្រឈមមុខនឹងបរិយាកាសអន្តរជាតិដ៏ស្មុគស្មាញ ចិន និងកម្ពុជាគួរតែពង្រឹងការដឹកនាំជាយុទ្ធសាស្ត្រកម្រិតខ្ពស់ និងដឹកនាំការកសាងសហគមន៍ ចិន-កម្ពុជា ជាមួយនឹងអនាគតរួមគ្នាក្នុងទិសដៅដ៏ត្រឹមត្រូវ៕
