កម្ពុជាទាមទារជាថ្មីទៀតឱ្យថៃ ចុះមកវាស់វែងរួមគ្នានៅខែមីនាកម្ពុជានិងទាមទារឱ្យថៃបញ្ឈប់ការរំលោភបំពានព្រំដែន

ភ្នំពេញ៖ រដ្ឋលេខាធិការដ្ឋានកិច្ចការព្រំដែនកម្ពុជា (JBC)នៅថ្ងៃទី២៣កុម្ភៈ បានចេញសេចក្តីថ្លែងការណ៍ជាផ្លូវការមួយទៀត ទាមទារឱ្យភាគីថៃបញ្ឈប់រាល់សកម្មភាពរំលោភបំពានព្រំដែនខុសច្បាប់ និងស្នើឱ្យអនុវត្តតាមកិច្ចព្រមព្រៀងព្រំដែនឱ្យបានជាដាច់ខាត ។ 

បើយោងតាមកំណត់ទូតចុះថ្ងៃទី២៣ ខែកុម្ភៈ ឆ្នាំ២០២៦ រដ្ឋលេខាធិការដ្ឋានកិច្ចការព្រំដែនកម្ពុជា (JBC)ភាគីកម្ពុជាបានស្នើៈ១៖ ស្នើចាត់បញ្ជូនក្រុមវាស់វែងចម្រុះ (JSTs) នៃភាគីទាំងពីរចុះលើដីជាក់ស្តែង នៅកាលបរិច្ឆេទ សមស្របណាមួយចន្លោះពីថ្ងៃទី១ ដល់ថ្ងៃទី៧ ខែមីនា ឆ្នាំ២០២៦ ដើម្បីបន្តអនុវត្តការងារបោះបង្គោលបណ្តោះអាសន្ន នៅកំណាត់ខ្សែព្រំដែនចន្លោះបង្គោលព្រំដែនលេខ 42-47 ស្ថិតក្នុងភូមិសាស្ត្រភូមិជោគជ័យ និងភូមិព្រៃចាន់ ស្រុកអូរជ្រៅ ខេត្តបន្ទាយមានជ័យ និងនៅកំណាត់ខ្សែព្រំដែនចន្លោះបង្គោលព្រំដែនលេខ 52-59 ស្ថិតក្នុងភូមិសាស្ត្រស្រុកកំរៀង ខេត្តបាត់ដំបង ព្រមទាំងសាងសង់ឡើងវិញនូវបង្គោលព្រំដែនចំនួន ១៥ តាមគំរូដើមបង្គោលជំនាន់បារាំង នៅទីតាំងដើមដែលភាគីទាំងពីរបានឯកភាពគ្នា។

២៖ ស្នើចាត់បញ្ជូនក្រុមវាស់វែងចម្រុះ (JSTs) នៃភាគីទាំងពីរ ដើម្បីចុះវាស់វែងនិងបោះបង្គោលបណ្តោះអាសន្ន នៅកំណាត់ខ្សែព្រំដែនចន្លោះបង្គោលព្រំដែនលេខ 33-37 (តំបន់បឹងត្រកួន), តំបន់ច្រកទ្វារព្រំដែនអន្តរជាតិថ្មដា (ឃុំថ្មដា ស្រុកវាលវែង ខេត្តពោធិ៍សាត់), តំបន់ព្រំដែនអូរភ្លុកដំរី (ឃុំថ្មដា ស្រុកវាលវែង ខេត្តពោធិ៍សាត់), តំបន់ព្រំដែនច១ (ឃុំថ្មដា ស្រុកវាលវែង ខេត្តពោធិ៍សាត់) និងតំបន់ព្រំដែនផ្សេងទៀត នៅកាលបរិច្ឆេទសមស្របណាមួយចន្លោះពីថ្ងៃទី៨ ដល់ថ្ងៃទី១៥ ខែមីនា ឆ្នាំ២០២៦។

៣៖ ស្នើចាត់បញ្ជូនក្រុមវាស់វែងចម្រុះ (JSTs) នៃភាគីទាំងពីរ ដើម្បីចុះវាស់វែងនិងខណ្ឌសីមាលើដីជាក់ស្តែង នៅកំណាត់ខ្សែព្រំដែនចន្លោះបង្គោលព្រំដែនដែលបានឯកភាពគ្នា (ខ្សែព្រំដែនដើរតាមផ្លូវទឹក និងខ្សែព្រំដែនជាបន្ទាត់ត្រង់) នៅកាលបរិច្ឆេទសមស្របណាមួយចន្លោះពីថ្ងៃទី៨ ដល់ថ្ងៃទី១៥ ខែមីនា ឆ្នាំ២០២៦ ដោយអនុវត្តតាមស្មារតីនៃកំណត់ហេតុកិច្ចប្រជុំលើកទី៦ របស់គណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ ចុះថ្ងៃទី១៥ ខែមិថុនា ឆ្នាំ២០២៥ នៅរាជធានីភ្នំពេញ។

៤៖ ស្នើឱ្យមានការរៀបចំកិច្ចប្រជុំក្រុមប្រតិបត្តិក កិច្ចប្រជុំក្រុមប្រតិបត្តិការ (OG) កម្ពុជា-ថៃ លើកទី១២ និងកិច្ចប្រជុំអនុគណៈកម្មការបច្ចេកទេសចម្រុះព្រំដែន (JTSC) កម្ពុជា-ថៃ លើកទី៥ នៅអំឡុងសប្តាហ៍ទីមួយ ខែមីនា ឆ្នាំ២០២៦ និងកិច្ចប្រជុំពិសេសរបស់គណៈកម្មការ JBC នៃភាគីទាំងពីរ នៅអំឡុងសប្តាហ៍ទីពីរ ខែមីនា ឆ្នាំ២០២៦។

ក្នុងរបាយការណ៍ដដែល គណៈកម្មការ JBC កម្ពុជា បានសម្តែងការថ្កោលទោសយ៉ាងខ្លាំងក្លាចំពោះសកម្មភាពរបស់យោធាថៃ ដែលបានប្រើប្រាស់ដ្រូន ដាក់រាយលួសបន្លា និងទូកុងតឺន័រ ដោតទង់ជាតិ ព្រមទាំងជីកប្រឡាយ និងសាងសង់លេណដ្ឋានក្នុងទឹកដីកម្ពុជា។ លើសពីនេះ កម្ពុជាក៏បានបង្ហាញភស្តុតាងនៃការព្យាយាមប្តូរឈ្មោះផ្លូវជាតិលេខ៥៨ របស់កម្ពុជា ការឈូសឆាយបំផ្លាញផ្ទះសម្បែងប្រជាពលរដ្ឋ និងការរារាំងមិនឱ្យម្ចាស់ដីវិលត្រឡប់ទៅរស់នៅវិញ រួមទាំងការកែប្រែស្ថានភាពបរិស្ថាននៅតំបន់ប្រាសាទតាមាន់ និងប្រាសាទព្រះវិហារផងដែរ។

ពាក់ព័ន្ធនឹងវិវាទនេះ គណៈកម្មការចម្រុះខណ្ឌសីមាព្រំដែនគោកកម្ពុជា បានបញ្ជាក់ជំហរយ៉ាងម៉ឺងម៉ាត់ថា ខ្លួននឹងការពារខ្សែព្រំដែនអន្តរជាតិកម្ពុជា-ថៃ ដោយផ្អែកលើគោលការណ៍ច្បាប់អន្តរជាតិ ខ្សែព្រំដែនមិនកែប្រែ (Uti Possidetis Juris) និងសន្ធិសញ្ញាផែនទីបារាំង-សៀម ជាមូលដ្ឋាន។ នៅលើសេចក្តីប្រកាស គណៈកម្មការ បានសង្កត់ធ្ងន់ថា កម្ពុជានឹងមិនទទួលស្គាល់ការកែប្រែខ្សែព្រំដែនណាមួយដែលកើតចេញពីការប្រើកម្លាំងត យោធា និងដោយខុសច្បាប់នោះឡើយ។

រដ្ឋលេខាធិការដ្ឋានកិច្ចការព្រំដែន ក៏បានអំពាវនាវដល់សាធារណជនឱ្យរក្សាក្តីទុកចិត្តលើកិច្ចខិតខំប្រឹងប្រែងរបស់រាជរដ្ឋាភិបាល និងគណៈកម្មការ JBC ដែលកំពុងបំពេញភារកិច្ចដោយតម្កល់ឧត្តមប្រយោជន៍ជាតិ និងការពារអធិបតេយ្យភាពទឹកដីឱ្យបានគង់វង្ស ដើម្បីសម្រេចបាននូវសន្តិភាពយូរអង្វែងនៅតាមបណ្តោយព្រំដែន។សូមបញ្ជាក់ថាតាំងពីចុងខ្មែរធ្នូ២០២៥កម្ពុជាបានទាមទារថៃជាបន្តបន្ទាប់ឲ្យមានកិច្ចប្រជុំJBCតែថៃមិនព្រមធ្វើ។