មហាសេដ្ឋីនីវៀតណាមត្រូវតុលាការកាត់ទោសប្រហារជីវិតក្នុងសំណុំរឿងក្លែងបន្លំហិរញ្ញវត្ថុតម្លៃ ១២,៥ ពាន់លានដុល្លារអាម៉េរិក
21-September-2026 / ព័ត៌មានអន្តរជាតិ
វៀតណាម៖ តុលាការវៀតណាមនៅថ្ងៃព្រហស្បតិ៍សប្តាហ៍នេះ បានធ្វើការកាត់ទោសប្រហារជីវិតចំពោះមហាសេដ្ឋីនីអចលនទ្រព្យ ទ្រឿង មីឡាន (Truong My Lan) ក្នុងសំណុំរឿងពាក់ព័ន្ធនឹងករណីក្លែងបន្លំហិរញ្ញវត្ថុក្នុងរង្វង់ទឹកប្រាក់ចំនួន ៣០៤ ពាន់ពាន់លានដុងនៃរូបិយប័ណ្ណវៀតណាម និងមានតម្លៃប្រហែល ១២,៥ ពាន់លានដុល្លារអាម៉េរិក ដោយចំនួនក្លែងបន្លំហិរញ្ញវត្ថុខាងលើនេះ ស្ថិតនៅក្នុងកំណត់ត្រាដ៏ធំបំផុតមិនធ្លាប់មានក្នុងប្រទេសវៀតណាម ។
យោងតាមប្រព័ន្ធផ្សព្វផ្សាយរដ្ឋ បានរាយការណ៍បន្ថែមទៀតថា ក្រោយចុងបញ្ចប់នៃការកាត់ក្តីនៅក្នុងទីក្រុងហូជីមិញ លោកស្រី ទ្រឿង មីឡាន ដែលជាប្រធានក្រុមហ៊ុនអភិវឌ្ឍន៍អចលនទ្រព្យវ៉ាន់ធីញផាត់ហូលឌីងគ្រុប (Van Thinh Phat Holdings Group) ត្រូវបានរកឃើញថាមានជាប់ពិរុទ្ធពីបទចោទប្រកាន់មួយចំនួន រួមមាន កេងបន្លំ ស៊ីសំណូកសូកប៉ាន់ និងបំពានច្បាប់ធនាគារ ។
នៅក្នុងបទសម្ភាសន៍ជាមួយទីភ្នាក់ងារសារព័ត៌មាន Reuters លោក ង្វៀន ហ៊ុយធីប (Nguyen Huy Thiep) មេធាវីម្នាក់របស់លោកស្រីឡាន បានលើកឡើងថា លោកស្រីឡាន បានបានបដិសេធថាលោកស្រីមិនបានប្រព្រឹត្តដូចការចោទប្រកាន់ចំពោះករណីកេងបន្លំ និងស៊ីសំណូកសូកប៉ាន់អ្វីឡើយ ។ឯ សមាជិកគ្រួសារម្នាក់របស់លោកស្រី បានបង្ហើបប្រាប់នៅក្នុងលក្ខខណ្ឌសុំមិនបញ្ចេញឈ្មោះទៅកាន់ទីភ្នាក់ងារ Reuters ថា "យើងនឹងបន្តតស៊ូមតិដើម្បីច្បាស់អំពីអ្វីដែលយើងអាចធ្វើបាន" ។ បុរសដែលអះអាងថាជាសមាជិកគ្រួសាររបស់លោកស្រីឡាន បានរៀបរាប់ដែរថា លោកស្រី នឹងដាក់ពាក្យបណ្ដឹងឧទ្ធរណ៍ប្រឆាំងនឹងការកាត់ទោសចំពោះលោកស្រីនាពេលនេះ ។
ការកាត់ក្តីជំនុំជម្រះលើលោកស្រី ទ្រឿង មីឡាន បានចាប់ផ្តើមនៅថ្ងៃទី ៥ ខែមីនា និងបានបញ្ចប់ទៅវិញ លឿនជាងការគ្រោងទុក ហើយខាងលើនេះ គឺជាលទ្ធផលដ៏គួរឱ្យភ្ញាក់ផ្អើលមួយនៅក្នុងយុទ្ធនាការបង្ក្រាបអំពើពុករលួយដែលមេដឹកនាំបក្សកុម្មុយនិស្តកំពុងកាន់អំណាច ង្វៀន ភូជុង (Nguyen Phu Trong) បានសន្យាសម្រាប់រយៈពេលជាច្រើនឆ្នាំដើម្បីលុបបំបាត់ចោលនូវអំពើពុករលួយនៅក្នុងប្រទេសវៀតណាម ។
នៅក្នុងសេចក្តីរាយការណ៍របស់កាសែតថាញ់នៀន (Thanh Nien) បានសរសេរថា ចុងចោទចំនួន ៨៤ នាក់ក្នុងសំណុំរឿងខាងលើនេះ បានទទួលការកាត់ទោសឱ្យជាប់ពន្ធនាគារ ចាប់ពី ៣ ឆ្នាំរហូតដល់មួយជីវិត។ នៅក្នុងនោះ រួមមាន ប្តីរបស់អ្នកស្រី ឡាន ឈ្មោះ អេរិក ជូ (Eric Chu) ជាអ្នកជំនួញមកពីទីក្រុងហុងកុង ត្រូវបានកាត់ទោសឱ្យជាប់ពន្ធនាគារ ៩ ឆ្នាំ និងក្មួយស្រីនឹងត្រូវជាប់ពន្ធនាគារ ១៧ ឆ្នាំ ។
មហាសេដ្ឋីអចលនទ្រព្យហុងកុងលោក Eric Chu កាលពីថ្ងៃសុក្រត្រូវបានកាត់ទោសឲ្យជាប់ពន្ធនាគាររ ពីបទចូលដៃចូលជើងក្លែងបន្លំជាមួយប្រពន្ធរបស់លោកឈ្មោះ Truong My Lan ដែលនាំឲ្យធនាគារ Saigon Commercial Bank (SCB) ខាតបង់ប្រាក់ ៦៧៧ ពាន់ពាន់លានដុង (២៧ ពាន់លានដុល្លារ) ។ នេះបើយោងតាមការចេញផ្សាយដោយសារព័ត៌មាន VN Express កាលពីថ្ងៃទី១២ ខែមេសាកន្លងទៅ ។ចៅក្រមបាននិយាយនៅឯតុលាការប្រជាជនទីក្រុងហូជីមិញថា លោក Chu វ័យ ៦៨ ឆ្នាំមានទោសទណ្ឌពីបទរំលោភលើបទប្បញ្ញត្តិផ្តល់ប្រាក់កម្ចីឥណទាន ។ ក្នុងនាមជាប្រធានក្រុមហ៊ុន Times Square Vietnam ដែលកាន់កាប់ភាគហ៊ុន ៩៩ ភាគរយ, លោក Chu បានចុះហត្ថលេខាលើឯកសារដាក់អគារ Times Square ជារបស់បញ្ចាំសម្រាប់ប្រាក់កម្ចីប្រមាណ ៧៣ លើក ខណៈការយល់ព្រមមួយលើកៗនាំឲ្យធនាគារ SCB ខាតលុយចំនួន ៩.១២ ពាន់ពាន់លានដុង ។ចៅក្រមបានលើកឡើងទៀតថា ស្វាមីរបស់អតីតសេដ្ឋិនីវៀតណាមរូបនេះជាជនបរទេស ហើយមិនចេះនិយាយភាសាវៀតណាមនោះទេ ទើបលោកផ្ដល់សេចក្ដីទុកចិត្តទៅឲ្យភរិយារបស់លោកដែលជាប្រធានក្រុហ៊ុន Van Thinh Phat ក្នុងការចុះហត្ថលេខាលើការអនុម័តលើឯកសារ ក៏ដូចជាគម្រោងផ្សេងៗទាំងដែលមិនដឹងពីគោលបំណងច្បាស់លាស់ ។
ចាប់ពីឆ្នាំ ២០១២ ដល់ឆ្នាំ ២០២២ លោកស្រី Truong My Lan និងបក្ខពួក បានទទួលប្រាក់កម្ចីចំនួន ២ ៥០០លើក និងបណ្តាលឲ្យធនាគារ SCB ខាតបង់ជាទឹកប្រាក់ ៦៧៧ ពាន់ពាន់លានដុង ហើយដើម្បីបិទបាំងកំហុសខុសឆ្គងនៅធនាគារមួយនេះ អតីតសេដ្ឋិនីវ័យ ៦៨ ឆ្នាំរូបនេះក៏បញ្ជាឲ្យមន្ត្រីក្រោមឱវាទទៅសូកប៉ាន់សវនករនៃធនាគាររដ្ឋវៀតណាមថែមទៀត ។ ទោះយ៉ាងណា ក្នុងទោសទណ្ឌទាំងនេះ តុលាការក៏បញ្ជាឲ្យលោកស្រីផ្តល់សំណង ៦៧៣.៨ ពាន់ពាន់លានដុងដល់ធនាគារ SCB ផងដែរ .។ប្រព័ន្ធផ្សព្វផ្សាយរដ្ឋ បានលើកឡើងផងដែរថា លោកស្រី ទ្រឿង មីឡាន បានប្រាប់ចៅក្រមអំឡុងកាត់ក្តីថា កាលពីដើមឡើយ លោកស្រី គឺជាអ្នកលក់គ្រឿងសម្អាងម្នាក់ស្ថិតនៅផ្សារកណ្តាលក្នុងទីក្រុងហូជីមិញ និងបានជួយកិច្ចការលក់ដូររបស់ម្តាយ មុនពេលលោកស្រីបង្កើតក្រុមហ៊ុនអចលនទ្រព្យវ៉ាន់ធីញផាត់ (Van Thinh Phat) ក្នុងឆ្នាំ ១៩៩២ និងជាឆ្នាំដែលលោកស្រីបានរៀបការ ។
គួររំឮកថា អំឡុងប្រតិបត្តិការបង្ក្រាបអំពើពុករលួយរបស់វៀតណាម គេបានឃើញថា មន្ត្រីជាន់ខ្ពស់រដ្ឋរាប់រយនាក់ និងនាយកប្រតិបត្តិអាជីវកម្មដែលមានឋានៈខ្ពស់ជាច្រើននាក់ ត្រូវបានកាត់ទោស ឬបង្ខំឱ្យចុះចេញពីតួនាទី ។ នាពេលមួយក្នុងឆ្នាំ ២០២២ ភាគហ៊ុនក្នុងប្រទេសវៀតណាម បានទទួលរងនូវការខាតបង់ទឹកប្រាក់ចំនួន ៤០ ពាន់លានដុល្លារអាម៉េរិក បន្ទាប់ពីយុទ្ធនាការចាប់ខ្លួនសាជីវកម្មធំៗជាបន្តបន្ទាប់ ដោយធ្វើអោយទំនុកចិត្តរបស់វិនិយោគិនមានភាពស្រពេចស្រពិលក្នុងគ្រាដ៏ស្រស់បំព្រងសម្រាប់សេដ្ឋកិច្ចវៀតណាមដែលកំពុងរីកចម្រើនយ៉ាងឆាប់រហ័ស ៕ប្រភព៖ Reuters/ Reuters Connect
