លោក ហ្សេលេនស្គី អរគុណអឺរ៉ុបដែលគាំទ្រ ខណៈលោកខំបញ្ចុះបញ្ចូលឲណ្ឌានិងអារ៉ាប៊ីសាអ៊ូឌីតមុន កិច្ចចរចា ត្រាំ-ពូទីន
21-September-2026 / ព័ត៌មានអន្តរជាតិ
អ៊ុយក្រែន៖ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានទូរស័ព្ទទៅកាន់មេដឹកនាំនៃប្រទេសឥណ្ឌា និងអារ៉ាប៊ីសាអូឌីតកាលពីថ្ងៃចន្ទទី១១សីហា ក្នុងគោលបំណងកៀងគរការគាំទ្រសម្រាប់ទីក្រុងកៀវ ឱ្យបានលើសពីសម្ព័ន្ធមិត្តអឺរ៉ុបរបស់លោក មុនកិច្ចប្រជុំដែលគ្រោងទុកនៅសប្តាហ៍នេះ រវាងលោក ដូណាល់ ត្រាំ និងលោក វ្ល៉ាឌីមៀ ពូទីន។
យោងតាមការផ្សាយដោយទីភ្នាក់ងារសារព័ត៌មាន Reutersបាមឲ្យដឹងថាកិច្ចខិតខំប្រឹងប្រែងផ្នែកការទូតនេះកើតឡើង បន្ទាប់ពីលោក ហ្សេលេនស្គី ទទួលបានការគាំទ្រពីអឺរ៉ុប និងសម្ព័ន្ធមិត្ត NATO កាលពីថ្ងៃអាទិត្យ ចំពេលមានក្តីបារម្ភថា មេដឹកនាំអាមេរិក និងរុស្ស៊ីអាចនឹងព្យាយាមដាក់លក្ខខណ្ឌដើម្បីបញ្ចប់សង្គ្រាមដែលអូសបន្លាយអស់រយៈពេល ៣ឆ្នាំកន្លះ។ លោក ហ្សេលេនស្គី បានបញ្ជាក់ថា លោកបានជជែកជាមួយនាយករដ្ឋមន្ត្រីឥណ្ឌា លោក ណារិនដ្រា ម៉ូឌី និងព្រះអង្គម្ចាស់អារ៉ាប៊ីសាអូឌីត Mohammed bin Salman អំពីការពង្រឹងជំហររបស់អ៊ុយក្រែននៅក្នុងដំណើរការសន្តិភាពណាមួយ។
លោក ហ្សេលេនស្គី បានលើកឡើងពីបញ្ហាទណ្ឌកម្មលើប្រេងរុស្ស៊ី ដោយបានកត់សម្គាល់ថា «វាចាំបាច់ណាស់ក្នុងការកម្រិតការនាំចេញថាមពលរបស់រុស្ស៊ី ជាពិសេសប្រេង ដើម្បីកាត់បន្ថយសក្ដានុពល និងសមត្ថភាពរបស់ខ្លួនក្នុងការផ្តល់ហិរញ្ញប្បទានដល់ការបន្តសង្គ្រាមនេះ»។ ស្របពេលជាមួយគ្នានេះ ភាគីរុស្ស៊ីក៏បានបង្កើនសកម្មភាពការទូតរបស់ខ្លួនផងដែរ ដោយលោក ពូទីន បានទូរស័ព្ទទៅកាន់មេដឹកនាំចិន ឥណ្ឌា និងប្រេស៊ីល ដើម្បីជម្រាបជូនពួកគេអំពីទំនាក់ទំនងរបស់លោកជាមួយសហរដ្ឋអាមេរិក។គួរបញ្ជាក់ថា កាលពីព្រឹកថ្ងៃចន្ទ លោក ហ្សេលេនស្គី បានព្រមានថា ការធ្វើសម្បទានណាមួយចំពោះរុស្ស៊ី នឹងមិនអាចបញ្ចុះបញ្ចូលឱ្យទីក្រុងមូស្គូបញ្ឈប់ការប្រយុទ្ធនៅអ៊ុយក្រែនឡើយ ហើយវាចាំបាច់ត្រូវតែបង្កើនសម្ពាធបន្ថែមទៀតលើវិមានក្រឹមឡាំង។
នៅថ្ងៃអាទិត្យប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានថ្លែងអំណរគុណដល់មេដឹកនាំអឺរ៉ុប ដែលបានគាំទ្រការទាមទាររបស់លោកឱ្យមានកៅអីមួយនៅក្នុងកិច្ចចរចាសន្តិភាព ខណៈដែលសហរដ្ឋអាមេរិក និងរុស្ស៉ីត្រៀមរៀបចំកិច្ចប្រជុំកំពូល ដែលទីក្រុងកៀវបារម្ភថា អាចនឹងសម្រេចជោគវាសនារបស់ខ្លួន ដោយគ្មានការចូលរួម។ នេះបើយោងតាមការចុះផ្សាយដោយ ទីភ្នាក់ងារសារព័ត៌មាន Reuters។កិច្ចប្រជុំកំពូលនេះ ត្រូវបានប្រកាសឡើងដោយប្រធានាធិបតីអាមេរិក លោក ដូណាល់ ត្រាំ ដែលគ្រោងនឹងជួបជាមួយប្រធានាធិបតីរុស្ស៉ី លោក វ្ល៉ាឌីមៀ ពូទីន នៅថ្ងៃទី១៥ ខែសីហា ខាងមុខនេះ នៅរដ្ឋអាឡាស្កា។ ទោះបីជាមន្ត្រីសេតវិមានលើកឡើងថា លោក ត្រាំ បើកចំហចំពោះការចូលរួមរបស់លោក ហ្សេលេនស្គី ក៏ដោយ ក៏ការរៀបចំនៅពេលនេះគឺសម្រាប់តែកិច្ចប្រជុំទ្វេភាគីប៉ុណ្ណោះ។ ស្របពេលជាមួយគ្នានេះ វិមានក្រឹមឡាំងបានច្រានចោលលទ្ធភាពនៃការជួបជាមួយលោក ហ្សេលេនស្គី ដោយអះអាងថាលក្ខខណ្ឌមិនទាន់អំណោយផល។
ដើម្បីឆ្លើយតបនឹងក្តីបារម្ភនេះ មេដឹកនាំនៃចក្រភពអង់គ្លេស បារាំង អាល្លឺម៉ង់ អ៊ីតាលី និងសហភាពអឺរ៉ុប បានចេញសេចក្តីថ្លែងការណ៍រួមគ្នា ដោយសង្កត់ធ្ងន់ថា «មាគ៌ាឆ្ពោះទៅរកសន្តិភាព មិនអាចសម្រេចបានដោយគ្មានអ៊ុយក្រែនទេ»។ លោក ហ្សេលេនស្គី បានស្វាគមន៍ការគាំទ្រនេះ ដោយបានថ្លែងថា «ការបញ្ចប់សង្គ្រាមត្រូវតែមានភាពយុត្តិធម៌ ហើយខ្ញុំសូមថ្លែងអំណរគុណដល់អ្នករាល់គ្នាដែលឈរជាមួយអ៊ុយក្រែន... ដើម្បីសន្តិភាពនៅអ៊ុយក្រែន ដែលកំពុងការពារផលប្រយោជន៍សន្តិសុខដ៏សំខាន់នៃប្រជាជាតិអឺរ៉ុបរបស់យើង។»
គួរបញ្ជាក់ថា ក្តីបារម្ភរបស់អ៊ុយក្រែន កាន់តែខ្លាំងឡើងបន្ទាប់ពីលោក ត្រាំ បានលើកឡើងពីកិច្ចព្រមព្រៀងដែលអាចពាក់ព័ន្ធនឹង «ការដោះដូរទឹកដីមួយចំនួន»។ ភាគីរុស្ស៉ីបានប្រតិកម្មយ៉ាងខ្លាំងក្លា ដោយអតីតប្រធានាធិបតីរុស្ស៉ី លោក Dmitry Medvedev បានហៅមេដឹកនាំអឺរ៉ុបថាជា «ពួកអឺរ៉ុបភ្លើ» ដែលព្យាយាមរារាំងកិច្ចប្រឹងប្រែងរបស់អាមេរិក។ អ្នកវិភាគរុស្ស៉ីមួយចំនួនបានលើកឡើងថា ប្រសិនបើលោក ត្រាំ និងលោក ពូទីន ឈានដល់កិច្ចព្រមព្រៀងដោយផ្ទាល់ អឺរ៉ុប និងអ៊ុយក្រែននឹងគ្មានជម្រើសអ្វីក្រៅពីទទួលយកឡើយ៕
