វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2993 នាក់
ម្សិលមិញ 3717 នាក់
សរុប 14151326 នាក់
ចិន៖ ប្រព័ន្ធផ្សព្វផ្សាយ CCTV បានរាយការណ៍ថា ប្រធានាធិបតីចិន ស៊ី ជីនពីង (Xi Jinping) បានប្រាប់ទៅកាន់អតីតប្រមុខដឹកនាំកោះតៃវ៉ាន់ ម៉ា យីងចូវ (Ma Ying-jeou) កាលពីថ្ងៃពុធទី១០មេសាសប្តាហ៍នេះថា សកម្មភាពជ្រៀតជ្រែកពីផ្នែកខាងក្រៅ មិនអាចបញ្ឈប់ "ការបង្រួបបង្រួម" រវាងចិននិងតៃវ៉ាន់បានឡើយ ហើយគ្មានបញ្ហាណាដែលថាមិនអាចពិភាក្សាគ្នាបានដែរ ។
នៅក្នុងជំនួបជាមួយលោកម៉ា (Ma) ស្ថិតនៅឯសាលមហាប្រជាជនទីក្រុងប៉េកាំង ប្រមុខដឹកនាំប្រទេសចិន បាននិយាយថា ប្រជាជនរស់នៅផ្នែកទាំងសងខាងនៃច្រកសមុទ្រនេះ សុទ្ធតែជាប្រជាជនចិន ។តែ លោកប្រធានាធិបតី ស៊ី ជីនពីង ក៏មិនបានធ្វើការអត្ថាធិប្បាយជាសាធារណៈណាមួយឡើយ ពាក់ព័ន្ធនឹងការបោះឆ្នោតជ្រើសរើសប្រធានាធិបតីនៅកោះតៃវ៉ាន់កាលពីខែមករា ដោយអ្នកទទួលបានជ័យជម្នះនាពេលនោះ បានទៅលើអនុប្រធានាធិបតីបច្ចុប្បន្ន លោក ឡៃ ជីងតេ (Lai Ching-te) ដែលនឹងចូលកាន់តំណែងនៅថ្ងៃទី ២០ ខែឧសភា ដោយត្រូវបានរដ្ឋធានីប៉េកាំងចាត់ទុកថា ជាអ្នកបំបែកខ្លួនយ៉ាងគ្រោះថ្នាក់ជាទីបំផុតនោះទេ ។
ប្រព័ន្ធផ្សព្វផ្សាយរដ្ឋចិន CCTV បានរាយការណ៍ដូច្នេះថា «នារសៀលថ្ងៃទី១០ ខែមេសានេះ អគ្គលេខាធិការបក្សកុម្មយនិស្តចិន លោក ស៉ី ជីនពីង បានជួបជាមួយគណប្រតិភូ ដែលដឹកនាំដោយ លោក Ma Ying-jeou នៅទីក្រុងប៉េកាំង»។ កិច្ចពិភាក្សានេះ គឺជាជំនួបដ៏កម្រមួយរវាងមេដឹកនាំបច្ចុប្បន្នឬអតីតមេដឹកនាំ នៅទីក្រុងប៉េកាំងនិងទីក្រុងតៃប៉ិ ហើយជាលើកទីមួយ គិតចាប់តាំងពីកិច្ចប្រជុំកំពូលរវាងលោក ស៉ី និងលោក Ma កាលពីឆ្នាំ២០១៥ នៅប្រទេសសិង្ហបុរី ដែលកាលនោះ លោក Ma កាន់តំណែងជា មេដឹកនាំតៃវ៉ាន់ នៅឡើយ។អតីតមេដឹកនាំតៃវ៉ាន់រូបនេះ បានចាប់ផ្តើមដំណើរទស្សនកិច្ចនៅប្រទេសចិន កាលពីថ្ងៃទី១ ខែមេសា ក្នុងអ្វីដែលលោកហៅថា បេសកកម្មសន្តិភាព ដើម្បីព្យាយាមជួយ បន្ធូរបន្ថយភាពតានតឹងជាមួយទីក្រុងប៉េកាំង។ កោះតៃវ៉ាន់ត្រូវចិនចាត់ទុកជាផ្នែកនៃទឹកដីរបស់ខ្លួន។ លោក Ma ធ្លាប់ធ្វើជាមេដឹកនាំតៃវ៉ាន់ កាលពីចន្លោះឆ្នាំ២០០៨ ដល់ឆ្នាំ២០១៦ និងតំណាងឱ្យគណបក្ស Kuomintang (KMT) ដែលមាននិន្នាការចង់ធ្វើឱ្យទំនាក់ទំនង មានភាពប្រសើរឡើងជាមួយចិន។
គួរបញ្ជាក់ថា កិច្ចប្រជុំកំពូលរបស់លោក ជាមួយលោក ស៉ី ជីនពីង កាលពីឆ្នាំ២០១៥ បានជួយឱ្យទំនាក់ទំនងនៅត្រើយទាំងសងខាង នៃច្រកសមុទ្រតៃវ៉ាន់ ទទួលបានភាពប្រសើរឡើង ប៉ុន្តែវាបានធ្លាក់ចុះទៅវិញ ចាប់តាំងពីការជាប់ឆ្នោតរបស់លោកស្រី Tsai Ing-wen មកពីគណបក្សកាន់អំណាចបច្ចុប្បន្នគឺ DPP។ ការជាប់ឆ្នោតជាមេដឹកនាំថ្មី កាលពីខែមករា ដើមឆ្នាំនេះ របស់លោក Lai Ching-te ដែលបច្ចុប្បន្នមានតួនាទីជាមេដឹកនាំរងតៃវ៉ាន់ ទំនងជានឹងមិនធ្វើឱ្យទំនាក់ទំនងជាមួយចិន ល្អប្រសើរជាងមុននោះឡើយ ដ្បិតរូបលោកត្រូវបានទីក្រុងប៉េកាំង ចាត់ទុកជាបុគ្គលចង់បំបែករដ្ឋដ៏គ្រោះថ្នាក់ម្នាក់។
ដោយឡែកនៅតៃប៉ិ មេដឹកនាំជាប់ឆ្នោតនៅកោះតៃវ៉ាន់ លោក Lai Ching-te នាថ្ងៃពុធនេះ បានសម្រេចតែងតាំង លោក Cho Jung-tai ដែលជាអតីតអគ្គលេខាធិការគណបក្សកាន់អំណាច DPP ឱ្យធ្វើជានាយករដ្ឋមន្ត្រីរបស់លោក ខណៈការតែងតាំងតួនាទីដទៃទៀត ដូចជាតំណែងរដ្ឋមន្ត្រីការបរទេសជាដើម នឹងត្រូវប្រកាសក្នុងពេលឆាប់ៗ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃពុធ ទី១០ ខែមេសា ឆ្នាំ២០២៤។
នៅក្រោមប្រព័ន្ធរដ្ឋាភិបាលរបស់តៃវ៉ាន់ មេដឹកនាំប្រធានាធិបតីគឺជាអ្នកតែងតាំងនាយករដ្ឋមន្ត្រី ហើយបន្ទាប់មកនាយករដ្ឋមន្ត្រី គឺជាអ្នកតែងតាំងសមាជិកនៃគណៈរដ្ឋមន្ត្រី ដែលតម្រូវឱ្យមានការសម្រេចចុងក្រោយពីមេដឹកនាំ។ នាយករដ្ឋមន្ត្រីថ្មី រួមជាមួយគណៈរដ្ឋមន្ត្រីរបស់លោក នឹងមិនទាន់ចូលកាន់តួនាទីរបស់ខ្លួនឡើយ រហូតទាល់តែលោក Lai ស្បថចូលកាន់តំណែងជាផ្លូវការ នៅថ្ងៃទី២០ ខែឧសភា។ លោក Cho បានប្រាប់ក្រុមអ្នកសារព័ត៌មានថា រូបលោកនឹងប្រកាសពីសមាសភាពនៃសមាជិកគណៈរដ្ឋមន្ត្រីរបស់លោក ក្នុងពេលឆាប់ៗ។
បើតាមប្រព័ន្ធផ្សព្វផ្សាយនៅតៃវ៉ាន់ផ្ទាល់ អគ្គលេខាធិការក្រុមប្រឹក្សាសន្តិសុខជាតិ លោក Wellington Koo ទំនងនឹងត្រូវឡើងជា រដ្ឋមន្ត្រីការពារជាតិថ្មី បន្តពីលោក Chiu Kuo-cheng ខណៈរដ្ឋមន្ត្រីការបរទេសបច្ចុប្បន្ន គឺលោក Joseph Wu ទំនងជានឹងប្តូរតួនាទីទៅកាន់តំណែងជំនួសលោក Koo ជាប្រធានក្រុមប្រឹក្សាសន្តិសុខជាតិវិញ។ លោក Lai ដែលសព្វថ្ងៃកាន់តួនាទីជាមេដឹកនាំរងតៃវ៉ាន់ បានទទួលជ័យជម្នះក្នុងការបោះឆ្នោតជ្រើសរើសមេដឹកនាំអាណត្តិថ្មី កាលពីខែមករា ដើមឆ្នាំនេះ ប៉ុន្តែគណបក្ស DPP បានបាត់បង់សំឡេងភាគច្រើននៅក្នុងសភា។ គណបក្សប្រឆាំងធំបំផុតរបស់តៃវ៉ាន់ Kuomintang (KMT) ឈ្នះបានអាសនៈច្រើនជាងគេ ប៉ុន្តែមិនគ្រប់គ្រាន់ដើម្បីបង្កើតសំឡេងភាគច្រើន ដោយខ្លួនឯងនៅក្នុងសភា។ អាសនៈដទៃទៀត ត្រូវបានឈ្នះដោយគណបក្ស Taiwan People's Party (TPP) ដែលដឹកនាំដោយអភិបាលក្រុងតៃប៉ិ លោក Ko Wen-je៕