វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 666 នាក់
ម្សិលមិញ 8227 នាក់
សរុប 14127547 នាក់
មីយ៉ានម៉ា៖តុលាការមីយ៉ាន់ម៉ានៅថ្ងៃទី២៩ខែកញ្ញា បានកាត់ទោសលោកស្រីអោង សានស៊ូជី និងអ្នកសេដ្ឋកិច្ចជនជាតិអូស្ត្រាលី Sean Turnell ឱ្យទទួលទោសជាប់គុកបន្ថែម៣ឆ្នាំទៀតពីបទបំពានច្បាប់សម្ងាត់របស់ជាតិ។សារព័ត៌មាន Reuters នៅថ្ងៃព្រហស្បតិ៍ ទី២៩ ខែកញ្ញា ឆ្នាំ២០២២បានផ្សាយថា តុលាការនៅប្រទេសមីយ៉ាន់ម៉ា ដែលបច្ចុប្បន្នស្ថិតនៅក្រោមការគ្រប់គ្រងរបស់រដ្ឋាភិបាលយោធា បានសម្រេចផ្តន្ទាទោសអតីតមេដឹកនាំ លោកស្រី អោងសាន ស៊ូជី ព្រមទាំងអតីតទីប្រឹក្សាសេដ្ឋកិច្ចឱ្យជាប់គុកម្នាក់៣ឆ្នាំបន្ថែមទៀត។
លោកស្រី ស៊ូជី និងលោក ថឺនណេល ត្រូវបានចោទប្រកាន់ពីបទបំពានច្បាប់កិច្ចការសម្ងាត់របស់រដ្ឋ ដែលមានទម្ងន់ទោសជាអតិបរមាគឺ ១៤ឆ្នាំក្នុងពន្ធនាគារ ខណៈដែលអ្នកទាំងពីរសុទ្ធតែបានប្រកាន់ជំហរថា មិនបានប្រព្រឹត្តអ្វីខុសដូចការចោទប្រកាន់នេះឡើយ។ ប្រភពដែលដឹងឮអំពីសវនាការកាត់ទោស ដែលត្រូវបានធ្វើឡើងដោយមិនបើកចំហ នៅឯរដ្ឋធានីណៃពិដោនេះ បានបង្ហើបប្រាប់ថា លោកស្រី ស៊ូជី និងលោក ថឺនណេល ត្រូវបានផ្តន្ទាទោសដាក់ពន្ធនាគារម្នាក់៣ឆ្នាំ។
ក្នុងសំណុំរឿងដាច់ដោយឡែក កាលពីពេលកន្លងមក លោកស្រី អោងសាន ស៊ូជី គឺត្រូវបានតុលាការកាត់ទោសឱ្យជាប់ពន្ធនាគារសរុបរយៈពេលជាង ១៧ឆ្នាំរួចស្រេចហើយ ដោយការចោទប្រកាន់ភាគច្រើន ពាក់ព័ន្ធនឹងអំពើពុករលួយ។ ពាក់ព័ន្ធនឹងការឃុំខ្លួនលោក សន ថឺនណេល នៅមីយ៉ាន់ម៉ា រដ្ឋាភិបាលអូស្ត្រាលីធ្លាប់បានទទូចឱ្យមានការដោះលែងលោកវិញជាបន្ទាន់ ហើយច្រានចោលការសម្រេចចិត្តរបស់តុលាការមីយ៉ាន់ម៉ា ក្នុងការបើកសវនាការជំនុំជម្រះក្តីលើរូបលោក។
រដ្ឋមន្ត្រីការបរទេសអូស្ត្រាលី លោកស្រី ផេននី វង់ (Penny Wong) បាននិយាយនៅថ្ងៃព្រហស្បតិ៍នេះថា ប្រទេសអូស្ត្រាលីសូមបដិសេធសេចក្តីសម្រេចរបស់តុលាការមីយ៉ាន់ម៉ា ដែលកាត់ទោសឲ្យលោកសាស្ត្រាចារ្យ សន ថឺនណេល (Sean Turnell) ហើយអំពាវនាវឲ្យដោះលែងរូបលោកជាបន្ទាន់។ នេះបើយោងតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី២៩ ខែកញ្ញា ឆ្នាំ២០២២។លោកស្រី ផេននី វង់ បានគូសបញ្ជាក់ថា «រដ្ឋាភិបាលអូស្ត្រាលីសូមច្រានចោលការចោទប្រកាន់ទាំងឡាយ ដែលប្រឆាំងនឹងលោកសាស្ត្រាចារ្យ ថឺនណេល កំលុងពេលជាង១៩ខែ ដែលលោកត្រូវបានគេឃុំឃាំងដោយអយុត្តិធម៌ ដោយរបបយោធាមីយ៉ាន់ម៉ា»។ អូស្ត្រាលី នឹងបន្តតស៊ូមតិសម្រាប់ការដោះលែង និងឲ្យលោកសាស្ត្រាចារ្យអាចត្រឡប់មក អូស្ត្រាលីវិញ.។សម្តេចតេជោហ៊ុនសែនក្នុងនាមជាប្រធានអាស៊ានក៏ធ្លាប់បានអន្តរាគមន៍ឲ្យមានការដោះលែងដែរតែមេដឹកនាំយោធាលោកមីនអុងឡាំងធើង៉ើយ!៕