វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2722 នាក់
ម្សិលមិញ 6677 នាក់
សរុប 14150298 នាក់
ប្រទេសចិន៖ នៅថ្ងៃពុធនេះ ទីក្រុងប៉េកាំងបានបដិសេធផ្តល់ការបកស្រាយអំពីមូលហេតុ នៅពីក្រោយការបណ្តេញរដ្ឋមន្ត្រីការពារជាតិចិន លោកលីស្ហាងហ្វ៊ូ( Li Shangfu )មួយថ្ងៃបន្ទាប់ពីរូបលោក ត្រូវបានដកហូតតំណែងជាផ្លូវការ ក្រោយបាត់មុខអស់រយៈពេលប្រហែល២ខែ។ ទីភ្នាក់ងារព័ត៌មាន AFP នៅថ្ងៃពុធ ទី២៥ ខែតុលា ឆ្នាំ២០២៣បានឲ្យដឹងថាកាលពីថ្ងៃអង្គារទី២៤តុលា ទីក្រុងប៉េកាំងបានប្រកាសថា លោក Li ត្រូវបានដកតំណែងជារដ្ឋមន្ត្រីការពារជាតិ ខណៈអតីតរដ្ឋមន្ត្រីការបរទេស លោក Qin Gang ក៏ត្រូវបានដកតំណែងចេញពីទីប្រឹក្សារដ្ឋថែមទៀត។
កាលពីខែកក្កដាឆ្នាំ២០២៣ ចិនបានដកតំណែងលោក Qin Gang ហើយឱ្យលោកវ៉ាងយី( Wang Yi)អតីតរដ្ឋមន្ត្រីការបរទេសនិងជាប្រធានគណៈទាក់ទងប្រទេសគណបក្ស ចូលកាន់តួនាទីជំនួសវិញ បន្ទាប់ពីលោក Qin បានបាត់មុខពីក្រសែភ្នែកសាធារណៈនជអស់រយៈខ្ទង់១ខែ។ទាក់ទងការដកតំណែងលោក Li អ្នកនាំពាក្យក្រសួងការបរទេសចិន លោកស្រីម៉ៅនិង( Mao Ning )បានប្រាប់ទៅកាន់ ក្រុមអ្នកសារព័ត៌មានថា លោកស្រីមិនមានព័ត៌មានផ្សេងទៀត ដែលអាចផ្តល់ឱ្យបន្ថែមឡើយ។ កាលពីពេលលោក Qin Gang ត្រូវបានដកតំណែង ទីក្រុងប៉េកាំងក៏មិនបានផ្តល់មូលហេតុដូចគ្នាផងដែរ។
ទាំងលោកឈិង( Qin )និងលោកលី( Li )ត្រូវបានក្រុមអ្នកជំនាញជឿជាក់ថា គឺប្រធានាធិបតីចិន លោក ស៉ី ជីនពីង ជាអ្នកជ្រើសរើសដោយផ្ទាល់ សម្រាប់តួនាទីជារដ្ឋមន្ត្រីការបរទេស និងជារដ្ឋមន្ត្រីការពារជាតិ កាលពីខែមីនាឆ្ន២០២៣។ តែនៅរវាងចុងខែសីហា លោកបានបាត់មុខឈឹងតែម្តង បន្ទាប់ពីបានធ្វើដំណើរទៅរុស្ស៊ី និងទៅបេឡារុស។ កាសែតអង់គ្លេស Financial Times ដែលស្រង់ប្រភពពីមន្ត្រីរដ្ឋាភិបាលអាមេរិក៣នាក់ផ្សេងគ្នា បានចុះផ្សាយថា គឺលោក Li Shangfu ទំនងជាបានបាត់ខ្លួន ដោយសារតែបានរងការស៊ើបអង្កេតផ្ទៃក្នុង ពាក់ព័ន្ធនឹងករណីប្រព្រឹត្តិអំពើពុករលួយ។
ការដកហូតតំណែងលោករដ្ឋមន្ត្រីក្រសួងកាពារជាតិចិន ដោយពុំមានបញ្ជាក់ពីមូលហេតុនេះ គឺវាស្ថិតនៅក្នុងបរិបទមួយ ដែលរដ្ឋអំណាចចិន ទើបតែបានរុះរើថ្នាក់ដឹកនាំនៃការិយាល័យមួយ នៅក្រសួងការពារជាតិ ដែលទទួលបន្ទុកអាវុធមីស៊ីលយុទ្ធសាស្ត្រា កាលពីខែកក្កដា។ បណ្តាញព័ត៌មានចិនបានចុះផ្សាយ អតីតប្រធាននៃនាយកដ្ឋាននេះ ទំនងជាត្រូវរងការចោទប្រកាន់ថាបានប្រព្រឹត្តិអំពើពុករលួយផងដែរ។ ជាមួយគ្នាគ្នានេះ ក៏មានពាក្យចចាមអារ៉ាមផងដែរ ថាករណីពុករលួយនេះ វាមានពាក់ព័ន្ធទៅដល់ លោក Li Shangfu ព្រោះលោកធ្លាប់ជាប្រធានអគ្គនាយកដ្ឋានគ្រឿងសព្វាវុធ។ នេះតាមការលើកឡើង របស់លោកស្រី Sun Yun ប្រធានក្រុមស្រាវជ្រាវនៅមជ្ឈមណ្ឌល Stimsom នៅក្រុងវ៉ាស៊ីនតោន។
កាលពីថ្ងៃអង្គារទី២៤តុលាដែរ រដ្ឋមន្ត្រីចិន២នាក់ទៀត ក៏ត្រូវបានដកហូតចេញពីតំណែងដែរ គឺរដ្ឋមន្ត្រីក្រសួងហិរញ្ញវត្ថុ លោក Liu Kun និងរដ្ឋមន្ត្រីក្រសួងវិទ្យសាស្ត្រនិងបច្ចេកវិទ្យា លោក Wang Zhigang។ លោក Lao Fo’an នឹងឡើងមកធ្វើរដ្ឋមន្ត្រីហិរញ្ញវត្ថុថ្មី ចំណែករដ្ឋមន្ត្រីវិទ្យាសាស្ត្រនិងបច្ចេកវិទ្យា គឺលោក Yin Hejun។យោងតាមការវិភាគរបស់លោក Neil Thomas អ្នកស្រាវជ្រាវ នៅវិទ្យាស្ថាន Asia Society Policy គឺការដកហូតតំណែងចុះឡើងភ្លាមៗនេះ វាអាចជាលទ្ធផលនៃការមិនចុះសម្រុង ជាមួយនឹងមន្ត្រីក្រោមឱវាទតាមក្រសួង ដែលមិនពេញចិត្តនឹងរដ្ឋមន្ត្រីដែលលោកស៊ី ជីនពីងបានតែងតាំងមក។ តែយ៉ាងណាក៏ដោយ ការរុះរើតំណែងនេះមិនមានអ្វីប៉ះពាល់ទៅដល់ កម្លាំងអំណាចនយោបាយដ៏ខ្លាំងរបស់លោកស៊ី ជីនពីង ទេ ព្រោះថាទាំងលោក Qin Gang ទាំងលោក Li Shangfu មិនមែនជាមនុស្សស្ថិតនៅក្នុងក្រុម ដែលកៀកខ្លាំងនឹងលោកស៊ី ជីនពីងទេ៕