ឧត្តមសេនីយ៍ឯក ហ៊ុន ម៉ានិត៖ កងអង្គរក្ស បានក្លាយជាកម្លាំងស្នូល ក្នុងការការពារសុវត្ថិភាពសន្តិសុខថ្នាក់ដឹកនាំ និងលើការការពារជាតិ បូរណភាពទឹកដី
ភ្នំពេញ៖ ឧត្តមសេនីយ៍ឯក ហ៊ុន ម៉ានិត អគ្គនាយក នៃអគ្គនាយកដ្ឋានស្រាវជ្រាវចារកិច្ច ក្រសួងការពារជាតិ និងជាមេបញ្ជាការរង កងទ័ពជើងគោក តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នាថ្ងៃទី៨ ខែមេសា ឆ្នាំ២០២៤នេះ បានអញ្ជើញជាអធិបតី ក្នុងពិធីបិទវគ្គហ្វឹកហ្វឺនបណ្តុះបណ្តាលជំនាញអង្គរក្សពិសេស ជំនាន់ទី២៩និង បើកវគ្គបន្ ជំនាន់ទី៣០ និងសម្ពោធអគារមន្ទីរពេទ្យថ្មី ចំនួន ១ខ្នង កម្ពស់ពីរជាន់ ព្រមទាំងសម្ពោធសមិទ្ធផលនានា នៅមជ្ឈមណ្ឌលហ្វឹកហ្វឺនបញ្ជាការដ្ឋានអង្គរក្ស ស្ថិតនៅភូមិសាស្ត្រភ្នំស្រង់ ស្រុកគងពិសី ខេត្តកំពង់ស្ពឺ។
ក្នុងនាមសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត, ឧត្តមសេនីយ៍ឯក ហ៊ុន ម៉ានិត បានថ្លែងនូវការកោតសរសើរ និងវាយតម្លៃខ្ពស់ចំពោះការរីកចម្រើន កងយោធពលខេមរភូមិន្ទ ជាពិសេសនាយទាហាន នាយទាហានរង ពលទាហាន និងសិក្ខាកាម បញ្ជាការដ្ឋានអង្គរក្ស ដែលមានស្មារតីជឿជាក់ដ៏ជ្រាលជ្រៅ លើថ្នាក់ដឹកនាំ និងយកអស់កម្លាំងកាយ-ចិត្ត ដើម្បីក្រេបជញ្ជក់នូវរាល់ ចំណេះជំនាញ ឆ្លើយតបនូវកាតព្វកិច្ចចាំបាច់សំដៅលើការងារ ការពារសន្តិសុខ សុវត្តិភាពជូនសម្តេចតេជោ ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ព្រមទាំងក្រុមគ្រួសារ និងការពារអធិបតេយ្យភាពជាតិ បូរណភាពទឹកដី ស្ថិរភាពសន្តិសុខសង្គមជាតិ ក៏ដូចជាការអភិវឌ្ឍអង្គភាព និងការបណ្តុះបណ្តាលធនធានមនុស្ស។
ឧត្តមសេនីយ៍ឯក ហ៊ុន ម៉ានិត បានបញ្ជាក់ថា កងអង្គរក្ស បានក្លាយជាកម្លាំងស្នូល ក្នុងការការពារសុវត្ថិភាពសន្តិសុខថ្នាក់ដឹកនាំ ប្រមុខរាជរដ្ឋាភិបាល និងលើការការពារជាតិបូរណភាពទឹកដី នៃព្រះរាជាណាចក្រកម្ពុជា។ កងទ័ពកម្ពុជា ត្រូវមានភាពស្មោះត្រង់ និងបានផ្តាំផ្ញើអនុវត្តនូវអនុសាសន៍របស់សម្តេចតេជោ ១០ចំណុច និងអនុសាសន៍របស់សម្តេចធិបតី ៥ចំណុច ពិសេសការប្រយុទ្ធប្រឆាំងបញ្ហាគ្រឿងញៀន ដើម្បីសុខភាពខ្លួន ក្រុមគ្រួសារ និងសង្គមជាតិ ហើយត្រូវយកចិត្តទុកដាក់លើការ លាក់ការណ៍សំងាត់កងទ័ព ថែរក្សាយោធបរិក្ខារគ្រឿងបំពាក់ ហ្វឹកហ្វឺន ត្រៀមលក្ខណ:សម្ភារឧបករណ៍ ចូលរួមជួយសង្គ្រោះប្រជាពលរដ្ឋ ជួបគ្រោះមហន្តរាយផ្សេងៗ។
ឧត្តមសេនីយ៍ឯក ណុប រ័ត្ននិមល មេបញ្ជាការរង បញ្ជាការដ្ឋានអង្គរក្ស បានឲ្យរាយាការណ៍ឲ្យដឹងថា បញ្ជាការដ្ឋានអង្គរក្ស បង្កើតមជ្ឈមណ្ឌលហ្វឹកហ្វឺននៅឆ្នាំ២០០៤ បានបើកវគ្គហ្វឹកហ្វឺនបណ្តុះបណ្តាល និងបំប៉នសិក្ខាកាមរហូតមកដល់បច្ចុប្បន្ននេះ រយៈពេល ២០ឆ្នាំ បានចំនួន ៤៨វគ្គ ស្មើនឹង ១៣,០៦៧នាក់ ក្នុងនោះ ស្រី៣៨នាក់។ ក្រោយពីផ្លាស់ប្តូរទីតាំងភូមិសាស្ត្រ ពីស្រុកកណ្តាលស្ទឹង ខេត្តកណ្តាល មករៀបចំកសាងមជ្ឈមណ្ឌល ហ្វឹកហ្វឺនថ្មី នៅភូមិស្វាយ ឃុំស្រង់ ស្រុកគងពិសី ខេត្តកំពង់ស្ពឺ ក្នុងឆ្នាំ២០១៩ មជ្ឈមណ្ឌលហ្វឹកហ្វឺនបណ្តុះបណ្តាល និងបំប៉ន បានចំនួន ១៥វគ្គ រួមមាន៖ វគ្គជំនាញអង្គរក្សពិសេស ចំនួន០៥វគ្គ សិក្ខាកាម ២,០៨៧នាក់ សិក្ខាកាមផ្ញើ១៨៥នាក់- វគ្គបញ្ជាការសេនាធិការ ចំនួន០៤វគ្គ សិក្ខាកាម ៤០០នាក់ វគ្គថែទាំបច្ចេកទេស បើកបរ អនុវត្តបាញ់គ្រាប់ពិត រថក្រោះ រថពាសដែកចំនួន ០២វត្ត សិក្ខាកាម ២៣០នាក់ និងវគ្គបណ្តុះបណ្តាលកាំជ្រួចការពារអាកាសរយៈកម្ពស់ទាប Smart Com-Smart Hunter និង QW3 ចំនួន០៨វគ្គ សិក្ខាកាម ៦០០នាក់។
វគ្គហ្វឹកហ្វឺនបណ្តុះបណ្តាលជំនាញអង្គរក្សពិសេស ជំនាន់ទី២៩ មានសិក្ខាកាមរួម ចំនួន ៤៣៧នាក់ ក្នុងនោះ សិក្ខាកាមមកពីបញ្ជាការដ្ឋានអង្គរក្ស ចំនួន ៤២៧នាក់ និងសិក្ខាកាមបញ្ជាការដ្ឋានការពារកោះឆ្នេរ ចំនួន១០នាក់។ សូមជម្រាបថា ក្រោមការដឹកនាំរបស់ នាយឧត្តមសេនីយ៍ កិត្តិសង្គហបណ្ឌិត ហ៊ីង ប៊ុនហៀង និងនាយឧត្តមសេនីយ៍ ហ៊ុយ ពិសិដ្ឋ បានដឹកនាំកសាងមជ្ឈមណ្ឌលហ្វឹកហ្វឺន គិតមកដល់បច្ចុប្បន្នមានអគារសរុបចំនួន ៥៨ខ្នង បណ្ណាល័យចំនួន ១ ស្ថានីយប្រេងឥន្ធនៈ១ ស្ថានីយឧបសគ្គទីខ្ពស់១កន្លែង សំណង់ខ្ពស់សម្រាប់ហ្វឹកហាត់បាញ់អាវុធរយៈចម្ងាយឆ្ងាយ ១កន្លែង ឧបសគ្គសម្រាប់ពង្រឹង កាយសម្បទា ២៥ឧបសគ្គ អណ្តូងទឹក ស៊ីទែនទឹក ២១កន្លែង និងអគារមន្ទីរពេទ្យថ្មី ចំនួន ១ខ្នង កម្ពស់ពីរជាន់ ដែលទើបកាត់ខ្សែប្តូរដាក់ឱ្យប្រើប្រាស់នាឱកាសនេះ រួមជាមួយអគារទីបញ្ជាការថ្មី១ខ្នង កម្ពស់២ជាន់ អគារការិយាល័យ អមទីបញ្ជាការ កំពុងសាងសង់ ជាអំណោយដ៏ថ្លៃថ្លារបស់សម្តេចតេជោ និងសម្តេចកិត្តិព្រឹទ្ធបណ្ឌិត សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត និងបន្តធ្វើផ្លូវចាក់កៅស៊ូ ក្នុងមជ្ឈមណ្ឌលហ្វឹកហ្វឺនទាំងមូល។ក្នុងឱកាសនោះដែរ ឧត្តមសេនីយ៍ឯក ហ៊ុន ម៉ានិត បានអំណោយដ៏ថ្លៃថ្លារបស់សម្តេចធិបតី នាយករដ្ឋមន្ត្រី និងលោកជំទាវបណ្ឌិត ឧបត្ថម្ភដល់បញ្ជាការដ្ឋានអង្គរក្ស មានអង្ករ ចំនួន២០តោន, ត្រីខ ចំនួន១៥០កេស និងថវិកាចំនួន ១៥០លានរៀល៕
