ក្រុមសង្គមស៊ីវីលជម្រុញឲ្យរាជរដ្ឋាភិបាលចេញច្បាប់ស្តីពីគ្រឿងស្រវឹង
ភ្នំពេញ៖ តំណាងអង្គការ សមាគម សហគមន៍ និងប្រជាពលរដ្ឋខ្មែរ ប្រមាណ២៥០នាក់ បានជម្រុញឲ្យរារដ្ឋាភិបាលធ្វើអភិបាលគ្រឿងស្រវឹង និង ជម្រុញការអនុម័តច្បាប់ស្តីពីការគ្រប់គ្រឿងស្រវឹងក្នុងពិធីជួបជុំគ្នាមួយ នៅព្រឹកថ្ងៃទី១៨ ខែកុម្ភៈ ឆ្នាំ២០២៤ ក្នុងបរិវេណវត្តសំពៅមាស រាជធានីភ្នំពេញ ។
មូលហេតុត្រូវបានតំណាងអង្គការ សមាគម សហគមន៍ និងប្រជាពលរដ្ឋខ្មែរ លើកឡើងថា ដោយបានមើលឃើញថា ការប្រើប្រាស់គ្រឿងស្រវឹងបានបង្កឱ្យមានគ្រោះថ្នាក់ចរាចរណ៍យ៉ាងធ្ងន់ធ្ង រួមទាំងបង្កឱ្យអំពើហិង្សាលើស្ត្រី កុមារ អសន្តិសុខសហគមន៍ ភាពឥតសណ្តាប់ធ្នាប់ និងជាបន្ទុកជម្ងឺជាង២០០មុខ ដូចជា ជំងឺថ្លើម ទឹកនោមផ្អែម ជំងឺមហារីក លើសសម្ពាធឈាម ជាពិសេសជំងឺគ្រោះថ្នាក់សរសៃឈាមខួរក្បាល ជាដើម។ល។ក្នុងសេចក្តីថ្លែងការណ៍នៃកិច្ចប្រជុំនេះ បានលើកឡើង ពីផលប៉ះពាល់បណ្តាលពីគ្រឿងស្រវឹង ដូចជាបង្កផលប៉ះពាល់យ៉ាងខ្លាំងដល់សុខភាពសាធារណៈ និង សីលធម៌សង្គម។ តាមការប្រមើលមើលមួយដែលចុះផ្សាយតាមគហទំព័រស្តាតធីស្តា (Statista)នៅឆ្នាំ២០២៤ បង្ហាញថាការផឹកគ្រឿងស្រវឹងក្នុងមនុស្សម្នាក់អាចកើនឡើងដល់ទៅ ២៧.៣៨ លីត្រ។ កាលណាអត្រានៃការប្រើប្រាស់គ្រឿងស្រវឹងកាន់តែខ្ពស់ អត្រាគ្រោះថ្នាក់ ក៏កាន់តែខ្ពស់ដែរ។
តាមរបាយការណ៍អង្គការសុខភាពពិភពលោកឆ្នាំ២០២២ គ្រឿងស្រវឹងបង្កឱ្យ មនុស្សស្លាប់ប្រមាណ ៣លាននាក់នៅលើពិភពលោកជារៀងរាល់ឆ្នាំ ជារួម១០វិនាទីមានមនុស្សម្នាក់ ស្លាប់។ គ្រោះថ្នាក់ចរាចរណ៍នៅក្នុងព្រះរាជាណាចក្រកម្ពុជាឆ្នាំ២០២៣ មានអ្នកស្លាប់ចំនួន១៥៩០ នេះបើតាមការបញ្ជាក់របស់អគ្គស្នងការនគរបាយជាតិកាលពីថ្ងៃទី១៨ ខែមករា ឆ្នាំ២០២៤។ គ្រោះថ្នាក់ ចរាចរណ៍ ធ្វើឱ្យខាតបង់ថវិកាប្រមាណជា៤៦៦.៨ លានដុល្លារក្នុងនៅឆ្នាំ២០១៩ (UNDP, Road Traffic Accidents in Cambodia)។
សេចក្តីថ្លែងការបានបញ្ជាក់ថា ដោយសារតែផលប៉ះពាល់ដ៏អាក្រក់នៃគ្រឿងស្រវឹង មកលើយុវវ័យ ស្ត្រី រួមទាំងប្រជាពលរដ្ឋទូទៅក៏ដូចជាសុខុមាលភាពសង្គម។សម្រាប់ជាជំហានវិជ្ជមានសំខាន់ក្នុងការកាត់បន្ថយគ្រោះថ្នាក់ដែលជាប់ពាក់ព័ន្ធនឹងគ្រឿងស្រវឹងក្រុមសង្គមស៊ីវីលបានជម្រុញទឹកចិត្តរដ្ឋាភិបាលឱ្យគិតគូរពីវិធានការមួយចំនួនដើម្បីទប់ស្កាត់ផលប៉ះពាល់ទាំងនោះ រួមមានការធ្វើក្រមប្រតិបត្តិដើម្បីដាក់កម្រិតលើការផ្សាយពាណិជ្ជកម្ម ក៏ដូចជាការលុបបំបាត់ផ្ទាំងប៉ាណូ ឬរូបភាពនៃការផ្សាយពាណិជ្ជកម្មផ្សេងៗតាមដងផ្លូវ ដែលក្រសួងពាក់ព័ន្ធរបស់រាជរដ្ឋាភិបាលកំពុងធ្វើ។ វិធានការទាំងនេះមានសារៈសំខាន់សម្រាប់ការដោះស្រាយបញ្ហាចំពោះមុខនាពេលបច្ចុប្បន្ននេះ តែការធ្វើច្បាប់ស្តីពីការគ្រប់គ្រងផលិតផលគ្រឿងស្រវឹងេជាវិធានការច្បាប់ដែលមិនអាចអត់បានក្នុងការដោះស្រាយបញ្ហាគ្រឿងស្រវឹងសម្រាប់រយៈពេលវែង។
ដើម្បីកាត់បន្ថយអត្រានៃការស្លាប់ខាងលើ ដែលបណ្តាលមកពីការប្រើប្រាស់គ្រឿងស្រវឹង តំណាង អង្គការ សមាគម សហគមន៍ និងតំណាងប្រជាពលរដ្ឋស្នើដល់រាជរដ្ឋាភិបាលកម្ពុជាពន្លឿនការអនុម័តច្បាប់ស្តីពីការត្រួតពិនិត្យផលិតផលគ្រឿងស្រវឹង ដែលបានព្រាង និង ឆ្លងអន្តរក្រសួងរួចរាល់កាលពីថ្ងៃទី០៨ ខែកក្កដា ឆ្នាំ២០១៥។ ការហាមឃាត់ការផ្សាយពាណិជ្ជកម្ម ការតម្លើងពន្ធ និងការដាក់កម្រិតភាពងាយរកបាននៃគ្រឿងស្រវឹងត្រូវតែមានចែងយ៉ាងច្បាស់នៅក្នុងច្បាប់នេះ។ ការអនុម័តច្បាប់ស្តីពីការត្រួតពិនិត្យផលិតផលគ្រឿងស្រវឹង ជាការលើកកម្ពស់គោលដៅអភិវឌ្ឍន៍ប្រកបដោយចេរភាពទាំង១៧ ដែលរាជរដ្ឋាភិបាលកម្ពុជាបានគាំទ្រ ជាពិសេសគោលដៅទី៣ អំពីសុខុមាលភាព និងសុខភាពល្អ ។
