វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 88 នាក់
ម្សិលមិញ 3717 នាក់
សរុប 14148421 នាក់
ភ្នំពេញ៖លោកស្រី ជូតា អេភើលឡៃនិន ស្នងការសហភាពអឺរ៉ុប ទទួល បន្ទុក ភាពជាដៃគូអន្តរជាតិបានមកបំ ពេញទស្សនកិច្ចផ្លូវការនៅកម្ពុជាចាប់ពីថ្ងៃទី ១២ -១៣ ខែមីនា ឆ្នាំ២០២៤។ក្នុងរយៈពេល២ថ្ងៃនៅស្រុកខ្មែរលោកស្រីបានជួបនិងធ្វើកិច្ចការច្រើនជាប្រយោជន៍ដល់ភាគិទាំងពីកម្ពុជានិងសហគមន៍អឺរ៉ុប។លោកស្រី Jutta Urpilainen ស្នងការសហភាពអឺរ៉ុបទទួលបន្ទុកកិច្ចការភាពជាដៃគូអន្តរជាតិ នៅថ្ងៃអង្គារទី១២មីនា បានជួបជជែកជាមួយប្រមុខរដ្ឋាភិបាលកម្ពុជា អំពីបញ្ហាសិទ្ធិមនុស្ស អភិបាលកិច្ចល្អ និងការណ៍ដែលកម្ពុជាត្រៀមចាកចេញពីប្រទេសក្រីក្រនៅពេលខាងមុខ។
មុនចាកចេញពីកម្ពុជា លោកស្រី Jutta Urpilainen នៅល្ងាចថ្ងៃពុធទី១៣មីនា បានធ្វើសន្និសីទសារព័ត៌មានមួយ ដោយបញ្ជាក់ថា លោកស្រីបានជួបជជែកជាមួយមន្ត្រីរបស់រដ្ឋាភិបាលកម្ពុជាច្រើន ជុំវិញការត្រៀមចាកចេញពីប្រទេសក្រីក្រក្នុងពេលខាងមុខ។ តាមលោកស្រីទទួលកិច្ចការភាពជាដៃគូអន្តរជាតិរបស់សហភាពអឺរ៉ុបរូបនេះ កម្ពុជានឹងអាចទទួលប្រព័ន្ធអនុគ្រោះថ្មីដែលលោកស្រី ហៅថា GSP Plus ក្រោយចាកចេញពីប្រទេសក្រីក្រ។ តែយ៉ាងណាការទទួលបាននោះ ត្រូវភ្ជាប់មកជាមួយនូវគោលការណ៍ដែលកម្ពុជាត្រូវគោរពតាមលក្ខខណ្ឌរបស់អន្តរជាតិ។
នៅឯព្រលានយន្តហោះអន្តរជាតិភ្នំពេញ មុនពេលជាកចេញ លោកស្រី ជូតា អេភើលឡៃនិន ស្នងការសហភាពអឺរ៉ុប មាន ប្រសាសន៍បញ្ជាក់ថា៖ដំណើរទស្សនកិច្ចរបស់ លោកស្រី ជាដំណើរទស្សនកិច្ចលើកដំបូង មកកាន់តំបន់អាស៊ីអាគ្នេយ៍ ហើយ កម្ពុជា ជាប្រទេសដំបូងដែលលោកស្រីបានមក ក្នុងតំបន់អាស៊ាន។លោកស្រី ជូតា អេភើលឡៃនិនស្នងការសហភាពអឺរ៉ុប បញ្ជាក់ថា៖កម្ពុជាមានការរីកចម្រើនជាលំដាប់។ជំនួបពិភាក្សាជាច្រើនគឺជាឱកាសដើម្បីចាប់យកកិច្ចសហប្រតិបត្តិការយូរអង្វែងរវាងកម្ពុជា និងសហភាពអឺរ៉ុបនិងចាប់ផ្តើមគំនិតផ្តួចផ្តើមថ្មីៗដើម្បីជំរុញការវិនិយោគបន្ថែមទៀត។
លោកស្រីស្នងការសហភាពអឺរ៉ុប បញ្ជាក់ទៀតថា៖សហភាពអឺរ៉ុបនិងរដ្ឋសមាជិករបស់ខ្លួនបានជួយដល់ប្រព័ន្ធអប់រំនៅកម្ពុជាអស់រយៈពេលជាង២០ឆ្នាំមកហើយជាមួយនិងជំនួយជាង២០០លាន អឺរ៉ូ។លោកស្រី ពិតជាមានសេចក្តីសោមនស្សរីករាយក្នុងការប្រកាសពីគំនិតផ្តួចផ្តើម មួយចំនួនដែលធ្វើឲ្យភាពជាដៃគូរវាងកម្ពុជា និងសហភាពអឺរ៉ុបកាន់តែស៊ីជម្រៅ ហើយក៏ជួយជំរុញការអនុវត្តយុទ្ធសាស្ត្រវិនិយោគច្រកទ្វារទៅកាន់សកលលោករបស់សហភាពអឺរ៉ុបនៅក្នុងប្រទេសផង ដែរ។ការវិនិយោគលើវិស័យអប់រំ ជំនាញ និងការស្រាវជ្រាវទាំងនេះក៏អាចទាក់ទាញ ក្រុមហ៊ុនអឺរ៉ុបកាន់តែច្រើន ឱ្យមកផ្តល់ការងារប្រកបគុណភាពខ្ពស់ដល់ប្រជា ពលរដ្ឋកម្ពុជាសម្រាប់ ការអភិវឌ្ឍន៍បៃតង និងឌីជីថលរបស់ប្រទេស។គំនិតផ្តួចផ្តើមរបស់ក្រុមអឺរ៉ុប (Team Europe Initiative) ចំនួនពីរ ដើម្បី បង្កើតការងារសមរម្យនៅក្នុងប្រទេសកម្ពុជា។
លោកស្រី ជូតា អេភើលឡៃនិន ស្នងការសហភាពអឺរ៉ុបទទួលបន្ទុកភាព ជាដៃគូអន្តរជាតិ បានបញ្ជាក់បន្តថា៖គំនិតផ្តួច ផ្តើមទីមួយគឺផ្តោតលើ "កសិពាណិជ្ជកម្មបៃតង និងការងារសមរម្យ" នឹងកៀងគរថវិកា ចំនួន១ពាន់លានអឺរ៉ូ ហើយមួយ ទៀតគឺផ្តោតលើ "រោងចក្របៃតង និងការ ងារសមរម្យ" ដែលនឹងកៀងគរថវិកាចំនួន ៤០០ លានអឺរ៉ូ។លោកស្រី ជូតា អេភើលឡៃនិន ស្នងការសហភាពអឺរ៉ុបទទួលបន្ទុកភាព ជាដៃគូអន្តរជាតិបានចុះហត្ថលេខាលើកម្មវិធីថ្មីរបស់សហភាពអឺរ៉ុបចំនួន៤នៅក្នុងពិធីមួយរួមគ្នាជាមួយ លោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុនៃប្រទេសកម្ពុជា ផងដែរ។
នៅថ្ងៃទី១៣ ខែមីនា ឆ្នាំ២០២៤ លោកស្រី ជូតា អេភើលឡៃនីន ស្នងការអឺរ៉ុបទទួលបន្ទុកភាពជាដៃគូអន្តរជាតិ បានរួមដំណើរជាមួយ លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីបំពេញទស្សនកិច្ចនៅរោងចក្រផលិតទឹកស្អាតបាក់ខែង។ រោងចក្រផលិតទឹកស្អាតបាក់ខែងនេះគឺជាគម្រោងវិនិយោគរបស់អឺរ៉ុបដ៏ធំជាងគេមួយនៅកម្ពុជា ក្រោមយុទ្ធសាស្ត្រវិនិយោគច្រកចូលទៅកាន់ពិភពលោករបស់អឺរ៉ុប (EU Global Gateway)។ ការវិនិយោគនេះបានជួយធ្វើឱ្យប្រសើរឡើងនូវការទទួលបានសេវាទឹកស្អាតសម្រាប់ប្រជាពលរដ្ឋជាង២លាននាក់ នៅរាជធានីភ្នំពេញ និងក្រុងតាខ្មៅ។
លោកស្រី ជូតា អេភើលឡៃនីន បានលើកឡើងថា៖ “ជាមួយនឹងការអនុវត្តប្រកបដោយជោគជ័យនៃគម្រោងទឹកស្អាតបាក់ខែងដំណាក់កាលទី១ និងដំណាក់កាលទី២ សហភាពអឺរ៉ុបនឹងបន្តគាំទ្រកម្ពុជា ក្នុងការផលិតទឹកស្អាត និងប្រកបដោយសុវត្ថិភាព ទាំងនៅក្នុងរាជធានីភ្នំពេញ និងតំបន់ផ្សេងទៀត។ តាមរយៈការបន្តកិច្ចសហប្រតិបត្តិការនេះ ខ្ញុំមានមោទនភាពក្នុងការប្រកាសការសន្យាផ្តល់ជំនួយឥតសំណងចំនួន១៣លានដុល្លាសហរដ្ឋអាមេរិក (១២ លានអឺរ៉ូ) ដើម្បីគាំទ្រដល់គម្រោងបាក់ខែងដំណាក់កាលទី៣ ដោយសហការជាមួយដៃគូអឺរ៉ុបរបស់យើង គឺទីភ្នាក់ងារអភិវឌ្ឍន៍បារាំង (AFD)។”
លោក ហែម វណ្ណឌី បានលើកឡើងថា៖ យើងសូមថ្លែងអំណរគុណដល់សហភាពអឺរ៉ុប និងដៃគូអភិវឌ្ឍន៍ពាក់ព័ន្ធ ចំពោះការបន្តគាំទ្រដ៏ខ្ជាប់ខ្ជួនក្នុងការអភិវឌ្ឍវិស័យទឹកស្អាតរបស់កម្ពុជា។”
រោងចក្រផលិតទឹកស្អាតបាក់ខែងដំណាក់កាលទី១ និងដំណាក់កាលទី២ ដែលមានសមត្ថិភាពផលិតទឹកស្អាតចំនួន ៣៩០.០០០ ម៉ែត្រគីបក្នុង១ថ្ងៃ គឺជាសមិទ្ធផលលេចធ្លោមួយក្នុងការអភិវឌ្ឍហេដ្ឋារចនាសម្ព័ន្ធទឹកស្អាតនៅកម្ពុជា ដែលធានាបាននូវការផលិតទឹកស្អាតដល់ប្រជាពលរដ្ឋរាប់លាននាក់។ គម្រោងនេះក៏បានរួមចំណែកដល់ការតភ្ជាប់បណ្តាញទឹកស្អាតថ្មី ដល់ប្រជាពលរដ្ឋប្រមាណ ១៧០,០០០ តំណ រួមទាំងប្រជាពលរដ្ឋក្រីក្រ និងរោងចក្រសហគ្រាសប្រមាណជា ២៥.០០០ តំណផងដែរ។