វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 5791 នាក់
ម្សិលមិញ 6359 នាក់
សរុប 14092424 នាក់
ភ្នំពេញ៖ ព្រះមហាក្សត្រខ្មែរ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ជាទីគោរពសក្តារៈដ៏ខ្ពង់ខ្ពស់ និងសម្តេចព្រះមហាក្សត្រី ព្រះវររាជមាតាជាតិខ្មែរ នរោត្តម មុនីនាថ សីហនុ បានយាងនិវត្តន៍មកកាន់ប្រទេសកម្ពុជាវិញហើយ បន្ទាប់ពីគង់ប្រថាប់ពិនិត្យព្រះរាជសុខភាព នៅទីក្រុងប៉េកាំង ប្រទេសចិន អស់រយៈពេលជាងមួយខែ។
នៅរសៀលថ្ងៃពុធ ទី០២ ខែតុលា ឆ្នាំ២០១៩នេះមានការអញ្ជើញទទួលព្រះរាជដំណើរពីសំណាក់ថ្នាក់ដឹកនាំស្ថាប័នកំពូលរបស់ជាតិ រួមមានសម្តេចវិបុលសេនាភក្តី សាយ ឈុំ ប្រធានព្រឹទ្ធសភា, សម្តេចពញាចក្រី ហេង សំរិន ប្រធានរដ្ឋសភា, សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា, សម្តេចកិត្តិព្រឹទ្ធបណ្ឌិត ព្រមទាំងមន្ត្រីជាន់ខ្ពស់មួយចំនួនទៀតនៃរាជរដ្ឋាភិបាលកម្ពុជា និងព្រះញាតិវង្សជាច្រើននាក់ និងអង្គផ្សេងទៀតផងដែរបានទទួលព្រះរាជដំណើរយាងនិវត្តន៍របស់ព្រះមហាក្សត្រខ្មែរ និងព្រះវររាជមាតាជាតិខ្មែរ។
សូមបញ្ជាក់ថា ព្រះមហាក្សត្រខ្មែរ និងព្រះវររាជមាតាជាតិខ្មែរ បានយាងទៅពិនិត្យព្រះរាជសុខភាពជាលើកទី២នៅទីក្រុងប៉េកាំង សម្រាប់ឆ្នាំ២០១៩នេះ កាលពីថ្ងៃទី២៦ ខែសីហា។ ក្នុងកំឡុងពេលគង់ប្រថាប់ពិនិត្យព្រះរាជសុខភាពនៅទីក្រុងប៉េកាំង រយៈពេលជាងមួយខែនេះ ព្រះមហាក្សត្រខ្មែរ និងព្រះវររាជមាតាជាតិខ្មែរ ទទួលបានព្រះរាជបដិសណ្ឋារកិច្ចយ៉ាងខ្ពង់ខ្ពស់ពីមន្ត្រីជាន់ខ្ពស់របស់ចិន និងបានយាងព្រះអង្គចូលរួមក្នុងកម្មវិធីផ្សេងៗ។
ព្រះមហាក្សត្រខ្មែរសម្តេច ព្រះបរមនាថ នរោត្តម សីហមុនី បានយាងបំពេញព្រះរាជទស្សនកិច្ចនៅខេត្តស៊ីឈួន និងខេត្តឆុងឈីង។ ព្រះអង្គបានយាងជួបសវនាការជាមួយថ្នាក់ដឹកនាំជាន់ខ្ពស់នៃខេត្តទាំងពីរនេះ ដោយមានព្រះសវនាការពាក់ព័ន្ធនឹងការងារមួយចំនួន ដើម្បីពង្រឹងកិច្ចសហប្រតិបត្តិការ និងទំនាក់ទំនងរវាងខេត្តទាំងពីរជាមួយនឹងកម្ពុជា។
អង្គព្រះមហាក្សត្រខ្មែរ និងព្រះវររាជមាតាជាតិខ្មែរ ត្រូវបានផ្តល់ព្រះរាជកិត្តិយសដ៌ឧត្តុង្គឧត្តមពីសំណាក់ប្រធានាធិបតីចិនលោក ស៊ី ជីនពីង យាងចូលរួមក្នុង ពិធី លៀង សាយភោជន៍ នៅ វិមាន សភា ប្រជាជន ចិន ក្នុងរដ្ឋធានីប៉េកាំង ដើម្បី អបអរសាទរ ខួប លើក ទី ៧០ នៃការបង្កើតសាធារណរដ្ឋប្រជាមានិតចិនផងដែរ។