ពលករខ្មែរធ្វើចំណាកស្រុក ចូលរកការងារធ្វើនៅក្នុងដីថៃ តាមច្រកអូរស្មាច់-ឆងចម ទទូចសុំប្រមុខដឹកនាំរដ្ឋាភិបាល ជួយកុំអោយភាគីថៃគាបសង្កត់យកលុយពីពួកគាត់ធ្ងន់ធ្ងរពេក !
11-February-2026 / ព័ត៌មានជាតិ
ខេត្តឧត្តរមានជ័យ:បន្ទាប់ពីគេហទំព័រ សារព័ត៌មាន មាតុភូមិ www.meatophoum.com បានចេញផ្សាយ១លេខរួចមកនូវ អត្ថបទមួយក្រោមចំណងជើងថា " ប្រជាពលរដ្ឋ និងពលករខ្មែរដែលរកសុីចេញ-ចូលដីថៃ នៅច្រកព្រំដែនអូរស្មាច់-ឆងចមសុំអោយសមត្ថកិច្ចនៅតាមព្រំដែន អន្តរាគមន៍ជួយពួកគាត់ផង " ត្រូវបានមហាជន និងបណ្តាញ សង្គមចាប់អារម្មណ៍ខ្លាំង ។ ប៉ុន្តែ រហូតមកដល់ពេលនេះ ករណី ពលករខ្មែរធ្វើចំណាកស្រុកទៅធ្វើការងារនៅក្នុងទឹកដីថៃតាមច្រក អូរស្មាច់-ឆងចម គឺមិនមាន អ្វីប្រែប្រួលទេ គឺនៅតែដដែលភាគីនៅតែគាបយកលុយពីពលករខ្មែរ ពី២០០ទៅ៣០០បាត(ប្រាក់ថៃ) ដដែល ។
យោងតាមសេចក្តីរាយការណ៍ថ្មីៗរបស់ភ្នាក់ងារ មាតុភូមិនៅច្រកអូរស្មាច់បានបង្ហាញ ពីសកម្មភាពជាក់ស្តែង របស់ពលករខ្មែររាប់រយនាក់ ក្នុង១ថ្ងៃៗដែលធ្វើចំណាកស្រុក តាមច្រកអូរស្មាច់ ស្ថិតក្នុងក្រុង សំរោង ខេត្តឧត្តរមានជ័យ ប្រឈមនឹងច្រកឆងចម ស្រុក កាប់ឆើង ខេត្តសូរិន្ទ ប្រទេសថៃ បានសម្តែងការ ត្អូញត្អែពីការលំបាកខ្លាំង ចំពោះ ភាគីថៃ ពិសេសគឺ(ត.ប) តម្រួតថៃនៅមាត់ច្រក និងប៉ូលិសអន្តោប្រវេសន៍ថៃ នៅស្រុកកាប់ឆើង គាបយកលុយពី២០០ទៅ៣០០បាតក្នុងម្នាក់ៗ ដោយមិនមានចេញវិក័យប័ត្រ លិខិតស្នាមអ្វីទេ ទោះជាពួកគាត់ មានប័ណ្ណ( បរដឺផាស) ចេញពី ប៉ូលិសអន្តោប្រវេសខ្មែរនៅច្រកអូរស្មាច់ហើយក៏ដោយ គឺនៅតែ បង់លុយអោយសមត្ថកិច្ចថៃ ដោយគ្មានការយោគយល់អ្វីសោះឡើយ ។
ប្រភពព័ត៌មាន ពីពលករខ្មែរ បានសំណូមពរសុំយ៉ាងទទូច អោយថ្នាក់ដឹកនាំ អាជ្ញាធរដែនដី និងសមត្ថកិច្ចពាក់ព័ន្ធនៅមាត់ច្រកទ្វារអន្តរជាតិអូរស្មាច់ នៃខេត្តឧត្តរមានជ័យ ជាពិសេសគោរពស្នើសុំអង្វរក ដល់ថ្នាក់ដឹកនាំ ប្រទេស គឺសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃ ព្រះរាជាណាចក្រកម្ពុជា និងថ្នាក់ដឹកនាំក្រសួងមហាផ្ទៃ មេត្តា ជួយអន្តរាគមន៍រកដំណោះស្រាយជួយសម្របសម្រួលភាគីថៃ អោយយោគយល់បន្ធូរបន្ថយការយកលុយពីពួកគាត់ខ្លះទៅ ព្រោះ សព្វថ្ងៃពួកគាត់ជួបប្រទះការខ្វះខាតក្នុងជីវភាពរស់នៅខ្លាំងណាស់ ។ ជុំវិញបញ្ហា ការលើកឡើងរបស់បងប្អូនពលករខ្មែរនេះ ការិយាល័យនិពន្ធ គេហទំព័រ មាតុភូមិ នៅរសៀលថ្ងៃទី២៧ខែកុម្ភ:ឆ្នាំ២០២៤ បានទំនាក់ទំនងសុំការបំភ្លឺ ពីលោកវរសេនីយ៍ឯក ពៅ ផេង មេយោធាទំនាក់ទំនងព្រំដែនខ្មែរនៅច្រកអូរស្មាច់ តាមតេឡេក្រាម អំពីទុក្ខលំបាក និងកង្វល់របស់ពលករខ្មែរបានលើក ឡើងដូចការរៀបរាប់ខាងលើនេះ ។
លោក ពៅ ផេង បានបំភ្លឺថា:បញ្ហាពលករនេះតើខាងថៃទារលុយរបៀបម៉េច អ្នកហ្នឹងមានលិខិតឆ្លងដែន ឯកសារគ្រប់គ្រាន់ឬអត់ ? តាមការសម្របសម្រួលពីមុនមក ( មុនកូវីត១៩) នៅពេលដែល ថៃចាប់បញ្ជូនពលករ(អ្នកអត់មានលិខិតស្នាម) មកវិញ នៅស្រុកកាប់ឆើង គឺគេធ្វើបែបទអោយមក សរុបទាំងការដឹកជញ្ជូនមក អស់លុយចំនួន៨០០បាត ក្រោយមកខាងលោកបានសម្រួលសុំទៅខាងថៃអោយជួយសម្រួលបន្ធូរបន្ថយអ្នកដែលគ្មានឯកសារអ្វីសោះ ។ ក្រោយមកក៏មិនដែលមានបញ្ហាអ្វីដែរ ព្រោះគេបន្ធូរបន្ថយតិចតួច ។ម្យ៉ាងទៀតបើគាត់អត់មានឯកសារអីចឹងច្បាប់គេ (ថៃ) ពីមុនតម្រូវអោយយកទៅកាត់ទោសក្នុងប្រទេសថៃ តែលោកបានអោយកម្លាំង របស់លោកជូនបងប្អូនជាឪពុកម្តាយ ជួយអម្តរាគមន៍ដោះស្រាយសម្របសម្រួលយកពួកគាត់(ពលករ)មកវិញ ។ តែក្រោយមកបានសម្រួលត្រឹមតម្រួតស្រុកកាប់ឆើង ។ លោក ពៅ ផេង បានបញ្ជាក់ថា បើលិខិតឆ្លងដែន វ៉ៃត្រាត្រឹមត្រូវ គឺគេអត់មានយកអ្វីទាំងអស់ តែបើតាមលោកដឹងគឺនៅពេលបានប័ណ្ណ បដឺផាស (បណ្ណចេញ-ចូល) ព្រំដែន បើបានវ៉ៃត្រាចូលហើយ អ្នកខ្លះបានចូលទៅ ទៅនៅស្រុកគេរាប់ឆ្នាំ ពី៦ខែរហូតដល់២-៣ ឆ្នាំ ធ្វើការនៅស្រុកគេដល់បាងកក ឬ ខេត្តផ្សេងៗ ។ លុះដល់ពេលត្រឡប់មកវិញ អត់មានឯកសារអ្វីទាំងអស់ ។
ប៉ុន្តែឥលូវនេះ បើអត់មានឯកសារអ្វី គឺខុសច្បាប់ ដូច្នេះប្រហែលគេ ( ថៃ ) ពិន័យធ្វើបែបបទអោយស្របច្បាប់ របស់តម្រួតស្រុកកាប់ ឆើង យក៣០០បាត និងការដឹកជញ្ជូន២០០បាត សុបទៅ ៥០០បាត នេះបើតាម លោក ពៅ ផេង បានសាកសួរប្រជា ពលរដ្ឋ ព្រោះខាងលោកបានសម្របសម្រួលតាំងពី៨០០បាត មកត្រឹម៥០០បាត ព្រោះពលរដ្ឋយើងចូលស្រុកគេខុសច្បាប់ អត់មានឯកសារអ្វីទាំងអស់ បានវ៉ៃត្រាលើប័ណ្ណបដឺផាសហើយយកទៅក្រវាត់ចោល ទៅស្រុកគេរាប់ឆ្នាំ ត្រឡប់មកវិញអត់មានឯកសារអ្វីទាំងអស់ ។ លោក ពៅ ផេង បានបញ្ជាក់ថា: ចំពោះរឿងប័ណ្ណបដឺផាស ឬប៉ាស្ព័រ គឺខាងអន្តោប្រវេសន៍ខ្មែរ និងថៃ ជាអ្នកចេញអោយប្រជាពលរដ្ឋ ចំណែកខាងលោក គឺធ្វើការងារសម្របសម្រួលជាមួយភាគីទំនាក់ទំនងព្រំដែនថៃនៅពេលមានការចាប់ចងប្រជាពលរដ្ឋខ្មែរ ដើម្បីអោយថៃបញ្ជូនមកស្រុកខ្មែរវិញតែប៉ុណ្ណោះ ។ តែបើយោងតាមការបញ្ជាក់ពីពលករខ្មែរបានប្រាប់ភ្នាក់ងារយើងថា : ពួកគាត់មានឯកសារគ្រប់គ្រាន់ តែគាត់អត់វ៉ៃត្រាបិទទេ ពីព្រោះពេលត្រឡប់មកវិញចឹងអត់វ៉ៃត្រាបិទទេ កាលណាវ៉ៃត្រាបិទ ត្រូវស្គែនវាលឥន្ទ្រីយ៍អស់លុយចំនួន១០០០បាត ប៉ុន្តែខាងថៃគេមិនតម្រូវអោយវ៉ៃត្រាបិទទេគេយក៥០០បាត ពេលទៅវិញ គេយក៥០០បាតទៀត ដើម្បីរក្សាសិទ្ធិប៉ាស្ព័រ ដែលប្រើប្តាស់ក្នុងស្រុកថៃ នៅតែ ប្រើបានដដែល ។
ពលករបញ្ជាក់ថា: វាខុសពីសម័យមុនៗ គេចាប់ពួកគាត់នៅស្រុកកាប់ឆើងគេបញ្ជូនមក គេយកតែថ្លៃនៅស្រុកកាប់ឆើង១ទេ ហើយគេបញ្ជូនមកអោយខ្មែរយើង តែឥលូវគេអត់ធ្វើចឹងទេ គេធ្វើសំបុត្រ បញ្ជូនមែន ក៏ប៉ុន្តែពេលមកដល់ច្រកព្រំដែនខ្មែរ គេអត់បញ្ជូនមកប្រគល់អោយសមត្ថកិច្ចខ្មែរយើងទេ គេអោយពលករដើរមកធម្មតា ពេលមកដល់មាត់ច្រកព្រំដែនគេយកលុយម្តងទៀត ដល់តែអញ្ចឹងទើបបានជាពលករស្រែកសុំរកជំនួយ ។ ពលករខ្មែរ ប្រាប់ថា: ពួកគាត់ឆ្ងល់ ត.ប(តម្រួត) ថៃ ក្រុមតែ១ ខេត្ត១ និងស្រុកតែ១ ហេតុអ្វីតម្រូវអោយបង់លុយចំនួន២កន្លែង បើបង់តែ១កន្លែងទៅវាចប់ហើយ ហេតុអ្វីបង់លុយ១កន្លែងហើយ ព្រលែងមកហើយអោយបង់លុយ១កន្លែងទៀត តែគោលដៅតែ១ ។
ដោយឡែក ពលរដ្ឋថៃ ដែលចេញចូលដីខ្មែរ តាមច្រកអូរស្មាច់-ឆងចមក្នុង១ថ្ងៃៗរាប់រយនាក់ដែរ គឺវ៉ៃត្រាតែខាងភាគីថៃទេ ឯខ្មែរយើងអត់មានវ៉ៃត្រា ហេតុអ្វីបានជាច្បាប់តម្រូវអោយវ៉ៃត្រាតែខាងថៃ មិនមានវ៉ៃត្រាខាងខ្មែរ ក្នុងប៉ាស្ព័រជនជាតិថៃដែលចូលមកលេងក្នុងទឹកដីខ្មែរ ? ។ ចំពោះករណីនេះ ការិយាល័យនិពន្ធ គេហទំព័រ មាតុភូមិ ក៏បានបញ្ជូនឃ្លីប Videos សកម្មភាពរបស់ពលករខ្មែរឆ្លងដែនតាមច្រកអូរស្មាច់ ទៅឯ.ឧ អភិបាលខេត្តឧត្តរមានជ័យ ហើយសុំការបំភ្លឺពីឯ.ឧ ប៉ែន កុសល អភិបាលខេត្តឧត្តរមានជ័យ តាមរយ: តេឡេក្រាមដែរ ឃើញមានសញ្ញាគ្រីសចូលមើលដែរ ប៉ុន្តែ ពុំមានការឆ្លើយតបទេ ៕ ដោយ: ស៊ុន សុផល Tel:012 953 824 / 016 953 222
