អាជ្ញាធរខេត្តឧត្តរមានជ័យ និង ក្រសួងការពារជាតិ ស្ងាត់ស្ងៀម ស្តីអំពីសកម្មភាពទាហាន និង ប៉ូលីសថៃលើកគ្នាសំរុកឆ្លងព្រំដែន អូរស្មាច់ចូលក្នុងបរិវេណកាស៊ីណូរ៉យ៉ាល់ហៀល?
03-April-2024 / ព័ត៌មានជាតិ
ខេត្តឧត្តរមានជ័យ : គិតមកដល់ថ្ងៃទី ១៩ ខែមីនា ឆ្នាំ ២០២៤ នេះ មានរយ:ពេល៣យប់ ៣ថ្ងៃ ហើយ បើគិតពីថ្ងៃទី ១៦ ខែមីនា ឆ្នាំ ២០២៤ ករណីក្រុមទាហាន និងប៉ូលីសអន្តោប្រវេសន៍ថៃ មានគ្នាប្រមាណ ៣០នាក់ បាននាគ្នាសម្រុកឆ្លងព្រំដែនច្រក អូរស្មាច់ ស្ថិតនៅក្នុងស្រុកសំរោង ខេត្តឧត្តរមាន ជ័យ ចូលក្នុងបរិវេណអគារកាស៊ីណូ រ៉ូយ៉ាល់ ហៀល របស់ក្រុមហ៊ុនឧកញ៉ា លឹម ហេង។
គោលបំណងនៃការសម្រុកចូលដោយគ្មានការអនុញ្ញាតិនេះគេថាក្នុងគោលបំណង មករំដោះយកស្ត្រីជនរងគ្រោះថៃ ឈ្មោះ នាង វ:រ៉ាញ់ញ៉ា ឆៅវរ៉ាក់ អាយុ ៤៣ ឆ្នាំ ដែលសមត្ថកិច្ចថៃអះអាងប្រាប់សមត្ថកិច្ចភាគីខ្មែរថា : សង្ស័យចិនចាប់យុំខ្លួនជំរឹតទារលុយ នៅក្នុងអគារជាន់ទី៥ បន្ទប់លេខ៥៤៧ នៃ កាស៊ីណូ រ៉ូយ៉ាល់ហៀល ។ តែពុំ អាចរំដោះបានសម្រេចទេ ព្រោះខាងភាគីកាស៊ីណូនេះ មិនសហការជាមួយ កម្លាំងសមត្ថកិច្ចខ្មែរ និងកម្លាំងសមត្ថកិច្ចថៃ នៅច្រកព្រំដែនដើម្បីត្រួតពិនិត្យរុករក ជនរងគ្រោះ ។ ប្រភពពព័ត៌មាន បានអោយដឹងថា : ប៉ុន្តែនៅយប់នោះ ( ថ្ងៃទី១៦ ឈានចូលថ្ងៃទី ១៧ មីនា ២០២៤ ) មានជនរងគ្រោះថៃ ទាំងប្រុស ទាំងស្រីចំនួន១១នាក់ (ស្រី៥នាក់) បាននាំគ្នារត់ចេញក្រៅបរិវេណអគារកាស៊ីណូ រ៉ូយ៉ាល់ហៀល រកជំនួយអន្តរាគមន៍ពីសមត្ថកិច្ចខ្មែរអោយជួយពួកគេ ។
សូមបញ្ជាក់ថា: ជនរង គ្រោះថៃ ទាំង១១នាក់នោះ ត្រួវបានកម្លាំងនគរបាល នៃអធិការដ្ឋាននគរបាលស្រុកសំរោងជួយអន្តរាគមន៍ នឹងបានបញ្ជូនត្រឡប់ទៅប្រទេសថៃវិញអស់ ហើយ កាលពីថ្ងៃទី ១៨ ខែ មីនា២០២៤ ។ ព្រឹត្តិការណ៍ ដ៏រសើប១នេះឡូវនេះ អ្នកយកព័ត៌មាន មាតុភូមិ បានរាយការណ៍ មកថា: នៅមាត់ច្រកទ្វារព្រំដែនអន្តរជាតិអូរស្មាច់-ឆងចម ឥលូវនេះ មានការរឹតបន្តឹង និងត្រួតពិនិត្យមធ្យោបាយធ្វើដំណើរ របស់ភ្ញៀវចេញ-ចូល ទឹកដីខ្មែរ-ថៃ តឹងរ៉ឹងជាងមុន ប៉ូលីសប្រចាំការមាត់ច្រកទ្វារព្រំដែន ដាក់បារ៉ាស់ឃាត់រថយន្តដែលឆ្លង កាត់ត្រួតពិនិត្យឆែកឆេរយ៉ាងម៉ត់ចត់ មិនដូចកាលពីមុនភាពធូររលុង មិនមានការឆែកឆេរអ្វីនោះទេ ហើយមាត់ច្រកទ្វារព្រំ ដែនគឺបើកដំណើរការធម្មតា ពុំមានការបិទទេ ។
ជុំវិញ ករណី មិនមានប្រតិកម្ម ឬសេចក្តីប្រកាសព័ត៌មានជាផ្លូវការ ពីអាជ្ញាធរខេត្តឧត្តរមានជ័យ និង ស្ថាប័នក្រសួងការពារជាតិនេះ ការិយាល័យ គេហទំព័រ មាតុភូមិ បានទំនាក់ទំនងតាមតេឡេក្រាម ទៅឯកឧត្តម អ៊ុន សុភ័ក្ត្រ អភិបាលរងខេត្តឧត្តរ មានជ័យ ដើម្បីសុំការបំភ្លឺ បញ្ជាក់ អំពីការ វិវឌ្ឍន៍ នៃព្រឹត្តិការណ៍កងយោធា និងប៉ូលីសអន្តោប្រវេសន៍ថៃនាំគ្នាសំរុកចូលក្នុងបរិវេណអគារកាស៊ីណូរ៉ូយ៉ាល់ហៀលនេះ តើយ៉ាង ដូចម្តេចហើយ ? លោកអភិបាលរងខេត្ត បានសរសេរតបថា : បាទសូមអរគុណ សូមអធ្យាស្រ័យ ខ្ញុំប្រមូលព័ត៌មានពីសមត្ថ កិច្ចជំនាញសិន ខ្ញុំនិងជូនព័ត៌មានវិញនៅពេលក្រោយ ។ ប្រភពពីមន្ត្រីសមត្ថកិច្ចនៅព្រំដែន បានបង្ហើបប្រាប់ថា : មិន មានអ្វីកើតឡើងទេ ក្រោយពេលភាគីថៃ និងភាគីខ្មែរ បានបញ្ចប់ការពិភាក្សាគ្នានៅក្នុងកាស៊ីណូរ៉ូយ៉ាល់ហៀល ហើយថៃបាននាំកងកម្លាំងរបស់គេត្រឡប់ទៅស្រុកវិញអស់ហើយកាលពីយប់ថ្ងៃទី ១៦ មីនា ។ នៅខាងស្ថាប័នក្រសួងការពារជាតិ ដែលមានឯកឧត្តម នាយឧត្តមសេន៏យ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ក៏ មិនទាន់ឃើញអ្នកនាំពាក្យក្រសួងការពារជាតិ ចេញសេចក្តី ប្រកាសព័ត៌មានបំភ្លឺ អំពី ករណី កើតឡើងនៅច្រកអន្តរជាតិអូរស្មាច់នេះដែរ។
សូមបញ្ជាក់ថា៖ក្រសួងការពារជាតិកម្ពុជា ត្រូវធ្វើជាម្ចាស់ផ្ទះរៀបចំកិច្ចប្រជុំលើកទី១៦ នៃគណៈកម្មាធិការព្រំដែនទូទៅកម្ពុជា-ថៃ (The 16th General Border Committee Meeting "GBC") នៅសណ្ឋាគារ Garden City Phnom Penh នៃព្រះរាជាណាចក្រកម្ពុជា ចាប់ពីថ្ងៃទី១៨-២២ ខែមីនា ឆ្នាំ២០២៤ ក្រោមវត្តមាន នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា សហប្រធានគណៈកម្មាធិការព្រំដែនទូទៅកម្ពុជា និង លោក ស៊ុធិន ខ្លាំងស៊ែង (SUTIN KLUNGSANG) រដ្ឋមន្ត្រីក្រសួងការពារជាតិថៃ និងជាសហប្រធានគណៈកម្មាធិការ ព្រំដែនទូទៅថៃ។
ក្រោមកិច្ចព្រមព្រៀងឆ្នាំ២០០៦ រវាងរាជរដ្ឋាភិបាលកម្ពុជា និងរាជរដ្ឋាភិបាលថៃ គណៈកម្មាធិការព្រំដែនទូទៅ កម្ពុជា-ថៃ (General Border Committee "GBC") ត្រូវបានបង្កើតឡើងដោយមានការជួបប្រជុំប្តូរវេនយ៉ាងទៀងទាត់រៀងរាល់ឆ្នាំ រវាងរដ្ឋមន្ត្រីក្រសួងការពារជាតិប្រទេសទាំងពីរ(កម្ពុជា-ថៃ) ហើយក្នុងឆ្នាំ២០២៤ កម្ពុជាទទួលធ្វើជាម្ចាស់ផ្ទះ សម្រាប់កិច្ចប្រជុំលើកទី១៦ ដោយមានការចូលរួមពីគណៈប្រតិភូ នៃគណៈកម្មាធិការ ព្រំដែនទូទៅ កម្ពុជា-ថៃ ដឹកនាំដោយ នាយឧត្តមសេនីយ៍ ទៀ សីហា និងគណៈប្រតិភូ នៃគណៈកម្មាធិការព្រំដែនទូទៅ ថៃ-កម្ពុជា ដឹកនាំដោយ ស៊ុធិន ខ្លាំងស៊ែង។
កិច្ចប្រជុំលើកទី១៦ នេះ ភាគីទាំងពីរ កម្ពុជា-ថៃ នឹងបន្តកិច្ចពិភាក្សា ដោយផ្តោតយ៉ាងសំខាន់លើការពង្រឹង និងលើកកម្ពស់កិច្ចសហប្រតិបត្តិការ បង្កើតទំនាក់ទំនងល្អរវាងកងទ័ពនៃប្រទេសទាំងពីរ កម្ពុជា-ថៃ ក្នុងកិច្ចការពារ និងរក្សាឱ្យបានរឹងមាំនូវសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍតាមបណ្តាព្រំដែន នៃប្រទេសទាំងពីរ និងរួមគ្នាដោះស្រាយបញ្ហាប្រឈមនានា ដែលអាចកើតមានឡើងនៅតាមបណ្តោយព្រំដែនមួយនៃប្រទេសជិតខាងទាំងពីរ ដើម្បីរួមគ្នារក្សា និងធានាឱ្យបាននូវសេចក្តីសុខ ក្សេមក្សាន្ត និងជីវភាពរស់នៅរីកចម្រើនរបស់ប្រជាជន នៃប្រទេសទាំងពីរ កម្ពុជា-ថៃ៕
.jpg&h=97&w=146)