ទន្ទឹមនិងរដ្ឋជួយលុយសម្រាប់ការវិនិយោគឈិបក្រុមហ៊ុនអាមេរិកជាច្រើន កំពុង ត្រៀមបោះទុនវិនិយោគចំនួន ៨ពាន់លានដុល្លារ ទៅវៀតណាម
06-August-2026 / ព័ត៌មានអន្តរជាតិ
អាមេរិក៖ ក្រុមហ៊ុនអាមេរិកចំនួន១៥ រួមទាំងក្រុមហ៊ុនផលិតបន្ទះឈីប (semiconductors) បានបង្ហាញចំណាប់អារម្មណ៍ក្នុងការវិនិយោគចំនួន ៨ពាន់លានដុល្លារ ក្នុងហេដ្ឋារចនាសម្ព័ន្ធថាមពលស្អាតរបស់ប្រទេសវៀតណាម ដែលទាក់ទងនឹងវឌ្ឍនភាពរបស់ប្រទេសនេះលើច្បាប់ថាមពលកកើតឡើងវិញ។ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី២៧ ខែមករា ឆ្នាំ២០២៤។
លោក Jose Fernandez អនុរដ្ឋលេខាធិការអាមេរិកទទួលបន្ទុកកំណើនសេដ្ឋកិច្ច និងបរិស្ថានបានប្រាប់សន្និសីទសារព័ត៌មាននៅទីក្រុងហាណូយថា «ពួកគេបានត្រៀមខ្លួនរួចជាស្រេចក្នុងការវិនិយោគចំនួន ៨ពាន់លានដុល្លារ»។ លោក Fernandez បានគូសបញ្ជាក់ថា ក្រុមហ៊ុនទាំងនោះមានកាតព្វកិច្ចចំពោះម្ចាស់ភាគហ៊ុន ដូច្នេះការវិនិយោគនឹងមានលក្ខខណ្ឌលើវឌ្ឍនភាពបទប្បញ្ញត្តិស្តីពីថាមពលកកើតឡើងវិញនៅក្នុងប្រទេសវៀតណាម។ លោកបានបន្តថា៖ «ពួកគេបានសន្យាចំពោះម្ចាស់ភាគហ៊ុន និងអតិថិជន ដោយពួកគេនឹងប្រើតែថាមពលកកើតឡើងវិញតែប៉ុណ្ណោះ» ដោយបន្ថែមថាក្រុមហ៊ុនទាំង១៥ របស់អាមេរិក កំពុងរង់ចាំការអនុញ្ញាតជាមុនសិន ទើបពួកគេអាចចាប់ផ្តើមគម្រោងវិនិយោគនោះ។
ប្រសិនចេញជាលទ្ធផលនេះគឺជា ភាពជោគជ័យដ៏ធំធេងរបស់ប្រទេសវៀតណាម ខណៈពេលដែលប្រទេសនេះកំពុងស្វែងរកការទាក់ទាញក្រុមហ៊ុនផលិតបន្ទះឈីប និងចង់ពង្រីកវិស័យថាមពលកកើតឡើងវិញរបស់ខ្លួន។ ការវិនិយោគនេះស្របតាមគោលដៅទាំងពីរ ហើយទំនងជាអាចដាក់ប្រទេសវៀតណាមជាមជ្ឈមណ្ឌលសម្រាប់បច្ចេកវិទ្យា និងផលិតកម្មផងដែរ។យ៉ាងណាមិញចំពោះក្រុមហ៊ុនអាមេរិកទាំង១៥ ដែលកំពុងត្រៀមខ្លួនបោះទុនទៅវៀតណាម មិនត្រូវបានមន្ត្រីជាន់ខ្ពស់អាមេរិក បង្ហាញឈ្មោះជាសាធារណៈនោះទេ។
គួរជម្រាបដែរថា ពេលនេះប្រទេសវៀតណាមកំពុងពិចារណាលើគម្រោងវិនិយោគពីក្រុមហ៊ុនអាមេរិក ដើម្បីអនុម័តបទប្បញ្ញត្តិដែលនឹងអនុញ្ញាតឱ្យរោងចក្រចរចាតម្លៃអគ្គិសនីដោយផ្ទាល់ជាមួយអ្នកផលិតជាជាងទិញវាពីប្រតិបត្តិករបណ្តាញថាមពលរបស់ប្រទេសវៀតណាម។ សូមបញ្ជាក់ដែរថា «ថាមពលកកើតឡើងវិញ» សំដៅដល់ថាមពលបានមកពីប្រភពធម្មជាតិ ដូចជា ខ្យល់ និងពន្លឺព្រះអាទិត្យដែលអាចកកើតឡើងវិញ ដើម្បីបំពេញចំនួនដែលបាត់បង់ និងមិនចេះរីងស្ងួត នេះបើយោងតាម United Nations.។
ទាក់ទងបញ្ហានេះដែររដ្ឋបាលរបស់ប្រធានាធិបតីលោក Joe Biden ត្រូវបានគេរំពឹងថា នឹងប្រកាសពីការឧបត្ថម្ភធនរាប់ពាន់លានដុល្លារដល់ក្រុមហ៊ុនផលិតបន្ទះឈីប (semiconductor) កំពូលៗ រួមទាំងក្រុមហ៊ុន Intel និង Taiwan Semiconductor Manufacturing (TSMC) ក្នុងប៉ុន្មានសប្តាហ៍ខាងមុខនេះ ដើម្បីជួយសាងសង់រោងចក្រថ្មីនៅសហរដ្ឋអាមេរិក។ សារព័ត៌មាន Reuters នៅថ្ងៃទី២៨ ខែមករា ឆ្នាំ២០២៤បានឲ្យដឹងថា។ការប្រកាសពីគម្រោងឧបត្ថម្ភធននាពេលខាងមុខ ត្រូវបានគេរំពឹងថា នឹងធ្វើឡើងនៅថ្ងៃទី០៧ ខែមីនា ឆ្នាំ២០២៤ ក្នុងគោលបំណងចាប់ផ្តើមការផលិតបន្ទះឈីបកម្រិតខ្ពស់ ដែលផ្តល់ការគាំទ្រថាមពលដល់ ស្មាតហ្វូន បញ្ញាសិប្បនិម្មិត្ត និងប្រព័ន្ធសព្វាវុធ នេះបើតាមការឱ្យដឹងថាពី WSJ។
ការឧបត្ថម្ភធននេះគឺជា ផ្នែកមួយនៃកម្មវិធីឧបត្ថម្ភធន «Chip for America» ចំនួន ៣៩ពាន់លានដុល្លារ ដែលត្រូវបានអនុម័តដោយសភាសហរដ្ឋអាមេរិកក្នុងឆ្នាំ២០២២ កន្លងទៅ។ ដោយឡែកកាលពីអំឡុងខែធ្នូ ឆ្នាំ២០២៣ រដ្ឋលេខាធិការក្រសួងពាណិជ្ជកម្មអាមេរិក Gina Raimondo ធ្លាប់បានគូសបញ្ជាក់ថា លោកស្រីនឹងផ្តល់រង្វាន់មូលនិធិជាច្រើនបន្ថែមទៀតសម្រាប់បន្ទះឈីប semiconductor ក្នុងឆ្នាំ២០២៤ រួមទាំងការប្រកាសផ្តល់ឧបត្ថម្ភធនរាប់ពាន់លានដុល្លារសម្រាប់ការផលិតផងដែរ។ គួរជម្រាបដែរថា Intel ជាក្រុមហ៊ុនអាមេរិក ចំណែក TSMC ជាក្រុមហ៊ុនផលិតបន្ទះឈីបដ៏ធំរបស់តៃវ៉ាន់ ហើយការឧបត្ថម្ភធនដល់ក្រុមហ៊ុនទាំងពីរនេះ វាពាក់ព័ន្ធនឹងរឿងសន្តិសុខជាតិ និងនយោបាយផងដែរ (សង្គ្រាមបន្ទះឈីបរវាងចិន និងអាមេរិក)៕
