បូកសរុបលទ្ធផលការងារឆ្នាំ២០២៣ និងលើកទិសដៅការងារបន្ត ២០២៤ ក្រសួងព័ត៌មានសម្តេចធិបតី ហ៊ុន ម៉ាណែតអះអាងពីភាពជាដៃគូជាមួយអ្នកកាសែត
ភ្នំពេញ៖សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នារសៀលថ្ងៃទី២៣ ខែមករា ឆ្នាំ២០២៤បានលើកឡើងថា ក្រមសីលធម៌វិជ្ជាជីវៈ អ្នកសារព័ត៌មាន ត្រូវបង្កើតឡើង ដើម្បីរក្សាតម្លៃអ្នកព័ត៌មាន ដូច្នេះត្រូវតែធ្វើអ្វីមួយឲ្យ បានត្រឹមត្រូវតាមវិជ្ជាជិវៈ។ជាអធិបតីក្នុងពិធីបូកសរុបលទ្ធផលការងារឆ្នាំ២០២៣ និងលើកទិសដៅការងារបន្ត ២០២៤ របស់ក្រសួងព័ត៌មាន សម្តេចថា ទាល់តែឲ្យតម្លៃខ្លួនឯង តាមរយៈប្រតិបត្តិក្រមសីលធម៌ ទើបមានតម្លៃ ព្រោះក្រមសីលធម៌វិជ្ជាជីវៈអ្នកសារព័ត៌មាន មិនមែនមានតែនៅកម្ពុជានោះទេ គឺមានគ្រប់ប្រទេស ។
សម្តេចធិបតី ហ៊ុន ម៉ាណែត បានថ្លែងថា “អំណាចសារព័ត៌មានជាអំណាចទីបួន បើប្រើត្រូវគឺមានប្រយោជន៍ណាស់”។ ទាក់ទងនិងសិទ្ធទទួលពត៍មានសម្តេចបន្តថា ពលរដ្ឋមានសិទ្ធិទទួលបានព័ត៌មានពីគ្រប់មធ្យោបាយនាពេលបច្ចុប្បន្ន ហើយរាជរដ្ឋាភិបាល និងថ្នាក់ក្រោមជាតិអាចទទួលបានព័ត៌មាន អាចដោះស្រាយបញ្ហានានាជូនពលរដ្ឋបានលឿន ។សម្តេចធិបតី បានបន្តថា កន្លងទៅសម្តេចទទួលបានព័ត៌មានតាមប្រព័ន្ធផ្សព្វផ្សាយ និងដោះស្រាយបានលឿន ។ សម្តេចធិបតី បានបញ្ជាក់ថា “ឧទាហរណ៍ ការអនុវត្តលើស យកភាស៊ីពីពលរដ្ឋជាដើម យើងដឹងតាមប្រព័ន្ធផ្សព្វផ្សាយ ក៏បញ្ជាឱ្យចាត់វិធានការ និងមិនឱ្យយកពីអ្នកលក់ដូរតាមកញ្ច្រែងល្អី “។
សម្តេចធិបតី ហ៊ុន ម៉ាណែត ក៏បានលើកឡើងដែរថា ព័ត៌មានមាន២ប្រភេទ មានព័ត៌មាន ពិត និងព័ត៌មានប្រឌិត ដូច្នេះទាមទារឱ្យមើលប្រភពព័ត៌មានឱ្យបានច្បាស់ផងដែរ ដើម្បីជឿទុកចិត្តបាន។សម្រាប់់ទំនាក់ទំនងជាមួយង្នកសារពត៍មានសម្តេចនាយករដ្ឋមន្ត្រី បានថ្លែងដូច្នេះថា៖ «ភាពជាដៃគូរវាងរាជរដ្ឋាភិបាល និងវិស័យសារព័ត៌មាន ជាមួយអ្នកសារព័ត៌មាន ចាំបាច់ណាស់ត្រូវតែធ្វើ ហើយរាជរដ្ឋាភិបាល មិនយកអ្នកកាសែតធ្វើជាសត្រូវទេ យើងជាដៃគូជាមួយគ្នា»។ សម្ដេចធិបតី គូសបញ្ជាក់ថា ព័ត៌មាន មិនមែនត្រូវការតែប្រជាពលរដ្ឋនោះទេ តែសូម្បីសម្ដេច ជាប្រមុខរាជរដ្ឋាភិបាល ក៏ត្រូវការព័ត៌មានដែរ។
សម្ដេចធិបតី ហ៊ុន ម៉ាណែត បានបញ្ជាក់ដោយបង្កាថា ការរៀបចំ និងការបង្កើតច្បាប់ ពាក់ព័ន្ធនឹងវិស័យសារព័ត៌មាននាពេលកន្លង និងទៅថ្ងៃអនាគត មិនមែនដើម្បីបិទសិទ្ធិអ្នកសារព័ត៌មាននោះទេ តែដើម្បីការពារអ្នកសារព័ត៌មាន។ ការពារអ្នកសារព័ត៌មាន ដែលអនុវត្តត្រឹមត្រូវតាមក្រមសីលធម៌វិជ្ជាជីវៈ និងតាមច្បាប់។«តាមពិត ការចេញច្បាប់ដើម្បីអី មិនមែនដើម្បីបិទសិទ្ធិអ្នកសារព័ត៌មាននោះទេ ប៉ុន្តែគឺផ្ទុយទៅវិញគឺដើម្បីការពារអ្នកសារព័ត៌មាន ការពារអ្នកសារព័ត៌មាន ដែលប្រព្រឹត្តត្រឹមត្រូវតាមច្បាប់ ការពារតម្លៃរបស់ខ្លួនទៅវិញ បើគាត់ធ្វើអីមួយគេចោទប្រកាន់គាត់ មានច្បាប់ការពារ បើគាត់អនុវត្តតាមក្រមសីលធម៌ និងតាមច្បាប់របស់គាត់ នេះជាការការពារសិទ្ធិសេរីភាពរឹងមាំ ទៅវិញទេ ដោយសារច្បាប់»។
ក្រៅពីរឿងសារពត៍មានសម្តេចធិបតី ហ៊ុន ម៉ាណែត បានបញ្ជាឲ្យលោកឧត្តមសេនីយ៍ឯក ស ថេត អគ្គស្នងការ នគរបាលជាតិ ត្រូវពង្រឹងការពិនិត្យឡើងវិញ នូវជាតិអាល់កុល ដល់អ្នកបើកបរយាន្តយន្តគ្រប់ប្រភេទ ដើម្បីជៀសវាងគ្រោះថ្នាក់ចរាចរណ៍ ខណៈថ្មីនេះ មានគ្រោះថ្នាក់ចរាចរណ៍ កើតឡើងជាញឹកញាប់ ធ្វើឲ្យមនុស្សស្លាប់ ជាហូរហែរដែលភាគច្រើន សុទ្ធតែជាធនធានមនុស្សរបស់ជាតិ ។សម្តេចធិបតី ហ៊ុន ម៉ាណែតក៏បាន ណែនាំឱ្យអភិបាលរាជធានីខេត្តត្រូវតាមដានព័ត៌មាន ដើម្បីទទួលបានព័ត៌មាន និងដោះស្រាយបញ្ហាជូនពលរដ្ឋ។
លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានថ្លែងឲ្យដឹងថា “ ក្រសួងពត៍មាននឹងធ្វើទំនើបកម្មស្ថាប័ន និងការកសាងរដ្ឋបាលទំនើប។ ការពង្រឹងបទដ្ឋានបច្ចេកទេស និងការទទួលខុសត្រូវវិជ្ជាជីវៈ។ ការអភិវឌ្ឍធនធានមនុស្ស និងបណ្តុះស្មារតីមនសិការវិជ្ជាជីវៈ។ ការរៀបចំប្រព័ន្ធ និងយន្តការគ្រប់គ្រងលំហព័ត៌មាន និង ការបង្កើនភាពជាដៃគូប្រកបដោយបរិយាប័ន្ទនិងស័ក្តិសិទ្ធភាព។ទិសដៅការងារឆ្នាំ២០២៤ ពង្រឹងតួនាទីក្រសួងព័ត៌មានធ្វើជាស្ថាប័នទំនាក់ទំនងសាធារណ:របស់រាជរដ្ឋាភិបាលឱ្យកាន់តែសកម្ម អន្តរសកម្ម ប្រកបដោយគុណភាព និងប្រសិទ្ធភាព លើវិស័យផ្សព្វផ្សាយ និងព័ត៌មាន។ បញ្ចប់សេចក្តីព្រាងអនុក្រិត្យស្តីពីការរៀបចំនិងការប្រព្រឹត្តិទៅរបស់ក្រសួងព័ត៌មានក្នុងបរិបទបរិវត្តកម្មឌីជី ថល។
បញ្ចប់សេចក្តីព្រាងច្បាប់ស្តី សិទ្ធិទទួលព័ត៌មាន ដែលកំពុងស្ថិតនៅក្នុងដែនសមត្ថកិច្ចពិនិត្យរបស់ក្រសួង យុត្តិធម៌។ កសាងសមត្ថភាព និងគុណភាព មូលធនមនុស្ស និងពង្រឹងសមត្ថភាពវិជ្ជជីវៈ និងជំនាញក្នុងអង្គភាព ផ្សាយរបស់រដ្ឋ ដើម្បីដើរទាន់ទីផ្សារឌីជីថល ក្នុងវិស័យព័ត៌មាននិងផ្សព្វផ្សាយ។ ពង្រីកលំហប្រព័ន្ធផ្សព្វផ្សាយរបស់ជាតិឱ្យគ្របដណ្តប់បានទូទាំងប្រទេស និងឆ្ពោះទៅកាន់អន្តរជាតិ។ ជម្រុញដំណើរការផ្លាស់ប្តូរប្រព័ន្ធផ្សាយទូរទស្សន៍ពីអាណាឡូក ទៅឌីជីថល ឱ្យចេញដំណើរបានទាន់ ផែនការបិទបញ្ចប់នៅឆ្នាំ២០២៥៕
