សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិតពិធីបុណ្យទន្លេលើកទី៥ នៅខេត្តកំពង់ឆ្នាំងប្រកាសផ្តល់អំណោយផ្លូវស្ពានឆ្លងទៅកំពង់ធំ
កំពង់ឆ្នាំង៖នៅល្ងាចថ្ងៃសៅរ៍ ១១កើត ខែផល្គុន ឆ្នាំច ព.ស ២៥៦២ ត្រូវនឹងថ្ងៃទី១៦ ខែមីនា ឆ្នាំ២០១៩នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែនបានប្រកាសជូនកាដូរដល់ប្រជាពលរដ្ឋខេត្តកំពង់ឆ្នាំងនិងកំពង់ធំតាមរយៈការកសាងផ្លូវនិងស្ពានពីខេត្តកំពង់ឆ្នាំងភ្ជាប់ទៅក្នុងកំពង់ធំ ក្នុងឱកាសអញ្ជើញជាអធិបតីដ៏ខ្ពង់ខ្ពស់ប្រារព្ធពិធីបុណ្យទន្លេលើកទី៥ នៅក្នុងខេត្តកំពង់ឆ្នាំង។
គម្រោងដែលសម្តេចប្រកាសសាងសង់មានផ្លូវប្រវែងជាង ៥៧ គីឡូ ម៉ែត្រ ពី ស្រុក កំពង់លែង ខេត្ត កំពង់ឆ្នាំង ឆ្ពោះទៅកាន់ ក្រុង ស្ទឹងសែន នៃខេត្តកំពង់ធំ។ ជាមួយគ្នានេះដែរ គឺនឹងមានសាងសង់ស្ពានឆ្លងកាត់ដៃទន្លេចំនួន៣ រួមមាន ១)ទន្លេផ្សារក្រោម ២)ទន្លេជល់មុខ និង ៣)ទន្លេកំពង់ហាវ ពីខេត្តកំពង់ឆ្នាំ ឆ្ពោះទៅខេត្តកំពង់ធំ ដែលមានប្រវែងរហូតដល់ទៅ ៣,៩០០ម៉ែត្រ ដែលនឹងក្លាយជាស្ពានវែងជាងគេបំផុតនៅក្នុងប្រទេសកម្ពុជា។
សម្តេចតេជោបានមានប្រសាសន៍ថា ព្រឹត្តិការណ៍បុណ្យទន្លេនេះ ក៏ជាឱកាសមួយដើម្បីពង្រឹងគុណភាពសេវាកម្ម ការបង្កើត និងអភិវឌ្ឍន៍ផលិតផលទេសចរណ៍ថ្មីៗប្រកបដោយការច្នៃប្រឌិតខ្ពស់ ជាពិសេសទេសចរណ៍តាមនាវា សហគមន៍ទេសចរណ៍តាមដងទន្លេ ព្រមទាំងរួមចំណែកជំរុញការតភ្ជាប់រឹតចំណងមិត្តភាព សាមគ្គីភាពរវាងបណ្តាប្រទេសក្នុងតំបន់អាស៊ាន និងបានពង្រឹងភាពជាដៃគូក្នុងក្របខណ្ឌតំបន់នានាដូចជា ក្របខណ្ឌមហាអនុតំបន់មេគង្គ មេគង្គ-ដប៉ុន មេគង្គ-គង្គា និងមេគង្គ-ឡានឆាងជាដើម។ ទន្ទឹមនឹងនេះ សម្តេចតេជោនាយករដ្ឋមន្ត្រី បានអំពាវនាវ សូមអោយប្រជាពលរដ្ឋទាំងអស់ត្រូវចេះរួមគ្នាថែរក្សាបរិស្ថាន ជាពិសេសតាមដងទន្លេ បឹង បួរ តាមរយៈការមិនចោលសំរាមក្នុងទន្លេ បឹង បួរ និងរួមគ្នាធ្វើអនាម័យអោយបានល្អ។
ទន្ទឹមនឹងនេះដែរ រាជរដ្ឋាភិបាលកម្ពុជា ក៏មានគម្រោងសាងសង់ស្ពាន ២ បន្ថែមទៀត នៅក្នុងខេត្តកំពង់ធំ ដើម្បីសម្រួលកុំឲ្យមានផលប៉ះពាល់ទៅដល់ចរាចរណ៍ផ្លូវទឹក ក៏ដូចជាចរាចរណ៍ត្រី។ គម្រោងនេះគឺ បានសិក្សារួចហើយ ហើយមិនមានផលប៉ះពាល់ណាមួយដល់ធនធានធម្មជាតិ បញ្ហាបង្វែរចរន្តទឹក និង ការបំលាស់ទីរបស់ត្រីនោះទេ ។
ពិធីបុណ្យទន្លេលើកទី៥ នៅក្នុងខេត្តកំពង់ឆ្នាំងនេះ ប្រារព្ធធ្វើឡើងក្រោមប្រធានបទ «ទន្លេ ផ្សារភ្ជាប់សន្តិភាព ប្រជាជន និងទេសចរណ៍» ដោយមានរយៈពេល៣ថ្ងៃចាប់ពីថ្ងៃទី១៥ ដល់ថ្ងៃទី១៧ ខែមីនា ឆ្នាំ២០១៩។
ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានអោយដឹងថា ពិធីបុណ្យនេះធ្វើឡើងក្នុងគោលបំណងធំគឺជំរុញការអភិវឌ្ឍវិស័យទេសចរណ៍ និងកំណើនទេសចរ ជំរុញការអភិវឌ្ឍហេដ្ឋារចនាសម្ព័ន្ធក្នុងខេត្តម្ចាស់ផ្ទះ គឺខេត្តកំពង់ឆ្នាំងពិសេសបំផុសស្មារតីចូលរួមក្នុងចលនាប្រឡងប្រណាំង «ទីក្រុងស្អាត រមណីយដ្ឋានស្អាត សេវាល្អ និងបដិសណ្ឋារកិច្ចល្អ» ក្នុងក្របខណ្ឌជាតិ និង «ចលនាទីក្រុងទេសចរណ៍ស្អាតអាស៊ាន»។
ក្នុងឱកាសនេះផងដែរ សម្តេចតេជោនាយករដ្ឋមន្ត្រីបានផ្តល់អនុសាសន៍សំខាន់ចំនួន៥ ចំនុចដូចខាងក្រោម៖
១)ត្រូវចូលរួមការពារសន្តិភាពអោយខានតែបាន ដើម្បីកុំអោយទន្លេយើងក្លាយទៅជាទន្លេដែងរងគ្រោះដោយសារតែសង្គ្រាមដូចពីអតីតកាល។ សូមប្រជាពលរដ្ឋត្រូវមើលអោយឃើញពីតម្លៃសន្តិភាព ជាពិសេសតម្លៃនៃការដាក់ចេញនូវនយោបាយ ឈ្នះ-ឈ្នះ។
២)ត្រូវខិតខំរកប្រភពទុនមកទប់ទល់ការបាក់ច្រាំងទន្លេដោយប្រការណាមួយ ទប់ស្កាត់និងធានាអោយបានការការពារធនធានទន្លេ ដូចជាការពារការបូមខ្សាច់បែបអាណាធិបតេយ្យ ការរក្សាធនធានព្រៃឈើ និងធនធានជលផលក្នុងទន្លេពិសេសការកាប់បំផ្លាញព្រៃលិចទឹក។
៣)ត្រូវខិតអភិវឌ្ឍវិស័យទេសចរណ៍អោយបានច្រើនបន្ថែមទៀតនៅតាមដងទន្លេរបស់យើង ដូចជាការបង្កើតតំបន់ទេសចរណ៍ថ្មីៗ ការបង្កើតផលិតផលទេសចរណ៍តាមដងទន្លេ ដើម្បីទាក់ទាញដល់ភ្ញៀវទេសចរណ៍ជាតិ និងអន្តរជាតិ។
៤)ត្រូវចេះរៀចចំទេសចរណ៍នៅនឹងកន្លែង តាមរយៈការបង្កើតកន្លែងទេសចរណ៍ដោយមិនចាំបាច់សម្រាប់តែបំរើភ្ញៀវទេសចរណ៍បរទេសប៉ុណ្ណោះទេ តែក៏សំរាប់បំរើភ្ញៀវជាតិខ្លួនឯងផងដែរ ដូចជាភោជនីដ្ឋានដែលមានការទាក់ទាញបំផុតពីភ្ញៀវជាដើម។
៥ )ត្រូវរៀចចំប្រព័ន្ធការតភ្ជាប់តាមដងទន្លេ ដូចជាការធ្វើផ្លូវ និងស្ពានជាដើម ដើម្បីបង្កការងាយស្រួលក្នុងការធ្វើដំណើររបស់ប្រជាពលរដ្ឋពីកន្លែងមួយទៅកន្លែងមួយ។
