ចិន មិនសប្បាយចិត្ត ចំពោះសេចក្ដីថ្លែងការណ៍របស់សហរដ្ឋអាមេរិក ស្ដីពីលទ្ធផលបោះឆ្នោតនៅតៃវ៉ាន់
21-September-2026 / ព័ត៌មានអន្តរជាតិ
ចិន៖ នៅថ្ងៃអាទិត្យ ទី១៤ ខែមករានេះចិនបាននិយាយថាខ្លួនមានការសោកស្ដាយជាខ្លាំង ចំពោះសេចក្ដីថ្លែងការណ៍របស់សហរដ្ឋអាមេរិកស្ដីពីការបោះឆ្នោត សកលនៅតៃវ៉ាន់ បន្ទាប់ពីទីក្រុងវ៉ាស៊ីនតោន បានផ្ញើសារអបអរសាទរជ័យជម្នះរបស់លោក Lai Ching-te។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។នៅក្នុងសេចក្ដីថ្លែងការណ៍របស់ខ្លួនក្រសួងការបរទេសចិន បានគូសបញ្ជាក់ ថា «សេចក្ដីថ្លែងការណ៍របស់សហរដ្ឋអាមេរិក បានបញ្ជូនសញ្ញាខុសយ៉ាងធ្ងន់ធ្ងរ ចំពោះ កងកម្លាំងផ្ដាច់ខ្លួនដែលចង់ឱ្យតៃវ៉ាន់មានឯករាជ្យ។ យើងពិតជាសោកស្ដាយ ហើយប្រឆាំងយ៉ាងដាច់ខាតចំពោះរឿងមួយនេះ»។
គួរបញ្ជាក់ថា លទ្ធផលបោះឆ្នោតសកលនៅប្រទេសតៃវ៉ាន់កាលពីថ្ងៃសៅរ៍ ទី១៣ ខែមករា បានបង្ហាញថា លោកលីជិងតែ( Lai Ching-te )មកពីគណបក្សវឌ្ឍនភាពប្រជាធិបតេយ្យ DPP ដែលជាបក្សកាន់អំណាច តៃវ៉ាន់សព្វថ្ងៃ គឺជាអ្នកទទួលបានជ័យជម្នះ ។តាមលទ្ធផលបោះឆ្នោតបង្ហាញថា លោកលីជិងតែ( Lai Ching-te) ទទួលបានសំឡេងគាំទ្រ ៤០.២ភាគរយ រីឯលោក ហ៊ូយូអ៊ិ(Hou Yu-ih) មកពីគណបក្សប្រឆាំងគួកមិញតាំង( Kuomintang KMT) ទទួលបានសំឡេងគាំទ្រ ៣៣.៤ភាគរយ ។លោកកូវិនជេ( Ko Wen-je )មកពីគណបក្សប្រជាជនតៃវ៉ាន់ (TPP) ទទួលបានសំឡេងគាំទ្រ ២៦.៤ភាគរយ។ តាមរយៈជ័យជម្នះនេះ លោក Lai Ching-te នឹងត្រូវក្លាយជាមេដឹកនាំតៃវ៉ាន់ថ្មីជំនួសលោកស្រី Tsai Ing-wen ដែលត្រូវផុតអាណត្តិ ដោយលោកនឹងត្រូវ ស្បថចូលកាន់តំណែង នៅខែឧសភាខាងមុខ។
សម្រាប់លោកប្រធានាធិបតីអាមេរិកជុំវិញការបោះឆ្នោតនៅតៃវ៉ាន់នេះដែរ នៅពេលត្រូវបានសាកសួរថាតើលោកមានប្រតិកម្មបែបណា? លោក ចូ បៃដិន បានបញ្ជាក់យ៉ាងខ្លីថា «យើងមិនគាំទ្រ ឯករាជ្យ (របស់តៃវ៉ាន់) នោះទេ»។ តែយ៉ាងណាក៏ដោយ រដ្ឋមន្ត្រីការបរទេសអាមេរិក លោក Antony Blinken បានផ្ញើសារអបអរសាទរជ័យជម្នះរបស់ លោក Lai ហើយថាអាមេរិក មានការប្ដេជ្ញាក្នុងការថែរក្សាសន្តិភាព និងស្ថិរភាពនៅត្រើយទាំងសងខាងនៃច្រកសមុទ្រតៃវ៉ាន់ រួមទាំងការដោះស្រាយ ការខ្វែងគំនិតគ្នាដោយសន្តិវិធី មិនមានការសម្លុតគំរាម និងការដាក់សម្ពាធ។បើតាមលោកអានតូនីប្លិងកឹន( Antony Blinken) សហរដ្ឋអាមេរិក កំពុងសម្លឹងមើលការធ្វើការជាមួយលោក Lai Ching-te ក៏ដូចជាមេដឹកនាំ គណបក្សនយោបាយទាំងអស់របស់តៃវ៉ាន់ ដើម្បីបន្តលើកកម្ពស់ទំនាក់ទំនងក្រៅផ្លូវការដ៏យូរអង្វែងរវាងសហរដ្ឋអាមេរិក និងតៃវ៉ាន់ អនុលោមតាម «គោលនយោបាយចិនតែមួយ» របស់សហរដ្ឋអាមេរិក។
សូមបញ្ជាក់ថាលោក Lai Ching-te ឬគេស្គាល់ថា William Lai គឺជាបេក្ខជនមេដឹកនាំតៃវ៉ាន់ និងជាមេដឹកនាំរង (អនុប្រធានធិបតី) ម្នាក់មកពីគណបក្សវឌ្ឍនភាពប្រជាធិបតេយ្យ DPP ដែលជាបក្សកាន់អំណាច តៃវ៉ាន់សព្វថ្ងៃរបស់លោកស្រីសៃអ៊ិងវិន( Tsai Ing-wen) ។ លោក Lai បច្ចុប្បន្នជាប្រធានគណបក្ស DPP ។ លោក Lai Ching-te កើតនៅឆ្នាំ១៩៥៩ នៅក្នុងស្រុក Wanli នៃទីក្រុង New Taipei និងមានឪពុកជាកម្មកររ៉ែធ្យូងថ្ម។ លោកទទួលបានបរិញ្ញាបត្រផ្នែកវិទ្យាសាស្ត្រមកពីសាកលវិទ្យាល័យ National Taiwan University និងសញ្ញាបត្រវិទ្យាសាស្ត្រវេជ្ជសាស្ត្រមកពីសាកលវិទ្យាល័យ National Cheng Kung University។ ក្រោយមកទៀត លោកទទួលបានសញ្ញាបត្រអនុបណ្ឌិតសុខាភិបាលសាធារណៈមកពីសាកលវិទ្យាល័យ Harvard ដែលនេះបានធ្វើឱ្យរូបលោកស្ថិតនៅក្នុង ចំណោមអ្នកជំនាញសុខាភិបាលសាធារណៈល្បីៗនៅតៃវ៉ាន់។
ក្នុងឆ្នាំ១៩៩៤ ជាពេលដែលលោកមានតួនាទីជាប្រធានម្នាក់នៅឯមន្ទីរពេទ្យសាកលវិទ្យាល័យ National Cheng Kung University Hospital ហើយតៃវ៉ាន់រៀបចំការបោះឆ្នោតដោយផ្ទាល់ ជាលើកដំបូងរបស់ខ្លួន ដើម្បីជ្រើសរើសអភិបាលក្រុង លោក Lai Ching-te បានចាប់ផ្ដើមចូលរួមក្នុងកិច្ចការសាធារណៈ និងនយោបាយបន្តិចម្ដងៗ ក្នុងនាមជាប្រធានសមាគមគ្រូពេទ្យទីក្រុង Tainan។រហូតដល់នៅអំឡុងវិបត្តិច្រកសមុទ្រតៃវ៉ាន់ឆ្នាំ១៩៩៦ ទើបរូបលោកបានបោះបង់ចោលអាជីពជាគ្រូពេទ្យ ដើម្បីប្រឡូកចូលក្នុងឆាកនយោបាយ។ លោក Lai បានក្លាយជាតំណាងរាស្ត្រតៃវ៉ាន់ អស់រយៈពេលជាងមួយទសវត្សរ៍មកហើយ និងធ្លាប់ជាអតីត ចៅហ្វាយក្រុងដ៏មានប្រជាប្រិយភាពនៃទីក្រុង Tainan ស្ថិតនៅភាគខាងត្បូងតៃវ៉ាន់។
លោក Lai ទទួលបានការគាំទ្រគួរឱ្យកត់សម្គាល់ពីសំណាក់អ្នកដែលមានជំហរតឹងរ៉ឹងគាំទ្រឯករាជ្យភាពតៃវ៉ាន់។ តែកន្លងមក លោកក៏ធ្លាប់មានប្រជាប្រិយភាពខ្លាំងនៅក្នុងចំណោមអ្នកបោះឆ្នោត មាន និន្នាការកណ្ដាលនិយមផងដែរ។ លោក Lai ជាមនុស្សម្នាក់ដែលចិនចាត់ទុកជាបន្លារក្នុងភ្នែក ដ្បិតលោកធ្លាប់ចាត់ទុកខ្លួនឯងជា «អ្នកធ្វើការដ៏ពិតប្រាកដម្នាក់ដើម្បីឯករាជ្យភាពរបស់តៃវ៉ាន់»។ ប៉ុន្តែ អនាគតមេដឹកនាំតៃវ៉ាន់ថ្មីរូបនេះបានអះអាងថាលោករក្សាស្ថានភាពដើមនៅតៃវ៉ាន់ ដោយនឹងមិនប្ដូរឈ្មោះផ្លូវការរបស់តៃវ៉ាន់ គឺសាធារណរដ្ឋចិននោះទេ ហើយនឹងដើរតាមគោលនយោបាយរបស់ លោកស្រី Tsai ដោយមិនបង្ករឿងជាមួយចិន តែក៏មិនចុះញមនឹងសម្ពាធពីចិននោះដែរ៕
