វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 94 នាក់
ម្សិលមិញ 3717 នាក់
សរុប 14148427 នាក់
ភ្នំពេញ៖សម្តេចតេជោ ហ៊ុន សែនប្រធានក្រុមឧត្តមប្រឹក្សាព្រះមហាក្សត្រនិងជាប្រធានគណបក្សប្រជាជនកម្ពុជា បានថ្លែងនៅថ្ងៃទី៩ ខែតុលា ឆ្នាំ២០២៣ ក្នុងពិធីបិទការថតខ្សែភាពយន្ត «កូនប្រុសក្រោមពន្លឺព្រះចន្ទពេញបូណ៌មី» នៅ OCIC ជ្រោយចង្វារថា សម្តេចនៅតែរក្សាជំហរដូចករណីនៅកូរ៉េខាងត្បូង និងនៅចិន គឺមិនជម្លៀសនិស្សិត និងពលរដ្ឋខ្មែរពីអ៉ីស្រាអែលនោះឡើយ បើរដ្ឋាភិបាលអ៉ីស្រាអែលមិនតម្រូវឱ្យជម្លៀសទេនោះ។សម្តេចបានចាត់ទុកការក្រាញននៀលនៅជាមួយអ៉ីស្រាអែល ជាការបង្ហាញនូវស្មារតីសាមគ្គីភាពជាមួយប្រជាពលរដ្ឋអ៉ីស្រាអែល។ទោះជាយ៉ាងណាសម្តេចតេជោ ហ៊ុន សែន បានផ្តល់យោបល់ជូនរាជរដ្ឋាភិបាលថា ក្នុងករណីអ៉ីស្រាអែលតម្រូវឱ្យកម្ពុជាជម្លៀសពលរដ្ឋចេញពីអ៉ីស្រាអែល គឺកម្ពុជា មិនខ្លាចនឹងជួលយន្តហោះទៅដឹកនិស្សិត និងពលរដ្ឋនោះឡើយ។
គួរជម្រាបថា និស្សិតកម្ពុជាប្រមាណជាង៤០០នាក់កំពុងសិក្សានៅប្រទេសអ៉ីស្រាអែល។ នៅថ្ងៃទី៧ ខែតុលា ថ្មីៗនេះ តំបន់ហ្កាហ្សាដែលនៅជាប់ដែនដីអ៉ីស្រាអែលត្រូវបានវាយប្រហារដោយគ្រាប់មីស៉ីលពីក្រុមហាម៉ាសប៉ាឡេស្ទីន ក្នុងនោះបានសម្លាប់មនុស្សអស់រាប់រយនាក់ មានទាំងនិស្សិតកម្ពុជាមួយរូបដែរឈ្មោះ ចាន់ ឧត្តម ជានិស្សិតនៅសាកលវិទ្យាល័យភូមិន្ទកសិកម្ម (ចម្ការដូង)។ ជុំវិញព្រឹត្តិការណ៍ដ៏ព្រួយបារម្ភនេះ ប្រទេសមួយចំនួនបានត្រៀមយន្តហោះទៅដឹកជញ្ជូននិស្សិតនិងពលកររបស់ខ្លួនចេញពីប្រទេសអ៉ីស្រាអែល ប៉ុន្តែសម្រាប់កម្ពុជាគឺមិនមានជំហរបែបនោះឡើយ។
សម្ដេចតេជោ ហ៊ុន សែន បានថ្លែងថា ឥឡូវនេះ នាយករដ្ឋមន្ត្រី រដ្ឋមន្ត្រីការបរទេស រដ្ឋមន្ត្រីកសិកម្ម រដ្ឋមន្ត្រីអប់រំ និងអ្នកពាក់ព័ន្ធជាច្រើនទៀតកំពុងតាមដានជាប់លើសុវត្ថិភាពប្រជាពលរដ្ឋកម្ពុជានៅប្រទេសអ៉ីស្រាអែល ប្រសិនបើរដ្ឋាភិបាលអ៉ីស្រាអែលពុំមានការឱ្យជម្លៀសជនបរទេសចេញពីប្រទេសរបស់ខ្លួនទេ ពលរដ្ឋកម្ពុជាក៏កុំចាកចេញចោលប្រជាជនអ៉ីស្រាអែល។សម្ដេចតេជោបានរំឭកនូវព្រឹត្តិការណ៍កាលពីឆ្នាំ២០១៣-២០១៤ នៅប្រទេសកូរ៉េខាងត្បូង ដែលកាលណោះរងការគំរាមកំហែងផ្លោងគ្រាប់មីស៉ីល ពីសំណាក់កូរ៉េខាងជើង ខណៈដែលពលករនិងនិស្សិតកម្ពុជារាប់ម៉ឺននាក់កំពុងស្នាក់នៅកូរ៉េខាងត្បូង ប៉ុន្តែសម្ដេចតេជោក្នុងនាមជានាយករដ្ឋមន្ត្រីនៃកម្ពុជានាពេលនោះ ពុំមានជំហរឱ្យប្រជាពលរដ្ឋកម្ពុជាចាកចោលប្រជាពលរដ្ឋកូរ៉េខាងត្បូងនោះឡើយ។ ដូចគ្នាដែរ នៅពេលផ្ទុះការរាតត្បាតជំងឺកូវីដ១៩ដំបូងៗនៅប្រទេសចិន នាដើមឆ្នាំ២០២០ ប្រទេសមួយចំនួនបានយកយន្តហោះទៅដឹកប្រជាពលរដ្ឋរបស់ខ្លួនចេញពីប្រទេសចិន ប៉ុន្តែសម្រាប់សម្ដេចតេជោ ហ៊ុន សែន វិញ គឺបានទៅដល់ប្រទេសចិន ដើម្បីជូនសារអំពីសាមគ្គីភាពជាមួយប្រជាជនចិនក្នុងការប្រយុទ្ធប្រឆាំងនឹងជំងឺកូវីដ១៩ ព្រមទាំងបានជូនសារទៅនិស្សិតកម្ពុជា សូមឱ្យបន្តនៅជាមួយប្រជាជនចិនក្នុងកាលៈទេសៈដ៏លំបាក។
សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាប្រធានគណបក្សប្រជាជនកម្ពុជា នៅថ្ងៃទី០៩ ខែតុលា ឆ្នាំ២០២៣នេះ បានថ្លែងអំណរគុណ ដល់សប្បុរសជនទាំងអស់ ដែលបានឧបត្ថម្ភគាំទ្រ ដល់ការថតភាពយន្តរឿង «កូនប្រុសក្រោមពន្លឺព្រះចន្ទពេញបូណ៌មី» ហើយភាពយន្តនេះ ជាភាពយន្តចំណាយច្រើនជាងគេ ក្នុងចំណោមភាពយន្តថតនៅកម្ពុជា។«ខ្ញុំសូមអរគុណ ចំពោះសប្បុរសជននានា ដែលបានចូលរួមជួយ នៅក្នុងការផ្គត់ផ្គង់ថវិកាសម្រាប់ការថតរឿងនេះ ដែលជាការចំណាយច្រើនបំផុត នៅក្នុងប្រវិត្ដនៃខ្សែភាពយន្ដរបស់កម្ពុជាយើង»។
សូមជម្រាបថា ភាពយន្តរឿង «កូនប្រុសក្រោមពន្លឺព្រះចន្ទពេញបូណ៌មី» ដែលជាភាពយន្តបែប ប្រវត្តិសាស្ត្រ និងឆ្លុះបញ្ចាំងពីជីវិតតស៊ូរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធ បណ្ឌិត ប៊ុន រ៉ានី ហ៊ុនសែន ក្នុងបុព្វហេតុជាតិមាតុភូមិ បានថតចប់ជាស្ថាពរហើយ។សម្តេចតេជោ ហ៊ុន សែន បានឲ្យដឹងផងដែរថា ភាពយន្តទាំង៩៩ភាគ នៃភាពយន្តរឿង «កូនប្រុសក្រោមពន្លឺព្រះចន្ទពេញបូណ៌មី» នេះ ត្រូវបានឆ្លងកាត់ការពិនិត្យគ្រប់ភាគ ហើយភាគខ្លះ ត្រូវបានសម្តេចតម្រូវឲ្យថតឡើងវិញ។
ការថតភាពយន្តចម្រៀងរឿង កូនប្រុសក្រោមពន្លឺព្រះចន្ទ មានលោក ហ្វៃ សំអាង និងលោកឧកញ៉ា ហេង ឡុង ។ខ្សែភាពយន្តប្រវត្តិសាស្ត្រនេះ ត្រូវបានក្រុមការងារផលិតភាពយន្ត ជ្រើសរើសតួសំដែងសំខាន់ៗចំនួន ១០៣នាក់ តួប្រជាជនយ៉ាងតិច ៥០០នាក់ ព្រមទាំងកងកម្លាំង ៥០០នាក់ផ្សេងទៀត ដើម្បីចូលរួមសំដែង ក្នុងឈុតឆាកធំៗ។ខ្សែភាពយន្ត រឿង «កូនប្រុសក្រោមពន្លឺព្រះចន្ទពេញបូណ៌មី» បានបង្ហាញពីខ្សែជីវិតតស៊ូរបស់សម្តេចតេជោ ពីកុមារភាពត្រូវចាកចេញ ពីមាតាបិតា បងប្អូនបង្កើតនៅភូមិកំណើត ទៅស្វែងរកការសិក្សារៀនសូត្រ នៅរាជធានីភ្នំពេញ ដោយស្នាក់អាស្រ័យជាមួយ ព្រះសង្ឃក្នុងវត្តនាគវ័ន្ត។ភាពយន្តដែលទាក់ទង ទៅនឹងព្រឹត្តិការណ៍ប្រវត្តិសាស្ត្រជាតិនេះ ចំណាយថវិកាសម្រាប់ផលិត ប្រមាណជា៦លានដុល្លារអាមេរិក។ ថវិកាដែលចំណាយថតភាពយន្តនេះ មិនមែនជាថវិកាជាតិនោះឡើយ៕