នាយករដ្ឋមន្ត្រីកម្ពុជាថៃពិភាក្សាគ្នា អំពីវិស័យនៃកិច្ចសហការទ្វេភាគីកម្ពុជា-ថៃ ដែលមានភាពសម្បូរបែប និងទូលំទូលាយ
21-September-2026 / ផ្សេងៗ
ភ្នំពេញ៖លោក សេដ្ឋា ថាវីស៊ីន នាយករដ្ឋមន្ត្រីថ្មីថៃ បានអញ្ជើញចាកចេញពីប្រទេសកម្ពុជា នៅវេលាម៉ោង៧៖០០យប់ ថ្ងៃទី២៨ ខែកញ្ញា ឆ្នាំ២០២៣នេះ បន្ទាប់ពីបំពេញទស្សនកិច្ចផ្លូវការជាលើកដំបូង រយៈពេលពេញ១ថ្ងៃ ប្រកបដោយផ្លែផ្កា។
ក្នុងកម្មវិធីនៅកម្ពុជា ប្រមុខរាជរដ្ឋាភិបាលទាំងពីរ បានពិភាក្សាគ្នាដោយយកចិត្តទុកដាក់ និងស្និទ្ធស្នាល អំពីវិស័យនៃកិច្ចសហការទ្វេភាគីកម្ពុជា-ថៃ ដែលមានភាពសម្បូរបែប និងទូលំទូលាយ។ កិច្ចពិភាក្សាបានផ្តោតជាសំខាន់ទៅលើវិស័យគន្លឹះ ដោយរាប់ចាប់ពីវិស័យពាណិជ្ជកម្ម, វិនិយោគ, ទេសចរណ៍, ការអប់រំ, ការបណ្ដុះបណ្ដាលវិជ្ជាជីវៈ, កិច្ចការទូត, ទំនាក់ទំនងធុរកិច្ច, ទំនាក់ទំនងប្រជាជន និងប្រជាជន, ការតភ្ជាប់រវាងប្រទេសទាំងពីរ តាមផ្លូវអាកាស, ផ្លូវរថភ្លើង និងផ្លូវថ្នល់, សេដ្ឋកិច្ចឌីជីថល និងសេដ្ឋកិច្ចបៃតង, កិច្ចការពាក់ព័ន្ធនឹងអន្តោប្រវេសន៍រហូតដល់វិស័យសន្តិសុខឆ្លងដែន និងសន្តិសុខអនឡាញ។
ថ្នាក់ដឹកនាំទាំងពីរក៏បានណែនាំឱ្យក្រសួង-ស្ថាប័នពាក់ព័ន្ធនៃប្រទេសទាំងពីរ បន្តពិភាក្សា និង សហការគ្នា ដើម្បីឱ្យកិច្ចសហប្រតិបត្តិការកម្ពុជា-ថៃ ទទួលបានផ្លែផ្កា សម្រាប់ជាឧត្តមប្រយោជន៍ទាំងសងខាង។
កម្ពុជា និងថៃបង្កើតទំនាក់ទំនងការទូតជាផ្លូវការនៅថ្ងៃទី១៩ ខែធ្នូ ឆ្នាំ១៩៥០។ ទំនាក់ទំនង នេះ ត្រូវបានផ្អាកទៅវិញនៅឆ្នាំ១៩៦២ និងភ្ជាប់ឡើងវិញនៅឆ្នាំ១៩៩១។ កម្ពុជា និងថៃ មានព្រំដែនជាប់គ្នា ប្រវែងប្រមាណ ៨១៧គីឡូម៉ែត្រ ខេត្តខ្មែរជាប់ព្រំដែនថៃ រួមមាន៖ កោះកុង ពោធិ៍សាត់ បាត់ដំបង បៃលិន បន្ទាយមានជ័យ ព្រះវិហារ និងឧត្តរមានជ័យ។
បច្ចុប្បន្នកម្ពុជាមានច្រកទ្វារព្រំដែនជាមួយថៃ សរុបចំនួន ៤៣ច្រក ដើម្បីសម្រួលដល់ការធ្វើដំណើរ ចេញ-ចូលរវាងប្រជាជន និងភ្ញៀវទេសចរ ការធ្វើពាណិជ្ជកម្ម ការផ្លាស់ប្ដូរទំនិញ សេដ្ឋកិច្ច និងការដឹកជញ្ជូនរវាងប្រទេសទាំងពីរ។ ច្រកទាំង៤៣នេះ រួមមាន ច្រកទ្វារកំពង់ផែសមុទ្រចំនួន ៦ច្រក, ច្រកទ្វារអន្តរជាតិចំនួន ១១ច្រក, ច្រកទ្វារទ្វេភាគីចំនួន ១ច្រក, និងច្រកទ្វារតំបន់ព្រំដែនចំនួន ១៤ច្រក។កម្ពុជា និងថៃ ក៏ជាដៃគូពាណិជ្ជកម្មដ៏ធំផងដែរ។ ពាណិជ្ជកម្មរវាងកម្ពុជា និងប្រទេសថៃ ឆ្នាំ២០២២សម្រេចបានប្រមាណ ៤,៦៦ពាន់លានដុល្លារ (កម្ពុជានាំទៅថៃជាង ៨៣១លាន, នាំចូលពីថៃមានជិត ៤ពាន់លាន), ចាប់ពីខែមករា ដល់ខែសីហា ២០២៣ ទំហំពាណិជ្ជកម្មសរុបប្រមាណ ២,៥៨ពាន់លានដុល្លារ (កម្ពុជានាំទៅថៃ ៦៤៧លានដុល្លារ និងនាំចូលពីថៃជិត ២ពាន់លានដុល្លារ)។
កម្ពុជា និងប្រទេសថៃ មានបំណងសម្រេចការធ្វើពាណិជ្ជកម្មរួមគ្នាឱ្យបាន ១៥ពាន់លានដុល្លារនៅឆ្នាំ២០២៥។តាមរយៈទំនាក់ទំនងនេះ ថៃ ក៏ជាប្រទេសដែលបានផ្តល់អាហារូបករណ៍ជាច្រើនកន្លែងដល់និស្សិតកម្ពុជាផងដែរ។ ចាប់ពីឆ្នាំ១៩៩៥-ខែមីនា ឆ្នាំ២០២៣ គម្រោងព្រះរាជឧបត្ថម្ភលើវិស័យអប់រំរបស់ព្រះអង្គម្ចាស់ក្សត្រី មហាចក្រី សិរិនថន មាននិស្សិតកម្ពុជាទទួលបានអាហារូបករណ៍ថ្នាក់បរិញ្ញាបត្រ បរិញ្ញាបត្រជាន់ខ្ពស់ និងបណ្ឌិត ចំនួនសរុប ៣,២៤០នាក់, ពី TICA ចំនួន ១១នាក់ និងផ្សេងៗចំនួន ១៩នាក់។គិតត្រឹមខែកក្កដា ឆ្នាំ២០២៣ និស្សិតខ្មែរដែលកំពុងសិក្សាថ្នាក់បរិញ្ញាបត្រ បរិញ្ញាបត្រជាន់ខ្ពស់ និងបណ្ឌិត ទាំងទទួលបានអាហារូបករណ៍ និងបង់ប្រាក់នៅប្រទេសថៃ មានចំនួន ១,៥២៨នាក់។កម្ពុជា និងថៃ ក៏មានកិច្ចសហប្រតិបត្តិការជាមួយគ្នាកិច្ចការជាច្រើនទៀតលើផ្នែកសន្តិសុខ និងការពារជាតិ វប្បធម៌ សុខាភិបាល ទេសចរណ៍ កសិកម្ម ការងារ និងបណ្តុះបណ្តាលវិជ្ជាជីវៈ។
សូមបញ្ជាក់ថាលោក សេដ្ឋា ថាវីស៉ីន បានអញ្ជើញមកដល់ប្រទេសកម្ពុជា នៅម៉ោង១០៖៣០នាទីព្រឹក ថ្ងៃទី២៨ ខែកញ្ញា ឆ្នាំ២០២៣ ដើម្បីបំពេញទស្សនកិច្ចផ្លូវការលើកដំបូង តបតាមការអញ្ជើញរបស់ សម្តេចធិបតី ហ៊ុន ម៉ាណែត បន្ទាប់ពីលោកបានចូលកាន់តំណែងជានាយករដ្ឋមន្ត្រីថ្មីរបស់ថៃ។ក្រៅពីជួបពិភាក្សាទ្វេភាគីជាមួយ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា, លោកនាយករដ្ឋមន្ត្រីថៃបានអញ្ជើញបំពាក់កម្រងផ្កា និងគោរពព្រះវិញ្ញាណក្ខន្ធ ព្រះបរមរតនកោដ្ឋ និងជួបសម្តែងការគួរសមចំពោះ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា, សម្តេចវិបុលសេនាភក្តី សាយ ឈុំ ប្រមុខរដ្ឋស្តីទី និងជួបសម្តែងការគួរសមចំពោះ សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រផងដែរ។
