សម្តេចហ៊ុនម៉ាណែតនាំជោគជ័យពីអាមេរិកមកស្រុកខ្មែរ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុនី បានអញ្ជើញដឹកនាំគណៈប្រតិភូជាន់ខ្ពស់ នៃរាជរដ្ឋាភិបាលកម្ពុជាអញ្ជើញចូលរូមកិច្ចពិភាក្សាទូទៅ នៃសម័យ ប្រជុំលើកទី៧៨ នៃមហាសន្និបាតអង្គការសហប្រជាជាតិ (UNGA) ដែលប្រព្រឹត្តទៅពីថ្ងៃទី១៩ ដល់ថ្ងៃទី២៦ ខែកញ្ញា ឆ្នាំ២០២៣ នៅទីក្រុងញូវយ៉ក សហរដ្ឋអាមេរិកឡូវបាន វិលត្រឡប់មកដល់មាតុប្រទេសវិញហើយ ប្រកបដោយសុវត្ថិភាព និងនាំមកនូវជោគជ័យជូនប្រទេសជាតិជាលើកទី៣ ក្នុងរយៈពេល១ខែ ។ នេះបើតាមសេចក្តីប្រកាសពត៍របស់អង្គភាពអ្នកនាំពាក្យរាជរដ្ឋាភិបាល នៅថ្ងៃទី២៥ ខែកញ្ញា ឆ្នាំ២០២៣។
មូលបទចម្បងសម្រាប់កិច្ចពិភាក្សាក្នុងឆ្នាំសន្និបាតលើកទី៧៨ នៅទីក្រុងញ៉ូវយ៉ក សហរដ្ឋអាមេរិក គឺ «កសាងទំនុកចិត្តឡើងវិញ និងបំផុសសាមគ្គីភាពក្នុងពិភពលោក៖ ជំរុញសកម្មភាពលើរបៀបវារៈឆ្នាំ២០៣០ និងគោលដៅអភិវឌ្ឍន៍ដោយចីរភាព ដើម្បីសន្តិភាព វិបុលភាព វឌ្ឍនភាព និងចីរភាពសម្រាប់ទាំងអស់គ្នា»។សម្ដេចធិបតី បានថ្លែងសន្ទរកថា នៅអង្គការសហប្រជាជាតិ ដោយផ្ដោតលើទិដ្ឋភាពសំខាន់ៗចំនួន៣ រួមមាន ១.បដិវត្តន៍ពិភពលោក ២.វឌ្ឍនភាពសង្គមសេដ្ឋកិច្ចកម្ពុជា និង៣.ការប្ដេជ្ញាចិត្តរបស់កម្ពុជា ចំពោះសកម្មភាពបដិវត្តន៍កម្ម នៃគោលដៅអភិវឌ្ឍន៍ប្រកបដោយចីរភាព។
សម្ដេចធិបតី ហ៊ុន ម៉ាណែត មានជំនួបជាមួយឥស្សរជនជាន់ខ្ពស់ និងតំណាងស្ថាប័នមួយចំនួន រួមមាន អគ្គលេខាធិការអង្គការសហប្រជាជាតិ, ជួបសំដែងការគួរសមជាមួយ អនុរដ្ឋមន្ត្រីស្ដីទី នៃក្រសួងការបរទេសសហរដ្ឋអាមេរិក, ជួបជាមួយប្រធានាធិបតីទីម័រឡេស្តេរ, ជួបជាមួយនាយកមជ្ឈមណ្ឌលការអភិវឌ្ឍប្រកបដោយចីរភាព នៃសាកលវិទ្យាល័យកូឡុំប៊ី និងជួបជាមួយតំណាងក្រុមហ៊ុនជាច្រើនទៀត ដើម្បីទាក់ទាញការវិនិយោគ ពីសហរដ្ឋអាមេរិកមកកាន់កម្ពុជា។
សម្ដេចធិបតី ក៏មានកម្មវិធីមួយចំនួនទៀត រួមមានការអញ្ជើញបើកវេទិកាសេដ្ឋកិច្ចសហរដ្ឋអាមេរិក-កម្ពុជា ក្នុងគោលបំណង ដើម្បីពង្រឹងកិច្ចសហប្រតិបត្តិការលើវិស័យពាណិជ្ជកម្ម និងជំរុញការវិនិយោគពីសហរដ្ឋអាមេរិក មកកាន់កម្ពុជា។ ជាមួយគ្នានោះ សម្ដេចក៏បានជួបជាមួយនឹងសហគមន៍ខ្មែរ រស់នៅសហរដ្ឋអាមេរិក និងកាណាដាផងដែរ។នៅក្នុងជំនួបជាមួយលោកស្រី វ៉ិចតូរីយ៉ នូលែន អនុរដ្ឋមន្ត្រីការបរទេសស្ដីទីអាមេរិក, លោកស្រី បានជម្រាបជូនសម្តេចថា អាមេរិកសម្រេចផ្តល់ជូនកម្ពុជាវិញ ដោយមិនចាំបាច់ឲ្យកម្ពុជាស្នើសុំនោះទេ នូវជំនួយក្នុងទំហំទឹកប្រាក់ប្រមាណ ១៨ លានដុល្លារអាមេរិក តាមរយៈទីភ្នាក់ងារអាមេរិក សម្រាប់ការអភិវឌ្ឍអន្តរជាតិ (USAID) ដែលសហរដ្ឋអាមេរិក បានផ្អាក ក្រោយការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣។
ជាការកត់សម្គាល់ វត្តមានសម្ដេចមហាបវរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នៅទីក្រុងញ៉ូវយ៉ក បានទទួលការស្វាគមន៍ប្រកបដោយមនោសញ្ចេតនាមហាគ្រួសារខ្មែរ យ៉ាងរីករាយកក់ក្ដៅពីសំណាក់បងប្អូនប្រជាពលរដ្ឋខ្មែររស់នៅសហរដ្ឋអាមេរិក និងកាណាដា។ទាក់ទងដំណើរបេសកកម្មក្រៅប្រទេសសម្ដេចធិបតី គូសបញ្ជាក់ថា បេសកកម្មក្រៅប្រទេសទាំង៣លើក ពោលគឺនៅឥណ្ឌូនេស៊ី សាធារណរដ្ឋប្រជាមានិតចិន និងទីក្រុងញូវយ៉ក សហរដ្ឋអាមេរិកនាពេលនេះ គឺដើម្បីសម្រេចកិច្ចការ ៣ ក្នុងពេលតែមួយ រួមមាន៖
១-ការងារការទូត គឺដើម្បីបង្ហាញថា កម្ពុជាជាប្រទេសអធិបតេយ្យ ឈរស្មើមុខជាមួយគ្រប់ប្រទេសលើពិភពលោក។២-ការងារនយោបាយ ដើម្បីបញ្ជាក់គោលជំហរ ក្នុងឋានៈជាសមាជិករបស់អង្គការសហប្រជាជាតិ ពាក់ព័ន្ធអធិបតេយ្យជាតិ ផលប្រយោជន៍ជាតិ និងបញ្ហាប្រឈមរបស់ពិភពលោក។៣-ការងារសេដ្ឋកិច្ច គឺការខិតខំកៀរគរការវិនិយោគ បង្កើនទំហំពាណិជ្ជកម្ម ស្វែងរកទីផ្សារសម្រាប់ផលិតផល និងទាក់ទាញភ្ញៀវទេសចរណ៍។សម្ដេចធិបតី សង្កត់ធ្ងន់ថា រាជរដ្ឋាភិបាលកម្ពុជា គ្មានរាត្រីទឹកឃ្មុំដើម្បីលំហែកាយក្រោយការបោះឆ្នោតនោះទេ ផ្ទុយទៅវិញបានដាក់ចេញ និងចាប់ផ្ដើមអនុវត្តប្រកបដោយភាពស្វាហាប់នូវយុទ្ធសាស្ត្របញ្ចកោណដំណាក់កាលទី១ ដើម្បីសម្រេចឧត្តមប្រយោជន៍ជូនជាតិ និងប្រជាជន។
.jpg&h=97&w=146)
.jpg&h=97&w=146)
