ក្រុមប្រឆាំងឥណ្ឌា មិនពេញចិត្តចំពោះការប្តូរឈ្មោះប្រទេស ដោយនាយករដ្ឋមន្ត្រីម៉ូឌី
03-April-2024 / ព័ត៌មានអន្តរជាតិ
ឥណ្ឌា៖សារព័ត៌មាន AFP នៅថ្ងៃចន្ទ ទី១១ ខែកញ្ញា ឆ្នាំ២០២៣ បានផ្សាយថា មេដឹកនាំនៃគណបក្សប្រឆាំងធំជាងគេរបស់ឥណ្ឌា បាននិយាយថា គម្រោងរបស់នាយករដ្ឋមន្ត្រីឥណ្ឌា លោក ណារិនដ្រា ម៉ូឌី (Narendra Modi) ក្នុងការផ្លាស់ប្តូរឈ្មោះប្រទេសទៅជា Bharat គឺជារឿងមិនទំនងទាល់តែសោះ។
ប្រាប់ក្រុមអ្នកសារព័ត៌មាន នៅឯទីក្រុងព្រុចសែល អំលុងដំណើរបំពេញទស្សនកិច្ចរយៈពេល៥ថ្ងៃ នៅតំបន់អឺរ៉ុប លោក រ៉ាហ៊ូល ហ្កាន់ឌី (Rahul Gandhi) ដែលជាមេដឹកនាំគណបក្សសមាជ( Congress) បាននិយាយថា «លោក ម៉ូឌី មានបំណងផ្លាស់ប្តូរឈ្មោះប្រទេស ដែលជារឿងមិនទំនងទាល់តែសោះ»។ លោក Gandhi បានលើកឡើងបែបនេះ ក្រោយត្រូវបានសាកសួរអំពីរឿងឥណ្ឌាប្រើប្រាស់ឈ្មោះ Bharat អំលុងព្រឹត្តិការណ៍កិច្ចប្រជុំកំពូល G20 កាលពីចុងសប្តាហ៍មុន។ភាពភ្ញាក់ផ្អើលនិងងឿងឆ្ងល់បានកើតមានឡើង កាលពីសប្តាហ៍កន្លងទៅនេះ នៅពេលដែលរដ្ឋាភិបាលលោក ម៉ូឌី បានសម្រេចចិត្តប្រើប្រាស់ពាក្យសំស្ក្រឹត Bharat ជាឈ្មោះរបស់ប្រទេសឥណ្ឌា នៅក្នុងលិខិតអញ្ជើញផ្ញើទៅកាន់មេដឹកនាំអន្តរជាតិ ក៏ដូចជាក្រុមតំណាងទាំងឡាយ នៃកិច្ចប្រជុំកំពូល G20 ដែលបានប្រព្រឹត្តទៅរយៈពេល២ថ្ងៃ នៅឯទីក្រុងញូដេលី។ លោក ម៉ាឌូ ក៏បានប្រើពាក្យ Bharat លើស្លាកឈ្មោះប្រទេសឥណ្ឌា នៅពេលបើកកិច្ចប្រជុំ G20 កាលពីថ្ងៃសៅរ៍ផងដែរ។
ប្រធានាធិបតីឥណ្ឌា លោកស្រីឌ្រូផាឌីមឺមូ (Droupadi Murmu) ពេលរៀបចំកិច្ចប្រជុំជី២០ (G20) ការិយាល័យរបស់លោកស្រីបានផ្ញើលិខិតអញ្ជើញសម្រាប់ពិសាភោជនាហារពេលល្ងាចទៅកាន់បណ្តាភ្ញៀវចូលរួម ដោយប្រើពាក្យថាប្រធានាធិបតីភារតៈ (Bharat) ជំនួសឱ្យពាក្យប្រធានាធិបតីឥណ្ឌា ។ សកម្មភាពនេះ បានឆ្លុះបញ្ចាំងអំពីកិច្ចខិតខំប្រឹងប្រែងរបស់គណបក្សហិណ្ឌូជាតិនិយម នៅក្នុងការលុបបំបាត់អ្វីដែលខ្លួនមើលឃើញថាជាឈ្មោះនៅក្នុងសម័យអាណានិគមអង់គ្លេស ។
ការផ្លាស់ប្តូរនេះមានការគាំទ្រដោយមន្ត្រីនៃគណបក្សភារតធីយ៉ាហ្សាណាតា (Bharatiya Janata) របស់លោកនាយករដ្ឋមន្ត្រីណារិន្ទ្រម៉ូឌី (Narendra Modi) ក្នុងរយៈពេលជាច្រើនឆ្នាំមកហើយ ដោយមតិអ្នកគាំទ្រឱ្យមានការផ្លាស់ប្តូរឈ្មោះពី“ឥណ្ឌា” មក “ភារតៈ” បានលើកឡើងថា អាណានិគមអង់គ្លេសបានដាក់ឈ្មោះថា ឥណ្ឌា ព្រោះដើម្បីគ្រប់គ្រង់ត្រួតត្រាទៅលើ ភារតៈ រីឯឈ្មោះនេះទៀតសោតគឺជាការបញ្ជាក់ "អំពីភាពជាទាសករ" នាសម័យនោះ ។
ស្ថិតនៅឯទីក្រុងញូវដេលី (New Delhi) មន្ត្រីសន្តិសុខឯកជនម្នាក់ឈ្មោះអាកាសទីវ៉ារី (Akash Tiwari) បានថ្លែងប្រាប់ភ្នាក់ងារសារព័ត៌មាន NBC News ជុំវិញពាក្យចចាមអារ៉ាមនៃការផ្លាស់ប្តូរថា "យើងធ្លាប់ប្រើពាក្យភារតៈពីមុនមកហើយ" ។ ដោយលោកបានបន្ថែមបន្តិចថា “ការផ្លាស់ប្តូរគឺពិតជាល្អ” ។
គួរបញ្ជាក់ថា ភារតៈ គឺជាពាក្យបាលីសំស្ក្រឹតបុរាណ ដែលប្រវត្ដិវិទូជាច្រើនជឿជាក់ថា មានដើមកំណើតមកពីអក្សរសិល្ប៍ហិណ្ឌូសម័យដើម ។ ដោយឡែក នៅក្នុងសំណេររបស់ទីភ្នាក់ងារសារព័ត៌មានមួយចំនួន រួមមាន AP និង Al Jazeera បានសរសេរថា ពាក្យ “ភារតៈ” ក៏មានន័យថាឥណ្ឌាផងដែរ នៅក្នុងអក្សរសិល្ប៍ហិណ្ឌូ ។ប្រទេសដែលមានប្រជាជនជាង ១.៤ ពាន់លាននាក់វ៉ាដាច់ប្រទេសចិន ត្រូវបានស្គាល់ជាផ្លូវការដោយមានឈ្មោះពីរ គឺឥណ្ឌា និងភារតៈ ប៉ុន្តែឈ្មោះឥណ្ឌាហាក់មានការប្រើប្រាស់ជាទូទៅ ទាំងនៅក្នុងស្រុក និងក្រៅស្រុក ។ ចក្រភពអង់គ្លេសបានគ្រប់គ្រងប្រទេសឥណ្ឌាប្រហែល ២០០ ឆ្នាំរហូតដល់ប្រទេសនេះទទួលបានឯករាជ្យនៅឆ្នាំ ១៩៤៧ ។
បើតាមមេបក្សប្រឆាំងឥណ្ឌាលោកហ្កាន់ឌី( Gandhi) ចាត់ទុកផែនការប្តូរឈ្មោះប្រទេសរបស់រដ្ឋាភិបាលឥណ្ឌានាពេលនេះ គឺហាក់ដូចជាយុទ្ធសាស្ត្របង្វែរចំណាប់អារម្មណ៍មួយ នៅពេលក្រុមប្រឆាំងលើកឡើងពីបញ្ហាប្រឈម ដែលមានលក្ខណៈស៉ីជម្រៅនៅក្នុងស្រុក៕ប្រភព៖ AP, Reuters, NBC News, Al Jazeera
