លោក ស៊ី ជីនពីង និងលោក ត្រាំជជែកគ្នាពីការរកស៊ីបើទោះបីមានការលើកពី បញ្ហាតៃវ៉ាន់ក៏ដោយ!

ប្រទេសចិន៖ ប្រធានាធិបតីចិន លោក ស៊ី ជីនពីង បានព្រមានអំពីលទ្ធភាពនៃការផ្ទុះជម្លោះជាមួយសហរដ្ឋអាមេរិក ជុំវិញបញ្ហាតៃវ៉ាន់ ហើយលោកបានប្រាប់ប្រធានាធិបតីអាមេរិក លោក ដូណាល់ ត្រាំ ថាវាគឺជាបញ្ហាដ៏សំខាន់បំផុតនៅក្នុងទំនាក់ទំនងចិន-អាមេរិក។

ទីភ្នាក់ងារព័ត៌មាន BBC នាថ្ងៃព្រហស្បតិ៍ ទី១៤ ខែឧសភា ឆ្នាំ២០២៦បានឲ្យដឹងថាអំឡុងកិច្ចពិភាក្សាជាមួយលោក ត្រាំ នៅទីក្រុងប៉េកាំង លោកប្រធានាធិបតីចិន បានលើកឡើងដូច្នេះថា «ប្រសិនបើបញ្ហាតៃវ៉ាន់ចាត់ចែងបានល្អ ទំនាក់ទំនងទ្វេភាគីជាទូទៅ អាចបន្តមានស្ថិរភាព។ ប៉ុន្តែប្រសិនបើវាចាត់ចែងមិនបានល្អទេនោះ ប្រទេសទាំងពីរអាចប៉ះទង្គិចគ្នា ឬថែមទាំងឈានដល់ការផ្ទុះជម្លោះតែម្តង ដែលនឹងរុញច្រានទំនាក់ទំនងចិន-អាមេរិកទាំងមូល ទៅក្នុងស្ថានការណ៍ដ៏គ្រោះថ្នាក់»។

លោក ស៊ី បានបន្ថែមថា ការប្រកាសឯករាជ្យដោយតៃវ៉ាន់ គឺមិនអាចត្រូវគ្នាឡើយ ជាមួយសន្តិភាពនៅច្រកសមុទ្រតៃវ៉ាន់ ហើយសន្តិភាពនៅច្រកសមុទ្រនេះ គឺជាផលប្រយោជន៍រួមដែលប្រសើរជាងគេបង្អស់ រវាងចិននិងសហរដ្ឋអាមេរិក។

ក្រៅពីនេះប្រធានាធិបតីអាមេរិកលោកដូណល់ ត្រាំ និងលោកស៊ី ជីនពីងប្រធានាធិបតីចិន បានយល់ស្របគ្នាថាច្រកសមុទ្រHormuz ត្រូវតែបើកចំហសម្រាប់រំហូរថាមពលដោយសេរី។ នេះបើតាមប្រភពពីសេតវិមានអាមេរិក។ ភាគីទាំងពីរបានឯកភាពគ្នាទៀតថា អ៊ីរ៉ង់មិនអាចមានអាវុធនុយក្លេអ៊ែរបានទេ ដែលជាចំណុចជាប់គាំងដ៏សំខាន់មួយ រវាងអ៊ីរ៉ង់និងទីក្រុងវ៉ាស៊ីនតោន ក្នុងកិច្ចចរចាដែលផ្តួចផ្តើមឡើងដើម្បីបញ្ចប់សង្គ្រាមនៅតំបន់មជ្ឈិមបូព៌ា។

ក្នុងជំនួបនាពេលព្រឹក ថ្នាក់ដឹកនាំនៃប្រទេសមហាអំណាចពិភពលោកទាំងពីរ បានពិភាក្សាលើបញ្ហាស្មុគស្មាញរួមទាំងអ៊ីរ៉ង់ ពាណិជ្ចកម្មនិងតៃវ៉ាន់។ បើតាមCNA លោកត្រាំនិងលោកស៊ីក៏បានពិភាក្សា អំពីការកសាងវឌ្ឍនភាពក្នុងការបញ្ចប់រំហូរសារធាតុគីមីfentanylចូលទៅក្នុងសហរដ្ឋអាមេរិក ក៏ដូជាការបង្កើនការទិញរបស់ចិន លើផលិតផលកសិកម្មរបស់អាមេរិកផងដែរ។

ក្នុងអំឡុងកិច្ចពិភាក្សាផ្លូវរដ្ឋនៅទីក្រុងប៉េកាំង នាថ្ងៃព្រហស្បតិ៍នេះ ប្រធានាធិបតីអាម៉េរិក ដូណាល់ ត្រាំ បានប្រើប្រាស់ពាក្យសម្តីយ៉ាងផ្អែមល្ហែម និងកោតសរសើរដោយមិនលាក់លៀមចំពោះប្រធានាធិបតី ស៊ី ជីនពីង ដោយចាត់ទុកមេដឹកនាំចិនរូបនេះថាជា «មេដឹកនាំដ៏ឆ្នើមបំផុត»។ លោកបញ្ជាក់ថា ទោះបីជាមានមតិរិះគន់ចំពោះការលើកសរសើរនេះក៏ដោយ ក៏លោកនៅតែប្រកាន់ជំហរនិយាយដដែល ព្រោះតែវាជាការពិតដែលលោកបានឃើញដោយផ្ទាល់ភ្នែក ។

លោក ត្រាំ ក៏បានបង្ហាញការកោតស្ញប់ស្ញែងយ៉ាងខ្លាំងចំពោះពិធីទទួលបដិសណ្ឋារកិច្ច ជាពិសេសគឺវត្តមានរបស់កុមារចិន និងភាពដ៏អស្ចារ្យនៃកងទ័ពរបស់ប្រទេសចិន។ លោកលើកឡើងថា កិត្តិយសដែលលោកទទួលបាននាពេលនេះ គឺជាអ្វីដែលមនុស្សតិចតួចណាស់ក្នុងពិភពលោកអាចមានឱកាសបានជួប ដែលនេះបង្ហាញពីការផ្ដល់តម្លៃខ្ពស់របស់ម្ចាស់ផ្ទះចំពោះរូបលោក ។

ក្រៅពីការសន្ទនាបែបការទូត លោក ត្រាំ បាននាំមកជាមួយនូវក្រុមអ្នកជំនួញកំពូលៗចំនួន ៣០ រូបលើពិភពលោក ដើម្បីមកបង្ហាញការគោរព និងស្វែងរកឱកាសពាណិជ្ជកម្មនៅក្នុងប្រទេសចិន។ គោលដៅចម្បងរបស់លោក គឺរៀបចំឱ្យមានការធ្វើពាណិជ្ជកម្មដែលផ្ដល់ផលប្រយោជន៍ឱ្យគ្នាទៅវិញទៅមកទាំងសងខាង និងពង្រឹងទំនាក់ទំនងសេដ្ឋកិច្ចឱ្យកាន់តែរឹងមាំ ។

ជំនួបលើកនេះ មានសារៈសំខាន់ខ្លាំងក្នុងការដោះស្រាយបញ្ហាដែលនៅសេសសល់ ជាពិសេសគឺការបន្តផ្អាកសង្គ្រាមពន្ធគយ ព្រមទាំងការស្នើសុំឱ្យចិនបើកចំហការនាំចេញរ៉ែកម្រ។ កិច្ចពិភាក្សានេះ ក៏គ្របដណ្ដប់លើវិស័យយន្តហោះ កសិកម្ម ថាមពល និងការស្វែងរកដំណោះស្រាយរួមគ្នាលើបញ្ហាសង្គ្រាមនៅអ៊ីរ៉ង់ ដែលជាមូលហេតុធ្វើឱ្យទស្សនកិច្ចនេះត្រូវបានពន្យារពេល ។

សូមបញ្ជាកថាពេលទៅដល់មេដឹកនាំទាំង២បានស្វាមគ៍គ្នាដោយការចាប់ដៃ បន្ទាប់ពីក្បួនរថយន្ដរបស់លោក ត្រាំ បានធ្វើដំណើរទៅដល់វិមានប្រជាជនចិន អមដោយប្រតិភូជាន់ខ្ពស់អាមេរិក រួមមានរដ្ឋមន្ត្រីការបរទេសអាមេរិក លោក Marco Rubio រដ្ឋមន្ត្រីការពារជាតិ លោក Pete Hegseth និង CEO ក្រុមហ៊ុនអាមេរិកធំៗដូចជាលោក Elon Musk ដែលបានរង់ចាំដំណើរមកដល់របស់លោក ត្រាំ។

នេះជាដំណើរទស្សនកិច្ចទៅកាន់ប្រទេសចិនលើកដំបូងបំផុតរបស់លោក ដូណាល់ ត្រាំ ចាប់តាំងពីឆ្នាំ២០១៧ ហើយវាក៏នឹងក្លាយជាជំនួបទល់មុខលើកដំបូងផងដែរ រវាងមេដឹកនាំនៃមហាអំណាចទាំង២ បន្ទាប់ពីបានជួបគ្នាក្នុងកិច្ចប្រជុំមួយនាឱកាសចូលរួមកិច្ចប្រជុំកំពូល APEC ក្នុងប្រទេសកូរ៉េខាងត្បូងកាលពីខែតុលា ឆ្នាំ២០២៥។