ស្ត្រីចិន​ជាមេឃុំមួយរបស់ហ្វីលីពីននិងជា មេខ្លោងឆបោកអនឡាញត្រូវកាត់ទោស ដាក់ពន្ធនាគារអស់មួយជីវិត

ប្រទេសហ្វីលីពីន៖ស្ត្រីជាតិចិនម្នាក់ មានឈ្មោះ អាលីស គួ (Alice Guo) ជនជាប់ចោទធ្លាប់​ជា​នារី​ដ៏ល្បីល្បាញក្នុងបណ្តាញសង្គម និងធ្លាប់ជាប់ឆ្នោត ធ្វើជាមេឃុំតូចមួយ នៅភាគខា​ង​ជើង​រដ្ឋធានីម៉ានីល ប្រទេសហ្វីលីពីនដែលជាមេខ្លោង ក្នុងឧក្រិដ្ឋកម្មឆបោកអនឡាញ និង​សកម្មភាពជួញដូរមនុស្សត្រូវបានតុលាការហ្វីលីពីន សម្រេចផ្តន្ទាទោសដាក់ពន្ធនាគារ​អស់មួយជីវិតកាលពីថ្ងៃទី២០វិច្ឆិកា២០២៥ ។ ​

 លោកស្រី អាលីស គួ និង​ជន​សមគំនិត​ ៧ នាក់ទៀត ត្រូវ​តុលាការ​ហ្វីលីពីន សម្រេចផ្តន្ទាទោសដាក់ពន្ធនាគារអស់មួយជីវិត ក្នុង​សំណុំ​រឿង​ឧក្រិដ្ឋកម្មឆបោក​អនឡាញ និងជួញដូរមនុស្ស។លោកស្រី Olivia Torrevillas រដ្ឋអាជ្ញាហ្វីលីពីន​ប្រចាំ​ដែនដី​តំបន់​ម៉ានីល​ បាន​ប្រកាសប្រាប់​អ្នក​សារព័ត៌មាន ឲ្យដឹងថា៖។​ លោកស្រី អាលីស គួមាន​អាយុ ៣៥ឆ្នាំ​បាន​ក្លែង​បន្លំឯកសារ ​ដើម្បីទទួល​បា​ន​សញ្ជាតិ​ហ្វីលីពីន​ ធ្លាប់​មានប្រជាប្រិយភាព​ល្បីល្បាញក្នុងបណ្តាញសង្គម ហើយ​បានឈរ​ឈ្មោះឲ្យគេបោះឆ្នោត រហូត​ក្លាយជា មេឃុំ Bamban ភាគខាងជើង រដ្ឋធានីម៉ានីល ចន្លោះ​ពីឆ្នាំ២០២២ ដល់ឆ្នាំ​២០២៤។ នៅ​ឃុំ Bamban នោះហើយ ដែល​លោកស្រី អាលីស គួ និង​បក្សពួក​ជនបរទេស​ច្រើន​ទៀត បាន​រួមដៃគ្នា​ បើកបនល្បែងឆបោកអនឡាញ​ និងធ្វើ​សកម្មភាពជួញដូរមនុស្ស ដោយ​ឃុំឃាំង​មនុស្ស​ ហើយធ្វើទារុណកម្ម​បង្ខំ​ឲ្យ​ធ្វើការ​ខុស​ច្បាប់​។ ​ ​

ក្នុង​ឆ្នាំ២០២៤ ជន​ជាតិ​វៀតណាម​ម្នាក់ ​​បាន​រត់​គេ​​ចចេញ​ពី​មណ្ឌលបនល្បែង​បោកប្រាស់​នោះ​ ហើយបានទៅ​​​រាយការណ៍​ប្រាប់​សមត្ថកិច្ច​ហ្វីលីពីន។ អាជ្ញាធរ​ហ្វីលីពីនបា​ន​ចុះ​បង្ក្រាប​ទីតាំង​បនល្បែង​ឆបោក​អនឡាញ និង​បំបែក​សំបុក​បង្ខាំង​មនុស្ស​ នៅ​ Bamban។ ​គេក៏​រកឃើញថា មាន​​មនុស្ស​យ៉ាងហោចជាង​ ៧០០នាក់ ​​ចម្រុះ​ជាតិសាសន៍ ដូចជា ចិន វៀតណាម ម៉ាឡេស៊ី តៃវ៉ាន់ ឥណ្ឌូណេស៊ី និង​រវ៉ាន់ដា ជាដើម​ ដែល​រងការបង្ខំ​ឲ្យ​ធ្វើការ​ខុសច្បាប់​​នៅ​ទីតាំង​បនល្បែង​ ក្រោម​ការ​គ្រប់គ្រង​របស់​លោកស្រី អាលីស គួ និង​បក្សពួក​។ ក្រោយ​ផ្ទុះ​បែក​រឿងអាស្រូវនេះ​ លោកស្រី អាលីស គួ បាន​លួច​រត់គេច​ខ្លួន ​ទៅសម្ងំនៅ​​ប្រទេស​ឥណ្ឌូណេស៊ី តែ​ទីបំផុត​​អាជ្ញាធរ​ឥណ្ឌូណេស៊ី ចាប់​បញ្ជូន​ខ្លួន និង​ប្រគល់​​ឲ្យ​ ហ្វីលីពីន​ ក្នុង​​ខែ​កញ្ញា ឆ្នាំ២០២៤។​

នៅហ្វីលីពីន​ មជ្ឈមណ្ឌល​បនល្បែង​ និង​ល្បែង​អនឡាញ​ បាន​រីកដុះដាល​ខ្លាំ​ង ​ក្នុង​អាណត្តិ​ដឹកនាំ​របស់​អតីត​ប្រធានាធីបតី លោក​ រ៉ូឌ្រីហ្គោ ឌុយទែរតេ ហើយ​សំណុំ​រឿង​ អាលីស គួ ក៏​ ​បាន​បញ្ឆេះ​កំហឹង​មហាជន​ជាខ្លាំងដែរ ក្នុង​ឆ្នាំ២០២៤។ ចាប់ពីពេលនោះ​មក លោក ហ្វ៊ែរឌីណង់ ម៉ាកូស ជូញ៉រ ប្រធានាធិបតីហ្វីលីពីន បាន​ប្រកាស​បិទ​បនល្បែង​ និង​ហាម​ឃាត់​​ល្បែង​អនឡាញ​ទាំង​អស់​នៅ​ក្នុង​ប្រទេស ហើយ​បាន​បញ្ជា​ឲ្យ​ជន​បរទេស​ដែល​ធ្វើការ​ខុសច្បាប់​ ​នៅ​ Bamban ត្រូវចាកចេញពីហ្វីលីពីន​​។​