កាត់ទោសកុប្បករបារាំងក្នុងពេលជីដូនជនរងគ្រោះអំពាវនាវឲ្យបញ្ឈប់សកម្មភាពក្រោមលេសស្លាប់ចៅគាត់
10-April-2024 / ព័ត៌មានអន្តរជាតិ
ប្រទេសបាំរាំង៖កុប្បករប្រហែល ៥០ នាក់ ភាគច្រើនជាយុវជន ត្រូវប្រឈមមុខនឹងការកាត់ក្តីក្នុងទីក្រុងប៉ារីស និងហ្គ្រីណូបល ដោយសារចូលរួមក្នុងសកម្ម ភាពអនាធិបតេយ្យក្រោមលេសនសការសម្លាប់ក្មេងជំទង់ម្នាក់កាលពីដើមសប្តាហ៍មុនដោយសារប៉ូលិសបាញ់ពេលមិគោរពច្បាប់ចរាចរ។
សារព័ត៌មាន Le Monde បានរាយការណ៍ថា ជនសង្ស័យ ៥ នាក់ ត្រូវបានតុលាការកាត់ទោសពីបទបះបោរដោយហិង្សាលើមន្ត្រីប៉ូលិស និងធ្វើឲ្យខូចខាតទ្រព្យសម្បត្តិ ។ តុលាការក៏បានសម្រេចកាត់ទោសមនុស្ស ៣ នាក់ឲ្យជាប់ពន្ធនាគារ, ម្នាក់ទទួលបានការព្រមាន ខណៈម្នាក់ទៀតបានរួចទោស ។ទន្ទឹមនោះ ការកាត់ទោសធ្ងន់ធ្ងរបំផុត គឺផ្តល់ទៅឲ្យបុរសអាយុ ២២ ឆ្នាំម្នាក់ ឈ្មោះ Amaury ដែលបានគប់ដុំថ្មដាក់មន្ត្រីប៉ូលិសចេញពីដំបូលផ្ទះមួយកន្លែង ។ ស្ថានីយ៍វិទ្យុ France Info បានរាយការណ៍កាលពីថ្ងៃអាទិត្យ ទី២ ខែកក្កដាថា កុបករ ៣ នាក់នៅក្នុងទីក្រុងហ្គ្រីណូបល ក៏ត្រូវបានកាត់ទោសឲ្យជាប់ពន្ធនាគារពី ៣ ទៅ ៤ ខែផងដែរ។ក្រសួងមហាផ្ទៃបារាំងបានឲ្យដឹងថា អាជ្ញាធរបារាំងបានចាប់ខ្លួនមនុស្សជាង ២,៨០០ នាក់ពីបទកុបកម្ម ចាប់តាំងពីថ្ងៃអង្គារសប្តាហ៍មក បន្ទាប់ពីប៉ូលិសបាញ់សម្លាប់យុវជនម្នាក់ដែលមិនព្រមសហការនៅភ្លើងស្តុបក្នុងទីក្រុង ណង់ទែរ ។
ក្នុងកិច្ចប្រជុំដែលរៀបចំឡើងនៅវិមាន Elysee លោកប្រធានាធិបតីបារាំងម៉ាក្រុន( Macron) បានស្នើឲ្យលោកនាយករដ្ឋមន្ត្រី Elisabeth Borne រដ្ឋមន្ត្រីក្រសួងមហាផ្ទៃ និងរដ្ឋមន្ត្រីយុត្តិធម៌ ធ្វើយ៉ាងណាធ្វើទៅឲ្យតែស្តារសណ្តាប់ធ្នាប់នៅក្នុងប្រទេសបារាំងបានឡើងវិញ ។លោក Macron ក៏បាននិយាយផងដែរថា រដ្ឋាភិបាលបារាំងត្រូវតែបន្តគាំទ្រមន្ត្រីអនុវត្តច្បាប់ និងសមាជិកនៃទីភ្នាក់ងារពិសេសដែលត្រូវបានប្រមូលផ្តុំក្នុងរយៈពេល ៥ ថ្ងៃកន្លងមកនេះ ហើយលោកក៏គ្រោងនឹងជួបអភិបាលក្រុងដែលរងផលប៉ះពាល់ដោយកុបកម្មជាង ២២០ នាក់នៅវិមាន Elysee នាថ្ងៃអង្គារនេះផងដែរ ។រដ្ឋមន្ត្រីក្រសួងមហាផ្ទៃបារាំងលោក Gerald Darmanin បាននិយាយកាលពីថ្ងៃសុក្រថា មន្ត្រីអនុវត្តច្បាប់ជាង ៤៥,០០០ នាក់រួមទាំងអង្គភាពពិសេសបានចូលរួមក្នុងការប្រយុទ្ធប្រឆាំងនឹងកុបកម្មនៅបារាំង ខណៈដែលមន្ត្រីប៉ូលិស និងកងកម្លាំងប្រដាប់អាវុធជាង ៣០០ នាក់បានរងរបួសនៅក្នុងរយៈពេល ៣ ថ្ងៃដំបូងនៃភាពចលាចលនៅក្នុងប្រទេស ។ពាក់ព័ន្ធនឹងបញ្ហានេះដែរ ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សបានជំរុញឲ្យរដ្ឋាភិបាលបារាំង ធ្វើការដោះស្រាយបញ្ហាឲ្យស៊ីជម្រៅនៃការរើសអើងជាតិសាសន៍ និងការរើសអើងក្នុងការអនុវត្តច្បាប់ បន្ទាប់ពីយុវជនម្នាក់ឈ្មោះ Nahel Merzouk អាយុ ១៧ ឆ្នាំត្រូវប៉ូលិសបាញ់សម្លាប់ក្នុងប្រទេសបារាំង ។
Nahel ត្រូវបានប៉ូលិសបាញ់សម្លាប់នៅតំបន់ Nanterre ជាយក្រុងប៉ារីសកាលពីសប្ដាហ៍មុន បន្ទាប់ពីរូបគេមិនគោរពច្បាប់ចរាចរណ៍ ខណៈមន្ត្រីប៉ូលិសដែលប្រព្រឹត្តទង្វើនេះ ត្រូវបានចោទប្រកាន់ពីបទមនុស្សឃាត និងកំពុងត្រូវបានឃុំខ្លួនផងដែរ ។ទាកទងសកម្មភាពកកុប្បកម្មនេះដែរក្រុមអ្នកនយោបាយបារាំង បានថ្កោលទោស ចំពោះការវាយប្រហារ ទៅលើផ្ទះរបស់លោក Vincent Jeanbrun អភិបាលក្រុងដែលជាអ្នកស្តាំនិយម ស្ថិតនៅ L’Hay-les-Roses នាភាគខាងត្បូង ទីក្រុងប៉ារីស។ បន្ថែមពីលើនេះ ក្រុមជនបង្ក បានបើករថយន្តដែលកំពុងតែឆេះ ចូលទៅក្នុងផ្ទះរបស់លោកអភិបាលក្រុង នៅក្នុងគោលបំណងដុតបំផ្លាញវាចោល ខណៈប្រពន្ធ និង កូនរបស់លោកអភិបាល Jeanbrun ទើបនឹងមានអាយុ៥ឆ្នាំ និង ៧ឆ្នាំ កំពុងស្ថិតក្នុងផ្ទះ ហើយគាត់កំពុងតែនៅខាងក្រៅផ្ទះ។ ចំណែកប្រពន្ធរបស់គាត់ បានរងរបួសធ្ងន់។ ដោយឡែក ក្រុងរដ្ឋអាជ្ញា បានបើកសំណុំរឿងស៊ើបអង្កេត អំពីករណីប៉ុនប៉ងមនុស្សឃាត។
ដោយឡែកអ្នកស្រី ណាឌីយ៉ា ជីដូនរបស់ជនងរងគ្រោះបានអំពាវនាវឲ្យបញ្ចប់សកម្មភាពអនាធិបតេយ្យក្រោយលេសនសការេស្លាប់ចៅរបស់គាត់។ លោកស្រីណាឌីយ៉ា បញ្ជាក់ ថា «រថយន្ដទាំងអស់ មិនបានធ្វើអ្វីប្រឆាំងនឹងអ្នកនោះទេ សាលារៀនមិនបានធ្វើអ្វីប្រឆាំងនឹងអ្នកដែរ ហើយរថយន្ដក្រុង ក៏មិនបានធ្វើអ្វីប្រឆាំងនឹងអ្នកនោះឡើយ ចូរអ្នកកុំបំផ្លាញសាលារៀន កុំបំផ្លាញរថយន្ដក្រុង ព្រោះវាយានសម្រាប់អ្នកធ្វើដំណើរ»។អ្នកស្រី បានសង្កត់ធ្ងន់ ថា «ខ្ញុំនៅតែមានជំនឿលើប្រព័ន្ធតុលាការ។ ប៉ូលិសដែលបានបាញ់ចៅរបស់គាត់ ជាអ្នកត្រូវតែទទួលខុសត្រូវ ហើយខ្ញុំមិនខឹងនឹងប៉ូលិសទាំងអស់នោះដែរ»។យុវជន ណាហែល អាយុ១៧ឆ្នាំ មានឪពុកម្ដាយ ជាជនជាតិអាល់ហ្សេរី និង ម៉ូរ៉ុកកូ ត្រូវបានប៉ូលិសបាញ់ស្លាប់ ដោយសារមិនឈប់ឈប់កន្លែងភ្លើងស្ដុប កាលពីថ្ងៃអង្គារសប្ដាហ៍មុន នៅណង់តេរេ ជាយក្រុងប៉ារីស។ សកម្មភាពបែបនេះ បានបង្កឲ្យផ្ទុះកុបកម្មយ៉ាងធំ នៅក្នុងប្រទេសបារាំង។ពេលសួរអំពីយុទ្ធនាការប្រមូលថវិកា ដែលទទួលបានការសន្យាជាង ៧៣១ 000ដុល្លារ សម្រាប់មន្ត្រីប៉ូលិសដែលត្រូវបានចោទប្រកាន់ លើការបាញ់ប្រហារនោះ អ្នកស្រី Nadia បានអះអាង ថា៖ «បេះដូងខ្ញុំឈឺណាស់»។
បើតាមក្រសួងមហាផ្ទៃបារាំង បានឲ្យដឹង ថា ប៉ូលិស ជាង២០០នាក់ បានរងរបួស កាលពីថ្ងៃសៅរ៍។ រីឯក្រុមកុបករ ចំនួន ១ ៣១១នាក់ ត្រូវបានចាប់ខ្លួន កាលពីយប់ថ្ងៃសុក្រ ហើយរថយន្ដជាង២០០គ្រឿង ត្រូវបានដុតបំផ្លាញ និង ហាងទំនិញ ភោជនីយដ្ឋាន ធនាគារ សរុបជាង ៧០០កន្លែង បានរងការខូចខាត ចាប់តាំងពីការផ្ទុះនូវភាពវឹកវរនេះឡើង។ពាក់ព័ន្ធនឹងបញ្ហានេះដែរ ប្រធានាធិបតីបារាំងលោក Emmanuel Macron កាលពីថ្ងៃសៅរ៍បានពន្យារពេលដំណើរទស្សនកិច្ចដែលបានគ្រោងទុក ទៅកាន់ប្រទេសអាល្លឺម៉ង់ ដោយសារតែភាពចលាចលនៅតែបន្តកើតមាន៕
