សម្តេចតេជោព្រមានអង្គការជនភៀសខ្លួនកុំឲ្យជួយពួកឧទ្ទាមវៀតណាម!
21-September-2026 / ផ្សេងៗ
កំពង់ចាម៖ «ខ្ញុំកំពុងតែបារម្ភថា ក្រុមប្រដាប់អាវុធភេរវកម្មដែលបានបាញ់ប្រហារនៅវៀតណាមកំពុងតែចូលទឹកដីកម្ពុជា ដែលខ្ញុំសូមយកឱកាសនេះ ចេញបទបញ្ជាជាចំហសម្រាប់កងកម្លាំងប្រដាប់អាវុធ សូមបង្កើនការយកចិត្តទុកដាក់សហការជាមួយភាគីវៀតណាម ដើម្បីទប់ស្កាត់ការឆ្លងដែនខុសច្បាប់ចូលមកក្នុងកម្ពុជា »។ នេះជាការថ្លែងរបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជាក្នុងឱកាសអញ្ជើញជួបសំណេះសំណាលជួបកម្មករ កម្មការិនី ជិត២ម៉ឺននាក់ នៅស្រុកជើងព្រៃ ខេត្តកំពង់ចាម នាព្រឹកថ្ងៃទី១៦ ខែមិថុនា ឆ្នាំ២០២៣នេះ។
សម្តេចលើកឡើងថា «រឿងមួយដែលចង់ផ្ញើសារចេញពីទីនេះ ប៉ុន្មានថ្ងៃហើយ មានការប្រយុទ្ធគ្នាដោយពួកឧទាមមួយក្រុមនៅក្នុងប្រទេសវៀតណាម។ យើងបានធ្វើការស្រាវជ្រាវលើរឿងនេះ សារព័ត៌មាន ក៏បានផ្សាយហើយសារព័ត៌មានរបស់យើងក៏បានផ្សាយខ្លះដែរ ក្រុមនេះបាន វាយប្រហារទៅលើឃុំពីររបស់វៀតណាមក្នុងពេលតែមួយ។ សម្លាប់មេឃុំ លេខាបក្សឃុំ សម្លាប់ប៉ូលីស និងសម្លាប់ប្រជាពលរដ្ឋ និយាយរួមប្រើប្រដាប់អាវុធអាវុធដើម្បីវាយ»។
សម្តេចបញ្ជាក់ថា «ឥឡូវក្រុមនេះកំពុងបាក់ទ័ព។ ហើយខ្ញុំកំពុងតែបារម្ភថា ពួកនេះ នឹងអាចចូលមកក្នុងទឹកដីកម្ពុជា ដែលខ្ញុំសុំយកឱកាសនេះ ចេញបទបញ្ជាជាចំហ សម្រាប់កងកម្លាំងប្រដាប់អាវុធ ជាកងទ័ពក្ដី ជានគរបាលក្ដី នៅទិសយោធភូមិភាគទី១ និងនៅខេត្តរតនគិរី និងមណ្ឌលគីរី ហើយអាចរួមទាំងក្រចេះខ្លះផង សូមបង្កើនការយកចិត្តទុកដាក់សហការជាមួយនឹងភាគីវៀតណាមដើម្បីទប់ស្កាត់ការឆ្លងដែនខុសច្បាប់ចូលមកក្នុងកម្ពុជាយើង។
សម្តេច បង្ហាញការសង្ស័យថា «មេរបស់វានៅក្នុងទឹកដីកម្ពុជា ព្រោះមេរបស់វាមិនអាចមកពីខាងទឹកដីចិន ឬនៅក្នុងទឹកដីវៀតណាមទេ នេះជាអង្គការចាត់តាំងមួយ ដែលមានការចាត់តាំងច្បាស់លាស់ អញ្ចឹងត្រូវផ្នែកសន្តិសុខជាតិត្រូវយកចិត្តទុកដាក់ ត្រួតពិនិត្យមើលឲ្យបានច្បាស់ ព្រោះយើងធ្លាប់មានបទពិសោធន៍ហើយ ដែលបានធ្វើដំណើរចេញពីប្រទេសវៀតណាម សម្រាប់ ហាស់សេអ៊ែរ( HCR )នៅទីក្រុងភ្នំពេញ។ អញ្ចឹងផែនការរបស់គេ វាយហើយ បើវាយបាន គឺកាន់កាប់ វាយមិនបាន រត់ចូលកម្ពុជា ហើយមាន HCR ជួយ តែម្ដង។
ករណីយ៍នេះសម្តេចតេជោ ហ៊ុន សែន បានបញ្ជាក់ថា «អញ្ចឹងទេ មិនមែនក្នុងតែទឹកដី រតនគិរី មណ្ឌលគីរី សូមឱ្យអ្នកក្រចេះ អ្នកត្បូងឃ្មុំ បង្កើនការយកចិត្តទុកដាក់គ្រប់គ្រអ្នកធ្វើដំណើរ ពួកនេះមានខ្សែរយៈ ដូចកន្លងទៅជនជាតិម៉ុងតាញ៉ា មិនទាន់អស់ពីនៅទីក្រុងភ្នំពេញទេ នៅសល់ប៉ុន្មាននាក់ ពីមុនអ្នកឯងរត់ឆ្លងដែនមកដល់ភ្នំពេញ ចូលកន្លែង ហាស់សេអ៊ែរ។
សម្តេចបញ្ជាក់ថា «ឥឡូវខ្ញុំកំពុងតែកង្វល់ថា ពួកនេះ នឹងអាចមកជ្រកក្រោមផ្លាក ហាសសេអ៊ែរ នៅទីក្រុងភ្នំពេញ សម្តេចតេជោ ហ៊ុន សែន បានថ្លែងព្រមានទុកជាមុន ដល់អង្គការអន្តរជាតិ ឬជនជាតិណាៗក៏ដោយ ដែលឃុបឃិតជាមួយក្រុមភេរវកម្មទាំងនេះ ចូលមកក្នុងទីក្រុងភ្នំពេញ ហើយយើងមិនអនុញ្ញាតដាច់ខាត។សម្តេចតេជោ បានដាក់បទបញ្ជាឲ្យមានការត្រួត ពិនិត្យឲ្យបានច្បាស់លាស់ចំពោះជនជាតិភាគតិចម៉ុងតាញ៉ា ដែលកំពុងស្នាក់នៅប្រទេសកម្ពុជា ដើម្បីធ្វើការសម្ភាសត្រៀមខ្លួនទៅប្រទេសទី៣នោះ បើពេលនេះសម្ភាសន៍មិនជាប់ទេគប្បីបញ្ជូនពួកគេឲ្យទៅភាគីវៀតណាមវិញ ខណៈពួកនេះកំពុងស្ថិតនៅការសង្ស័យជាបក្ខពួកក្រុមឧទ្ទាមដែលបានស្លាប់អាជ្ញាធរវៀតណាមនោះដែរ។
សម្តេចតេជោ ហ៊ុន សែន ក៏បានផ្តាំទៅក្រុមអង្គការសិទ្ធិមនុស្សមួយចំនួន និងប្រទេសលោកខាងលិចកុំនិយាយរិះគន់ និងថ្កោលទោសថាកម្ពុជារំលោភសិទ្ធិមនុស្សឲ្យសោះ ដោយកម្ពុជាធ្វើបែបនេះ ចំពោះជនជាតិភាគតិចម៉ុងតាញ៉ាទាំងនោះគឺដើម្បីការពារនូវអធិបតេយ្យភាពរបស់ខ្លួន និងការពារនូវសន្តិសុខ សណ្តាប់ធ្នាប់ប្រទេសកម្ពុជាតែប៉ុណ្ណោះ ខណៈបញ្ហានេះមិនមែនជាការលេងសើចនោះទេ វាអាចជាករណីភេរវកម្ម។សូមបញ្ជាក់ដែរថាកន្លងមកថ្មីៗនេះសម្តេចតេជោក៏បានព្រមានវៀតណាមកុំអនុញ្ញាតិឲ្យលោកសមរង្ស៊ីចូលមកវៀតណាមក្នុងនាមជាអ្មកទេសចរណ៍ដោយប្រើលិខិតឆ្លងដែនបារាំងផងដែរ។សម្តេចព្រមានថាបើវៀតណាមមិនធ្វើគឺរឿងជាមួយគ្នាហើយ?៕
