រកឃើញ​សាច់មាន់​ប្រហិត​ចម្រុះ ខូចគុណភាព ៧​តោន​មកពី​សៀម​

​បន្ទាយមានជ័យ​៖ មន្ត្រី​ជំនាញ​ចម្រុះ បាន​ដឹកនាំ​កម្លាំង​ចុះ​ពិនិត្យ​ឃ្លាំង និង​បាន​ដកហូត​ផលិតផល​ធ្វើ​ពីស​ត្វ​ទម្ងន់ ៧ តោន ដែល​វិច​ខ្ចប់​ខុស​លក្ខណៈ​បញ្ចេ​ក​ទេស​នៅ​ថ្ងៃទី ១៥ ខែ មិថុនា ឆ្នាំ ២០២៣ នៅក្បែរ​ផ្សារ​ត្រី ស្ថិតនៅ​ភូមិ​ក្បាលស្ពាន ២ សង្កាត់​អូរជ្រៅ ក្រុង​ប៉ោយប៉ែត ខេត្តបន្ទាយមានជ័យ ។​ 

​លោក ហ៊ុយ ទូច ប្រធានការិយាល័យ​ផលិតកម្ម និង​បសុព្យាបាល ខេត្តបន្ទាយមានជ័យ បានឱ្យដឹងថា ក្រោយ​ធ្វើការ​ស្រាវជ្រាវ និង​កំណត់​មុខសញ្ញា មន្ត្រី​អគ្គនាយកដ្ឋាន​សុខភាព​សត្វ និង​ផលិតកម្ម​សត្វ បាន​សហការ​ជាមួយ​មន្ត្រី​ការិយាល័យ​ផលិតកម្ម និង​បសុព្យាបាល​ខេត្ត បាន​ចុះ​ពិនិត្យ​ឃ្លាំង ១​កន្លែង ដែល​នាំចូល​ទំនិញ​ផលិតផល​ធ្វើ​ពី​សាច់សត្វ នៅក្នុង​ឃ្លាំង​ជាង ២០​តោន​។​សម​ត្ត​កិច្ច​បាន​ដកហូត​សាច់​ចំនួន ៧ តោន ដែល​វិច​ខ្ចប់​គ្មាន​លក្ខណៈ​បច្ចេកទេស​ត្រឹមត្រូវ និង​ខូច​គុណ​ភាណ ។ ផលិតផល​ទាំងនេះ មន្ត្រី​ជំនាញ​ព្រួយបារម្ភ​ពី​ជំងឺផ្តាសាយបក្សី ដែល​ឈ្មួញ​ជា​ម្ចាស់​ឃ្លាំង​នាំចូល​ពី​ប្រទេស​ថៃ សម្រាប់​នាំចេញ​ទៅ​លក់​បន្ត​នៅតាម​បណ្តា​ខេត្ត​មួយចំនួន​ក្នុងប្រទេស​កម្ពុជា ។​

​មន្ត្រី​ជំនាញ​ក៏បាន​នាំ​ម្ចាស់​ឃ្លាំង​ស្តុក​សាច់​ក្លាស្សេ​ទៅ​សាកសួរ​នៅ​ការិយាល័យ​ផលិតកម្ម និង​បសុព្យាបាល​ខេត្តបន្ទាយមានជ័យ ដើម្បី​អនុវត្ត​បន្ត​តាម​នីតិវិធី ។ ចំណែក​សាច់មាន់​ប្រហិត​ចម្រុះ ដែល​ដកហូត ត្រូវបាន​យកទៅ​ដុត​កម្ទេចចោល និង​កប់​ចោល​នៅ​ជាយក្រុង​សិរីសោភ័ណ នៅ​ល្ងាច​ថ្ងៃទី ១៥ ខែ មិថុនា ឆ្នាំ ២០២៣ នេះ ៕ 

​