នាយករដ្ឋមន្ត្រីចុះពិនិត្យច្រវាក់ផលិតកម្មរោងចក្រម៉ូតូក្រុមហ៊ុន អិន ស៊ី អិច (NCX) នៅសង្កាត់ចោមចៅ រាជធានីភ្នំពេញ
01-March-2025 / សេដ្ឋកិច្ច
ភ្នំពេញ៖នៅព្រឹកថ្ងៃទី៥កុម្ភៈសម្តេចធិបតីហ៊ុនម៉ាណែតនាយករដ្ឋមន្ត្រីនិងសមាជិករាជរដ្ឋាភិបាលមួយចំនួនបានអញ្ជើញចុះពិនិត្យខ្សែច្រវាក់ផលិតកម្មនៅរោងចក្រម៉ូតូក្រុមហ៊ុន អិន ស៊ី អិច (NCX) នៅសង្កាត់ចោមចៅខណ្ឌពោធិសែនជ័យ រាជធានីភ្នំពេញ។
ក្រុមហ៊ុន អិន ស៊ី អិច គឺជាក្រុមហ៊ុនឈានមុខគេនៅក្នុងវិស័យឧស្សាហកម្មផលិត និងចែកចាយម៉ូតូ ។ ផ្តើមពីឆ្នាំ១៩៩២ ក្រុមហ៊ុន អិន ស៊ី អិច បាននាំចូលផលិតផលសម្រេចម៉ាកហុងដា (CBU) សម្រាប់ទីផ្សារកម្ពុជា។ ជាមួយកំណើនយ៉ាងឆាប់រហ័សនៃតម្រូវការរបស់អតិថិជន ប្រជាប្រិយភាព និងសន្ទុះនៃការគាំទ្រ ក្រុមហ៊ុនបានបង្កើតខ្សែច្រវាក់ផលិតកម្មដំបូងរបស់ខ្លួននៅទីរាជធានីភ្នំពេញក្នុងឆ្នាំ ១៩៩៩។
ច្រវាក់ផលិតកម្មខ្នាតតូចនេះហើយ គឺជាការចាប់ផ្តើមដំបូងរបស់ក្រុមហ៊ុន អិន ស៊ី អិច ពីការនាំចូលមកជាការដំឡើងម៉ូតូដោយខ្លួនឯងក្នុងទម្រង់ពាក់កណ្តាលសម្រេច (IKD)។ ក្នុងឆ្នាំ២០០៤ ក្រុមហ៊ុនបានពង្រីកប្រតិបត្តិការរបស់ខ្លួនជាមួយខ្សែច្រវាក់ផលិតកម្មធំជាងមុន ដោយការបង្កើនសមត្ថភាពផលិតទាំងក្នុងទម្រង់ពាក់កណ្តាលសម្រេច (IKD) និងពាក់កណ្តាលសម្រេច១ (IKD1)។បច្ចុប្បន្ននេះ អិន ស៊ី អិច មិនត្រឹមតែមានសមត្ថភាពក្នុងការដំឡើងម៉ូតូប៉ុណ្ណោះទេ ប៉ុន្តែថែមទាំងបានចាប់ផ្តើមផលិតគ្រឿងបន្លាស់ម៉ូតូសំខាន់ៗក្រោមប្រព័ន្ធកម្រិតខ្ពស់ ( IKD1.5)ផងដែរ។ក្រុមហ៊ុន បានប្រើប្រាស់បុគ្គលិកកម្មករខ្មែរ នៅគ្រប់ខ្សែច្រវាក់ផលិតកម្មទាំងអស់ ដោយបានអនុវត្តន៍ទៅតាមស្តង់ដាររបស់ក្រុមហ៊ុនហុងដា យ៉ាងត្រឹមត្រូវ ព្រមទាំងមានកម្មវិធីបង្កើនជំនាញដល់បុគ្គលិកកម្មករ ស្របតាមបរិបទនៃការវិវឌ្ឍនៃបច្ចេកវិទ្យា និងសម័យកាលឌីជីថល។ទន្ទឹមនឹងការផលិតគ្រឿងបំណែកម៉ូតូ បម្រើឱ្យការដំឡើងក្នុងស្រុកក្រុមហ៊ុន ក៏បាននាំចេញគ្រឿងបំណែកមួយចំនួនទៅក្រៅប្រទេសផងដែរ ដូចជាទៅកាន់ប្រទេសថៃជាដើម។
រោងចក្រក៏មានរៀបចំកន្លែងចម្រុះទឹកកខ្វក់ឱ្យទៅជាទឹកស្អាត មុនបង្ហូរចេញទៅលូសាធារណៈ ដើម្បីចូលរួមការពារបរិស្ថានឱ្យបានល្អ ស្របតាមទិសដៅ និងគោលនយោបាយរបស់រាជរដ្ឋាភិបាល។ក្រុមហ៊ុន បានចាប់ផ្តើមដំណើរការជាមួយការដំឡើងម៉ូតូបាន៥០គ្រឿងក្នុងមួយវេននៅឆ្នាំ១៩៩៩ កើនឡើងដល់ប្រមាណ ៨០០គ្រឿងក្នុងមួយវេន នៅឆ្នាំ២០១៥។យោងតាមបុគ្គលិកជាន់ខ្ពស់របស់ក្រុមហ៊ុន បានឱ្យដឹងថា បច្ចុប្បន្នក្រុមហ៊ុនដំឡើងម៉ូតូចំនួន៥ប្រភេទ រួមមាន៖ Click, Scoopy, Dream, Wave និង Beat។ បុគ្គលិកជាន់ខ្ពស់រូបនេះ បានឱ្យដឹងថា នៅមុនពេលជំងឺកូវីដ១៩រាតត្បាត ក្រុមហ៊ុនដំឡើងម៉ូតូចែកចាយលើទីផ្សារប្រមាណ ៤០ម៉ឺនគ្រឿងក្នុងមួយឆ្នាំ។ ឆ្នាំ២០២៤ ក្រុមហ៊ុនដំឡើងចែកចាយប្រមាណ ២៥ម៉ឺនគ្រឿងក្នុងមួយឆ្នាំ។ ចំនួននេះ មានការកើនឡើងប្រមាណពី១៧ភាគរយ ទៅ២០ភាគរយ ធៀបនឹងឆ្នាំ២០២៣។ជាមួយនឹងដំណើរការដំឡើង និងផលិតគ្រឿងបន្លាស់នេះ ក្រុមហ៊ុនបានផ្តល់ការងារដល់បុគ្គលិក និងកម្មករសរុបប្រមាណ ១,២២១នាក់ ដែលសុទ្ធសឹងជាពលរដ្ឋខ្មែរ មានបរទេសតែ៧នាក់ប៉ុណ្ណោះ។ បុគ្គលិក និងកម្មករ ទទួលបានប្រាក់ឈ្នួលទាបបំផុតជិត ៣០០ដុល្លារអាមេរិក៕
