ក្រុមហ៊ុនផលិតបន្ទះឈីបតៃវ៉ាន់ TSMC ប្រកាសវិនិយោគ ១០០ពាន់លានដុល្លារ ដើម្បីសាងសង់រោងចក្រថ្មីចំនួន ៥ទៀត នៅអាម៉េរិក
21-September-2026 / សេដ្ឋកិច្ច
អាមេរិក៖ ក្រុមហ៊ុនផលិតបន្ទះឈីបតៃវ៉ាន( Taiwan Semiconductor Manufacturing Co. (TSMC)) ដែលជាក្រុមហ៊ុនផលិតបន្ទះឈីប AI កំពូលរបស់ពិភពលោក គ្រោងនឹងវិនិយោគបន្ថែមចំនួន ១០០ពាន់លានដុល្លារអាម៉េរិក ដើម្បីពង្រីកផលិតកម្មបន្ទះឈីបរបស់ខ្លួននៅលើទឹកដីអាម៉េរិក និងគាំទ្រដល់គោលដៅរបស់ប្រធានាធិបតី ដូណាល់ ត្រាំ ក្នុងការបង្កើនការផលិតក្នុងស្រុក។ នេះបើយោងតាមការចេញផ្សាយរបស់សារព័ត៌មាន Bloomberg។
គម្រោងវិនិយោគដ៏ធំនេះ គឺក្រុមហ៊ុន TSMC គ្រោងនឹងសាងសង់រោងចក្រផលិតបន្ទះឈីបបន្ថែមចំនួន ៥ទៀត នៅក្នុងទឹកដីអាម៉េរិក ក្នុងប៉ុន្មានឆ្នាំខាងមុខនេះ។នាយកប្រតិបត្តិក្រុមហ៊ុន TSMC លោក Wei បានចូលជួបជាមួយលោក ត្រាំ នៅសេតវិមានដើម្បីបង្ហាញពីចក្ខុវិស័យរបស់ក្រុមហ៊ុនសម្រាប់ការពង្រីកទីតាំងនៅសហរដ្ឋអាម៉េរិក ដែលបានចាប់ផ្តើមនៅឆ្នាំ ២០២០ ក្នុងអំឡុងពេលអាណត្តិដំបូងរបស់ប្រធានាធិបតី ត្រាំ។
លោក ត្រាំ បានថ្លែងពីបន្ទប់ Roosevelt ថា បើគ្មានឧបករណ៍ semiconductors ទេនោះ គ្មានសេដ្ឋកិច្ចដែលផ្តល់ថាមពលដល់អ្វីៗគ្រប់យ៉ាងរាប់ចាប់តាំងពី AI ដល់រថយន្ត និងដល់ការផលិតកម្រិតខ្ពស់នោះទេ។លោក ត្រាំ បាននិយាយថា ការផ្លាស់ប្តូរនេះមានន័យថា «បន្ទះឈីប AI ដ៏មានឥទ្ធិពលបំផុតនៅក្នុងពិភពលោក នឹងត្រូវបានធ្វើឡើងនៅអាម៉េរិក»។TSMC គឺជាក្រុមហ៊ុនឈានមុខគេលើពិភពលោកក្នុងការផលិត semiconductors កម្រិតខ្ពស់ដែលប្រើសម្រាប់បញ្ញាសិប្បនិម្មិត (AI) ហើយក្រុមហ៊ុននេះ បានបម្រើការជាដៃគូផលិតបន្ទះឈីបសំខាន់សម្រាប់ក្រុមហ៊ុន Nvidia Corp និងក្រុមហ៊ុន Apple Inc។
លោក Wei បានអះអាងថា៖ «យើងនឹងផលិតបន្ទះឈីបជាច្រើន ដើម្បីគាំទ្រដល់ការរីកចម្រើនរបស់ AI និងដើម្បីគាំទ្រដល់ការរីកចម្រើនរបស់ស្មាតហ្វូន ហើយយើងសូមអរគុណដល់លោកប្រធានាធិបតី ត្រាំ ម្តងទៀតសម្រាប់ការគាំទ្ររបស់គាត់»។ លោក Wei បានបន្ថែមថា ការផ្លាស់ប្តូរនេះ នឹងបង្កើតការងារក្នុងឧស្សាហកម្មបច្ចេកវិទ្យាកម្រិតខ្ពស់រាប់ពាន់កន្លែង។
ទោះជាយ៉ាងណា ការចំណាយបន្ថែមដ៏សម្បើមរបស់ក្រុមហ៊ុន TSMC នៅសហរដ្ឋអាម៉េរិ កនឹងត្រូវការការយល់ព្រមពីអាជ្ញាធររបស់តៃវ៉ាន់ផងដែរ។ នៅថ្ងៃអង្គារនេះ រដ្ឋមន្ត្រីក្រសួងកិច្ចការសេដ្ឋកិច្ចរបស់កោះតៃវ៉ាន់ លោក Kuo Jyh-Huei បានប្រាប់អ្នកសារព័ត៌មានថា៖ «TSMC មានរោងចក្ររួចហើយនៅក្នុងទឹកដីសហរដ្ឋអាម៉េរិក និងជប៉ុន ហើយឥឡូវនេះវាកំពុងសាងសង់រោងចក្រថ្មីមួយនៅក្នុងប្រទេសអាល្លឺម៉ង់។ ទាំងនេះមិនពាក់ព័ន្ធនឹងពន្ធគយទេ។ ការពង្រីកជាសកលរបស់ TSMC គឺជាការអភិវឌ្ឍដ៏សំខាន់មួយ»។ទោះជាយ៉ាងណាក៏ដោយ ភាគហ៊ុនរបស់ក្រុមហ៊ុន TSMC បានធ្លាក់ចុះ ១,៥% ដោយសារក្តីបារម្ភជុំវិញការដំឡើងពន្ធរបស់សហរដ្ឋអាម៉េរិកប្រឆាំងនឹងប្រទេសកាណាដា ម៉ិកស៊ីកូ និងចិន។
ទីភ្នាក់ងារសារព័ត៌មាន Reuters នៅថ្ងៃទី២៨ ខែមករា ឆ្នាំ២០២៥បានឲ្យដឹងថាយោងតាមរបាយការណ៍ចុះផ្សាយបានបង្ហាញថា លោក Trump បានប្រកាសនៅថ្ងៃចន្ទថា លោកគ្រោងនឹងដាក់ពន្ធថ្មីលើទំនិញនាំចូលដូចជា បន្ទះឈីប ឱសថ និងដែកថែប។ យ៉ាងណាក្នុងការឆ្លើយតបនឹងប្រកាសនេះ តៃវ៉ាន់បាននិយាយនៅក្នុងសេចក្តីថ្លែងការណ៍មួយថា «តៃវ៉ាន់ និងសហរដ្ឋអាមេរិក និងឧស្សាហកម្មបច្ចេកវិទ្យាផ្សេងទៀត គឺមានភាពស៊ីសង្វាក់គ្នាយ៉ាងខ្លាំងចំពោះគ្នាទៅវិញទៅមក ជាពិសេសការឌីហ្សាញដោយសហរដ្ឋអាមេរិក, គំរូរោងចក្រតៃវ៉ាន់ ដែលបង្កើតជាគំរូអាជីវកម្មឈ្នះឈ្នះ សម្រាប់ឧស្សាហកម្មតៃវ៉ាន់ និងសហរដ្ឋអាមេរិក»។ ពោលគឺ ភាពជាអ្នកដឹកនាំផ្នែកបច្ចេកវិទ្យារបស់តៃវ៉ាន់ក្នុងការផលិតគ្រឿងអេឡិចត្រូនិកផ្តល់នូវអត្ថប្រយោជន៍យ៉ាងសំខាន់ ដែលកាត់បន្ថយផលប៉ះពាល់ដែលអាចកើតមានពីពន្ធគយរបស់សហរដ្ឋអាមេរិក។
ក្រសួងសេដ្ឋកិច្ចរបស់តៃវ៉ាន់ បានសម្តែងការប្តេជ្ញាចិត្តក្នុងការរក្សាទំនាក់ទំនងជិតស្និទ្ធជាមួយសមភាគីសហរដ្ឋអាមេរិក ដើម្បីស្វែងរកបញ្ហាប្រឈមទាំងនេះប្រកបដោយប្រសិទ្ធភាព និងការពារផលប្រយោជន៍ឧស្សាហកម្មរបស់ប្រទេសទាំងពីរ។តៃវ៉ាន់គឺជាផ្ទះរបស់ TSMC ដែលជាក្រុមហ៊ុនផលិតបន្ទះឈីបកិច្ចសន្យាដ៏ធំបំផុតរបស់ពិភពលោក ដែលដើរតួនាទីយ៉ាងសំខាន់ក្នុងការផ្គត់ផ្គង់បន្ទះឈីបកម្រិតខ្ពស់ដល់ក្រុមហ៊ុនធំៗរបស់សហរដ្ឋអាមេរិកដូចជា Apple និង Nvidia ជាដើម។គួររំលឹកថា កាលពីពេលថ្មីៗនេះ ក្រុមហ៊ុនបច្ចេកវិទ្យាយក្សមួយចំនួន រួមមាន៖ Apple, OpenAI និង Meta Platforms Inc បានសន្យាវិនិយោគមានតម្លៃសរុបជាង ១ទ្រីលានដុល្លារអាម៉េរិក នៅក្នុងរដ្ឋបាលរបស់លោក ដូណាល់ ត្រាំ៕
