សាកលវិទ្យាល័យជាស៊ីមកំចាយមារប្រគល់សញ្ញាបត្របណ្ឌិតជូនសម្តេចសខេង
03-April-2024 / សុខភាពនិងកីឡា
ព្រៃវែង៖សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អញ្ជើញទទួលសញ្ញាបត្របណ្ឌិតកិត្តិយស ផ្នែកអភិវឌ្ឍន៍ជនបទ ពីសាកលវិទ្យាល័យជាតិជាស៊ីមកំចាយមារ។ពិធីប្រគល់ និងទទួលសញ្ញាបត្របណ្ឌិតកិត្តិយសនេះ បានធ្វើឡើងនៅព្រឹកថ្ងៃទី១៥ ខែមិថុនា ឆ្នាំ២០២៣ ដោយ ឯកឧត្តម បណ្ឌិតសភាចារ្យ ហង់ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡា។
ឯកឧត្តម ហង់ជួន ណារ៉ុន បានលើកឡើងថា សញ្ញាបត្របណ្ឌិតកិត្តិយស ផ្នែកអភិវឌ្ឍន៍ជនបទ គឺជាការទទួលស្គាល់ នៃកម្រិតអប់រំដ៏ខ្ពង់ខ្ពស់បំផុតរបស់របស់ សាកលវិទ្យាល័យជាតិជាស៊ីមកំចាយមារ ដែលត្រូវផ្ដល់ជូនដល់ឥស្សរៈជន ឬបុគ្គលឆ្នើម ដែលមានកិត្តិយសខ្ពង់ខ្ពស់ និងមានការទទួលស្គាល់ពិសេសចំពោះសមិទ្ធដ៏សំខាន់ៗ ស្របតាមបេសកកម្មរបស់ សាកលវិទ្យាល័យ។គណៈកម្មាធិការវាយតម្លៃថ្នាក់បណ្ឌិត បានពិនិត្យយ៉ាងម៉ត់ចត់នូវស្មារដៃទាំងឡាយរបស់ សម្ដេចក្រឡាហោម និងបានឯកភាពគ្នាជាឯកឆ័ន្ទ សម្រេចនៅថ្ងៃទី២៤ ខែមេសា ឆ្នាំ២០២៣ថា ស្មារដៃរបស់សម្ដេចក្រឡាហោម ក្នុងផ្នែកអភិវឌ្ឍជនបទ មានលក្ខណៈដ៏ខ្ពង់ខ្ពស់ឧត្តុង្គឧត្តម និងមានតម្លៃលើសលប់ទាំងផ្នែកសិក្សា សេដ្ឋកិច្ច និងសង្គម ក្នុងកម្រិតខ្ពស់ សម្រាប់ប្រគល់ជូនពីសាកលវិទ្យាល័យជាតិជាស៊ីមកំចាយមារ នូវសញ្ញាបត្របណ្ឌិតកិត្តិយស ផ្នែកអភិវឌ្ឍន៍ជនបទ ជូនបេក្ខជនសម្ដេចក្រឡាហោម។
សម្ដេចក្រឡាហោម ស ខេង មានប្រសាសន៍ថ្លែងអំណរគុណចំពោះក្រុមប្រឹក្សាភិបាល ក្រុមប្រឹក្សាវិទ្យាសាស្ដ្រ គណៈកម្មការវាយតម្លៃថ្នាក់បណ្ឌិតរបស់សាកលវិទ្យាល័យ ក៏ដូចជាក្រសួងអប់រំ យុវជន និងកីឡា ដែលបានវាយតម្លៃ និងគាំទ្រចំពោះស្នាដៃរបស់សម្តេច ហើយសម្រេចផ្តល់នូវសញ្ញាបត្របណ្ឌិតកិត្តិយសផ្នែកអភិវឌ្ឍន៍ជនបទ ជូនសម្តេច។សម្តេច ក៏បានថ្លែងអំណរព្រះគុណថ្វាយព្រះករុណាព្រះមហាក្សត្រ ក៏ដូចជាសម្តេចព្រះវររាជមាតាជាតិខ្មែរ ដែលជានិច្ចកាលព្រះអង្គបានគាំទ្រចំពោះការងាររបស់សម្តេច ផ្តល់ឱកាសសម្រាប់សម្តេចបម្រើជាតិ និងបានផ្សារភ្ជាប់ខ្លួនជាមួយនឹងប្រជាជាតិ។ កសម្តេច ក៏បានអរគុណចំពោះរាជរដ្ឋាភិបាល និងគណបក្សប្រជាជនកម្ពុជា ដែលបានប្រគល់ភារកិច្ចជូនសម្តេចផងដែរ។
សូមជម្រាបថា សាកលវិទ្យាល័យជាតិ ជា ស៊ីម កំចាយមារ ដែលមានឈ្មោះដើមថា សាកលវិទ្យាល័យមហាឥសីវេទ ជាគ្រឹះស្ថានឧត្ដមសិក្សារដ្ឋមួយ ត្រូវបានបង្កើតឡើងដោយរាជរដ្ឋាភិបាលកម្ពុជា ក្រោមការផ្ដួចផ្ដើមពីឥស្សរជនដែលរួមមាន ៖ សម្ដេចអគ្គមហាធម្មពោធិសាល ជា ស៊ីម និងសម្ដេចក្រឡាហោម ស ខេង ។គិតត្រឹមឆ្នាំសិក្សា២០២១-២០២២ សាកលវិទ្យាល័យជាតិ ជា ស៊ីម កំចាយមារ បានបណ្ដុះបណ្ដាលនិស្សិតបញ្ចប់ការសិក្សា ចំនួន ២៥ជំនាន់រួចមកហើយ ដែលស្មើនឹង ១៥,៩៨១នាក់ ហើយកំពុងបម្រើការងារក្នុងស្ថាប័នរដ្ឋ ឯកជន សង្គមស៊ីវិល និងបានបង្កើតជាសហគ្រាស ក្រុមហ៊ុន និងអាជីវកម្មផ្ទាល់ខ្លួនប្រកបដោយសមត្ថភាពវិជ្ជាជីវៈខ្ពស់ ឧត្ដមភាព សេចក្ដីថ្លៃថ្នូរ និងកិត្តិយស។
សូមបញ្ជាក់ថា បច្ចុប្បន្នសាកលវិទ្យាល័យជាតិ ជា ស៊ីម កំចាយមារ មាននិស្សិតដែលកំពុងសិក្សាចំនួនសរុប ៣.៧១៥នាក់ ក្នុងនោះស្រី ចំនួន ២.២៣៧នាក់។ សាកលវិទ្យាល័យ មានបុគ្គលិកក្របខ័ណ្ឌកំពុងបម្រើការងារសរុបចំនួន ៨៤នាក់ ក្នុងនោះស្រី ១៧នាក់ គ្រូបង្រៀនវេលាការ ចំនួន ១២០នាក់ និងបុគ្គលិកកិច្ចសន្យា ចំនួន ៥០នាក់៕
