វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2018 នាក់
ម្សិលមិញ 6677 នាក់
សរុប 14149594 នាក់
ភ្នំពេញ៖ក្រសួងការបរទេសសហរដ្ឋអាមេរិក កាលពីថ្ងៃទី២ ខែកម្ភៈ ឆ្នាំ២០២៣ បានផ្ដល់ពានអ្នកការពារសិទ្ធិមនុស្សសកលប្រចាំឆ្នាំ២០២២ ដល់បុគ្គលឆ្នើមចំនួន១០រូប នៃបណ្តាប្រទេសលើសកលលោក ក្នុងនោះមានទាំងប្រធានសហជីពក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ដែលត្រូវបានតុលាការឃុំខ្លួននៅពន្ធនាគារព្រៃស ពាក់ព័ន្ធនឹងការចេញមុខការពារសិទ្ធិកម្មករដែលថៅកែបញ្ឈប់ពីការងារ។ពាននេះជាការទទួលស្គាល់ភាពជាមេដឹកនាំក្លាហានក្នុងការតស៊ូមតិ ដើម្បីលើកកម្ពស់ និងការពារសិទ្ធិមនុស្ស ដែលគេទទួលស្គាល់ជាសកល។
អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ លោក ឃុន ថារ៉ូ យល់ឃើញថា ជាការលើកទឹកចិត្តសកម្មជនសិទ្ធិមនុស្ស សិទ្ធិការងារ ដែលសកម្មក្នុងបុព្វហេតុសង្គមប៉ុណ្ណោះទេ តែក៏ជាការទាមទារឱ្យអាជ្ញាធររដ្ឋត្រូវយកចិត្តទុកដាក់បន្ថែមទៀតពីកាតព្វកិច្ចលើកកម្ពស់សិទ្ធិមនុស្ស។លោកឃុន ថារ៉ូ ថា៖ «ខ្ញុំគិតថា មានតែការតាមដាននិងការឆ្លើយតបមួយដែលមានលក្ខណៈប្រាកដ ហើយមានវិធានការជាក់លាក់នូវស្ថានភាពសិទ្ធិមនុស្សសិទ្ធិការងារហ្នឹងទេ ទើបទំនាក់ទំនងហ្នឹង វាប្រសើរឡើង ក្នុងកម្រិតនយោបាយការបរទេសរវាងប្រទេសកម្ពុជា និងសហរដ្ឋអាមេរិក ជាពិសេសប្រទេសលោកសេរី ក្នុងប្លុកសេដ្ឋកិច្ចដែលយើងពឹងផ្អែកលើការនាំចេញទៅទីផ្សារសហរដ្ឋអាមេរិក ជាអាទិភាពទី១សម្រាប់ទីផ្សារកម្ពុជា ហើយអាហ្នឹងជាការកសាងសេដ្ឋកិច្ចស្នូលសម្រាប់ប្រទេសកម្ពុជាក្នុងការអភិវឌ្ឍរយៈពេលវែង»។
លោកស្រី ចក់ សុភាព នាយិកាមជ្ឈមណ្ឌសិទ្ធិមនុស្សកម្ពុជា យល់ឃើញថា ការផ្តល់ពាននេះជាការផ្តល់គុណតម្លៃ និងទទួលស្គាល់ពីវីរភាពរបស់កញ្ញា ឈឹម ស៊ីថរ ដែលគាត់ទទួលរងនូវការយាយីជាច្រើន និងការចាប់ខ្លួនទាំងកំរោល តែគាត់នៅតែបន្តបង្ហាញភាពអង់អាច ដើម្បីការពារសិទ្ធិសហជីព រហូតជាប់ពន្ធនាគារដល់ទៅពីរលើកក្នុងឆ្នាំ២០២២ ហើយក៏ជាសារមួយបង្ហាញថា ការចូលរួមជំរុញតម្លាភាពសង្គម មិននៅឯកោទេ តែមានសហគមន៍ជាតិនិងអន្តរជាតិគាំទ្រ ស្របច្បាប់ជាតិនិងអន្តរជាតិ។
តែសម្រាប់អ្នកនាំពាក្យគណៈកម្មាធិការសិទ្ធិមនុស្សកម្ពុជារបស់រដ្ឋាភិបាល លោក កត្តា អ៊ន យល់ថា ការដែលអាមេរិកផ្តល់ពានការពារសិទ្ធិមនុស្សដល់កញ្ញា ឈឹម ស៊ីថរ មិនមានឥទ្ធិពលដល់ដំណើរការនីតិវិធីរបស់តុលាការកម្ពុជាទេ។លោកថា៖ «នេះជាការវាយតម្លៃរបស់អាមេរិក។ ប៉ុន្តែកម្ពុជាយើងនៅតែជាកម្ពុជា គឺយើងធ្វើយ៉ាងណា រដ្ឋាភិបាលប្រឹងប្រែងអនុវត្តច្បាប់ ពង្រឹងនីតិរដ្ឋ លទ្ធិប្រជាធិបតេយ្យ ស្របតាមរដ្ឋធម្មនុញ្ញរបស់កម្ពុជា»។
ក្រសួងការបរទេសកម្ពុជាវិញ តាមរយៈសេចក្តីថ្លៃងការណ៍ បានសំអាងថា ចំណាត់ការផ្លូវច្បាប់ចំពោះកញ្ញា ឈឹម ស៊ីថរ ពុំពាក់ព័ន្ធនឹងសិទិ្ធមនុស្ស ឬក៏វិវាទការងារទ ប៉ុន្តែគឺដោយសារការបំពានជាក់ស្តែងលើបម្រាមមិនឱ្យចាកចេញពីដែនដីនៃព្រះរាជាណាចក្រកម្ពុជា ខណៈដែលកំពុងស្ថិតក្រោមការត្រួតពិនិត្យតាមផ្លូវតុលាការ។ក្រសួងការបរទេសចាត់ទុកការផ្ដល់ពានអ្នកការពារសិទ្ធិមនុស្ស ឆ្នាំ២០២២ ដោយអាមេរិកដល់កញ្ញា ឈឹម ស៊ីថរ គឺជាការផ្តល់ទៅឱ្យបុគ្គលល្មើសច្បាប់ និងមិនមែនជាមធ្យោបាយស្របច្បាប់សម្រាប់ការពារខ្លួនកញ្ញា ឈឹម ស៊ីថរ នៅក្នុងតុលាការនោះឡើយ។